КРЕСТЬЯНАЛӦН КОНФЕРЕНЦИЯ

Кӧдзвывса вӧлӧсьтын (Сыктыв уездын)

Конференция вӧлі декабрын 8-ӧд лунӧ. Конференция вылӧ воліс 80 кымын делегат. Мӧдӧд да коймӧд десятаса йӧз вӧлі ыстӧмаӧсь делегатъясӧн важ купечьясӧс. Делегатъяс-крестьянаяс важ купечьясӧс эз сибӧдны конференция вылӧ. Конференция вылын вӧліны сёрнияс: кооператив йылысь, Исполкомӧн сельхозналог чукӧртӧм йылысь, му-видз лӧсьӧдӧм удж йылысь. Вӧліны сёрнияс и мукӧдтор йылысь.

Кооперация йылысь делегатъяс медся ёнасӧ шуисны: карса кооперативын пӧ крестьяналы колан бур тӧварыс абу тырмымӧн. Сы вӧсна унаысь лоӧ босьтасьлыны спекулянтъяс ордысь: «Сэсся лавкаясса приказчикъяс омӧля видзӧдӧны крестьяна вылӧ», — шуӧны делегатъяс. Шуисны, медым пӧ эськӧ кооператив аслас шленъяслы тӧварсӧ сетігӧн чинтіс тӧварлысь донсӧ 5%.

Налог йылысь конференция вылын шуисны: карын (в черте города) олысь крестьяналӧн пӧ налог унджык вӧлӧсьтъяс дорысь, нажӧткаыс пӧ эськӧ ӧткодь ставыслӧн. Шуисны та йылысь шыӧдчывны Сыктывдінкарса Сӧветӧ, корны, медым сійӧ налог пуктӧмсӧ карын олысь крестьяналы лӧсьӧдас мӧд ногӧнджык.

Му-видз лӧсьӧдӧм удж йылысь конференция шуис Волисполкомлы босьтчыны ӧнісянь жӧ уджсӧ нуӧдны. Тайӧ удж нуӧдӧм вылӧ делегатъяс шуисны чукӧртны крестьяналысь кык сюрс шайт кымын сьӧм.

Конференция вылын делегатъяс став сёрнисӧ нуӧдісны зэв бура, тӧлкӧн, ӧтвыв. Асьныс мунігас шуӧны — эз на пӧ вӧвлы миян татшӧм ӧтвылысь, вензьытӧг мунӧм чукӧртчылӧмъяс.

Конференция вылын вӧлі 15 нывбаба. Найӧ медся ёна нуӧдісны сёрни кооператив йылысь да посни челядь сад йылысь. Шуӧны: мыйла пӧ Сыктывдінкар шӧрын восьтӧма кык сад, миян Сыктывдін помӧ ньӧтиӧс эз лӧсьӧдны. Делегаткаяс шуисны корны челядьлы сад восьтыны 6−7-ӧд десятаясӧ.

Н. Б.