БУР СЁРНИ

5-ӧд десятаын Кӧдзвывса вӧлӧсьтын (Сыктыв уездын) декабр 7-ӧд лунӧ гражданалӧн вӧлі собранньӧ. Сэні висьтавлісны Сыктывдінкарса сизим вося (семилетка) школа йылысь, гырысь йӧзӧс велӧдӧм йылысь, лыддьысян керка йылысь да, кооператив йылысь да.

Школа йылысь висьталӧм бӧрти собранньӧ шуис: «Сӧвет власьт школа удж нуӧдӧ веськыд туйӧд. Ми кӧсйысям отсавны быд ногӧн школалы бура удж сувтӧдны. Школаын велӧдысьяслы колӧ тшӧкыдджыка собранньӧяс вывъясын висьтавлыны школаын удж мунӧм йылысь, мый сэні бурыс, мый омӧльыс, мый колӧ вӧчны. Школаса Сӧветӧ десятасянь бӧрйыны представительӧс, медым гражданаӧс школакӧд топыдджыка ӧтвывтны».

Лыддьысян керка йылысь висьталӧм кузя собранньӧ шуис восьтыны сэтшӧм лыддьысян керкасӧ 5-ӧд десятаын, корны сы вылӧ волисполкомлысь сьӧм. Асланыс десятаса йӧзлы быд ногӧн отсавны лыддьысян керкалы. Гырысь йӧзӧс гижны-лыддьысьны велӧдны лыддьысян керкаын.

Кооператив йылысь кывзӧм бӧрын собранньӧ вылын граждана шуисны: кооператив пӧ миянлы ёна колӧ. Колӧ пырны сэтчӧ шленъясӧн быдӧнлы. Нывбабаяслы тайӧ тӧлысь кооперативӧ пырны сетсьӧ льготаяс. Сы вӧсна тайӧ тӧлысьнас быд нывбабалы нин колӧ кооперативад пырны.

А. Коданёв.