ЛУДӦМ ВИСЬӦМ ДА КЫДЗИ СЫЫСЬ БУРДӦДЧЫНЫ

Лудӧм — вуджана висьӧм. Кучик увтіыд лудана гагъяс (клещи) сэні ветлӧдлӧны-визъялӧны, гильӧдӧны быттьӧ яйтӧ. Висьӧм паськалӧ зэв ӧдйӧ. Ӧтилы кӧ семьяысь сюрас лудӧмыс, висясны ставныс. Медся кокньыда лудӧм пырӧ няйта, дурка олысьяс пӧвстӧ. Чунь костъясыс, киыс лудысьясыдлӧн зэв мисьтӧмӧсь, зывӧк видзӧдны. Улялӧны, вежлӧмӧсь.

Медся ёна лудӧмӧн висьӧны ичӧтінын чукӧра олысь йӧз.

Лудӧмысь позьӧ бурдӧдчыны регыдӧн. Бурдӧдчытӧдз войдӧр висьысьлы колӧ купайтчыны майтӧг быгъя ваын. Бурдӧдчыны со кыдзи: куим лун чӧж (медводдза лунас — луннас да рытын, бӧръя кык лунас — асылын да рытын) луданінъясӧ зэв бура, минут 10−15, ниртны больничаысь сетӧм мазьӧн. Тӧдӧмысь, ещӧ бур, став тушатӧ кӧ мазьнад зыралан, став гагйыс сэки бырӧ. Мазьӧн бурдӧдчигӧн туша мыськыны оз ков. Китӧ кӧ мыськылан, мазьӧн сійӧс зэв нин бура колӧ зыравны.

Нёльӧд лунас висьысьӧс мичаа мыськыны, пасьтӧдны выль мыськӧм, сӧстӧм дӧрӧм-гачӧн, вежны вольпась да юрлӧс эжӧдъяс, эшкын.

Новлан сьӧд кӧлуйсӧ пеславны пӧсь кунваӧн, ёна пожъявны, тӧлӧдны кымынкӧ лун. Вольпась-эшкын кучкалӧмӧн пыркӧдны, тӧлӧдны.

Тадзи вӧчӧмӧн кӧ лудӧм оз помась, петкӧдчывны пельшӧрлы. Сійӧ висьталас, кыдзи колӧ водзӧ бурдӧдчыны.

Врач Тропников.