ТОМ ГВАРДИЯ
ДЕЙСТВУЙТӦНЫ:
Большевикъяслӧн старшӧй поколение:
ИВАН ПРОЦЕНКО
АНДРЕЙ ВАЛЬКО
МАТВЕЙ ШУЛЬГА
ЛЮТИКОВ
Том Гвардиялӧн штаб:
ОЛЕГ КОШЕВОЙ
УЛЬЯНА ГРОМОВА
СЕРГЕЙ ТЮЛЕНИН
ЛЮБА ШЕВЦОВА
ВАНЯ ЗЕМНУХОВ
ИВАН ТУРКЕНИЧ
Том гвардеецъяс:
ВАЛЯ БОРЦ
НИНА ИВАНЦОВА
ЖОРА АРУТЮНЯНЦ
СЕРГЕЙ ЛЕВАШОВ
РАДИК ЮРКИН
КЛАВА КОВАЛЁВА
ЭПИЗОДЪЯСЫН — Том Гвардиялӧн рядӧвӧй членъяс.
ЕЛЕНА НИКОЛАЕВНА КОШЕВАЯ
БАБУШКА ВЕРА
ЛЮБА ШЕВЦОВАЛӦН МАМ
КАЮТКИН — бывалӧй салдат
ФЁДОР ФЁДОРОВИЧ — доктор
Боецъяс, карса йӧз, шахтёръяс, крестьяна, йӧз вуджӧдчанінын да медбӧръя сценаын.
ЕВГЕНИЙ СТАХОВИЧ
ИГНАТ ФОМИН
ФОМИНЛӦН ГӦТЫР
немецъяс:
ГЕНЕРАЛ КЛЕР
ПОЛКОВНИК
ЛЕЙТЕНАНТ
БРЮКНЕР
БАЛДЕР
СОЛИКОВСКИЙ
Немецкӧй салдатъяс да офицеръяс.
Действиеыс мунӧ Краснодон карын, 1942 воын да 1943 во заводитчигӧн.
Пролог
Ю берег дорын дзик ва бердас ыджыд бадь куст. Мича, шондіа лун.
1.
Уля Громова да Валя Филатова
УЛЯ. Видзӧдлы, видзӧдлы, Валя, кутшӧм чудо! Кутшӧм мича! Быттьӧ изваяние, но кутшӧм чудеснӧй материалысь. Ӧд тайӧ абу мраморнӧй, абу алебастрӧвӧй, а ловъя, но кутшӧм кӧдзыд. И кутшӧм вӧсни да нежнӧй удж, мортлӧн кияс эськӧ тадзи вӧчны ньӧтчыд эз кужны... Видзӧд, кутшӧм лӧня сійӧ куйлӧ ва вылас, сӧстӧм, стрӧг... А эсійӧ рӧмыс сылӧн?... Весиг висьтавны он куж, кодыс мичаджык, ачыс али вавывса рӧмыс сылӧн... Кутшӧм мича лилия!...
ВАЛЯ. Аддзӧма нимкодясян кад! Кутшӧм тэ тешкодь, Уля! И нывъясысь торъялім. Ау! Локтӧй татчӧ! Уля аддзӧма лилия!
(«Ау!» — шыасьӧны сылы воча. И быттьӧкӧ ылын гымалӧм шы — кылӧ орудиеясысь лыйсьӧмлӧн мургӧм).
Бара...
УЛЯ. Бара...
ВАЛЯ. Збыль ӧмӧй найӧ ӧні пырасны? Господи!
УЛЯ (думыштчис). Кор ме тайӧс кыла, да татшӧм сэзь енэж аддза, аддза пу увъяс, кок улысь турун, кор чувствуйта, кыдзи сійӧс шондіыс шонтӧма, кутшӧм чӧскыд дук петӧ сыысь, — мем сэтшӧм сьӧкыд лолӧ, быттьӧ тайӧ ставыс нин ме дінысь мунӧма нэм кежлас... А тӧрыт, кор ме видзӧдлі степь вылӧ, кӧні ми сьывлім сы мында сьыланкыв, да видзӧдлі шонді лэччӧм вылӧ — муртса синваӧс куті. А тэ коркӧ аддзылін менсьым бӧрдӧм? Мунӧны красноармеецъяс, сэтшӧма мудзӧмаӧсь, буссьӧмаӧсь, и ме друг гӧгӧрвои, мый тайӧ абу кутшӧмкӧ перегруппировка, а мунӧ страшнӧй, да, да, страшнӧй отступайтӧм...
ВАЛЯ. А кар пасьтала кывсьӧ, быттьӧ пӧ миян асланым йӧз кутасны шахтаяс взрывайтны... Мем ӧні окота мунны гортӧ, тупкыны ӧшинь ставнияс, уськӧдчыны вольпасьӧ да бӧрдны... И мед кӧть война, кӧть мый — кодлы миянӧдз кутшӧм делӧ, збыль ӧд? Мый лоны — мед лоӧ...
УЛЯ (мӧвпалӧ ассьыс мӧвпъяс.) Да, да...
ВАЛЯ. Ми прӧстӧй йӧз, тыдавтӧмӧсь, мыйысь нӧ ми страдайтныс долженӧсь, збыль ӧд?
УЛЯ (чуймӧ). Мый нӧ тэ висьталан, Валя? Кыдз нӧ тадз позьӧ... Мый тэ?
ВАЛЯ. Эк, Уля, мамӧ збыль шуӧ — енмыс тэныд борд сетӧма. А ме... Ме свет вылас дзик прӧстӧй морт. И век ме мӧвпалі медся прӧстӧйторъяс йылысь... А ӧні... Уля... А кутшӧм лӧсьыда ӧд ми овлім...
УЛЯ (видзӧдӧ лилия вылӧ). Кутшӧм лӧсьыда эськӧ вермисны овны свет вылас став йӧзыс, найӧ кӧ сӧмын кӧсйисны, найӧ кӧ сӧмын гӧгӧрвоисны... (Друг.) Тӧдан, ме нетшышта тайӧс...
2.
САША БОНДАРЕВА (виччысьтӧг чепӧсйӧ куст сайысь). Нывъяс, лилия! Чур меным! Ой, тані тай джуджыд вӧлӧма!
(Саша бӧрся ещӧ тыдовтчӧны нывъяс. Найӧ сёрнитӧны ӧта-мӧднысӧ кывзытӧг, гораа, вылын нотаясӧн.)
— Сійӧ парашютӧн чеччыштіс, ей-бог! Сэтшӧм шань, чикыльӧсь юрсиа, еджыдик, синъясыс моль кодьӧсь.
— А ме эськӧ сестранад эг вермы лоны, збыль, ме вирсьыс зэв ёна пола.
— Оз жӧ ӧд эновтны миянӧс, кыдз тэ верман сідзи сёрнитныс! Оз вермы лоны сійӧ!
— Ой, кутшӧм лилияыс!
— Майечка, а эновтасны кӧ?
— Видзӧдлӧй, Сашаыс, Сашаыс!
— Друг сідзи и радейтны заводитны, мый тэ, мый тэ!
— Уля, йӧюк, кытчӧ тэ пыран?
— Вӧянныд, йӧюкъяс...
ВАЛЯ (полігтырйи видзӧдӧ Уля вылӧ). Уля, зарни, мыйла тэд сійӧ ковмис? Мыйкӧ ещӧ лоас...
САША. Уля, йӧюк, кытчӧ тэ пыран? Ой, вӧяс! Ой, ой... Судзӧдіс! Молодеч, Уля! Вай дзоридзсӧ... (Лялиясӧ сійӧ сюйыштӧ Улялы юрси костас). Ой, кутшӧма тэныд мунӧ тайӧ, весиг завидь босьтӧ. (Кывзысьӧ.) Энлӧй... Мургӧ кодікӧ... Кыланныд, нывъяс? Вот проклятӧй!
(Нывъяс кывзысьӧны самолёт шыӧ.)
МАЙЯ ПЕТЛИВАНОВА. Не ӧти, а быдса куим. «Мессеръяс» тайӧ...
САША. Кӧні, кӧні — нинӧм ог аддзы.
МАЙЯ (эскӧданаа). Ме ог жӧ аддзы, ме шысӧ кыла. Каменск вылӧ буракӧ лэбзисны, переправа бомбитны, либӧ Миллерово вылӧ.
САША. Шуан жӧ, Миллерово вылӧ! Миллеровосӧ тӧрыт нин сдайтісны.
МАЙЯ. Мый нӧ кӧть? Бойясыс лунвылынджык мунӧны.
(Уля чӧла видзӧдӧ енэжӧ.)
ТОНЯ ИВАНИХИНА. Кыдзи нӧ ми овныс кутам, нывъяс!...
МАЙЯ. Оз жӧ ӧд эновтны миянӧс? Мый йылысь тэ юасян, ог гӧгӧрво. (Велӧдігмоз.) Олӧмын ньӧтчыд оз ков жугыльтчыны, тайӧ ӧти...
САША (дэльӧдӧмӧн). Нывъяс! Ланьтлӧй! Лекция...
