МЕД ЛОАС БЫДЛУНЪЯ!
Кымын водзӧ олам — сымын вылӧджык кыптӧ миян овмӧс, сымын ёнмӧ гӧгӧрбок, содӧ эмбур.
Во сизим сайын коми йӧз эз весиг мӧвпыштлы: коркӧ пӧ лоас асланым коми газет. Лои тай! Кыптіс Коми му, быдӧн морт туйӧ пуктӧны коми йӧзӧс, петіс томан сайысь коми кыв.
Коми газет дыр петіс рочӧн. Сӧмын на ӧтик во корсюрӧ кутіс тыдовтчавлыны коми гижӧд. Первойсӧ — ӧтчыд вежон пытшкын, мукӧддырйиыс весиг ӧтчыдсӧ на оз вӧлі пет... Сы бӧрын сэсся вӧлі аддзывлам шочиника кыкысь вежоннас коми газеттӧ. Некор эз петавлы ӧткодя: ӧтик вежонын петас ӧтик номер коми газет, мӧд вежонын — ньӧтик оз пет, либӧ вежон мӧд-коймӧд он аддзыв коми газеттӧ.
Ӧні воддза дорысь ми ёна нин бура олам! Со ӧд газетыд нин петӧ миян быд лун (неважӧн на петавліс куимысь вежон пытшкас). Куимысь нин петӧ ӧні дзик коми кывйӧн.
Унаӧн на, дерт, шуасны: «Мый сыысь, коми газетсьыс». Тадзи вермасны шуны: кодъяс коми кывсӧ мустӧмтӧны, кодъяс пуксьӧны вылӧджык коми йӧзсьыс, кодъяс шусьӧны «кыдъя рочӧн», либӧ нӧ кодъяс оз гӧгӧрвоны Сӧвет власьтлысь политикасӧ (оласног нуӧдӧмсӧ) та йылысь.
Оз ӧд сӧмын Коми муын лӧсьӧдны аслас кывъя гижӧд. Быд аслас сёрниа йӧз костын мунӧ ас кывъя гижӧд: чувашъяслӧн, удмуртъяслӧн (вотякъяс), тотараяслӧн — быдпӧлӧс йӧзлӧн асланыс сёрни, сэтшӧм кывйӧн и нигаяс, газетъяс лэдзӧны, велӧдӧны, овмӧс кыпӧдӧны.
Мукӧдлаын важӧн нин гӧгӧрвоисны: ас кывйӧн регыдджык, ӧдйӧнджык верман велӧдчыны да кыпӧдчыны культурнӧй йӧзӧдз. Сы вӧсна быдлаын нин радейтӧны ас кывъя гижӧдтӧ, газеттӧ лэдзӧны быд лун.
Сідз жӧ колӧ вӧчны миянлы, коми йӧзлы — чорыда кутчысьны ас кывъя газетӧ, лыддьыны, велӧдчыны.
Коми деревняясын уджалысьяс (велӧдысьяс, партийнӧй йӧз, комсомолечьяс, газетӧ гижысьяс)! Ӧні газет петӧ куимысь вежонын комиӧн. Висьталӧй крестьяналы конференцияяс вылын, чукӧртчывлігъясӧн, висьталӧй налы, кутшӧм бур сетас коми крестьяналы коми газетыд. Ыштӧдӧй найӧс судзӧдны коми газет, лыддьыны коми газет. Тшӧктӧй найӧс гижны газетӧ асланыс олӧм йылысь, асьныд тшӧтш гижӧй! Гижӧй комиӧн!
Кыпӧдамӧй ӧтвылысь коми газетнымӧс! Лӧсьӧдамӧй куимысь пыдди вежонын — быдлунъя коми газет!
