ВЕЛӦДӦЙ ЧЕЛЯДЬӦС

Миян зэв на уна велӧдчытӧм морт. Кымын уна велӧдчытӧм пемыд йӧз — сымын олӧмным лёк, сӧмын сьӧкыд выль олӧмлань мунны. «Велӧдчытӧм йӧзӧн, пемыд йӧзӧн выль олӧм огӧ вермӧ лӧсьӧдны», — шуліс миянӧс велӧдысь Ленин ёрт.

Сӧвет власьт быд ногыс зільӧ велӧдны челядьӧс, верстьӧ йӧзӧс тшӧтш. Сӧмын Сӧвет власьтлӧн ӧні быд сиктӧ школа восьтӧм вылӧ сьӧм оз на тырмы. Сы понда уна челядь кольӧ дзик велӧдчытӧм.

Мӧдарӧ кӧ, уна школа на велӧдчысьяс челядьӧн абу тыр. Челядьӧс школаӧ оз лэдзны бать-мамныс, видзӧны гортаныс.

Ӧні кык вежон чӧж Коми муын мунӧ велӧдчӧм паськӧдӧм. Колӧ тайӧ кык вежонас отсавны школаяслы удж бура сувтӧдны — отсавны велӧдысьлы сійӧ уджсӧ ладмӧдны. Колӧ школаяс тыртны велӧдчысьясӧн. Бать-мамъяслы челядьнысӧ оз ков кутны школаӧ ветлӧмысь. Тайӧ кык вежон бӧрын медым тыртӧмин школаясын оз коль.

Медся уна велӧдчытӧм йӧз нывбаба пытшкын. Школаӧ челядьтӧ мӧдӧдігӧн мам-бать шуасны: «Мед велӧдчас детинаным, кутшӧм велӧдчӧм нывпоснилы, печкас гортын».

Тадзи вӧлі ичӧтысянь паччӧр вылын печкӧмӧн заводитчӧ пемыд нывбабалӧн пемыд олӧм.

Оз позь тадзи шуасьны. Ӧні колӧ велӧдны ӧтмоз зонмӧс дай нылӧс.

А. П.