ШУРА ДУБРОВИНА. Тэ, Саша, пыр горзан и Майяӧс он лэдз сёрнитны, а колӧ помнитны, мый мукӧдыслӧн эм жӧ мый висьтавны...
САША (нарошнӧ чуймӧмӧн). Вот тайӧ збыль, Шурочка! И мыйысь тэнӧ, Майечка, Шураыс тадзи уважайтӧ? Вот везитӧ йӧзыдлы, веськыда завидь босьтӧ! Но ме ӧд шуткаӧн, мый тэ шуткасьыс дӧзман?
УЛЯ (синъяснас жугыля колльӧдӧ самолётъясӧс, негораа). Со, ӧні тыдавны кутісны...
(Нывъяс видзӧдӧны.)
САША (негораа). Ок, йӧй ме, йӧй... И мыйла ме эг мун спецшколаӧ, кор ыстӧны вӧлі? (Наивнӧя.) Менӧ вӧлі ыстӧны энкаведэса спецшколаӧ... Кольччи эськӧ ме татчӧ немечьяс тылӧ, и ті эськӧ нинӧм эн тӧдлӧй. Ті эськӧ тані ставныд кутінныд шогсьыны, а ме синмӧс ог лапнитлы. Мыйла эськӧ Сашаыс татшӧм спокойнӧй? А ме, вӧлӧмкӧ, энкаведэсянь татчӧ кольчча.
УЛЯ (збыльысь). Тэнӧ ыстӧны вӧлі? Збыль?
САША. Дерт жӧ! А мый?
УЛЯ. Нинӧм, ме прӧста сідз...
ВЫРИКОВА. А ме и энкаведэтӧгыс кольчча! Раз меӧдз некодлы делӧ абу, кольчча и кута овны, кыдзи овлі! А мый? Ме велӧдчысь, немечьяс гӧгӧрвоӧм серти — гимназистка кодь. Найӧ всё-таки культурнӧй йӧз, мый найӧ мем вӧчасны?
МАЙЯ (скӧрмӧмӧн). Гимназистка кодь?
САША (Вырикова моз жӧ). Муртса на гимназияысь, здрасте!
(Ставӧн сералӧны. Чорыд, страшнӧй удар.)
ТОНЯ ИВАНИХИНА. Збыль ӧмӧй кытчӧкӧ шыбитісны?
(Лӧнь. Ставӧн кывзысьӧны. Бара удар, ещӧ удар. Лӧнь)
УЛЯ (ёна повзьӧмӧн). Нывъяс! Тайӧ взрывайтӧны шахтаяс! Нывъяс!...
(Би кусӧ).
1 ДЕЙСТВИЕ
Первой картина
Донец ю джуджыд берег йылын. Пемыд на. Югдӧм водзвылын. Кыркӧтш, а сэні, уліас — ва вуджанін, коді видзӧдысьлы оз тыдав. Временнӧй оланінын — дас сизим-дас ӧкмыс арӧса том йӧз чукӧр. Кылӧ ылыс бойлӧн шы. Уліын, ю вывсянь кылӧ гӧлӧсъяслӧн мургӧм, телегаяслӧн дзуртӧм, автомобильяслӧн эргӧм, вӧвъяслӧн гӧрдлӧм, скӧтлӧн баксӧм. Горзӧмъяс, ёрччӧмъяс, бӧрдӧм, грузовикъяслӧн лёкысь тутсӧмъяс.
1.
Ю дорӧ чой горув котӧртӧны йӧз.
НЫВБАБА (киас ыджыд ёкмыль). Зарнияс, донаяс! Кӧнӧсь нӧ миян? Машӧ! (Котӧртӧ).
ГӦЛӦС. Эй, эй! Вуджӧдчанінсаяс!
БОЕЦ (котӧртӧ). Баркасыс вуджис! Эй, ті!
ШТАТСКӦЙ ПАСЬКӦМА МОРТ. А ме тіянлы висьтала, эм уполномоченнӧйлӧн приказ ни ӧти минут не виччысьны — и виччысьны ми огӧ кутӧй.
ВОЕННӦЙ ПАСЬКӦМА МОРТ. А ме тэд висьтала, вуджаніныс дзикӧдз нин тырӧма, и штатскӧйяс ӧчеред виччысьӧны... Со, видзӧдлӧй асьныд.
ШТАТСКӦЙ ПАСЬКӦМА МОРТ. А вот ме петкӧдла, кутшӧм ми штатскӧйяс.
(Мунӧны).
СТАРИК (ичӧтик воськолӧн котӧртӧ ю дорӧ). Дунька!
ГӦЛӦС. Вуджанінын!
НЫВБАБА ГӦЛӦС (чилзӧ). Ой, донаяс, пычӧдінныд! Пычӧдінныд! Машка!
2
Уліын лёкысь тутсӧ грузовик. Берег йылын тыдовтчӧ Люба Шевцова.
ЛЮБА (увлань, крукыштігмоз, но прӧстӧя). Эй, эй, балда! Збыль, тыдалӧ, тэнад гайкаясыд личалӧмаӧсь, он кӧ вермы йӧзсӧ виччысьныс, челядьӧс талялан! Кытчӧ, кытчӧ? Ак тэ, балда!
(Уліын лёкысь тутсӧ автомашина.)
ГӦЛӦС. Эй, сет туйсӧ!...
ЛЮБА. Господи! И милиционеръяс вуджӧны! Эй, эй! Ок мыйтаӧн кавшасьӧмныд! Блюстительяс! Йӧзсӧ лӧньӧдӧм пыдди асьныд усйысянныд!
ЖОРА (временнӧй оланін дорын, том йӧз чукӧрын). И мый сійӧ звӧнитӧ — ог гӧгӧрво. Вӧччӧма, быттьӧ йӧктыны кӧсйӧ, духовӧй оркестр ещӧ татчӧ сылы. Терпитны ог вермы!
ВАНЯ ЗЕМНУХОВ (кыз кодь пыді гӧлӧсӧн). А тэ сувт да видзӧдлы — кӧлуйыс грузовикас сӧмын моздортыр, а милиционеръясыс...
ЖОРА. Ме гӧгӧрвоа. Но мыйла сійӧ тешитчӧ татшӧм кадас. Абу и морт кодь, а кутшӧмкӧ контра.
УЛЯ. Кытысь нӧ сійӧ?
ЖОРА. Шевцовлӧн ныв тайӧ, Григорий Ильичлӧн. Знатнӧй забойщиксӧ эн кывлы?
УЛЯ (уважениеӧн). Шевцовлӧн? Оз вермы лоны...
ЖОРА. Абу гӧгӧрвоана нывкаыс. Ме стӧч тӧда — Ворошиловградысь фельдшерскӧй курсъяс эвакуируйтчисны, военнӧй дисциплина серти, а тайӧ — гортас локтӧма... Ог гӧгӧрво, кыдзи позьӧ татшӧм кадӧ дезертируйтны...
УЛЯ. Гашкӧ сійӧ мыйкӧ райком йывсьыс тӧдӧ?
ЖОРА. Виччысь сысянь...
ГӦЛӦС. Сет туйсӧ!
ЛЮБА (уліӧ). А, Драпкин ёрт! Кытысь нӧ тэ югдін, гӧрд витязь? Тэнӧ, небось, сӧветскӧй властьыд пӧрадок лӧсьӧдны сувтӧдіс, а тэ пырӧмыд машинаӧ да горзан, попка дурак моз — сет туйсӧ, сет туйсӧ! Но тэ — он чеччышт, эн повзьӧдчы, он чеччышт, кольӧмысь повзян ... А тэ нӧ мый, бабушка, зык-шум улас колхозлысь ӧгурцысӧ сёян! Чайтан, сӧветскӧй властьыд мунӧ да, тэныд и кывкутнытӧ некод водзын нин лоӧ? А енмыс небесаас? Сійӧ чайтан оз аддзы? Сійӧ ставсӧ аддзӧ.
УЛЯ (матыстчис). Люба! Ме Первомайкаысь комсомолка. Ульяна Громова. Тэ он тӧд, вуджис эз на райкоммолыс?
ЛЮБА. Райкоммол? (Уліӧ.) Тэ нӧ мый, лысӧм чукчи, нывкасӧ нӧйтан? Вот лэчча сэтчӧ да аслыд сетала! У, злыдьӧнь. (Улялы.) Райком? А сійӧ, кыдзи и полагайтчӧ — авангардын. Кыа петігас на сійӧ мӧдлапӧлӧ вуджис.
УЛЯ. Кыдзи тэ сёрнитан...
ЛЮБА. А тэ мый, нывка, синъястӧ сувтӧдін? Эз пышйы, ме шутита; прикажитісны сылы — вот и вуджис. Гӧгӧрвоин?
УЛЯ. А тэ? Мунан?
ЛЮБА (уклончивӧя). А ме, нылукӧ, ӧні батьӧс на колльӧда... Сӧмын некыдз ог аддзы сійӧс... А сэн тыдавны кутас — эвакуируйтчыны меным али не эвакуируйтчыны.
УЛЯ Тэ ӧд комсомолка?
