КЫДЗИ УДЖАЛӦ СИНТӦМ КИРИЛ

Ми мунім кыкӧн, Поповкӧд, Сыктывдінкарсянь Сёськаӧ (Сыктыв уездын) вӧчны крестьяна костын собранньӧ. Ывла вылын вӧлі кӧдзыд. Петім Граддорсянь Сёськаӧ. Верст кык сайын, туй вылын вӧтӧдім кык мортӧс: ӧтиыс детина 12−13 арӧса, мӧдыс том морт, ар 22 кымын, синтӧм. Сійӧ киас кутӧ сигудӧк, ачыс кепысьтӧм, паськӧмыс киссьӧма — тӧдчӧ, зэв гӧль морт. Ме Попов ёртлысь юалі:

— Коді нӧ тайӧ мортыс?

— Талӧн нимыс Кирил — коми йӧзӧс югдӧдысь.

— Кыдзи сійӧ югдӧдас, ачыс синтӧм да?

— Локтан Сёськаад да, сэки аддзылан.

Ме сэсся эг нин кут юасьны Сёськаӧдз. Локтім сэтчӧ пемдандорыс. Пырим Волисполкомӧ. Сэні некод абу (лунъя уджыд помасьӧма нин). Стӧрӧжыс — пӧрысь баба. Тшӧктім сійӧс сувтӧдны самӧвар. Пуксим тшай юны. Стӧрӧжлысь ме юалі:

— Коді нӧ синтӧм мортыс тіян грездын? Мый сійӧ тані вӧчӧ?

Баба шуӧ:

— Сійӧ — менам пи; синтӧммис ичӧтӧн. Зэв шань морт. Сійӧ велӧдӧ том йӧзӧс быд грездын Сёська вӧлӧсьтас сьывны коми сьыланкывъяс. Ачыс зэв лӧсьыда кужӧ ворснысӧ гудӧкнас да сьывны. Кыдзи кужӧ да вермӧ — отсалӧ кыпӧдчыны Сӧвет власьтлы. Сійӧ велӧдчис Сыктывдінкарын, совпартшколаын.

Рытнас йӧзыд кутісны чукӧртчыны собранньӧ вылӧ. Локтісны посни челядьяс, 15 кымын морт, локтіс тшӧтш и Кирил сигудӧкнас. Ме сылысь куті юасьны:

— Мый нӧ тэ, Кирил, тані вӧчан?

Кирил висьталӧ:

— Велӧда пемыд коми йӧзсӧ революция йылысь коми сьыланкывъясӧн, медым став пемыд йӧзыд гӧгӧрвоасны, мый ӧні вӧчсьӧ став му вылас.

Собранньӧ вылӧ йӧзыд тыр локтісны: пӧчьяс, пӧльяс, бабаяс, мужикъяс, ныв-зон, челядь. Собранньӧ воссигас сьылысьясыд сьылісны комиӧн Интернационал. Сэсся быд доклад бӧрын сьылісны сьыланкывъяс. Сьылӧны зэв лӧсьыда. Йӧзыд зэв лӧсьыда кывзісны докладъяссӧ, меднимкодь налы вӧлі сьылігъясӧн.

Со кыдзи уджалӧ коми пи — синтӧм Кирил — да югдӧдӧ пемыд йӧзсӧ! Аттьӧ тэныд, дона вокӧй! Мед водзӧ уджыд тэнад мунас бура да лӧсьыда!

ВИд