СЁСЬКАЫН

(Емдін уездын)

Коммунист да Комсомол ячейкаяс уджалӧны ёна, ӧтвылысь. Кыкнан ячейкаас кызь гӧгӧр шлен. Став уджыс мунӧ Нардомын: собранньӧяс, спектакъяс, сёрнитны чукӧртчылӧм. Сэні жӧ эм лыддьысянін. Ӧні Нардом быд рыт тыр том йӧзӧн. Медся унаӧн волывлӧны нывъяс. Локтӧны лыддьысян керкаӧ удж босьтӧмӧн: печканӧн, кыанӧн. Сэні кывзӧны газет лыддьӧм, висьтавлӧм. Печкигмоз сьывлывлӧны и. Выль сикас войпук! Неважӧн воссис йӧзӧс велӧдан Общество («Долой неграмотность»). Пырисны сэтчӧ 25 морт. Гырысь йӧзӧс пондісны нин велӧдны. Волывлӧ велӧдчыны 12−14 морт. Надейтчӧны, водзӧ пӧ унджыкӧн кутасны волывлыны.

Волисполкомын ставыс партийнӧй йӧз. Йӧзыс Исполкомын уджалӧм вылӧ видзӧдӧ бура. Овлӧны собранньӧяс сиктса йӧзлӧн, кӧні Исполком висьталӧ ассьыс удж нуӧдӧмсӧ. Мукӧддырйи Исполкомын уджалысьяс ветлывлӧны грездъясӧ собранньӧяс вылӧ сёрнитны асланыс удж йылысь да Сӧвет власьтсянь выль петӧм законъяс йылысь.

Сельскокӧзяйственнӧй тӧварищество таво тулыс на воссьыліс, а ар кежлӧ судзӧдісны нин вартан машина. Тӧвариществоӧ пырӧм йӧз няньсӧ вартісны таво вартан машинаӧн нин. Гожӧмын йӧзыс лэптісны керка пельшӧрскӧй пункт вылӧ. Уджалісны йӧз артельӧн. Обисполком тшӧтш отсаліс керкасӧ вӧчны. Пельшӧрскӧй пункт вевт улӧдз нин лэптӧма. Ноябрын 17-ӧд лунӧ вӧлі собранньӧ. Сэні шуисны помавны регыдджык керка вӧчӧмсӧ. Вӧлі Сёськаын лӧсьӧдӧма вичко вылӧ кирпич да тьӧс. Сійӧ ставсӧ йӧзыс шуисны сетны пельшӧрскӧй пункт лӧсьӧдӧм вылӧ.

Н. Рам.