ЛЮБА. Ме? (Видзӧдӧ уліӧ.) Кытысь, мый тэ, нылукӧ? (Аддзис) Аддзи! Папа!... (Улялы.) А кодлы ме лёксӧ вӧчи? И меным нинӧм оз вӧчны лёксӧ... Папа! (Ӧдйӧ котӧртӧ увлань, ю дорӧ.)
4.
УЛЯ (бӧрсяыс). Отрекитчис...
ЖОРА (надеятӧг). Тайӧ вуджанінас позьӧ недель чӧж сулавны и всё равно некутшӧм ӧчередь оз во...
УЛЯ. А немечьяс пӧ зэв нин матынӧсь.
ВАНЯ (упрямӧя). А пӧыслы оз ков веритны, и ставыс!
ГӦЛӦС (вуджанінсянь). Нёльӧд рота, вуджанінӧ —
УЛЯ (негораа). Мукӧддырйиыс, Ваня, меным кажитчӧ, мый колі мунны медицинскӧй сестраяс курс вылӧ. Тадз ӧд медся ӧдйӧ веськалан армияад, збыль? А мукӧддырйи ... Мукӧддырйи меным медся окота велӧдчыны, велӧдчыны водзӧ, — регыдӧн ӧд позьӧ воны инженерӧ либӧ учительӧ, либӧ...
(Чӧв олӧм.)
5.
Туй бокын пукалысь кык боец видзӧдӧны том йӧз вылӧ. Старшӧйыс на пиысь — Каюткин.
КАЮТКИН (помаліс куритны). Ті нӧ, том йӧз, кытысь лоанныд?
ЖОРА. А мый?
КАЮТКИН. Интересуйтча... Али секрет?
ВАНЯ. Абу. Ми Краснодонысь.
КАЮТКИН. Вот аддзанныд, Краснодонысь. А нывкаыс тайӧ, шуам, лоӧ кодлыкӧ тіянлы чой, либӧ... абу? Вот аддзанныд, нывкаыд дзик свободнӧй — абу чой, ни абу ныв, ни абу мужиклӧн гӧтыр. И Каменскын сійӧс дерт мобилизуйтасны.
УЛЯ. А сэсся мый?
МӦД БОЕЦ. Тырмас тэд, Каюткин. Быттьӧ тэ абу мудзӧмыд.
КАЮТКИН. А мый кӧть и мудзи? Менӧ, гашкӧ, нывлӧн судьбаыс беспокоитӧ. Менам гашкӧ сьӧлӧм эм, а тэнад абу... Вот тіянӧс, нывка, мобилизуйтасны да сувтӧдасны регулировщицаӧн... Улич кузя дугдывтӧм движение дырйи. Бурджык нин миян автоматчикъяс ротаӧ локны, ей-бог! Ті, зонъяс, регыд Россияӧ веськаланныд, а нывъясыд сэні кӧть пруд прудит. А миян ротаын ниӧтик ныв абу. А татшӧм нывкаыс миянлы зэв ёна колӧ — медым велӧдіс мичаа сёрнитны да поведениеным мед лои благороднӧй. А?
ВАНЯ. А тайӧ нин — кыдзи сылы аслыс окота лоӧ.
КАЮТКИН. Примитім эськӧ ми тэнӧ, мича ныв, миян ротаӧ нэм кежлӧ и приварок вылӧ, и довольствие вылӧ эськӧ — шильнӧйӧ, мыльнӧйӧ, зачислитім, мед видзас енмыс да православнӧй вичко тіянлысь мичлуннытӧ — быд асыв кутам кофейӧн юктавны. Юмолӧн.
ЖОРА. Тіян, тыдалӧ, сёрнитчӧмъяс оз артмыны сыкӧд.
КАЮТКИН. У, ми сыкӧд сёрнитчам. Ми асланым ротасянь сэтшӧм войтырӧс ыстам, найӧ кӧть кутшӧм нылӧс ыштӧдасны...
(Ю вылысь кылӧ команда.)
Эк, эг удит сёрнитчыны сыкӧд... Но быд бурсӧ, гашкӧ, мӧдлапӧлын аддзысьлам.
(Ёртыскӧд сійӧ котӧртіс увлань, ю вылӧ.)
6.
УЛЯ (видзӧдӧ Каюткин мунӧм вылӧ, зумыштчӧма). А мый, збыль кӧ мунны? Вот босьтны ӧні да и мунны. Автоматчикъяскӧд тшӧтш?
ВАНЯ. Тайӧ тэ збыльысь?
УЛЯ (эз вочавидз). Кутшӧм лӧсьыд век вӧлі ю бокад, Ваня... Ме сэтшӧма радейта юсӧ... А талун вот... И сэтшӧм сьӧкыд видзӧдны тайӧ кӧтасьӧм вӧвъяс вылас, пушкаяс, повозкаяс, раненӧйяс вылӧ...
(Туй кузя, ю дорӧ лэччанінланьӧ ньӧжйӧник локтӧ Андрей Валько)
ЖОРА. Шш... Видзӧдлӧй!
УЛЯ. Коді нӧ тайӧ?
ВАНЯ. А тайӧ... Валько, первой-бис шахтаысь директор.
УЛЯ. Со сійӧ кутшӧм.
ВАЛЬКО (воӧ на дінӧдз). Краснодонскӧйяс? Ӧчередь виччысянныд?
ВАНЯ. Виччысям, Валько ёрт.
ВАЛЬКО (внимательнӧя видзӧдӧ). Школьникъяс?
УЛЯ. Выпускникъяс. А ӧні ставыс ӧткодь...
ВАНЯ. Войнаыс быттьӧкӧ наросьнӧ виччысис, медым школа помалісны, а сэсся веськыда биӧ...
ВАЛЬКО (тэрмасьтӧг). Да... тані тіянлы мӧд наука, чорыдджык. Да ме чайта велалам, велалам ми пазӧдны найӧс сідз, мый югыдлунсӧ найӧ оз аддзыны...
7.
Тыдовтчис боец-пехотинец, зэв ыджыд тушаа, киас кутшӧмкӧ тубрас.
БОЕЦ. Ёртъяс!... Мем висьтавлісны: тані пӧ кытӧнкӧ шахтёрскӧй машина эм?
ВАЛЬКО (коса). Но, ме сэтысь.
БОЕЦ. Извинитӧй, ёрт, кӧсъя тіянлы инструмент сетны. Шахтёръяс — мастерӧвӧй йӧз, инструмент згӧдитчас тіянлы. А меным походын сӧмын сьӧктӧдӧ сійӧ. Аддзылід? Слесарнӧй, ставнас выль.
ВАЛЬКО. Эг гӧгӧрво. Вузалан али мый?
БОЕЦ (гӧрдӧдіс). Кыдзи тэнад кывйыд бергӧдчӧ? Ме сійӧс туй вылысь аддзи. Мунам, а тайӧ тадзи трапка пиын и куйлӧ, кодкӧ, тыдалӧ, уськӧдӧма.
ВАЛЬКО. А гашкӧ шыбитіс, медым кокниджык лои мунныс?
БОЕЦ. Мастерӧвӧй морт инструменттӧ оз шыбит. Уськӧдіс.
ВАЛЬКО. А... Но, аттьӧ, аттьӧ, другӧ...
БОЕЦ. Ладнӧ кӧть иналі, а то шыбитны жаль — бур инструментыс. А меным походад, сьӧкыд выкладканад — кытчӧ нин! Видза колянныд! (Котӧртіс.)
ВАЛЬКО (видзӧдӧ бӧрас). Да... Морт... (Сійӧ перйӧ трубкасӧ, тыртӧ табакӧн, пуксьӧ туй бокӧ. Позьӧ чайтны, мый сійӧ оз и кывзысь том йӧз сёрниӧ, кодъяс чукӧртчӧмаӧсь временнӧй оланінӧ, сӧмын ӧткымынысь видзӧдлывлӧ на вылӧ.)
8.
ЖОРА (мӧвпалӧмӧн). Ӧні колӧ военнӧйӧн лоны. Кытчӧдз мунӧ война, колӧ лоны сӧмын военнӧйӧн. А кор войнаыс помасяс — колӧ лоны инженерӧн, медым овмӧс восстанавливайтны... А юристӧн лоны ӧнія кадӧ абу интереснӧ.
ВАНЯ (дӧзмыштӧмӧн). Мыйла тэ шуан, мый ӧнія кадӧ абу интереснӧ лоны юристӧн?
ЖОРА. А сы вӧсна, мый абу сійӧ главнӧй. Гӧгӧрвоан? А тэнӧ кӧ поэзияӧ кыскӧ — то колӧ тэныд литературнӧй вузӧ.
ВАНЯ. А вот тайӧ меным буретш оз и ков. Пушкин ни Тютчев эз велӧдчывны литературнӧй вузас. Да сэк эз и вӧв татшӧмыс. И вообще учебнӧй заведениеын поэтӧ велӧдчыны оз позь.
ЖОРА (чорыда). Быдторйӧ позьӧ велӧдчыны.
ВАНЯ. Но, вот! Велӧдчыны поэтӧ учебнӧй заведениеын — сійӧ прӧста тешкодь. Быд морт должен заводитны овныс кутшӧмкӧ профессиясянь. Шуам, Тютчев вӧлі дипломат, Гарин — инженер, Чехов — доктор, Толстой — помещик.
