ВОССЬӦ ЯРМАНГА

Сыктывдінкарын талун воссьӧ ярманга. Сӧвет власьт дырйи коймӧдысь таво лоӧ.

Колӧ быдӧнлы тӧдны, кутшӧм сяма вӧвлі войдӧрся, сар дырся ярмангаяс, кутшӧм сямаӧсь найӧ ӧні. Войдӧр озыр йӧз сӧмын зільлісны ярмангаяс вылын ассьыныс зепнысӧ тыртны, кыдзкӧ-мыйкӧ гӧль крестьянинӧс ылӧдны. Сэки ярманга весиг ӧти войт гӧль крестьянинлы некутшӧм кокньӧд эз сетлы. Ӧні Сӧвет власьт дырся ярмангаяс дзик мӧд ногӧсь. Ӧні ярманга вылын медъён вузасьысьыс абу нин ӧтка-ӧтка купечьяс. На пыдди ӧні петӧны вузасьны государствоса тӧргуйтысь организацияяс, кооперативъяс. Найӧ ярманга вылӧ петӧны оз ылӧдчыны купечьяс моз, оз гӧльмӧдны уджалысь йӧзӧс, а сетны налы колан тӧвар кыдзи-мый вермӧны донтӧгджык.

Сӧветскӧй ярманга ёнмӧдӧ Сӧвет власьтлысь вынсӧ, оласногсӧ, бурмӧдӧ государстволысь вузасьӧм-ньӧбасьӧм удж.

Ӧнія ярманга ён отсӧг рабочӧйлы крестьянакӧд топыда ӧтувтчӧмлы.

Воддза вося да колян вося ярмангаяс Сыктывдінкарын эз вермывны ёна паськӧдчывны. Сэки крестьяналӧн овмӧсныс эз на тавося кодь бур вӧв, вузаланторйыс этшаджык на вӧвлі. Мӧд-кӧ, рабочӧйяс, служащӧйяс этшаджык вӧлі босьтӧны сьӧм. Ставыс сійӧ, дерт, кузя война мунӧм вӧсна вӧлі.

Тавося ярманга ми виччысям паськыдджыкӧс, ыджыдджыкӧс. Таво крестьяналӧн вузалантор унджык нин эм. Таво кооперативъясын тӧваръяс донтӧмӧсь, бурӧсь. Таво быдӧн вермисны чӧжыштны ярманга кежлӧ колан тӧвар вылӧ сьӧм.

Ярманга петкӧдлас, ёна-ӧ кыптӧма овмӧс крестьяналӧн, ёна отсалас ещӧ на лэптыны сійӧ овмӧссӧ.

Коми крестьяналы шуам: «Петӧ ярманга вылӧ. Ярманга вылын верман ассьыд лӧсьӧдӧмтор вузавны ыджыдджык донысь, босьтны колан тӧвар донтӧгджык. Сӧмын мун ньӧбасьны кооперативӧ!»