ЯРМАНГА ВЫЛӦ!

Вит лун мысти Сыктывдінкарын воссьӧ Ёгорӧй ярманга.

Войнаяс понда да олӧм киссьӧм понда тайӧ ыджыд коми ярмангаыс куслі дзикӧдз. Сӧмын на коймӧдысь воссьӧ революция бӧрын. Воддза вонас эз вӧв ыджыд — унаӧн на эз тӧдны водзвыв, колян во рӧспута торкис — эз вермыны ылісянь воны.

Таво колӧ нин быдӧнлы волыны ярманга вылӧ.

Сӧветскӧй ярмангаыд — абу важ пӧлӧс ярманга. Важӧн вӧлі ярманга вылад воӧны торъя озыр купечьяс; найӧ ярманга помысь вӧлі нажӧвитӧны зэв гырысь барышъяс, ставыс вӧлі пырӧ налы асланыс зепъясӧ. Крестьянаӧс кокньӧдӧм вӧсна найӧ эз думыштлыны, сӧмын вӧлі «кокньӧдӧны» эмбурсьыс, мыйяс найӧ вермылісны ас кӧзяйство помсьыс чӧжыштны.

Ӧні дзик мӧдногса ярмангаыд. Ӧні ярманга вылад локтӧны унджыкыс государственнӧй тӧргуйтысь организацияяс, медводзын — кооперация.

Ӧнія ярмангаыд ёнджыка крепитӧ государстволысь ньӧбасьӧм-вузасьӧм уджсӧ (торговля); ӧтпырйӧ тшӧтш ёнмӧ став оласногыс Сӧвет власьтлӧн.

Мӧд-кӧ, ӧнія ярманга сетӧ крестьяналы коланджык тӧвар донтӧгджык мукӧддырйи дорысь.

Коми Обласьтын татшӧм ярмангаыс овлӧ ӧтчыд вонас. Коми крестьяналы колӧ волыны тайӧ ярманга кежлӧ. Ярманга вылас позьӧ аддзыны быдпӧлӧс тӧвар — быдтор петкӧдасны, ваясны сэтчӧ. Сэки ньӧбны позяс донтӧгджык, бӧрйысьӧмӧнджык. Нянь ли, скӧт ли, мукӧдтор ли вузавны позяс барышӧнджык.

Деревняад эм кӧ зэв нин ӧтик общественнӧй лавка, сэтысь унатор на оз сюр ньӧбныыд, унаысь на крестьяниныд вузавлывлӧ ассьыс тӧварсӧ бокӧ, донтӧм донысь, убыткаӧн. Ярманга вылын крестьяниныд вермас вузавны любӧйлы, коді унджык сетас.

Коми вӧралысьяс сідзжӧ ассьыныс прӧмыссӧ вермасны ярманга вылын инавны донӧнджык мукӧд кадын дорысь.

Коми крестьяна, кодлӧн мый эм вузыштны — локтӧй ярманга вылӧ!

Кодлы колӧ донтӧгджык мыйкӧ ньӧбыштны ас кӧзяйствоад — локтӧй ярманга вылӧ!

Ярманга вылын — донӧнджык вузалан, донтӧгджык ньӧбан!