ЮРТӦМ ЮРАЛЫСЬ

«Югыд туй» редакция таво юль тӧлысьын быд Коми Обласьтувса сиктъясӧ Волисполкомъяс пыр ыставліс эскӧданпасъяс (мандатъяс) газетӧ гижысьяслы. Быд сиктӧ нин воӧма сійӧ эскӧданпасъясыс, быд сиктсянь нин гижысьяс ыстӧны юӧр газет лэдзӧм вылӧ.

Сӧмын ӧд йӧз пӧвстын эмӧсь на неморт сяма мортъяс. Быдсяма «дивӧыд» овлӧ му вылын, весиг миян сӧветъяс му вылын. Изьва уездын эм сикт. Нимыс — Галово. Сэні эм Волисполком. Волисполкомыс редакцияӧ бӧр ыстіс мӧдӧдлӧм эскӧданпас газетӧ гижысьлы. Гижӧ, миян пӧ нинӧм гижнысӧ газетаныд, миян пӧ некодлы гижнысӧ, эскӧданпаснытӧ пӧ некодлы лои сетнысӧ. Со колӧкӧ! Мун дай сёрнит! Дзонь сиктын абу гижны кужысь морт, дзонь сикт йылысь нинӧм гижны. Но, зонмӧ! Гашкӧ, весиг ӧти велӧдчыштӧм морт абу да? Чӧвлӧ, эм. Редакцияӧ ыстӧм гижӧдсӧ кырымалӧмаӧсь кыкӧн на ещӧ. Исполкомас юралысьыс дай гижысьыс. Сӧмын тай юралысьлӧн юрыс абу помас, юралыссяньыс юравтӧмӧ пӧрӧма, либӧ вывті нин вежӧра лоӧма. Оз кӧсйы сійӧ некыдзи лэдзны гижны газетӧ Галов сиктын олӧм-вылӧм йылысь.

Ми тшӧктам Галовса Исполкомын юртӧм юралысьлы юрсӧ пуктыны бӧр пельпом вылас, эз на кӧ кытчӧкӧ вош юрыс. Тшӧктам извинитчыны редакция водзын да бӧр корны эскӧданпас. Оз кӧ вермы юрсӧ пельпом вылас новлӧдлыны, колӧ мукӧдлы кутчысьлыны юралысь юр бердас.

Галовса йӧзлысь корам гижӧдъяс газетӧ.