МИЧМӦДАМ. КЫПӦДАМ. СУӦДАМ!

Ми гижлім нин коми литература пельӧс газетӧ восьтӧм йылысь. Талунъя номерын первой на сэтшӧм пельӧссӧ лӧсьӧдім, заводитім. Сэсся зільны кутам быд вежонын ӧти коми газетын лэдзны.

Тайӧ газетӧ лэдзан литератураӧн ми кӧсъям ыджыд удж вӧчны.

Коми йӧз ёна на пемыдӧсь. Коми йӧз олӧны важ ног на. Налӧн уджныс омӧля на важ серти кокняммис. Найӧ оз на кужны бур гаж корсьны. Литература пыр ми коми йӧзӧс гажӧдам, велӧдам овны, индалам туй бур олӧмлань мунны, велӧдам кокньӧдны уджсӧ. Чуксалам коми йӧзӧс важ унмысь сьылӧмӧн, лёк олӧмсӧ сералӧмӧн.

Ми кӧсъям газет пыр коми йӧзӧс ас кывнас бурджыка тӧдмӧдны, коми кыв велӧдӧм кокньӧдны.

Коми йӧз пӧвстын уна на эм ассьыс кывсӧ мустӧмтысь, увтыртысь, кывлысь донсӧ тӧдтӧм понда. Ми налы петкӧдлам ас кывлысь коланлунсӧ, индам бурлунсӧ, вынсӧ, тшӧктам радейтны ас кыв.

Уна коми гижысьӧс Октябрса революция кыпӧдіс. Налы ми сетам гижанін газетӧ, медым найӧ вермасны чуксавны ас гижӧдӧн став коми йӧзӧс.

Талунъя газетын унджык гижӧдыс миян ставнымлы медтӧдса ёртлӧн — Нёбдінса Витторлӧн. Медводз сылӧн кылӧ чуксасьӧмыс, сьылӧмыс, серамыс. Вӧтчӧй Нёбдінса Виттор бӧрся, коми гижысьяс! Ысталӧй газетӧ ассьыныд гижӧдъяснытӧ: стихъяс, висьтъяс, сьыланкывъяс!

Ас кыв пыр кокниджык, регыдджык вермам сетны коми йӧзлы выль олӧм, ас кыв пыр медрегыдӧн югдӧдам коми йӧзӧс.

Босьтчамӧй тайӧ удж бердӧ ставным. Мед коми йӧз регыдджык югдасны, тӧдмаласны ставмувывса культура! Мед регыдджык воасны гажа долыд олӧмӧ!