ВИР ПАСЬТӦМӦСЬ КОЛЬӦМАӦСЬ

17 верст сайын Леткасянь эм пӧчинок «Ортсӧсъёль». Олӧ сэні крестьянин Спиридон Иванӧвич Мохняк. Семья ыджыд — кӧкъямыс морт.

15-ӧд лунӧ октябр тӧлысьын водалісны найӧ узьны. Друг пӧжар — керканыс сотчӧ. Кӧмтӧмӧсь, пасьтӧмӧсь чеччышталісны керкасьыныс, куш дӧрӧм-гач кежсьыныс. Немтор эз вевъявны мырддьыны билысь, став эмбурыс и сёян-юаныс сотчис. Биыс керка мышсяньыс кыптӧма. Вӧлӧмкӧ, лёк морт сотӧма найӧс — пырас тай киыд! Волмилиционер видлалӧма керка гӧгӧрсӧ да нинкӧма кок туйӧ веськалӧма. Кок туй сертиыс да ещӧ мукӧдторъяс серти сотысьнас шуӧны сійӧ жӧ вӧлӧсьтса крестьянинӧс — Митрей Иванӧвич Перминовӧс. Индӧмаӧсь нин сылы туй — раймилицияӧ ыстӧмаӧсь. Нем жалиттӧг колӧ велӧдны татшӧм йӧзсӧ!

Спирӧ семья олӧны йӧз ордын, корӧны-ветлӧны.

С. К.