***

Ласта. С. Кор.-лы. Миян газетӧ гижӧны сиктъяссянь комиӧн и рочӧн. Тэнад рочнас омӧля артмӧ, видлы комиӧн. Сэсся колӧ гижны мичаджыка, мед верман лыддьыны, дай ӧтар лист бокӧ. Ыстӧм гижӧдыд сэтшӧма нырӧма, муртса вермим лыддьыны.

Тані. Коми аньлы. «Ӧтитӧг пырӧй МОПР-ӧ» — статьяыд сёрмис.

Волся. Квайтӧдлы. Тешкодь тэ морт! Норасян, А. САВ. пӧ гижӧ газетын Волсяса йӧзӧн Ленинградса уджалысьяслы отсавтӧм йылысь, тшӧктан газетӧ гижны паныд кыв (опровержение). Мый нӧ гижам? Ачыд гижан: збыль пӧ Волсяса йӧз эз отсавны Ленинградса уджалысьяслы, збыль пӧ найӧ уна сетӧны руга поплы. А. САВ-лӧн газетӧ сідзи и гижӧма да. Паныд кыв пыдди ещӧ на лӧдсавны кӧ-а! Гижан, эз пӧ во сьӧлӧм выланыс Волсяса йӧзлы газетын гижӧдыд. Ми ӧд сы вылӧ и лэдзим газетӧ. Мися, йӧз водзын янӧдам да, водзӧ сідзи онӧ кутӧй уджавны. Гижан, мукӧдлаын пӧ йӧзыс некод жӧ оз отсав. Кӧні? Уна нин отсалісны, другӧ. Тэ чайтан, быдлаын ӧмӧй йӧзыд Волсяса йӧз кодьӧсь!

Грива. Коми Перкирейлы. Шензян асланыд поп вылӧ. Войдӧр пӧ сійӧ Устюгын аркирей ордын казакавлӧма, сэсся пӧ аркирейыд аслас «ыджыд милӧсьтнас» пуктӧма сійӧс пӧнӧмарӧ, сэсся и попӧдз. Тыдалӧ, вӧлӧма тіян поплӧн сюсьлуныс пемыд йӧзӧс ылӧдлӧм вылӧ. Сы вылӧ ӧд ёна оз на ков велӧдчыны, сӧмын лэдзчан кӧ и сэтшӧм удж вылад. Гижан, мед петас попсьыс, дугдас пӧрйӧдлыны йӧзӧс. Ок, он на найӧс вӧтлы бурӧн, горшнысӧ кӧ тыртӧны пемыд йӧзыд. Пет кӧть эн бара, миянлы дзик веськодь. Сӧмын колӧ йӧзсӧ мырддьыны найӧ ылӧг улысь, петкӧдлыны налы попъяслысь пӧръясьӧмсӧ.

Волся. Квайтӧдлы. «Колӧ ёнмӧдны кооперативъясӧс» статьяыд газетын оз мун. Уна нин ми ӧні на сы йылысь гижлім.

Ыб. Каньлы. «Ыбса олӧм» йылысь огӧ лэдзӧй, нинӧм торъя абу гижӧмыд да. Гижӧмыд: комсомол ячейка пӧ бура уджалӧ, кооперативыд пӧ важ дорысь бурджык нин. Сэсся и нинӧм. Колӧ ӧд гижны, кыдзи, код ногӧн бура уджалӧ, мый бурсӧ вӧчисны. Повзьӧдлан, огӧ кӧ пӧ лэдзӧй газетӧ тайӧ гижӧдтӧ, водзӧ кежлӧ дзикӧдз он кут гижны. Дерт, ӧнӧдз кыдзи гижлін, водзӧ нинӧм гижӧмсьыд, оз ков миянлы. Гижан кӧ шогмантор, сэтшӧмӧс лэдзам, коминад гижан тэ лӧсьыда.

Парма пилы, Вылыс Воч. Дерт эськӧ буртор деревняысь деревняӧ ветлыны да петкӧдлыны картинаяс, сӧмын миян сэтшӧмтор вылӧ сьӧмным оз судзсьы. Пемыд йӧзлы ӧні колӧ югдӧдчыны газет да нигаяс лыддьӧмӧн. Лыддьысян керкаяс лӧсьӧдалӧма быд вӧлӧсьтын.

Сэтчӧ жӧ. Син‐пельлы. «Веденньӧ сура праздникыд» оз мун газетын.

Комсомолечлы, Сёська, Емдін уезд. Аттӧ дивӧ, кутшӧм тэ нюжӧдчысь морт. Выставкаыд вӧлӧма ноябр 2 лунӧ — тэ гижӧмыд сӧмын ноябр 26 лунӧ. Праздник колльӧдӧм йылысь сідзи жӧ. Тадзтӧ гиж кӧть эн, сӧмын асьтӧ мудзтӧдан. Гижӧмыд, эськӧ, веськыда кӧ шуны, буракодь да, сӧмын ёна нин сёрмис, лои шыбитны кӧрзинаӧ. Водзӧ тадзи эн нин нюжӧдчы. Гиж.

Воч. Парма пилы. «Регыд воас лун» гижӧдтӧ стихотворенньӧӧн шуан. Миян ногӧн, стихотворенньӧ бокас на абу куйлывлӧма. Дерт, газетӧ огӧ лэдзӧй. Мукӧд гижӧдыд оз жӧ мун газетӧ, ассьыд ним-овтӧ абу пасйӧмыд да.