ЖОРА. Лӧсьыд профессия...
(Валько нюммуні, том йӧз видзӧдлісны сыланьӧ.)
ЖОРА (гусьӧн моз). Кывзы, любовнӧй стихъяс тэнад абуӧсь? Лыддьы мыйкӧ любовнӧйӧс!
ВАНЯ (чуймӧмӧн). Кутшӧм нин любовнӧй, мый тэ!
ЖОРА. Збыль ӧмӧй тэ Ковалева Клавалы ни ӧти стихотворение эн силы?
ВАНЯ. Дугды, эн сӧр тыртӧм сёрнинад.
ЖОРА. Збыль он гиж? Правильнӧ! Кад ӧмӧй ӧні любовнӧй стихъяс гижны, кыдзи эсійӧ Симоновыс гижӧ? Ӧні колӧ народӧс воспитывайтны враг дінӧ миритчытӧм лӧглунӧн! Колӧ гижны политическӧй стихъяс. Маяковский, Сурков, вот найӧ да! (Сьӧлӧмсяньыс лыддьӧ.) «Общӧй памятникӧн миян мед лоӧ бойясын стрӧитӧм социализм!» Мый? Крепыда шуӧма!...
ВАНЯ. Абу таын делӧыс. Гижны позьӧ быдтор йылысь... Ми кӧ олам сэтшӧм олӧмӧн, код йылысь, гашкӧ, медбур йӧзыслӧн дзонь поколениеяс мечтайтлісны — миян эм право гижны быдтор йылысь, ставыс тайӧ колана да мӧдысь оз лолы.
ЖОРА (пӧся). Тэ местаын кӧ эськӧ и ме эг ло юристӧн. Тэнсьыд стихъястӧ ме век окотапырысь лыддявлі — и стенгазетаысь, и «Парус» журналысь. Ме тэныд веськыда шуа — тэнад эм талант.
ВАНЯ. Кутшӧм нӧ тайӧ талант. Ӧні сідз на — стихторъяс лякам. Пушкин — вот сійӧ да! Сійӧ менам ен! (Лыддьӧ.)
ВАЛЬКО (виччысьтӧг да волнуйтчӧмӧн). Ок, том войтыр!... Да ті ӧд асьныд онӧ тӧдӧй, кутшӧм ті том йӧз... А сійӧ думайтӧ, мый миянлысь олӧмнымӧс помаліс. Эз! Локтіс и бӧр мунас... А олӧмыд оз сувт, аслас туйӧд мунӧ — велӧдчыны, уджавны!... Эк, том йӧз, ті кутанныд на сэтшӧма овны, сэтшӧма овны! (Ӧвтыштӧ кинас да ньӧжйӧник мунӧ увлань, ю дорӧ.)
9.
ВАНЯ (горӧдӧ). Валько ёрт...
ОЛЕГ КОШЕВОЙ (тыдовтчӧ). Ваня!
ВАНЯ (бергӧдчыштӧ). Кошевой!... Олег!...
ОЛЕГ (видзӧдӧ Вальколы бӧрвылас). Коді нӧ тайӧ?
ВАНЯ. Валько.
ОЛЕГ (здоровайтчӧ том йӧзкӧд и пыр на видзӧдӧ Валько вылӧ). Талун асывнас ӧд тайӧ ассьыс шахтасӧ аслас киясӧн взорвитіс...
ВАНЯ. Сылы эськӧ ӧдйӧджык колӧ эсчӧ, мӧдлапӧлас.
ОЛЕГ (пӧся). Оз, сійӧ абу сэтшӧм. Ӧтнасӧн сійӧ оз мун, кытчӧдз ставӧс оз вуджӧд.
УЛЯ. Та кодьясыс — найӧ обязанӧсь медводз мунны.
ОЛЕГ. Обязан, а мунас медбӧрын. Вот аддзанныд... (Небыда.) Ваня, друг! Кутшӧм мем нимкодь, мый тэкӧд паныдасим. Бур, мый аддзысим. Ёна нин ме тэысь гажтӧмтчи. Аддзылін? (Гӧгӧр видзӧдлӧ.) А стихъяс тэ лыддян? Э, вокӧ, видзӧд кымын сочинение ми гижлім школаын сійӧ война йывсьыс, мечтайтлім, миян батьяслы вежалім, а сійӧ вот миян дінӧ локтіс, быттьӧ нарошнӧ, медым тӧдмавны, кутшӧмӧсь ми... А ми со — Донец мӧдлапӧлӧ, Дон сайӧ...
ЖОРА. Но, райкомлӧн распоряжениеыд ӧд сійӧ распоряжение.
ОЛЕГ (шога). Да, со кӧні лои паныдасьны.
ЖОРА. Тані, вуджанінын ставӧн паныдасьӧны. Сӧмын со Ваня некыдз оз вермы аддзыны ӧти ёртӧс, гӧгӧрвоан? И ёртыс сійӧ, кыдзи ме чайта, подруга...
ВАНЯ. Но, ӧвсьы тэ, пожалуйста. (Олеглы.) А помнитан, войдӧрлун ми тэ ордӧ чукӧрӧн пыравлім ва юны, и тэ миянӧс тӧдмӧдін аслад пӧчыдкӧд. Сійӧ, мый, тэкӧд мунӧ?
ОЛЕГ. Оз, пӧчӧ кольччис. И мамӧ кольччис...
УЛЯ. Видзӧдлӧй, мый вӧчсьӧ вуджанінас. Ок и жальӧсь йӧзыс...
ОЛЕГ. Да, жальӧсь. Торъя нин мамъясным жальӧсь. Мый ӧні найӧ переживайтӧны и мый ещӧ лоӧ переживайтны...
(Югдӧмводзвывса пемыдсӧ косявлӧны артиллерийскӧй залпъяслӧн югнитлӧмъяс)
УЛЯ. Тӧданныд мый, ме свет вылас нинӧмысь ог пов. Ме ог пов некутшӧм тышысь, некутшӧм сьӧкыдлунысь, мучитӧмысь, но тӧдны кӧ эськӧ водзвыв, мый вӧчны. Мыйкӧ грознӧйтор ӧшйис миян весьтӧ...
ВАНЯ (друг.) Видзӧдлӧй, боецъяс вуджӧны...
10.
Улісянь бара тыдовтчис Каюткин.
КАЮТКИН (матыстчис Уля дінӧ, ӧні сійӧ лӧнь да серьёзнӧй). Ӧти минут дыра сӧмын... Эн дивит, беспокоитышта. Ме кывлі, ті пӧ быттьӧ Каменскӧ мӧдӧдчанныд. Оз позь тіянлы Каменскӧ — сійӧс регыд нин немеч босьтас. Миянлы быть колӧ сэтчӧ мунны, а тіянлы оз позь. А мый ме тіянлы шуи — ті некодлы эн висьталӧй, менам сы вылӧ праваыс эз вӧв. Сӧмын ми ӧд ас йӧз, и меным жаль, ті кӧ весь юрнытӧ воштанныд. А тась тіянлы ӧдйӧджык колӧ мунны. Вермас суӧдны, гӧгӧрвоан? Мый нӧ тэ чӧв олан?
УЛЯ. Сідз, видзӧда...
КАЮТКИН. Кыдзи нӧ тэнӧ шуӧны?
УЛЯ. Ульяна... Громова...
КАЮТКИН. Эм абу тэнад аслад карточкаыд?
УЛЯ. Абу...
КАЮТКИН (жугыля). Абу...
УЛЯ (друг, негораа). Карточка менам абу. Но тэ кӧ ме вылӧ бура видзӧдлан, менӧ ньӧтчыд он вунӧд...
КАЮТКИН (шога). Да, ме ог вунӧд тэнӧ. Вунӧдны тэнӧ оз позь. Прӧщай! (И сійӧ котӧртіс увлань).
ОЛЕГ (котӧртіс дзик кыр йылас да видзӧдӧ Каюткин мунӧм вылӧ). Ваня, тэ гӧгӧрвоан? Тэ сӧмын думышт! Ӧд немечьяс кӧ Донец сайынӧсь, а со этійӧ боецъясыс кӧ пондасны найӧс кутны Каменск дорын — артмӧ, мый налы не нин мынны — и автоматчикъяслы и тайӧ салдатыслы — некод нин мынны оз вермы... А найӧ тӧдӧны та йылысь — и мунӧны. Гӧгӧрвоан, мем эськӧ окота лоны вот татшӧм мортӧн...
ВАНЯ. Да, тайӧ вот йӧз...
ОЛЕГ. Видзӧд, видзӧд! Валько нин вуджӧ и.
ВАНЯ. Вот и бур!
ОЛЕГ (радпырысь). Мортыс кутшӧм, а? Тӧдан — ме чайта, талы кӧ эськӧ тшӧктісны вуджӧдчӧмсӧ котыртны — ӧти здукӧн эськӧ ставыс вӧліны мӧдар берегас.
ВАНЯ. Но, шуин жӧ: ӧти здукӧн...
