НИГА ДЕРЕВНЯЛЫ

«Выль Деревня» (Новая Деревня) — велӧдчан журнал му-видз уджалысьяслы. Петӧ кык вежон пиын ӧтчыд. Петӧ Мӧскуаын, «Новая Деревня» издательствоын. Доныс ӧти номерлӧн — 35 ур. Квайт тӧлысь кежлӧ гижсьыны журнал вылӧ колӧ 3 шайт да 50 ур.

Быд выль номер лэдзӧмӧн му-видз уджалӧм йылысь журнал «Выль Деревня» лоӧ бурджык да коланджык крестьяналы.

Медъёна журналыс велӧдӧ му-видз уджалӧм йылысь, тӧдмӧдӧ, кутшӧм ногӧн кокниджык бурмӧдны му-видз уджалӧм, кыдзиджык лэптыны крестьянинлы овмӧс. Тайӧ йылысь висьтавсьӧ журнал отделъясын: «Наука и крестьянство» да «Очередные задачи крестьянского хозяйства».

Тайӧ кык отделас гижсьӧ, кутшӧм удж мунӧ кутшӧм кадын. Сідз, арся журналъясын гижӧны статьяяс — кыдзи идравны да видзны картупель, кыдзи шоныда кутны скӧт картаяс, кутшӧм ногӧн лӧсьӧдны сёян тӧв кежлӧ да мукӧд сэтшӧмтор. Тайӧ статьяяссӧ гижӧны велӧдчӧм йӧз.

Журналын эм отдел: «Жизнь деревни». Татчӧ гижӧны, кӧні кыдзи му-видз бердӧ выль ногӧн босьтчӧны уджавны.

Крестьяналы колӧ бура тӧдны выль законъяс деревня йылысь. Журналын гижсьӧ жӧ сійӧ.

Сэсся крестьянин му-видз уджалӧм кындзи кӧсйӧ тӧдны олӧм мукӧд государствоясысь, политика йылысь. Та йылысь «Выль деревня» журналын уна гижӧны.

«Выль деревня» журнал зэв колантор быд крестьянинлы, зэв бур отсӧг сылы быдторйӧн.