МЫЙ КОЛӦ ТӦДНЫ НЫВБАБАЛЫ

Ноябр 30-ӧд лунӧ Визинын вӧлі нывбаба-делегаткаяслӧн чукӧртчылӧм. Сёрнитісны школаяс йылысь да кывзісны доклад ӧти делегаткалысь — Майбурова Марьялысь, кутшӧма удж муніс вӧлӧсьтувса съездын. Кывзӧм бӧрын, ёна сёрнитӧм мысти, делегаткаяс шуисны:

1. Ми, нывбаба-делегаткаяс, кыдз-мый вермам кутам отсавны школалы, быть (обязательно) колӧ сетны школалы му градъяс вылӧ, мед сэні миян челядьным велӧдчигмозыс вермисны тшӧтш велавны выль ногӧн градъяс уджавны, школаысь петӧм бӧрын мед эз кутны яндысьны да лэччысьны крестьянскӧй уджысь.

2. Му-видз уджалӧм кындзи колӧ висьтавлыны деревняса нывбабаяслы ещӧ со мыйяс йылысь: кыдзи колӧ скӧт видзны, мед эськӧ мӧсъясным вӧліны бурӧсь, йӧлаӧсь; колӧ велӧдны, кыдзи бурджыка шабді вӧдитны — ми ӧні арбыд и тӧвбыд уджалам-ноксям шабдінад да вермам вӧчны дӧратӧ сӧмын аршын 30−40 гӧгӧр. Став уджсӧ кӧ артавны, аршын дӧраыд сувтас шайт кык-куим, а ми вузалам 15 урӧн аршын: босьтам убытка зэв ыджыдӧс.

3. Став уджалысь йӧзлы колӧ пырны мӧда-мӧдлы отсасян комитетӧ (комитет взаимопомощи). Ми, делегаткаяс, сэтчӧ ставным нин пырим шленӧ. Чуксалам пырны и мукӧдлы.

Тайӧ кӧть ичӧтик сёрниыс Визинса делегаткаяслӧн, а сетӧ зэв ыджыд бур. Колӧ став коми деревняса нывбабаяслы кывзыны налысь шуӧмсӧ да тшӧтш на ногӧн вӧчны.

Пр.—К.