МЫЙЛА ТӦВАР ДОНА

31 верст сайын Сыктывдінкарсянь эм Лӧзым. Лӧзымын эм потребительскӧй лавка. Овлывлӧны собранньӧяс шленъяслӧн. Быд собранньӧ вылын шумитӧны: тӧвар пӧ вывті дона. Ӧтлаасяс морт кык-куим — бара жӧ сы йылысь сёрни.

Збыльысь дона унатор. Босьтам кӧть сов. Сыктывдінкарысь ньӧбӧны 1 шайт да 20 урӧн пуд, вузалӧны 1 шайт да 60 урӧн — быд пунт вылӧ босьтӧны 1 урӧн донӧнджык.

Ме войдӧр думайтлі: мися, солыд этша, ньӧбысьыд уна — сійӧн и дона сійӧ. Сэсся бӧрвылас казялі: прӧста вӧлӧм тадзи арталӧмыд.

Неважӧн мог суис менӧ да, пыралі Лӧзымса лавкаӧ мыйсюрӧ ньӧбны. Пыр и гӧгӧрвои, мыйла дона тӧварыд. Вӧлӧмкӧ, жалӧванньӧ босьтысьыд уна. Куш лавочникыс 4 морт. Ме зэв ёна шензи, думайта: мися, сюсь войтырыдлӧн и пияныд сюсьӧсь лоӧны. Медічӧт приказчикыслы ог тӧд эм-абу нёль арӧс... Лавкаын жӧ тӧргуйтӧ...

Быд дивӧыд овлӧ!

Лӧзымса.