ПАРТИЯ ЯЧЕЙКАЯСЛЫ ДА ГАЗЕТӦ ГИЖЫСЬЯСЛЫ

І

Газетӧ гижысьяслы сетӧм эскӧданпасъясын урчитӧма вӧлі эскӧданпасъяслысь вынсроксӧ январ 1 лунӧдз 1925 воын. Редакция шуис нюжӧдны налысь вынсроксӧ локтан во юль 1 лунӧдз (во джын). Ячейкаяслы колӧ та йылысь пасйыштны киясӧ сетӧм эскӧданпасъясӧ. (Ставсӧ, татшӧм документсӧ, разӧдӧма обласьт пасьта первойсяньыс 277 номерӧдз).

ІІ

Быд пельӧсын миян Сӧвета Союзын ӧні эм газетӧ гижысь. Найӧ кыдз-мый вермӧны мырсьӧны лӧсьӧдны выльногса олӧм, чуткӧны казялӧм лёкторъяс вылӧ. Мукӧд губерняын газетӧ гижысьяс лӧсьӧдалӧмаӧсь весиг (губерняса газетысь ӧтдор) аслыныс газетъяс. Эштӧны гижны кыкнанлаыс. Ми эськӧ тані морт-мӧд-коймӧд кыдз-мый вермам мырсям жӧ бурмӧдны газетнымӧс да, сӧмын кык-куимыдлы ёна сьӧкыд, оз кӧ ло отсӧг сюсьджык водзмӧстчысь ёртъяссянь. Ӧні «чурки-буди» (мед оз вомдзась) миян газетыд петӧ быд лун. Куимысь вежонын мырсям лэдзны ас кывйӧн, мед эськӧ пемыд йӧз быдтор гӧгӧрвоасны да мед быдтор пондасны тӧдны. Редакциялы колӧ сиктса гижӧдъяс, колӧ тӧдны йӧзлысь олӧмсӧ став Коми му пельӧсысь — сытӧг газетыд оз ло тыр.

Таво гожӧмнас ми быд вӧлӧсьтӧ ыстім газетӧ гижысьяслы эскӧданпасъяс. Тадзӧн чайтам вӧлі, мися, водзмӧстчысь йӧз кутасны ыставны сиктъяссянь юӧръяс. Став эскӧданпассӧ разӧдлім 277, вӧлӧсьтъясын сетӧмаӧсь ӧнӧдз сӧмын 72 мортлы — сідз тай ыстісны миянлы нимпасъяс-а. Колӧ регыдджык став эскӧданпасъяссӧ разӧдны да ыставны татчӧ нимпасъяс, мед ми эськӧ тӧдам ассьыным гижысьяснымӧс. Мукӧд губерняяс бӧрся колӧ вӧтчыны, ёна кӧ колям — оз ло лӧсьыд. Гижӧй кыдз кужанныд да корсялӧй газет судзӧдысьясӧс! Тайӧ пӧраясын татшӧм уджыд зэв дона.

Редакция.