КОМИ НЫВБАБАЯС, ПЫРӦЙ КООПЕРАТИВӦ!
Босьтам гожся олӧм-уджалӧм миян коми крестьянкалысь, кыдз сійӧ пессьӧ, ноксьӧ водз асывсянь скӧт гӧгӧр, пач дорын, челядьӧн, да сэсся лунтыр мужиккӧд ӧтмоз ытшкӧ, куртӧ да мукӧд сьӧкыд удж вӧчӧ. Рытнас, сёрӧн гортӧ воӧм бӧрын, удж оз помась. Бара скӧт гӧгӧр идрасьӧм, кагаӧн ноксьӧм да мукӧд гортса удж. Сідз быд лун. Лӧсьыд, абу кӧ ичӧт кага, сэк кӧть войнас шойччас, узьыштас ичӧтика. А коді челядя да ещӧ нӧбасьӧ, ветлӧ медбӧръя вежонъяс, лунъяс — сэки кутшӧм сылы! Колӧ эськӧ шойччыны, да некор. Унаысь овлӧ видз вылын либӧ му вылын челядясьӧм. Кутшӧм сьӧкыд ичӧт каганад, кор гожӧмнад найӧ ёна висялӧны. Кымын син куньлытӧм вой коляс мудзӧм мамыдлӧн!
Оз ёна кокньӧдлы и тӧлын. Уна нывбаба ӧтмоза мужикъяскӧд кер лэдзӧны, кыскасьӧны, ветлӧны заводӧ; гортас кольысьясыс кын кокыс сывлытӧг кыскалӧны пес да турун.
Колӧ кыдзкӧ кокньӧдны олӧм, колӧ корсьны пемыд олӧмысь петан туй.
Ӧткӧн кокньыд олӧм лӧсьӧдны он вермы. Медбур туй кокньыд олӧм лӧсьӧдны — кооперативӧ ӧтувтчӧмӧн.
Ӧні Обласьт пасьтала мунӧ кооперативӧ чукӧртчан тӧлысь.
Тайӧ тӧлысяс кутасны висьтавлыны кооперативас пырӧмсьыс бурторсӧ; сэсся сиктса кооперативъяс кутасны висьтавны (отчёт вӧчны) асланыс лавкаса уджалӧм йылысь.
Обласьтувса кооперативъяслӧн чукӧр (Обсоюз) тайӧ тӧлысяс — мед кокньыдджык вӧлі нывбабаяслы пырны да унджыкӧн пырасны — лӧсьӧдіс татшӧм кокньӧд. Сійӧ нывбабаяслысь, кодлӧн семья пытшкас эм нин ӧтик шлен кооперативын да дӧваяслысь шленӧ гижсигӧн босьтны джын дон.
Коми крестьянкаяс, энӧ полӧй кооперативӧ шленӧ пырӧмысь. Кыдз-мый верманныд, абу кӧ деньганыд, мынтӧй шленскӧй взностӧ выйӧн, вурунӧн, кудельӧн, мукӧдторйӧн да гижсьӧй кооперативӧ!
Пырӧй, радейтӧй ассьыныд ӧтувъя лавкатӧ! Отсалӧй сылы уджсӧ лӧсьӧдны кыдз-мый вермад! Эм кӧ тіян сиктын кутшӧмкӧ купеч, энӧ мунӧ сы дорӧ ньӧбасьны, ньӧбасьӧй сӧмын асланыд ӧтувъя лавкасьыд!
Сюсьджыкъястӧ ас костсьыныд бӧрйӧй сэтчӧ ревизионнӧй комиссияас да правленньӧас шленӧ.
Медым тіян кооперативыд лоас бур, медым сэні тӧварыс лоас донтӧм мукӧдлаын серти да уна сикас, мед кооперативыд ньӧбас тіян сиктӧ бур ӧшкӧс да бур порсьпиянӧс. Мед оз ков тіянлы водзӧ вылӧ дасысь ыджыд дон вылӧ мӧснад котравны лёк ӧшъяс дінӧ. Мед лоӧ тіян кооперативӧн ньӧбӧмысь бур порсьпиян. Колӧ кӧть неуна чӧскӧдны лёк сёянтӧ.
Тшӧктӧй ассьыныд кооперативнытӧ лӧсьӧдны ӧтвылысь видз-му уджалан, няръясян да мукӧд сикас машинаяс.
Корӧй, мед тіянлы лыддьыны сэки вӧлі посньыдик бур гижӧдъяс, нигаяс да газетъяс. Мед гожӧмнас вермис кооперативыд восьтыны челядьӧс видзны ясли да мед вайис лавкаас вузавны кага быдтыны коланторъяс.
Тадз сӧмын кооператив пыр ті вермад ньӧжйӧник кокньӧдны ассьыныд сьӧкыд олӧмнытӧ.
А. П.