ОЛЕГ (увлечённӧя). Но всё-таки ӧдйӧ! Гӧгӧрвоан? Кӧть мый, а свет вылас медыджыд выныс, вокӧ, — сійӧ организациялӧн вын. А Валько... Да, мем эськӧ окота вӧлі лоны сэтшӧмӧн, кутшӧм и эм Валько — уджавны, действуйтны, медым ӧдйӧ и мед став йӧзыс тэкӧд вӧліны...
ЖОРА (кывзысьӧ). Кыланныд? Ме ногӧн — лэбӧны... Сё збыль «мэссеръяс» лэбӧны.
(Ставӧн кывзысьӧны.)
ВАНЯ. Тэд кажитчис кӧ а...
УЛЯ. А ме, зонъяс, быттьӧкӧ аддза, кыдзи миян вылӧ сьӧд вуджӧр локтӧ. И бордъясыс сылӧн гырысьӧсь-гырысьӧсь. И кажитчӧ суӧдас да и пычӧдас.
ОЛЕГ (читкыртӧ синъяссӧ). Но, бордъястӧ, шуам, позьӧ и чеглавны.
ЖОРА. Дзик сідз!
11.
Сійӧ жӧ здукас ылысь кылӧ удар. Сцена сайын кузя горӧдӧны. Котӧртӧны йӧз.
ЖОРА. Водӧй!
ГӦЛӦС. Воздух!
МӦД ГӦЛӦС. Вуджӧдчанінын!
(Котӧртӧны йӧз. Вуджӧртӧ розӧвӧй ковтаа ныв).
ВАНЯ. Клава!
КЛАВА. Ваня! Ваня, видзӧд!
ОЛЕГ. (Негораа). Танкъяс...
Сценавывса йӧз веськалӧны матысмысь немецкӧй танкъяслӧн прожекторъяс би улӧ. Кодікӧ шыбитчис ӧтар бокӧ, кодікӧ мӧдарӧ да быттьӧ сигнал серти — ставӧн лӧнисны. «Ӧні сёр нин» — шуис кодкӧ. — «Немечьяс». И сэк жӧ — сьӧкыда бувгӧм да сэн, уліын, вуджӧдчанінсянь матын — взрыв.
КЛАВА (шӧпкӧдӧмӧн). Ванюк!
(Сэки жӧ кылӧ повзьӧм ныв гӧлӧс: «Батьӧ!»)
ОЛЕГ. Видзӧдлӧй! Машина сотчӧ. (Котӧртӧ увлань).
КЛАВА. Мый сійӧ вӧчӧ, Ванюк! Сійӧ ачыс пӧгибнитас...
УЛЯ (ёна повзьӧмӧн). Тэ видзӧд, видзӧд, Ваня, сотчӧм сьӧд му, и йӧзыс ставыс сотчалӧмаӧсь! Господи!
ВАНЯ. Коді нӧ тайӧ? Нинӧм оз тыдав...
КЛАВА. Тайӧ Люба Шевцова... Люба!...
ЖОРА (нимкодя). Молодеч, Олег!... Веськыда би пытшсьыс!
12.
Садьтӧм Люба Шевцоваӧс ки йылас ньӧжйӧник вайӧмӧн улісянь тыдовтчӧ Олег.
ОЛЕГ. Отсыштӧй мем.
ЖОРА. Мый нӧ? Ранитчӧма?
ОЛЕГ. Сылысь батьсӧ виис.
ЖОРА. Шевцов пӧгибнитіс? Ай, ай, ай...
ОЛЕГ. Уля, отсышт мем...
(Уля копыртчӧ Люба весьтӧ. Зонъяс зільӧны Любаӧс садьсьӧдны).
ГӦЛӦС (йӧз чукӧрсянь). Локтӧны.
ОЛЕГ (зэв скӧрысь). Немечьяс... Ӧтлаын сулалӧй, ми долженӧсь лоны ӧтлаын.
(А тані, прожектор би улын измӧм йӧз пӧвстын, тыдовтчӧ Валько. Паськӧмыс сылӧн кӧтасьӧма, юрси кузяыс ва визувтӧ).
Валько ёрт!
ВАЛЬКО. Шш!...
13.
Сцена вомӧн ӧдйӧ мунісны немечьяс. Кымынкӧ салдат пыр жӧ котӧртісны увлань. Офицер сувтіс йӧз чукӧр водзӧ. Салдатъяс, прикладӧн тойлалігтырйи, нуӧдісны кык боецӧс. Немечьяс корсьысигмоз видзӧдӧны йӧз чукӧр вылӧ.
КЛАВА (тэрыба шӧпкӧмӧн, нинӧм вылӧ видзӧдтӧг). Мем сэтшӧм нимкодь, Ваня... Сэтшӧм нимкодь... Менам сьӧлӧм вылысь кутшӧмкӧ сьӧкыд тор уси... А ме нин думайті, меся, буракӧ, тэнӧ ог нин аддзыв...
ВАНЯ (сідзжӧ тэрмасьӧмӧн шӧпкӧдӧ, но гӧгӧр видзӧдӧ). Но тэ верман гӧгӧрвоны? Сизимдас сизим учреждение — и ставыслы лӧсьӧд транспорт. Вӧвъяс, машинаяс, грузитчӧм, фураж, ӧтилӧн шынаыс косяссьӧма, мӧдлысь бричкасӧ колӧ кузнечаӧ нуны... Ми Жоракӧд огӧ нин помнитӧй, кор и узьлім...
КЛАВА (волнуйтчӧ). Ваня, Ванюк, ме гӧрдитча тэӧн... Ме сэтшӧма гӧрдитча тэӧн... Ме... Менам быттьӧкӧ сьӧлӧм вылысь из уси...
ОФИЦЕР (помаліс йӧз чукӧр видлалӧм) Коді ещӧ эм военнӧй?
(Ставӧн чӧв олӧны. Офицер лэччӧ ю бокӧ.)
ГӦЛӦС (йӧз чукӧрсянь). Видзӧд, штатскӧйястӧ оз и вӧрзьӧдны...
МӦД ГӦЛӦС. Сы вылӧ эм немецкӧй командованиелӧн приказ — местнӧй олысьясӧс не ӧбӧдитны.
ВАЛЬКО (мрачнӧя). Он мӧй аддзы, кадыс налӧн абу. А то эськӧ сетасны тэныд ватор юыштны.
ГӦЛӦС. А тэ, тыдалӧ, юыштӧмыд нин.
ВАЛЬКО (сьӧкыда). Да, ме юи нин... Сӧмын эг доз пыдӧсӧдзыс.
КОЙМӦД ГӦЛӦС (оз гораа). Да, коді удитіс, сійӧ асланым му вывті мунӧ, а ми...
14.
ОЛЕГ (локтіс Валько дінӧ). Мем колӧ тіянкӧд сёрнитыштны... Зэв ёна колӧ...
ВАЛЬКО. Бур. Сӧмын сувтсӧн лоӧ, муыс зэв ва, лысваа, а ме сідз нин сквӧзь кӧтаси. (Синъяснас колльӧдіс немецкӧй салдатъясӧс). Но, смертьыс буракӧ неуна вешйыштіс на...
(Найӧ вежыштісны бокӧджык).
ОЛЕГ. Мыйла нӧ ті мӧдлапӧвсяньыс бӧр локтінныд? Ті ӧд вуджавлід, ми аддзылім...
ВАЛЬКО. Вуджавлі... Но вуджавлі, ме, зонмӧ, сы вӧсна, мый переправаса командирыс вӧлі мӧдлапӧлас. Ме сылысь, сукин сынлысь, кӧсйи тымуссӧ нетшыштны, да кӧть мый, а заставитны, мед сійӧ вуджӧдчанінас аслас йӧзкӧд порядок лӧсьӧдіс... А мыйӧн этійӧ танкъясыс югдӧдісны, мем кажитчис, — лёктор мӧвпыштасны йӧзыд ме йылысь, кор став ас йӧз пытшкысь — ӧтнамӧн мӧдар берегас кольчча. Вот сэсся ме и бӧр локті...
ОЛЕГ. Варччӧмӧн?
ВАЛЬКО (зумышӧн). Аддзан ӧд...
ОЛЕГ. Отсалӧй мем аддзыны кодӧскӧ карын миян подпольщикъяс пӧвстысь.
(Чӧв олӧм.)
ВАЛЬКО. Збыль кӧ шуны — ме тэнӧ омӧля тӧда... Но... Ме эска тэныд.
ОЛЕГ. Аттьӧ...
ВАЛЬКО. А подпольщикӧс буракӧ тэ аддзин нин... А мый миянлы водзӧ вӧчны — та йылысь ӧні сёрнитыштам... (Внимательнӧя). Мый, сьӧкыд?
ОЛЕГ. Да, на вылӧ видзӧдны и то сьӧкыд...
