ВЕТЛӦДЛӦ СКАРЛАТИНА, ВИДЗЧЫСЬӦЙ СЫЫСЬ!

Миян, Коми Обласьтын, ӧні ветлӧ скарлатина висьӧм. Медся ёна Сыктывдінкарын. Тупкалісны нин школаяс, посньыдджык челядь кӧні велӧдчӧны.

Ёна колӧ повны скарлатина паськалӧмысь, матайтчан. Паськалас кӧ, регыдӧн он помав сійӧс.

Ӧткӧн скарлатинакӧд он вермы вермасьны. Доктор-пельшӧр ас кежаныс вынтӧмӧсь лоасны. Колӧ ӧтвылысь босьтчыны пӧдтыны тайӧ висьӧмсӧ, оз ков лэдзны паськавны.

Скарлатинаӧн висьмӧны микробысь (зэв посни гагъяс), сӧмын сійӧ микробсӧ лючки эз на вермыны тӧдмӧдны. Висьӧны медся ёна челядьяс дас кык арӧсӧдз. Скарлатинаыд вуджан висьӧм.

Вуджӧ висьыссянь паськӧмъяссянь, быдсяма кӧлуй пыр.

Челядьыдлысь кӧ казялан кисьтӧм, либӧ найӧ горш висьӧмӧн пондасны норасьны — ӧдйӧнджык колӧ нуны найӧс доктор дінӧ либӧ пельшӧр дінӧ. Висьысьӧс пырысьтӧм-пыр торйӧдны дзоньвидзаясысь да видзны торйӧн дзикӧдз бурдтӧдзыс.

Гырысь дзоньвидза йӧзлы скарлатина ветлігӧн колӧ овны да вӧчны доктор-пельшӧр велӧдӧм, индалӧм серти. Керка, паськӧм видзны пелькджыка, сӧстӧма. Видзчысьны мыйсюрӧ сёйӧмысь. Лыддьыны нигаяс скарлатина йылысь, ветлывлыны докладъяс вылӧ, кӧні велӧдчӧм-тӧдысь войтыр висьтавлӧны висьӧм да сыкӧд вермасьӧм йылысь.

Скарлатинаӧн висьӧм бӧрын квайт вежон чӧж оз ков лэдзны челядьӧс ветлыны школаясӧ, детсадъясӧ, клубъясӧ — некытчӧ, кӧні уна йӧз чукӧртчывлӧ.

Скарлатинаӧн висянінъясын поп-дяклы да мукӧд религиознӧй обществояслы овны Обисполкомса обязательнӧй постановленньӧ серти («Югыд туй» газетын, № 44, февраль 23-ӧд лунӧ 1924 во).