НЫВБАБА, МУН ЛЫДДЬЫСЯН КЕРКАӦ

Ӧні уна сиктъясын восьталӧма дай восьталӧны лыддьысян керкаяс.

Кывлан шуасьӧм: восьтісны пӧ войпукан керка йӧктыны да дурны.

Лыддьысян керкаястӧ лӧсьӧдалісны эз лёк воддза кодь войпукӧм вылӧ. Лыддьысян керкаӧ йӧз чукӧртчывлӧны рытъясын удж бӧрын да праздникъясӧ выль буртор кывзыштны.

Лыддьысян керкаын гора лыддьӧны газетъяс, мукӧддырйи вӧчлывлӧны докладъяс. Газетысь, висьтавлӧмысь позьӧ тӧдны, мый му вылас вӧчсьӧ, кутшӧм петӧма выль законъяс, кыдзи колӧ видз-му уджавны, уна мукӧдторъяс. Уналаын лыддьысян керкаын кутасны гырысь йӧзӧс велӧдны лыддьысьны да гижны.

Ёнджыка лыддьысян керкаӧ волӧны том йӧз. Найӧ сэні велӧдчӧны. Мукӧддырйи овлывлӧ — гажӧдчыштасны. Нывбабаяс омӧля на ветлӧны лыддьысян керкаясӧ. Водзӧ тадзи оз позь. Колӧ кӧть вежон пиын ӧтчыд нывбабаяслы чукӧртчывлыны лыддьысян керкаӧ. Позьӧ сэтчӧ локны удж босьтӧмӧн: печканӧн-кыанӧн. Уджалігмоз позяс кывзыны лыддьысьӧм, висьталӧм, тӧвбыдӧн быд вежон кӧ ӧти рыт ветлыны лыддьысян керкаӧ, позяс унатор тӧдмавны. Мунӧй, нывбабаяс, лыддьысян керкаӧ, югдӧдчӧй сэні, велӧдчӧй выль ногӧн овны.

А. П.