ВАЛЬКО (ньӧжйӧ). Тэ решитчӧмыд да сійӧн и тадз сибӧдчин ме дорӧ. Менам ӧд аслам сэтшӧм жӧ характерӧй. Тӧрыт на — ме муна вуджӧдчанінӧ, а юрысь менам оз пет — то кыдзи ми шахта взорвитам, то аддза, армия отступайтӧ, беженцы мучитчӧны, челядь. И сэтшӧм шог сьӧлӧм вылын! И он тӧд — кодлы медводз отсавны — кытчӧ асьтӧ воштыны... А ӧні менам — ӧти туй, чумаклӧн моз. А тайӧ ми вокыдлы — медся главнӧйыс. Гӧгӧрвоан?
ОЛЕГ. Гӧгӧрвоа.
ВАЛЬКО. Тэ со мый... Тэ тайӧ войтырыскӧд йитӧдсӧ эн вошты. Тайӧ ас йӧз. Асьтӧ эн явӧст, а йитӧд накӧд кут. Да ещӧ том йӧзӧс корсь, кодъяс вермӧны уджавны, кодъяс биаиз кодьӧсь. Но, смотри, менам тӧдтӧг нинӧм эн вӧч, сюран. Ме тэд висьтала, кор да мый тэныд вӧчны.
ОЛЕГ. Ті тӧданныд, кодӧс кольӧдісны карас?
ВАЛЬКО. Ог тӧд. Ог тӧд, но аддза... Но, а ӧні мун... И регыдӧн кӧ ме йылысь он кывлы — эн корсьысь. Виччысь. Кор тэ мем ковман, сэк ме тэнӧ аддза.
ОЛЕГ. Аттьӧ тіянлы.
ВАЛЬКО (ставныслы). Но, зонъяс да нывъяс... (И друг сӧмын шогапырысь ӧвтыштіс кинас — муніс.)
15.
Клава, Уля, Люба — неуна бокынӧсьджык зонъясысь.
УЛЯ. Ті думыштӧй, ті сӧмын думыштӧй, ӧд найӧ Краснодонӧ нин пырисны, миян уличьясӧ, миян садъясӧ, керкаясӧ. Кыдзи нӧ сэн миян бать-мамным, мый найӧ переживайтӧны?
КЛАВА. Мый нӧ ми кутам вӧчны, нывъяс?
ЛЮБА (курыда). Кыдзкӧ ӧд олам...
ВАНЯ. (Олеглы). Но мый, мый тэд сійӧ висьталіс?
ОЛЕГ. Мый йылысь?
ВАНЯ. Он-ӧ нин тэ кӧсйы мекӧд дзебсясьӧмӧн ворсны? Абу нин зэв сьӧкыд тӧдмавны тэнсьыд подпольнӧй йитӧдъястӧ, найӧ сэтшӧмӧсь жӧ, кутшӧм и менам. Тэ нӧ збыль чайтан, мый ме та йылысь эг думайтлыв?
ОЛЕГ. Ваня... Сідзкӧ ӧтлаын?
ВАНЯ. (негораа). Кытчӧдз ме пытшкын ветлӧ вир.
ОЛЕГ. Тӧдан мый, сійӧ ӧні нинӧм на оз тӧд. Но шуис: аддза пӧ. И сійӧ аддзас. (Индӧ Клава вылӧ.) Тэ, смотри, колльӧдан Клаваӧс Нижней Александровкаӧдз — да эн ылав сэтчӧ.
ВАНЯ (яналӧмӧн). Мый тэ, ог дерт! Та йылысь тэ эн думайт. Найӧ ӧд мамыскӧд ас кежаныс, батьтӧгыс — ме найӧс устроита и бӧр.
ОЛЕГ. Радейтан сійӧс?
ВАНЯ. Татшӧмторъяс йывсьыс ӧмӧй сёрнитлӧны?
ОЛЕГ. Тэ эн яндысь. Тайӧ ӧд буртор. Сійӧ сэтшӧм мича, шань, а тэ... Тэ йылысь весиг кывйыс оз сюр меным.
ВАНЯ. Да, сымында лоӧ переживайтны и миянлы и став йӧзыслы, а олӧмыд всё-таки зэв мича...
ОЛЕГ (сьӧлӧмыс вӧрзьӧ). Збыль... Збыль...
ЖОРА (том йӧз пӧвстын). Каннибалъяс! Миян народ ӧмӧй вермас миритчыны сыкӧд? Миян народ, мукӧд оккупированнӧй местаясын моз жӧ, дерт кутчысяс ӧружиеӧ. Менам батьӧ лӧнь морт, но ме зэв бура тӧда, мый сійӧ босьтас ӧружие. А мамӧ аслас характерӧн — сійӧ дерт нин босьтас ӧружие. А ми, том йӧз, долженӧсь дзик пыр жӧ йитчыны подпольнӧй организациякӧд да... кутчысьны ӧружиеӧ...
ОЛЕГ. Мый сійӧ горзӧ?
ВАНЯ (матыстчис). Кывзы тэ, абрек, збыльысь шуа, тэкӧд быдӧн сӧгласен. Но кывтӧ кутышт. Ӧти-кӧ — тайӧ быдӧнлӧн аслас сӧвесть сайын. А мӧд-кӧ, кодкӧ кӧ тӧдлытӧг кывлас, мый сэк лоас тэнад планъясӧн?
ЖОРА. Мыйла тэ менӧ абрекӧн шуин?
ВАНЯ. Сы вӧсна, мый тэ сьӧд да действуйтан наездник моз...
ЖОРА (зэв надзӧ). Тӧдан мый, Ваня, ме кӧ вуджа подпольеӧ да менам кӧ тайӧ артмас, гӧгӧрвоан, ме дерт жӧ босьта аслым Абрек ним. Ладнӧ?
ОЛЕГ (матыстчис). Зэв бур, Абрек ёрт...
(И он гӧгӧрво, шуткаӧн тайӧс шуӧма али збыльысь. Найӧ видзӧдӧны ӧта-мӧд выланыс внимательнӧя да сосредоточеннӧя.)
Мӧд картина
Стандартнӧй каменнӧй керкаын Кошевойяслӧн ыджыд комната. Уличӧ петан кык ӧшинь тупкӧма сьӧд шторыӧн, комнатаын Елена Николаевна, бабушка Вера, Сергей Тюленин, Валя Борц.
1.
ЕЛЕНА НИКОЛАЕВНА (шторысӧ муртса восьтыштӧмӧн). Войыс кутшӧм пемыд...
БАБУШКА ВЕРА. Лена, Лена, тэ кӧть мед сёйыштін ичӧтика...
ЕЛЕНА НИКОЛАЕВНА. Ме Олегӧс виччысьыштла...
БАБУШКА ВЕРА. А омӧльыс мед тіянӧс босьтас, кор ті сійӧ немечьяс вӧснаыс ассьыныд сьӧлӧмнытӧ дзугльӧдланныд.
СЕРГЕЙ. Ӧні сійӧ регыд нин воас.
ЕЛЕНА НИКОЛАЕВНА (беспокойнӧя). Ті ӧмӧй энӧ ӧтлаын вӧлӧй? Олег шуӧ вӧлі, ті пӧ ӧтлаын лоанныд.
ВАЛЯ. Первойсӧ ми ӧтлаын вӧлім, а сэсся янсалім. А гортӧ мунны миянлы Сергейкӧд сёр нин — быдлаын патрульяс, вот ми тіянӧ и...
ЕЛЕНА НИКОЛАЕВНА. Кутшӧм дыр сійӧ оз лок... Кӧні нӧ ті вӧлінныд, челядь?
СЕРГЕЙ (уклончивӧя). Сійӧ регыд воас.
БАБУШКА ВЕРА. Лена, тэ ичӧтика сёйышт.
ЕЛЕНА НИКОЛАЕВНА. Эн гора, мамӧ... Улич кузя дугдывтӧг ветлӧны...
БАБУШКА ВЕРА. Со кытчӧдз воис пӧрысьӧ-нэмӧ Вера пӧч — тыр гӧлӧсӧн сёрнитны эз кут позьны. А ме кута сёрнитны кыдзи меным окота, ме пӧрысь нин, смертьысь ме ог пов, мед кӧть грӧзитчӧны... Со кутшӧм молодеч вӧлӧма на, ӧнтай штабнысӧ и казарманысӧ ӧзтіс да налӧн салдатъясыс улыс гач кежсьыс ӧшинь пырыс чеччалісны. Вот тайӧ молодеч!
ВАЛЯ (видзӧдӧ Сергей вылӧ). Да, сюсь морт, тыдалӧ.
СЕРГЕЙ (надзӧ). Ладнӧ, тырмас.
ЕЛЕНА НИКОЛАЕВНА (волнуйтчӧмӧн). Кык час нин... Мамӧ, ме кильчӧ вылӧ петала.
БАБУШКА ВЕРА. Петав, петав... Ті, гашкӧ, том войтыр, ужнайтанныд мекӧд? Ме сэтшӧм чӧскыд свеклӧа борщ пуи, но лунтыр некод оз кӧсйы сёйны...
ВАЛЯ. Аттьӧ, оз ков.
(Бабушка Вера ӧвтыштіс кинас да петіс. Сергей да Валя колины кыкӧн.)
2.
ВАЛЯ. Тэ нӧ мый?
СЕРГЕЙ. Синъясӧй куньсьӧны. Кольӧм вой эг ланьтлы, и ӧні бара...
