ЧИГАНКАЯСЛЫСЬ ЫЛӦДЧӦМ КЫВЗӦНЫ

Поёлӧ (Сыктыв уездын) таво волывлӧ зэв уна чиган. Нывбабаясыс лун-лун ветлӧны керкаясӧд, гадайтчӧны, пычкӧны синтӧм гутъяс моз быдсяматорсӧ пемыд коми нывбабалысь.

«Вай гадайтыштам тэныд. Но, кутшӧм тэ шуда морт, кутшӧм кузь нэма. Тэ медшуда морт му вылын. Мед ен ещӧ на шудтӧ содтас», — видзӧдӧны ки пыдӧс да вашкӧдӧны чиганкаяс. Быд морт чиганлӧн шуда, быд морт медшуда му вылын!

Мый нӧ сэсся. Медтыкӧ налы мыйкӧ сетасны-а.

Кывлісны чиганкаяс гадайтӧм йылысь Исполкомын уджалысьяс. Найӧ йӧзӧс чиганкаяслысь кывзӧмысь ӧлӧдӧм пыдди асьныс пондісны гадайтчыны. Кыдзи нӧ на? Колӧ ӧд жӧ налы тӧдны, шудаӧсь-ӧ, кузь нэмаӧсь-ӧ лоӧны, бур-ӧ невеста сюрӧ. Ми пӧ абу на пӧрысьӧсь, сӧмын на пӧ овнысӧ кӧсъям! Исполкомын уджалысьяс дінӧ тшӧтш матысмис милиционер. Сӧмын на помалӧмаӧсь удж, котӧртӧны нин ӧтвылысь чиганкаяс дінӧ гадайтчыны. Унджык рытын сідзи.

Со тай Исполкомса уджалысьясыд! Ас кинаныс шуд дорӧм пыдди корсьӧны сійӧс чиганкаяс ордысь, кывзӧны налысь сӧрӧмнысӧ. Ӧти служитысь ещӧ комсомолеч.

Поёлса йӧз, дугдӧй кывзыны чиганкаяслысь сӧрӧмнысӧ, найӧ сӧмын ылӧдлӧны тіянӧс.

Сіс.