ДУРАН-ДУРАН ДАЙ СЮРАН

Абъячойын (Сыктыв уездын). Остаков грездын эм вӧр лэдзысь артель (лесорубы). Колян во кежлӧ сэні уджавны бӧрйылісны кык мортӧс: ӧтиыс уполномоченнӧй — Шулепов В. Н., мӧдыс счетовод — Лихачёв Е. А. Зэв бур уджалысьяс, немтор шуны: йӧз нажӧткаысь уна асланыс зептаныс тэчисны. Рӧщӧтайтігӧн быд пурщиклысь кык шайтӧн чиркисны. Сэсся ӧд и кучик юклігӧн кужӧмаӧсь донсӧ пуктыны. Уджавны медасигӧн урчитӧм дон серти пӧтшва кучикысь быд пунтысь босьтӧмаӧсь лишнӧй 14 урӧн, прӧстӧйысь — 18 урӧн дай.

Мудер ручьясыд, медым и водзӧ сюрасны служакъясӧ, Котлассянь воӧм пурщикъястӧ юкталӧмаӧсь морт ведра самӧкурӧн. Пурщикъяслы нимкодь, самӧкур вӧсна ловнысӧ гӧтовӧсь пуктыны, юӧны да ошкӧны «бур уджалысьясӧс». Таво тӧв кежлӧ пӧ бара тіянӧс бӧръям. «Кык друг» нюмъялӧны: «Бӧръяд кӧ пӧ, миян сайӧ оз вош: самӧкуртӧ нёль ведра сувтӧдам»...

Арнас, октябр 19-ӧд лунӧ, вӧр лэдзысьяс чукӧртчылісны восьтыны вӧр пуысь вӧчасьысь артель (деревообделочники). Чукӧртчылӧм вылын ӧти гражданин пондіс корны «кык друглысь» тӧдмӧдны колян вося уджӧн (сійӧ тӧдіс налысь квайтӧд чуньсӧ). Шыасьӧмысь гражданинлы сюри: видісны сійӧс.

Служакъясӧс бӧрйигӧн, яндысьӧм вӧсна, счетовод другыд бара на сюри местаӧ — профуполномоченнӧйӧ. Кыдзи нӧ, быть ӧд: чашка самӧкурыд весь оз вош.

Чукӧртчылӧм вылын 77 шлен пиысь вӧліны сӧмын 37 морт. Устав серти кӧ — йӧзыс абу тырмымӧн собранньӧсӧ вӧчны.

Татшӧм служакъястӧ эськӧ няйт ветьӧкӧн вӧтлыны.

Абъячойса.