ВИДЗ-МУ ВӦСНА СПОРЪЯС ВИДЛАЛӦМ ЙЫЛЫСЬ
Миян Коми Обласьтын видз-му вӧсна споръяс видлалӧм зэв кузя вӧлі нюжалӧ. Видз-му вӧсна либӧ котыр кост юксьӧм вӧсна пансяс вӧлі спорнӧй делӧыд да кыссьӧ во кыкӧдз-куимӧдз. Ӧткымын делӧяс ӧні на сюравлӧны 1918ʼ восяяс. Видлавлӧмаӧсь нин мукӧдсӧ кык кымын пӧрйӧ вӧлӧсьтас, сэсся кык пӧрйӧ жӧ уездас, сы бӧрын Обласьтын, мукӧдыс волӧмаӧсь нин Центрӧдз да бӧр воӧма Обласьтувса комиссияӧ.
Ӧнӧдз вӧлі видз-му вӧсна спорнӧй делӧяс, кодъясӧс вӧлӧсьтувса комиссия вӧлі видлалӧ медвойдӧр — ветлӧны вӧлі куимлаӧ: вӧлӧсьтӧ, уездӧ да обласьтӧ, сэсся вӧлисти помӧдз вӧлі решитчас.
Ӧні, декабр 1-й лунӧ, Россияса Социал Федер. Сӧвет. Республикаса Центральнӧй Исполнительнӧй Комитет да Народнӧй Комиссаръяслӧн Сӧвет (
Тайӧ шуӧм серти, вӧлӧсьтувса видз-му комиссия пондас видлавны вӧлӧсьтын сӧмын видз-муӧн пӧльзуйтчан права йылысь да вензьӧмъяс обществояс да сиктъяс костын, сідзжӧ ӧтка граждана костын. Мукӧд делӧяссӧ, кодӧс вӧлі видлалӧ войдӧр вӧлӧсьтувса видз-му комиссия воддза закон серти — ӧні, семья (котыр) кост юксьӧм делӧяс кындзи, оз понды видлавны. Вӧлӧсьтувса комиссия решенньӧ вылӧ норасьӧм ӧні пондас веськыда Обласьтувса комиссияӧ сетсьыны (ыстыссьыны), уезд кольӧ бокӧ.
Уездувса видз-му комиссия пондас видлавны став мукӧд споръяссӧ да вензьӧмъяссӧ, кодӧс оз вермы видлавныыс вӧлӧсьтувса комиссияыс, да сэсся кодӧс вӧлі войдӧр видлалӧ Обласьтувса комиссия, кыдзи медводдза инстанция.
Обласьтувса видз-му комиссия пондас видлавны делӧяс кассацияӧн норасьӧм кузя вӧлӧсьтувса да уездувса видз-му комиссия решенньӧяс вылӧ сӧмын.
Тайӧ шуӧм серти, вӧлӧсьтувса комиссияяслы ковмас удж бурмӧдны, делӧяс видлавны бурджыка. Решенньӧыс налӧн лоӧ ӧні делӧ кузяыс помалӧма (окончательнӧй). Вӧлӧсьтувса комиссияын судитчысьяслы колӧ делӧ кузяыс сетны либӧ висьтавны став мыччӧдсӧ (доказательствояссӧ), вайӧдны суд кежлӧ, эмӧсь кӧ, свидетельяс, либӧ комиссияяслы висьтавны, мед сійӧ ачыс корас да юалас найӧс суд вылас. Обласьтувса Комиссияясын делӧ видлалігкежлӧ свидетельясыд оз корссьыны.
Куклин.