ВАЛЯ. Мыйла нӧ тэ кольӧм войсӧ эн узь?
СЕРГЕЙ. Ме? Удж вӧлі...
ВАЛЯ. Пӧжар вылӧ видзӧдін?
СЕРГЕЙ. А мый нӧ сы вылӧ видзӧдныс? Зэв тай...
ВАЛЯ. Но, кыдз гажыд. Сӧмын ме ӧд ставсӧ гӧгӧрвоа.
СЕРГЕЙ (торкис). А батьыд нӧ кыдзи?
ВАЛЯ. Дзебсясьӧ. (Самолюбивӧя.) Сэтшӧм унизительнӧ дзебсьӧмӧн овны аслад гортын. Мамӧ шуӧ, сылы пӧ колӧ мунны мӧд карӧ, ӧд сылӧн оз нин вывті ёна синмӧ шыбитчы еврейскӧй чужӧмыс. Збыль ӧд?
СЕРГЕЙ. А мыйла нӧ ті, эськӧ, эн пышйӧй?
ВАЛЯ. Ми? А мый пышйыныс! (Презрительнӧя). Кодысь пышйыныс? Мед кӧть весиг батьӧ да мамӧ удитісны, а ме эськӧ всё равно кольччи.
СЕРГЕЙ (здӧвӧля). Тайӧ збыль...
ВАЛЯ. Ставыс кыдзкӧ артмис не сідз... Кымынысь ме заводитлі лётнӧй школаӧ мунны, а менӧ эз босьтны. И дуракъяс. Эк, эськӧ некор кӧ найӧ, тайӧ немечьясыс эз волыны! Сы мында вын миян пытшкын, сэтшӧмторъяс йылысь мечтайтлім, кажитчӧ вӧлі и олӧмыс оз тырмы, а ӧні весиг вернӧй ёртӧс сьӧкыд аддзыны...
СЕРГЕЙ (дӧзмыштӧмӧн). Ёрттӧ аддзыны всё-таки позьӧ... (Чӧв олыштӧм бӧрын). Ме тэныд зажигательнӧй смеся бутылка вит кымын сета, дзеблан? Медым киподулын вӧліны. Сӧмын немечьяс вермасны тіянӧ сюйсьыны.
ВАЛЯ (самолюбивӧя). А мый нӧ кӧть немечьяс?
СЕРГЕЙ. Аддзасны кӧ — омӧль тэд лоӧ.
ВАЛЯ. Оз аддзыны, эн пов.
СЕРГЕЙ. Сідзкӧ ме тэныд кымынкӧ бутылка сета, а то ӧти местаын видзны оз туй. (Чӧв олыштӧм бӧрын). Тӧдан мый, ме ногӧн зэв бур, мый ми тӧдмасим... Мыйӧн ме тэнӧ аддзи, ме пыр и гӧгӧрвои, мый тэ вылӧ позьӧ надейтчыны... Тадз тэд шуа, медым тэ тӧдін — а мӧдпӧв ог кут висьтавны... Но вот... А бутылка дас кымын ме Стёпа Сафонов ордӧ дзеба...
ВАЛЯ. Кытысь нӧ тэ Стёпа Сафоновсӧ тӧдан? Сійӧ ӧд эз тіян школаын велӧдчыв.
СЕРГЕЙ. А ми шор дорын тӧдмасьлім.
ВАЛЯ. Мый нӧ ті шор дорас вӧчинныд?
СЕРГЕЙ. Лягуша кыйим.
ВАЛЯ Лягуша?
СЕРГЕЙ. Стӧч.
ВАЛЯ. Мыйла?
СЕРГЕЙ. Первойсӧ ме чайті, меся сійӧ лягушаяссӧ сом кыйӧм могысь сам вылӧ куталӧ, а вӧлӧм кӧ сійӧ куталӧ, медым вундавны. Вӧлӧм кӧ сійӧ кӧсйӧ лоны зоологӧн...
ВАЛЯ. Но, а сэсся мый?
СЕРГЕЙ. Но, а сэсся ме нуӧді сійӧс сом кыйны, и ми мунім вой кежлас. А сэсся ме сійӧс нуӧді купайтчыны шонді петігас, сійӧ кывзіс менӧ, а васьыс дзик лӧз петіс, да шуӧ, ме пӧ дзикӧдз изӧймиті и пель тыр пӧ кӧдзыд ва. Но ме сійӧс велӧді, кыдзи регыдӧн шонавны да кыдзи пельясысь васӧ кисьтны.
ВАЛЯ. А кыдз нӧ сійӧ?
СЕРГЕЙ. А ӧти пельтӧ топӧдан да чеччалан кок пӧв йылад да горзан —
ВАЛЯ. Ӧні ме гӧгӧрвоа, кыдзи ті дружитчӧмныд. (Локтіс ӧшинь дорӧ.) Тэ тӧдан, эстӧн кодкӧ кыссьӧ.
(Найӧ зэв ӧдйӧ сувтӧны ӧшинь ӧтмӧдар бокас, виччысьӧны, сьӧкыд шторыыс ньӧжйӧникӧн воссьӧ ӧтмӧдарӧ да тыдовччӧ Олеглӧн юр)
3.
ОЛЕГ (шӧпкӧмӧн). Ме абу ӧтнам... Пырӧй...
(Олег бӧрся ӧшиньӧд пырӧны Туркенич да доктор Фёдор Фёдорович.)
ФЁДОР ФЁДОРОВИЧ (пуксьӧ улӧс вылӧ). Эн дивитӧй, том йӧз, ме мудзи. (Сійӧ куньӧ синъяссӧ.)
ОЛЕГ. Кык пӧрйӧ муртса эгӧ зурасьӧ патрулькӧд, а всё-таки 12 морт ордӧ волім. А тіян кыдз?
ВАЛЯ. Ми удитім жӧ. А гортӧ, кыдзи аддзан, эг удитӧй, пӧпуттьӧ лои тэ ордӧ пырны... Мыйла нӧ ті ӧшинь пырыс?
ОЛЕГ. А эсійӧ улич вылас салдатъяс. Мудзид, Фёдор Фёдорович?
ФЁДОР ФЁДОРОВИЧ. Да... 70 пациент ордӧ ветлыны гортӧдзныс — тайӧ, дерт, уна кодь. Но ті... ті тайӧс зэв буртор мӧвпыштінныд, ёртъяс, — боецъясӧс меститны торъя керкаясӧ... (Доктор пуктӧ юрсӧ улӧс мыш вылӧ.) Найӧс эськӧ немечьяс виисны ...
4
ЛӦНЬ ГӦЛӦС (ӧдзӧс сайсянь). Тайӧ тэ, Олег?
ОЛЕГ (локтӧ ӧдзӧс дорӧ.) Ме локта, мама. (Петӧ.)
СЕРГЕЙ. Иван, а збыль сійӧ, мый тэ противотанковӧй орудиеяс батареяӧн командуйтін?
ТУРКЕНИЧ (Скромнӧя, весиг быттьӧ яндысьыштӧмӧн). Збыль.
ВАЛЯ. А кыдзи нӧ тэ карас локтін?
ТУРКЕНИЧ. А ми буретш Калач дінын на-смерть сулалім. А сэсся став расчётъясыс стройысь петісны и ачым ме уси раненӧйӧн. Немечьяс кутісны лыйлыны миянӧс — и менӧ лыйисны. Да кыдз аддзан, эз артмы лыйӧмыс. Казачка менӧ сэтысь нуис, дзебис, лечитіс. (Мӧвпалӧмӧн.) Эк, кытӧні нин ӧні тышкасьӧны миян...
СЕРГЕЙ (зэв збыльысь). А ме ӧд армияад вӧлі жӧ. Ме ӧд дзик настоящӧй боевӧй частьӧ веськавлі. А сэсся миян ставныс пӧгибнитісны, а полковник менӧ вӧтлыны кутіс. А ачыс гӧгӧрбок ранитчӧма, и чужӧмыс и киыс и кокыс — ставыс бинтуйтӧма.
ТУРКЕНИЧ (видзӧдӧ Фёдор Фёдорович вылӧ). Тіянлы, доктор, колӧ пыр олан патера корсьны.
ФЁДОР ФЁДОРОВИЧ. А? Да, да... Дерт, выгоднӧйджык вӧлі эськӧ меным карас явӧ кольччыны, практикуйтчысь врачӧн. Но...
ВАЛЯ. Вермисны тӧдны, мый ті военнӧй врач...
ФЁДОР ФЁДОРОВИЧ. Но сэк эськӧ ме верми бура отсавны раненӧйяслы.
СЕРГЕЙ (неуна вежавидзӧмӧн). Фёдор Фёдорович, ме кӧсъя шуны тіянлы ассянь и аслам ёртъяссянь, мый тіян поступокныд, мый ті кольччинныд раненӧйяс дінӧ татшӧм кадӧ, кор позьӧ вӧлі эвакуируйтчыны, тіянлысь поступокнытӧ ми лыддям благороднӧй поступокӧн.
