ЮАЛӦЙ ПОПЛЫСЬ!

Попъяс быд «святӧйлы» пӧшти сетӧмаӧсь кутшӧмкӧ вын (благодать): ӧти вермӧ видзны ваӧ вӧйӧмысь, мӧд — друг кулӧмысь, коймӧд — син висьӧмысь, сідз водзӧ. Попъяс пемыд йӧзтӧ пыр ылӧдлӧны, тшӧктӧны молебенъяс сьылӧдны быдсяма «приччаысь» видзны. Весиг вичкоясын эмӧсь нимпасъяс (списокъяс), кутшӧм святӧй мыйӧн вына.

Со кымынӧскӧ ми тані гижыштам:

Пинь кыскалысь Ӧнтип.

Пинь висьӧмысь бурдӧдны вермӧ Ӧнтип мученик (паметьыс апрель 11-ӧд лунӧ).

Юалӧй поплысь: тэнад кӧ, батюшко, пиньыд висьмас, лун и вой кӧ кутан ойгыны — Ӧнтип мучениклы кутан кевмыны али мунан пельшӧр ордӧ да кыскӧдан пиньтӧ?

Писти бурдӧдысь Конӧ.

Писти висьӧмысь челядьӧс видзӧ Конон мученик (март 6-ӧд лунӧ).

Юалӧй поплысь: тэнад кӧ, батюшко, пиыд пистиӧн висьмас — Конон мучениклы кутан юрбитны али больничаӧ питӧ нуан?

Пӧжар кусӧдысь богородича.

Пӧжарысь да чардбиысь видзӧ неопалимӧй купина богородича (сентябр 4-ӧд лунӧ).

Юалӧй поплысь: тэнад кӧ, батюшко, керкаыд ӧзъяс да кутас няръявны-сотчыны, либӧ кӧлӧкӧльничаыд кутас сотчыны — неопалимӧй купиналы кутан кевмыны али котӧртан да йӧзӧс чукӧстан, мед пӧжарнӧй струментӧн кусӧдасны?

Сыщик Педӧр.

Вошӧм кӧлуй вермас индыны Тирӧн Педӧр мученик (февраль 17-ӧд лунӧ).

Юалӧй поплысь: тэнсьыд кӧ, батюшко, джын овмӧстӧ петкӧдасны — Тирӧн Педӧрлы кутан юрбитны али нӧ милициялы либӧ угрозысклы явитан?

Скӧт видзысь Ласей.

Скӧт усьӧмысь видзӧ святӧй Ласей (февраль 11-ӧд лунӧ).

Юалӧй поплысь: тэнад кӧ, батюшко, медбур лысьтан мӧскыд висьмас — сэки нӧ святӧй Ласейлы кутан кевмыны али мӧстӧ ветеринарнӧй пельшӧр дінӧ нулан?

Кила лечитысь Ӧртем.

Грыжаысь (килаысь) вермӧ бурдӧдны Ӧртем великомученик (октябр 20-ӧд лунӧ).

Юалӧй поплысь: тэныд кӧ, батюшко, ӧшӧдчас зэв ыджыд кила, муртса верман новлӧдлыныд — сэки нӧ тэ Ӧртем мучениклы кутан юрбитны али доктор ордӧ шыасян?

Бабка-богородича.

Сьӧкыда кага вайӧмысь видзны вермӧ Федӧровская богородича (август 16-ӧд лунӧ).

Юалӧй поплысь: матушкаыд кӧ тэнад, батюшко, сьӧкыда кутас челядясьны — сэки нӧ тэ Федӧровская богородичалы пондан кевмыны али ӧдйӧджык акушеркаӧс коран?

Тырмас нин сэсся, помыс ӧд оз жӧ волы-а.

Збыльысь (непременнӧ) юалӧй попъясныдлысь — мый найӧ шуасны воча.

Сӧмын позьӧ татчӧ ӧтитор шуны: «святӧйяс» нимӧн попъяс тыртӧны ассьыныс зепнысӧ, ылӧдлӧны пемыд йӧзӧс, асьныс оз веритны нинӧмӧ:

Вичкоын — кружка,

Сьӧм сэтчӧ — шнёп!

Тшӧгӧдӧ рушку

Сы вылӧ поп.