ВЕРМАН ВОНЫ 1000 ШАЙТ
Муна Сыктывдінкар кузя служба вылӧ. Столӧвӧй дорын сулалӧ кутшӧмкӧ крестьянин.
— Олан-вылан, Ӧльӧксан! — здоровайтчис мекӧд.
— Но, тӧдса тай вӧлӧма. Здорово! — воча шуа. — Мый нин тэ карас гуляйтан?
— Волі кучик вештыны, сэсся мыйсюрӧ вӧлі колӧ ньӧбыштны да...
— Сідз. Кутшӧма нин овланныд?
— Мыйкӧ тай олам на-а; няньясыд вот этшаджык-а...
— Вотъястӧ кутшӧма мынтӧны тіян?
— Топыда, другӧ, сійӧ миян мунӧ: нажӧткаясыд абу, сьӧмтӧ некытысь босьтны крестьянаыдлы...
— Тэ ачыд эн на жӧ мынты?
— Метӧ мынті нин первой сроксасӧ. Джынсӧ мынті деньгаӧн, мӧд джынсӧ облигацияясӧн, Крестьянскӧй заёмнад. Сійӧн тай зэв лӧсьыд вӧлӧма, зонмӧ! Мукӧд срокъяссьыс облигацияӧн жӧ кӧсъя мынтыны, коли на вит шайт дон.
— Кывзы, тэ эн зэв тэрмась облигацияяснад шыбласьны, кутышт мыйкӧ дыра киад, — шуа ме.
— Мый нӧ найӧс кутныыс? Сетін дай пом! Мый прӧстасӧ куйлыны кутасны...
— Збыль шуа. Прӧста облигацияясыд оз куйлыны. Колӧ бурджыка мӧвпыштны та йылысь, гӧгӧрбок артыштны да вӧлисти и шуны...
— Ме ог гӧгӧрво тэнӧ. Асьныд пыр вӧлі шуанныд: ньӧбалӧй пӧ облигацияяс, кокньыдджыка пӧ налогтӧ мынтанныд. Ӧні тай нӧ мыйкӧ мӧдарӧ нин тэ шуан?
— Мӧдарӧ, другӧ, ме ог шу тэныд. Со ачыд думышт. Быд гӧгӧрвоанаджык крестьянин зільӧ ассьыс сьӧмсӧ видзны выгӧднӧджык. Вот мынтыны колӧ? — Колӧ. Сідзикӧ быд лишнӧй грӧш кӧпейка, быд шайт колӧ пуктыны заёмӧ. Тадзи и вӧчисны гӧгӧрвоана крестьяна: ньӧбалісны облигацияяс, медым налогтӧ мынтігӧн коляс аслыныс кымынкӧ лишнӧй ур. Сӧмын медколанторсӧ, главнӧйсӧ вунӧдісны.
— Мый нӧ вунӧдім?
— Мый? Быдӧн ӧд тӧдӧны: Крестьяна заёмыд воана. Овлӧны лотереяяс (розыгрыш), облигацияястӧ латаръяалӧны. Ӧтчыд таво, сентябр тӧлысьын, вӧлі нин. Бура унаӧн воисны и миян Коми обласьтысь. Верман воны — вит шайтсянь сюрс шайтӧдз ӧти шайта облигация вылӧ. Регыд, медводдза вӧскресенньӧ лунӧ декабрын (7-ӧд лунӧ), мӧдысь кутасны латаръяавны. Ставыс лоас 8 лотерея: локтан кык вонас лоӧ куимысьӧн быд воӧ.
— Сідзкӧ, оз и босьтны кутны облигациятӧ локтан вонад вот мынтігад? — повзьӧмпырысь юалӧ крестьяниныд.
— Босьтасны локтан воын, дай ещӧ локтанас (1925 и 1926 воясын). Сӧмын ӧд колӧ думыштны тіянлы воӧм йывсьыс! Но, шуам, тэ аслад облигациянад воттӧ мынтӧмӧн видзыштан кымынкӧ лишнӧй ур. Дерт, ичӧтик пӧльзатор лоӧ тэныд, зэв ичӧтик! А тэ кӧ видзан облигациятӧ во-мӧдсӧ, верман унджык воны: шуд кӧ усяс, уна сьӧм верман воны. Облигацияыд ӧд сёйны оз кор, сійӧ ачыс на вайӧ 5 прӧчент вонас. Сэсся облигацияыд тэнад быд лотерея дырйи тшӧтш кутас ӧтилаын бергавны — верман сизимысь на воны ӧти облигациянас. Со ӧд кӧні пӧльзаыс!
— Пӧдлинӧ тай и эм.
— Дерт жӧ. Оз кӧ усь воӧмыс, повны нинӧм. Кык во мысти Сӧвет власьт бӧр ньӧбас тэнсьыд облигацияястӧ тыр донӧн. Сэсся ковмас кӧ тэныд деньга, облигация вылад верман удждыны Коми Сельбанкысь. Сетан закладӧ облигациятӧ, тэныд сетасны деньга. Сы кості кӧ латаръяалігӧн тэнад облигация вылӧ усяс воӧм, сійӧ оз вош, кутас лыддьысьны тэнад. Сэсся ӧні ачыд думышт, мый бурджык: вот мынтыны-ӧ, киад кутыштны-ӧ. Дерт, вот мынтыны облигацияӧн кокньыдджык, а ме шуа, киын кутны сыысь бурджык, убыткаыс некутшӧм оз ло, а пӧльза вермас лоны зэв ыджыд.
— Аттьӧ да пасибӧ тэныд, Ӧльӧксан, путьмӧдӧм вылад! Ми ӧд, деревняад олігад, нинӧм огӧ кывлӧ, огӧ тӧдӧ ни. Ме ӧні кольӧм облигацияясӧс ог нин сэсся ну вот вылад, висьтала весиг аслам суседъяслы, кодлӧн эм — мед видзасны.
— Колӧ ёнджыка газетъяс лыддьыны, сэки бурджыка кутанныд тӧдны быдтор йылысь.
Савӧ Ӧльӧксан.
