СЫКТЫВДІНКАРСА БОЛЬНИЧАЫН
Куйлысь больничаын век тыр. Тыртӧм крӧвать некор оз овлы. Ӧти висьысь эз на удит петны больничаысь — мӧд сы местаӧ видзӧдӧ нин водны. Медся уна висьысьясыс локтӧмаӧсь операция вылӧ. Мукӧдыс локтӧмаӧсь 200−300 верст сайсянь.
Больничаын уджалысьяслы — сиделкасянь докторӧдз — быд лун страдна пӧра кодь. Шойччывныс ыджыда оз эштывны. Медся нин уна удж нуӧдӧны Шушков да Вакнин докторъяс. Найӧ буракӧ больничасьыс оз и петавлыны, пыр тай сэтӧнӧсь-а... Висьысьяслы зэв нин сьӧлӧм вылӧ воӧны тайӧ докторъясыд. Найӧ сёрнитӧны быд висьыськӧд зэв бура.
Ме шулі нин, мися, медся уна висьысь локтӧма операция вылӧ. Шоч лун нин кольлӧ больничаын операция вӧчтӧг.
Мукӧд куйлысьясыс висьӧны уна во нин. Унджыкыслӧн кила. Кыскалӧмаӧсь дас воӧдз дай унджык.
Со мый висьталӧ сэтшӧм висьӧма ӧти морт: «Меным пӧ петіс кила дас ӧти во сайын нин, сы понда и война вылӧ эз нулыны. Первой вояссӧ уджалі бура на, весиг ветлі заводӧ. Сэсся воысь воӧ ӧтарӧ понді жебмыны. Шыӧдчыны вӧлі некод дорӧ. Чайта нин вӧлі — мися, лоӧ, тыдалӧ, кувны нин тайӧ висьӧмысь. Таво гожӧмнас висьталісны — Сыктывдінкарын пӧ эм бур доктор, быдсяма пӧлӧс операция пӧ вӧчӧ. Локті 220 верст сайсянь. Больничаӧ водан, мӧд лунас жӧ вӧчисны унмовськӧдлытӧг операция. Торъя ёна эз и доймы. Кык лун куйлышті, коймӧд лунас кок йылӧ нин сувтӧдісны. Дас лун мысти дзикӧдз бурді, петі больничаысь. Операция бӧрын быттьӧ шыбиті ас вылысь дзонь ноп».
Со ӧд мортыс кулӧм выйын нин вӧлӧма, да Шушков ёрт операцияӧн бурдӧдіс.
Ӧти 80 арӧса пӧльлы вӧчӧмаӧсь операция син висьӧмысь. Больничаӧ локтігӧн немтор вӧлӧм мортыд оз аддзы, гортас мунны синъяс воссисны. Операция вӧсна кулӧм пӧшти оз овлы.
Миян деревняясын уна верстьӧ йӧз эм — мучитчӧны килаясӧн, синъясӧн да мукӧд пӧлӧс пытшкӧс висьӧмъясӧн. Ӧнӧдз найӧ эз вермывны бурдӧдчыны: оз тӧдны, код дінӧ шыӧдчыны, либӧ оз вермыны мунны бурдӧдчыны гырысь каръясӧ.
Унаӧн сиктса знакаръяс ордын «бурдӧдчӧмӧн» дзикӧдз воштылісны ассьыныс дзоньвидзалунсӧ.
Ӧні миян Коми муын асланым бурдӧдчанін эм быдсяма висьӧмысь, бурдӧдӧны бура тӧдысь да зільысь докторъяс.
Сӧмын висьысь йӧзлы оз ков нюжӧдчыны, висьмӧм мысти пырысьтӧм-пыр локны больничаӧ. Сэки кокниджык бурдӧдны быдсяма висьӧмсӧ.
Бурдысь.
