ТУЙДӦДӦЙ БУРДЖЫКА!

Миян Ленин ёртным, поконик, пыр шуліс: «Велӧдчӧй, велӧдчӧй да ещӧ на велӧдчӧй».

Кыдзи велӧдчыны уна миллион крестьяналы? Дерт, ӧткӧн-ӧткӧн не велӧдчыны. Колӧ велӧдчыны ӧтувтчӧмӧн, унаӧн ӧтпырйӧ. Сы вӧсна Сӧвет власьт лӧсьӧдаліс быдлаӧ гырысьясӧс велӧданінъяс да лыддьысян керкаяс.

Лыддьысян керкаяс вылӧ тавоӧдз ми эгӧ на вермылӧй тырмидз удж пуктыны — вывті уна уджным сӧветскӧй государство стрӧитігӧн, быдлаӧ эз судзсьыв киным.

Таво, май тӧлысьын, вӧлі Мӧскуаын Коммунист партиялӧн дас коймӧд съезд. Сійӧ шуис чорыда кутчысьны деревня югдӧдны. Медъёна пӧ колӧ велӧдчан уджсӧ нуӧдны лыддьысян керкаясын. Мед пӧ татшӧм керкаясыс лоӧны деревняса культура позйӧн.

Сійӧ съезд вылас жӧ волісны Мӧскуа губерняувса учительяс. Найӧ Ленин гу дорын кӧсйысисны мунны ӧтвылысь коммунист партиякӧд да Сӧвет власьткӧд, отсавны налы быд ногӧн, кыпӧдны-югдӧдны деревняса уджалысь йӧзӧс (крестьянаӧс).

Съезд шуис кокньӧдны учительяслысь оласногнысӧ, матыстны найӧс коммунист партия дорӧ — 1000 деревняса учительӧс примитісны партияӧ. Сэсся, наысь кындзи, съезд шуис кыскыны став деревняса велӧдчӧм йӧзӧс: агрономъясӧс, пельшӧръясӧс — медым ӧтвылысь регыдджык туйдӧдны пемыд крестьянаӧс бур олӧмлань.

Тайӧ съезд бӧрын учительяс вӧрзисны места вывсьыс, кутчысисны ыджыд уджӧ — кыпӧдны, туйдӧдны деревняса олысьясӧс, отсавны партиялы да Сӧвет власьтлы.

Уналаын, тшӧтш и миян Коми муын, вӧчӧны учительяс татшӧм бур уджсӧ. Найӧ ӧтвылысь коммунистъяскӧд, комсомолечьяскӧд, йӧзӧс югдӧдан организацияяскӧд зільӧны бырӧдны крестьяна костысь пемыдлун да индыны найӧс выль олӧмӧ.

Уналаын учительяс бӧрся вӧтчӧны и мукӧд культурнӧй йӧз, тшӧтш отсалӧны кыпӧдны деревняса олӧмсӧ пемыд гуранысь.

Сӧмын оз на быдлаын тайӧ уджыс бура мун. Кӧнсюрӧ ӧнӧдз на омӧлика кутчысьӧны культурникъяс тайӧ уджас, мукӧдлаас весиг ньӧти оз отсавны коммунистъяслы да комсомолечьяслы. Талунъя газетысь на аддзам: весиг Кӧрткерӧсын (абу ӧд Кобраын либӧ кӧнкӧ мӧдлаын — Коми му пыдӧсас), весиг Кӧрткерӧсын оз став культурнӧй йӧзыс отсавны коммунистъяслы, комсомолечьяслы.

Колӧ ӧд гӧгӧрвоны: коммунистъяс миян коми деревняясын этша, быдлаӧ налӧн киныс оз судзсьы. Сэсся найӧ абу ёна велӧдчӧм войтыр — прӧстӧй крестьяна пиян жӧ, быдтор гашкӧ оз на вермыны крестьяналы висьтавны (разъяснить), найӧс гашкӧ асьнысӧ на колӧ туйдӧдны.

Колӧ став культурнӧй йӧзыслы деревняясын ӧтвылысь коммунистъяскӧд восьлавны, ӧтвылысь деревнясӧ кыпӧдны.

Январ 11-ӧд лунӧ чукӧртчасны Мӧскуаӧ став Сӧветса Республика пасьтаысь учительяс съезд вылӧ. Вермамӧ-ӧ ми, коми учительяс, сэки шуны:

— Ми ӧтвылысь уджалам коммунист партиякӧд да Сӧвет власьткӧд, ӧтвылысь вермасям деревняса пемыдлункӧд, ӧтвылысь туйдӧдам крестьянаӧс выль олӧмӧ воны.

Вермамӧ-ӧ тадзи шуны?

Колӧ вермӧдчыны. Колӧ бурджыка уджавны быдлаын!