ЛИТЕРАТУРА ЛӦСЬӦДНЫ

Коми йӧзлы асланыс кывйӧн гижӧд, нигаяс колӧ ёна. Гижӧд на пиӧ мунӧ зэв на этша. Коми литература лӧсьӧданін, мыйта колӧ да кутшӧмджык сикас литература колӧ, лэдзны некыдзи на оз вермы.

Босьтам художественнӧй литература. Сьыланкывъяс, шыльыда гижӧмъяс (стихотворения) нигаясын коми йӧзлы вель уна нин сетӧма. Висьтасъяс (рассказы) гырысь йӧзлы лыддьыны пӧшти ньӧти абу. Висьтасъясыд эськӧ медколантор. Сы серти позьӧ тӧдмавны коми кыв бурджыка. Висьтасъяс гижӧмӧн-лыддьӧмӧн позьӧ кокниджыка велавны гижны, сёрнитны комиӧн (дзик коми ног).

Висьтасъяс кывйӧн позьӧ наука и поэзия гижны.

Обласьтувса нёльӧд съезд Сӧветъяслӧн шуис коми кыв обласьт пытшкын роч кыв моз лыддьыны государственнӧйӧн. А ми унаӧн на бурджыка огӧ тӧдӧй коми кывсӧ. Сёрнитны сёрнитам, гижны кӧ — огӧ кужӧй.

Миян коми литература кыв абу на веськӧдӧма, шыльӧдӧма. Висьтасъяс серти миянлы медкокни сійӧс тӧдмавны быд боксянь.

Сэсся коми олӧмысь зэв на этша художественнӧй литератураыс. Гижысьяс эськӧ эмӧсь нин, Октябрса революция кыпӧдіс найӧс, сӧмын налы некыдзи йӧз пиӧ нуны ассьыныс гижӧмсӧ. Лӧсьӧдны журнал комиӧн некыдзи на эз вермыны.

Сы вӧсна «Югыд туй» газетлӧн редакция лӧсьӧдӧ быд вежонын ӧти коми газет номерын «литература пельӧс». Дерт, сэтчӧ он вермы лэдзны кузь гижӧдъяс, позяс сӧмын лэдзны дженьыдик висьтасъяс, стихотворенньӧяс коми олӧмысь.

Коми гижысьяслы колӧ ыставны дженьыдик висьтасъяс коми газетӧ.