КОМИ ТОМ ЙӦЗ, ЛЯМПА ВЫЛӦ СУВТӦЙ

Воис тӧв. Лымйӧн вевттис му. Ыджыд каръясын, заводъясын, пабрикъясын, уналаын Сӧвет Республика кузя заводитчӧ тӧвся спорт — лямпа вылын ветлӧм, ислалӧм.

Праздник лунӧ челядь, том ныв-зон, весиг олӧма йӧз лямпаяс вылын мунӧны кар сайӧ, пабрик-заводъяс сайӧ лолавны бур сынӧдӧн (воздухӧн), шойччыны вежон чӧж уджалӧмсьыс.

Миян коми йӧзлы лямпа вылын ветлӧдлӧм кажитчӧ челядь ворсӧмӧн, кӧм-пась кисьтӧмӧн. Вӧралысьяс, пӧтка кыйысьяс толькӧ ветлӧны лямпа вылын, оз позь лямпатӧгыс да.

Миян йӧз оз на тӧдны, кутшӧм бур сетӧ лямпа.

Лямпа вылын ветлӧм миянлысь дзоньвидзалун (здоровйӧ) нюжӧдӧ, тыяс да сьӧлӧм бурджыка, ёнджыка кутасны уджавны, вир лӧсьыдджыка кутас ветлӧдлыны. Лямпа миянлы кокньӧдӧ туйӧд ветлӧдлӧм, лямпа кӧмкотъяс миянлысь видзӧ, уна бур вермас вӧчны лямпа! Миян тӧв зэв кузь, лым джуджыд, туйяс омӧльӧсь; лямпанад мунны туйыд оз ков, кокньыда быдлаті ветлыны верман.

Лямпатӧ оз ков вердны, турун-нянь оз кор ни, вӧр миян уна, лямпа вӧчысь сідз жӧ — тайӧ вӧлыд донтӧм!

Швецияын, Норвегияын лямпаӧн быдлаӧ мунӧны: челядь — школаӧ, гырысьяс — гӧститны, уджавны, вичкоӧ, быдлаӧ. Сэні ичӧтысяньыс заводитӧны лямпаӧн ветлӧдлыны.

Коми йӧзлы ичӧтысянь жӧ колӧ велӧдчыны лямпа вылын ветлыны.

Бать-мамъяс, энӧ кутӧй челядьӧс лямпаӧн ветлӧмысь, ислалӧмысь!

Робур.