АСЛЫНЫМ КОЛӦ ОТСАВНЫ
Мӧскуа. Декабр 16 лунӧ воссис Ставсоюзса Съезд видз-му бурмӧдӧм вылӧ удждысян кооперативъяслӧн. Съезд шуис: кытчӧдз пӧ крестьяна оз сьӧлӧмсянь кутчысьны отсавны татшӧм кооперативъяслы, сэтчӧдз оз шыляв удждысян удж. Крестьяна отсӧгтӧг правительство оз вермы помӧдз ас вылас босьтны татшӧм уджсӧ. Водзӧ кӧ крестьяна оз кутны отсавны асланыс уджӧн, сьӧмӧн да мукӧд ногӧн — мед пеняйтасны ас выланыс.
Сэсся съезд сёрнитіс крестьяналы отсалӧм йылысь. Медвойдӧр колӧ кооперативъяслы отсавны жебджык овмӧса крестьяналы.
Государство ӧтнас пуктӧма татшӧм кооперативъясас 175 миллион шайт, а крестьяна став Республика пасьта сӧмын 35 миллион шайт. Войнаяс пансьытӧдз крестьяна пуктӧмаӧсь вӧлі вит мында унджык, мыйта пуктывліс государствоыс, ӧні крестьяна вит мында государство дорысь этшаджык пуктӧмаӧсь. Крестьяналы колӧ быд ногӧн отсавны кооперативъяслы, сӧмын найӧ отсӧг сорӧн государство вермас кыпӧдны быдлаын овмӧс. Надейтчыны мукӧд государстволысь удждысьӧм вылӧ ёна оз позь, сы понда крестьяналы колӧ чорыда мӧвпавны та йылысь.
