ТЭДЖЫК, ТЭДЖЫК КОМИ АНЬ!
Капиталист государствоясын рабочӧйлӧн крестьянакӧд вӧля некутшӧм абу. Лун-лун вӧвъяс моз вийсьӧны-уджалӧны му вылын да му пытшкын, асьныс пыр тшыг нисьӧ пӧтӧсь, гӧльӧсь. Ён киясыс кындзи да бур вежӧрыс кындзи немтор налӧн асланыс абу. Ставыс озыръяслӧн, капиталистъяслӧн. Уджалысь йӧз зільӧны миян Роч му вылын моз босьтны ас киас власьт, шыбитны капиталистъясӧс, буржуйясӧс. Водзмӧстчысь, ыджыдджык сьӧлӧма войтыр ӧтувтчалӧны, чуксалӧны вокъяссӧ, чойяссӧ ыджыд удж вылӧ — вӧчны революция.
Буржуйяс оз узьны. Быд пельӧсын налӧн кыйӧдчысьяс, пӧлича. Уджалысьяс дор сулалысьясӧс, водзмӧстчысь войтырӧс куталӧны, сюялӧны тюрмаясӧ, мучитӧны сэні быд ногыс: нӧйтӧны, тшыгйӧдӧны, кынтӧны. Пӧшти быд государствоын тюрмаясыс тырӧсь сэтшӧм уджалысь йӧзнас — сюрсӧн-сюрсӧн найӧ пукалӧны.
Со ӧд кутшӧм сьӧкыд рабочӧйыдлы да крестьянаыдлы перйыны вӧляысь олӧм да аслыд вылӧ уджалӧм. Кымын верстьӧ морт пуктӧны сы вылӧ ассьыныс ловсӧ. Надейтчӧны найӧ, тшӧтш и ми, кӧрт чепъяс разьсясны, оръясясны. Уджалысьяс крестьянакӧд став му пасьтаын кутасны овны вӧляысь, олысьясыс лоӧны найӧ. Сӧмын тайӧ сьӧкыд каднас ёна колӧ отсасьны тӧлка-бур олӧм корсьысьяслы, кокньӧдыштны тюрмаясӧ сюрӧм войтырлысь олӧмсӧ.
Кыдзи отсасьны? Мыйӧн?
Отсасян ног зэв уна, сӧмын эн зэлӧдчы да эн дышӧдчы.
Коми аньяс, ті тӧдлінныд сьӧкыд олӧмтӧ войдӧр.
Ӧні сэтшӧм олӧм капиталист государствоясын нывбабаяслӧн челядьяснас. Вердысьяссӧ налысь нетшыштӧмаӧсь, сісьталӧны тюрмаясын. Пессьӧ лэчкӧ шедӧм пӧтка моз уджалысь нывбаба, сэні шойччӧг оз аддзыв. Кӧмтӧм-пасьтӧм челядьяс нетшкӧны сійӧс, корӧны няньтор. Сэтчӧ жӧ кылӧ нывбабаыд верӧссӧ тюрмаын мучитӧм.
Тюрмаясын пукалысьяслы, найӧ семьялы колӧ отсӧг сетны. Отсӧгӧн налӧн кокньыдджыка ыджыд уджыс мунас, регыдджык мынтӧдчасны капиталистъясысь.
Босьтчылӧй жӧ ставныд, коді мыйӧн верманныд, йӧз государствоса тюрмаясын пукалысь уджалысьяслы да найӧ семьялы. Ичӧт отсӧгысь энӧ яндысьӧй ни полӧй. Уналаын ичӧт отсӧгыс лоас ыджыдтор, ён отсӧг.
Тайӧ вежоннас буретш мунӧ отсӧг чукӧртӧм йӧз государствоса революционеръяслы. Тэджык, коми нывбаба! Босьтчы тайӧ удж бердас сьӧлӧмсьыд! Отсав ачыд мыйӧн верман, чуксав отсасьны мукӧдӧс!
