ВОЧАКЫВ «СИН-ПЕЛЬЛЫ»

«Югыд туй» газетӧ (№ 224) «Син-пель» гижӧма Одыбса Епо правленньӧ удж йылысь. «Син-пель» шуӧ: вузасьысьяс пӧ ассьыныс зепнысӧ тыртӧны. Мый окота пӧ аслыныс, сійӧ и вӧчӧны. Эз на пӧ весиг вӧвлы ревизия. «Син-пельлӧн» омӧль синмыс, пельыс сьӧкыда кылӧ. Сійӧ оз аддзы дай абу кывлӧма Одыбса Исполкомысь удж нуӧдансӧ, нинӧм вӧвлытӧмторсӧ висьталӧ. Еполӧн правленньӧ уджалӧ шленъяс тшӧктӧм, индалӧм серти. Тӧвар ньӧбалӧ — 99 прӧчентсӧ Обсоюзлысь, 1% Госторговлялысь. Тӧвар вылӧ донсӧ содтам сы мында, мыйта сувтӧ тӧварыс, унджык оз пуктыссьы ни ӧти ур. Кутшӧм тӧвар колӧ крестьяналы ёнджыка, на вылӧ дон оз содтыссьы ньӧтик. Сы пыдди мукӧд пӧлӧс тӧвар вылӧ унджык пуктыссьӧ. Став воӧм барышыс вузасьӧмысь разӧдчысьӧ шленъяслы. Колян вося Одыбса Епоӧн договор вӧчӧм серти Обсоюз сетіс 50% ас босьтӧм барышсӧ. Юнь тӧлысьӧн сетліс сійӧ 1340 шайт да 8 ур. Сійӧс разӧдӧма вӧралысьяслы, мыйта-мыйтакӧ кольӧма Епоӧ, сідзи и тшӧктӧма Обсоюз. Вӧлі тшӧктылӧма Еполы вӧчны сир пуан завод. Сир пуан заводсӧ вӧчим, дай декабр тӧлысьын сійӧ заводитчис уджавны. Та йылысь гижӧма «Югыд туй» газетӧ (№ 51) таво мартын мӧд лунӧ.

«Син-пель» гижӧ, ревизия пӧ эз на вӧвлы. Таво ревизияыс вӧлі куимысь нин: ӧти январын, мӧд майын, медбӧръяысь сентябр тӧлысьын 15−20 лунъясӧ. Сэні медбӧръя ревизия вӧчигӧн уджалісны: Обсоюзса инструктор М. Савельев, практикант Осипов, правленньӧ ставнас да Епоса ревизионнӧй комиссиялӧн шленъясыс. Ревизия аслыс актас гижис правленньӧлысь удж нуӧдӧм шӧркоддьӧмӧн.

Ещӧ «Син-пель» гижӧ, вогӧгӧрся уджысь дон пӧ правленньӧ босьтӧ 900 шайт. Правленньӧ босьтӧ оз ас лӧсьӧдӧм серти, сымда мынтыны шуӧма Епоса шленъяс собранньӧ вылын. Та йылысь эм сёрнигижӧд (протокол).

«Син-пель» кӧ аддзӧ, мый ми огӧ кужӧ уджавны да сяммӧ кӧ ачыс, мед локтас да чуйдӧдас миянлы удж нуӧдны. Нинӧм абусӧ нинӧмла гижны. Сійӧн ми сӧмын йӧз водзын уськӧдам кооперативлысь бур уджсӧ.

Лоӧ татшӧм ылӧдчӧмысь «Син-пельӧс» кыскыны судӧ.

Одыбса Епо.