ТЫРМАС ВАЖ НОГ МУ-ВИДЗ УДЖАВНЫ

Коми крестьяна унаӧн нин казялісны став омӧльсӧ важ ногӧн — куим кӧдзаӧн — му уджалӧмысь. Медъёнасӧ казялісны ветлӧм-мунӧм йӧз: Гӧрд армияын служитлӧм йӧз, мукӧд государствоын пленын овлысьяс, Ставрочмувывса Сельскокӧзяйственнӧй выставка вылӧ ветлысьяс. Уна коми крестьянин кӧсйӧ босьтчыны му-видз уджавны выль ногӧн. Эмӧсь нин ӧткымынлаын сэтшӧмыс. Босьтам кӧть му вылӧ турун (бобӧнянь) кӧдзысьясӧс. Сӧмын найӧ оз тӧдны, кыдзиджык, код ногӧн, код боксянь кутчысьны мусӧ выль ногнас уджавны, татчӧ коми крестьянинлы колӧ отсӧг, ён отсӧг. Колӧ крестьянинӧс туйдӧдны, велӧдны. Агрономъяс кындзи та бердӧ колӧ кутчысьны став гӧгӧрвоысьджык, велӧдчӧм йӧзлы.

Быд сиктын колӧ лӧсьӧдавны му-видз уджалӧм йылысь кружокъяс (сельскохозяйственные кружки). Сэтшӧм кружокъясас тшӧктыны пырны томджык йӧзӧс, олӧма йӧзӧс, быдӧнӧс, кодъяс кӧсйӧны бурджыка тӧдмавны му-видз уджалӧм йылысь. Сійӧ кружокъясас велӧдчыны, вочасӧн велӧдчӧм сертиыс кутчысьны му бердӧ, петкӧдлыны пемыдджык крестьяналы (кодъяс некыдзи оз убӧлитны важ ногӧн му-уджалӧм шыбитны) выль ног уджалӧмӧн бурджык нянь босьтӧмсӧ.

Оз ков вунӧдны — сӧмын сэки муяс бурӧсь лоӧны, асьным кӧ найӧ кодь лоам бурӧсь, агрономъяс велӧдӧм серти кутам уджавны.

Му-видз уджалӧм йылысь кружокъяс лӧсьӧдан могыс медводз комсомолечьяслӧн, агрономъяслӧн. Сійӧ кружокъясын уджалантор быд сиктса велӧдчӧм йӧзлы, быд гӧгӧрвоысь крестьянинлы.

Ӧні Коми муын быдлаын кутас мунны крестьяналӧн конференцияяс. Сэні му-видз уджалӧм йылысь ёна колӧ сёрнитны, колӧ корсьны туй выль ног му уджалӧмӧ вуджӧм вылӧ, колӧ шуны велӧдчыны кружокъясын.

Обласьтувса му-видз удж нуӧданінлысь корам гижны газетӧ, код ногӧн лӧсьӧдавны татшӧм кружокъяссӧ сиктъясын да кыдзи сэні уджавны, мый медводзын велӧдны.