КОМСОМОЛ, КЫВЗЫ!

Сизим во чӧжӧн коми том йӧз ёна нин водзӧ мунісны.

Ӧні миян комсомол зэв ыджыда быдмис: ас чукӧрас ӧні ӧтлаалӧ 1300 том ёртӧс. Татшӧм ыджыд вынӧн миянлы позьӧ вӧчны зэв бур уджъяс; ми вермам став важ омӧль олӧмтӧ вужйӧдзыс путкыльтны да лӧсьӧдны коммунистическӧй бур олӧм. Тайӧ ыджыд уджсӧ ковмас миянлы нуӧдны. Миян водзын сулалӧ зэв на ыджыд удж: аслыным велӧдчыны водзӧ вылӧ уджавны, кыдзи Ленин тшӧктіс, мед ми вермам пӧрысь коммунистъясӧс вежны, найӧ уджалігӧн ёна нин мудзисны.

Велӧдчыны, кӧть и деревняын, миянлы зэв позьӧ: ставнымлы ӧтлаасьӧмӧн лыддьысьны, лыддьӧм кузяыс тӧлкуйтны. Нигаяс, газетъяс лыддьыны сюрӧ лыддьысян керкаын (Изба-читальня). Ӧти лун недель пиысь, кӧть кыдзи-а, колӧ велӧдчӧм удж вылӧ пуктыны. Энӧ вунӧдӧй Ленинлысь шуӧмсӧ: «Колӧ велӧдчыны, велӧдчыны, велӧдчыны». Велӧдчӧм удж кутасны нуӧдны тшӧтш коммунистъяс. Комсомоллы наысь кольччыны оз ков, колӧ ӧтлаасьӧмӧн накӧд тшӧтш уджавны, велӧдчыны, налысь нигаяссӧ лыддьыны.

Куш нига вылысь велӧдчӧм оз на тырмы комсомоллы, колӧ велӧдчигӧн тшӧтш уджавны мукӧд пӧлӧс удж: кооперативын, школаын, лыддьысян керкаын, мукӧдлаын. «Велӧдчигӧн стрӧит, велӧдчы стрӧитігӧн», — тадзи шуис Зиновьев (Коминтерн Исполкомын юралысь).

Вай жӧ босьтчыламӧй ставӧн чорыдджыка велӧдчыны, кыпӧдламӧй став выннымӧс, мый миян эм!

Том ёрт.