МУНӦНЫ ВЕСЬКЫД ТУЙӦД

Сёйтыын (Кулӧмдін уездса Визябӧж вӧлӧсьтын) таво декабр тӧлысьын 7-ӧд лунӧ вӧлі собранньӧ став Сёйтыса крестьянин-крестьянкалӧн. Тӧдмӧдісны найӧс сэні став му пасьта ӧнія олӧмӧн, висьталісны Рочмуын (СССР) олӧм йылысь. Висьтавлісны, кыдзи олӧны уджалысьяс крестьянакӧд капиталистическӧй государствоясын. Кывзысьяс бӧрвылас шуисны: «Сӧвет Республикаясын олӧм мунӧ бура, Сӧветскӧй власьт сулалӧ веськыд туй вылын аслас удж нуӧдӧмӧн. Дорйӧ, отсасьӧ пыр уджалысьяслы да крестьяналы. Капиталистъяс государствоясын рабочӧйлӧн, крестьяналӧн олӧм зэв омӧль: озыр йӧз нартитӧны найӧс, дзескӧдӧны быд ногӧн, тюрмаясӧ сюялӧны, лыйлӧны. Ми, Сёйтыса крестьянин-крестьянкаяс, мукӧд мувывса уджалысь войтыр вӧсна тӧждысям, дӧзмӧмаӧсь найӧс нартитысьяс вылӧ, чуксалам уджалысь йӧзӧс вӧчны революция, мездысьны капиталистъяс кабырысь, босьтны ас кианыс власьт.

Медым лоӧ Сӧвет власьт му пасьтала!

Мед олас партия, уджалысь йӧзӧс дорйысь».

Собранньӧ вылын уна сёрнитісны кооператив йылысь, велӧдчӧм йылысь. Школаныс ӧнӧдз кӧдзыд вӧлӧма, тупкылӧмаӧсь. Велӧдысьыс абу. Шуисны корны восьтыны школа. Кӧсйысьӧны отсасьны, мый вермасны, кутны школа ас тшӧт выланыс, сэсся корны отсӧг сы вылӧ асланыс шефныслысь — Сыктывдінкарса Еполысь.

Чукӧртчылӧм вылын бӧрйисны делегатъясӧс вӧлӧсьтса конференция вылӧ. Бӧрйисны вит мортӧс: куим мужикӧс да кык нывбабаӧс.

М. П.