МЕД ОЗ ВУН

Быд вӧлӧсьтын миян Коми Обласьт пасьта ӧні мунӧ крестьяналӧн чукӧртчылӧм (шусьӧ — широкая беспартийная крестьянская конференция). Кӧнсюрӧ вӧлі нин, мукӧдлаас мунӧ на либӧ лоӧ на.

Мыйла вӧчӧ Сӧвет власьт татшӧм конференцияяссӧ?

Конференция серти миян государство тӧдмалӧ: кутшӧм нуждаяс эмӧсь крестьяна костын, кутшӧма найӧ видзӧдӧны став Сӧветса уджыс вылӧ, быдлаті-ӧ лючки артмӧ, оз-ӧ кыткӧ-мыйкӧ неладнӧ мун.

Тадзи миян Сӧвет власьт — уджалысь йӧзлӧн государство — тӧждысьӧ аслас йӧзыс вӧсна, медым эськӧ шыльыдджыка уджыс муніс, медым эськӧ крестьяна ставныс тшӧтш отсалісны асланыс власьтлы бурджыка стрӧитны Ыджыд государствосӧ, кыпӧдны эмбурсӧ, регыдджык мездысьны сьӧкыд олӧмысь уджалысь йӧзлы.

Быдлаын крестьянскӧй конференцияыд шуас кутшӧмкӧ буртор вӧчны: школаяслы отсавны, йӧз костысь пемыдлун бырӧдны, кооперативъяс ёнмӧдны, мӧда-мӧдлы отсасян комитетъясӧс кок йылӧ сувтӧдны, налог мынтыны срок кежлӧ — зэв унатор.

Мый жӧ сэсся водзӧ вӧчны тайӧ конференция шуӧм бӧрас?

Дерт, весьшӧрӧ йӧзӧс оз чукӧртлыны быд деревняысь.

Медым конференциялӧн шуӧмыс збыльӧ пӧрас — колӧ вӧлӧсьтса Сӧветъяслы крестьяналысь шуӧмсӧ вынмӧдны (дать силу). Конференцияыд ӧд абу на власьт. Конференция сӧмын висьталас, мый колӧ крестьяналы; сійӧ шуӧм кузя сэсся колӧ Сӧветъяслы нин уджавны, сылысь гӧлӧссӧ кывзыны.

Быд конференция вылын сёрнитӧм кузя вӧчасны гижӧд; сійӧс мӧдӧдасны Центрӧ (Мӧскуаӧ), сэні сэсся юралысьяс кутасны тӧдны, мый колӧ вӧчны, кыті шыльӧдны, да мӧдысь кутшӧмкӧ выль распӧраженньӧ лӧсьӧдігӧн оз вунӧдны, кутасны сэтчӧ кутчысьны тшӧтш.

Коми Сӧветъяс, энӧ прӧста сідз кольӧй конференциялысь шуӧмъяссӧ! Мед шуӧмныс налӧн пӧртчас збыльӧ, уджӧ!