КРЕСТЬЯНКАЯС, ГИЖСЬӦЙ КООПЕРАТИВӦ!

Сӧвет власьт сизим во сайын нин нывбабаӧс мужиккӧд ӧткодяліс закон водзын. Сӧмын нывбаба ачыс оз пуксьы мужиккӧд ӧтвылнаӧ, пыр на асьсӧ ачыс омӧльтӧ, улӧ пуктӧ: «Ми мужикъястӧг нинӧм огӧ тӧдӧ — кытчӧ пӧ йӧй нывбабаыд лысьтан шыасьны!»

Сідз жӧ со и кооперацияысь сулалӧ бокын. Ас костас эськӧ ёна увгыласны да: со пӧ потребительскӧяд сійӧтор да тайӧ колантор абу, ставсӧ пӧ ковтӧмторъяс ньӧбалӧмаӧсь.

Дерт сідзи: мужикыд ӧмӧй тӧдас став колантортӧ нывбабалысь. Оз ӧд сійӧ керка-карта кытшовт, керка пытшкӧстӧ гажӧд, оз вурсьы-шӧрав...

А кооперативъясад уджалӧны ставыс мужикъяс: правленньӧас — мужикъяс, приказчикыс — мужик, тӧварла ветлӧны мужикъяс жӧ и общӧй собранньӧ вылас шленъясыс (кодъяс пырӧмаӧсь кооперативас) — мужикъяс.

Дерт, сэсся нывбабалы колан тӧваръясыд озджык сюр!

Нывбабаяс! Асьныд пырӧ кооперативад! Тайӧ тӧлысьын роботничаяслы да крестьянкаяслы (вӧчӧны скидка и быд аньлы) босьтӧны толькӧ пай джын гижсигас; кодлӧн деньга абу, босьтӧны пай джын донсӧ код мыйӧн вермас сетны: колькйӧн, выйӧн, мукӧдторйӧн.

Пырӧй, нывбабаяс, кооперативӧ! Сэки кутшӧм тӧвар колӧ, сэтшӧмӧс и ваясны — корӧй! Ті кӧ понданныд ӧтвылысь ёнмӧдны да вынмӧдны ассьыныд потребительскӧй лавканытӧ, сійӧ водзӧ тіянӧс кокньӧдас: восьтас яслияс посни челядьнымлы, школаяс — тіян грӧшъясныд бӧр тіянлы жӧ коркӧ воасны.

Купеч зепсьыд барышсӧ он бӧр босьт, а кооперативыд тіян асланыд ӧтувтчӧм лавка — бура кӧ уджсӧ нуӧданныд, тіянлы жӧ бур; омӧля кӧ радейтад, оз ёнмыв некор.

Ставыс тіян сайын!

Нывбабалӧн олӧм кокняммас, ачыс кӧ тшӧтш пондас и уджсӧ быдлаын нуӧдны.

Пырӧй жӧ, бур аньяс, ставӧн кооперативӧ! Кокньӧдӧй ассьыныд олӧмнытӧ! Тупкӧй озырман туйсӧ купечьяслысь да спекулянтъяслысь!

А. Н.