ФЁДОР ФЁДОРОВИЧ. Аттьӧ... Но ті кӧ заводитінныд та йылысь сёрнитны, ме тіянлы со мый висьтала. Кӧть кутшӧм профессия эз вӧв мортлӧн, сылӧн вермас артмыны положение, кор сылы колӧ эновтны буретш сійӧ йӧзсӧ, кодъяс зависитӧны сыысь, — кодъясӧс сійӧ нуӧдіс, кодъяс надейтчисны сы вылӧ. Овлӧ, мый тайӧс колӧ вӧчны высшӧй целесообразность ради... Тайӧ вермас лоны весиг полководецъяслӧн да политическӧй деятельяслӧн... Но тайӧ оз вермы лоны врачлӧн. Торъя нин военнӧй врачлӧн. Абу сэтшӧм целесообразностьыс, коді эськӧ вӧлі тайӧ долгсьыс вылынджык...
СЕРГЕЙ. А фронтӧн командуйтысь кӧ прикажитіс тіянлы кольны раненӧйяссӧ да эвакуируйтчыны?
(Пырис Олег, кывзысьӧ.)
ФЁДОР ФЁДОРОВИЧ (спокойнӧя). Ме эськӧ сылы эг подчинитчы. Весиг кӧть Сталин ёрт шуис мем — лоӧм положениесӧ арталӧмӧн тіянлы разрешайтчӧ мунны — ме эськӧ эг мун...
СЕРГЕЙ. А Сталин ёрт эськӧ тадзисӧ эз и шу.
ФЁДОР ФЁДОРОВИЧ. Правильнӧ. Сталин ёрт эськӧ тадзисӧ ньӧтчыд эз шу, ӧд сійӧ быдӧнысь бура гӧгӧрвоӧ тайӧс. Му вылас сійӧ дзик ӧти морт, кодлӧн сідзжӧ став условиеяс дырйи мунӧм вылӧ абу правоыс... Сӧмын сылӧн да военнӧй врачлӧн...
(Чӧв олӧм.)
СЕРГЕЙ (мӧвпалӧмӧн). А тӧданныд, мый ӧні ме думайта? Ме думайта, вӧлі кӧ эськӧ ӧні ловъя Чкалов — вот эськӧ грӧмитіс фрицъястӧ! А мый? Полюс вомӧн лэбзьыны и то сылы нинӧм вӧлі оз сулав, а тані эськӧ сійӧ петкӧдліс асьсӧ. Вот сійӧ морт вӧлі, а?
ОЛЕГ (негораа). Да, всё-таки прамӧй геройясыд сэтшӧмъяс, кодъяс, подвиг вылас мунӧны бескорыстнӧя. Йӧз шуд вӧсна...
(Чӧв олӧм.)
ТУРКЕНИЧ (виччысьӧмӧн локтіс ӧшинь дорӧ, кывзысьӧ). Дугдывтӧг патруль ветлӧ, мед эськӧ керкаяссӧ видлавны эз кутны пыравны.
ОЛЕГ. А вот партизанъяс... Ті гӧгӧрвоанныд, мый сійӧ партизанъясыс? Найӧ делӧяс йылысь став мирыс тӧдӧ, а налысь нимсӧ мирас некод оз тӧд! А сюран кӧ...
СЕРГЕЙ. Бурджык дзикӧдз пропадитны, чем немечьяслысь сапӧгнысӧ нювны либӧ прӧста сідз овны...
ВАЛЯ. Фёдор Фёдорович, ті диван вылас водӧй.
ТУРКЕНИЧ. Эн увгы, сійӧ вугыртіс...
ВАЛЯ. Олег, тэ должен отсавны миянлы лӧсьӧдны подпольнӧй организациякӧд йитӧд... Энлыв. Тэ ӧд збыль тӧдан, кыдзи тайӧс вӧчны... Тіян ордӧ век волывлісны уна партийнӧйяс...
ОЛЕГ. Сӧмын тай йитӧдъясыс менам вошины.
ВАЛЯ. Кодлы кӧ висьтав.
ОЛЕГ. Збыль шуа. Ме ӧд надейтчи ставсӧ вӧчны Валько пыр. А ӧні и сійӧ кытчӧкӧ воши. Ме гӧгӧрвоа, мый подпольнӧй организация эм, мый штаб да казарма ӧзтӧмыс — налӧн удж, но...
ВАЛЯ. Да, сюсь морт тыдалӧ ӧзталӧма... (Сергейлы.) А тэ кыдз чайтан? Ӧзтӧма?
СЕРГЕЙ (дӧзмӧмпырысь). Ачыс дерт эз ӧзйы... Энлыв, Валя. (Сійӧ мунӧ Олег дінӧ.) Со мый, Олег. Тэ йылысь мем Валя зэв уна висьтавліс, да и ачым ме, мыйӧн аддзи тэнӧ, эскыны куті тэныд ставнам. А делӧыс вот мыйын — штабсӧ да казармасӧ некутшӧм подпольнӧй организация эз ӧзты. Сійӧс ме ӧзті. (Смущеннӧя.) Ме сідз висьтала, медым тэ тӧдін...
ОЛЕГ (нимкодя). Кыдзи? Ӧтнад?
СЕРГЕЙ. Ӧтнам.
ОЛЕГ. Да. Крепыда... А тӧдан мый — тайӧ зэв омӧль. Омӧль, мый тэ ӧтнад, гӧгӧрвоан? Да... Энлыв, артмӧ — гашкӧ и збыль подпольщикъястӧ арестуйталісны ставнысӧ? Валькосянь ми юӧр виччысям, а мый, сійӧс кӧ... Менам весиг сьӧлӧмӧй доймӧ, кор та йылысь мӧвпышта...
СЕРГЕЙ. Эм менам ӧти надея веськавны следыс вылӧ: висьталӧны, посёлокын пӧ Игнат Фомин ордын кутшӧмкӧ тӧдтӧм морт дзебсясьӧ. Фоминыд эськӧ бур мортӧс ӧдвакӧ кутас дзеблавны. А мӧдарбоксянь кӧ — мыйла нӧ либӧ лёк мортыслы немечьяс дырйиыс дзебсясьныс? Ӧні буретш сэтшӧмыслы и воис эрд вылӧ петан кадыс. А Фомин йылысь быдторсӧ висьталӧны. Кор немечьяс локтісны, кутісны висьтавны, быттьӧ сійӧ пӧ абу и Фомин, а Острогожскӧй округысь кулак и паспортыс пӧ сылӧн абу прамӧй...
(Ӧшинь сайын ылын кылӧ горӧдӧм:
ВАЛЯ. Кодӧскӧ кутісны...
ОЛЕГ. Ме кӧсйи шуны со мый — ставсӧ, мый ми тӧдмалам да вӧчам — некод не должен тӧдны, миянысь кындзи, дзик некод. Кӧть кутшӧм матыса тӧдсаяс найӧ... Дружбаыд — дружба, а тані вермас гырд киссьыны... Миян колӧ котыртны настоящӧй организация. Колӧ Ваня Земнуховӧс, Уля Громоваӧс...
СЕРГЕЙ. Степан Сафоновӧс, Жора Арутюнянцӧс...
ВАЛЯ. А Ленаӧс?
СЕРГЕЙ (повзьыштіс). Кутшӧм Ленаӧс?
ВАЛЯ. Позднышева Ленаӧс... (Олеглы.) Всё-таки ӧд ті дружитанныд...
ОЛЕГ (дӧзмӧмӧн). Ме буретш тӧрыт пыралі сы ордӧ. Сэні сэтшӧмтор... Ог кутӧй сёрнитны сы йылысь ньӧтчыд.
СЕРГЕЙ. А... Ме сыкӧд ывлаын паныдасьлі. Мунӧ сэтшӧм тшап, юрсӧ со этадзи нуӧ... Ме сылы — Лена, Лена, а сійӧ сӧмын юрнас гогнитіс со кыдз да и муніс.
ВАЛЯ (серӧктӧ). И ньӧти абу сы моз.
ОЛЕГ. Мыйла, мунӧ сыланьӧ... Помнитан кутшӧм мичаа ми сьывлім сы ордын куим недель сайын. Тэ ещӧ ворсін сэки. Но... Ме ногӧн ми кутам сёрнитны вернӧй ёртъяс йылысь...
ТУРКЕНИЧ. А вот ещӧ эм Женя Стахович. Нырсӧ эськӧ сійӧ вывті лэптӧ, но всё-таки партизанскӧй отрядын вӧлӧма...
СЕРГЕЙ. Да, Стахович лэптӧ нырсӧ.
ВАЛЯ. Характерыс сылӧн важнӧй...
ОЛЕГ. Но, характерыд — сійӧ...
5.
(Чорыда йигӧдчӧм, тыдалӧ, керкаӧ пыран ӧдзӧсӧ. Сэк жӧ кылӧ ӧдзӧс сайын мамлӧн гӧлӧс: «Олег»).
ОЛЕГ. Ладнӧ, мама. Кымынкӧ секунд корсьышт ключтӧ.
ФЁДОР ФЁДОРОВИЧ (пыр жӧ очмӧ). Ӧшиньӧд?
ОЛЕГ. Час ме видзӧдла.
СЕРГЕЙ (видзӧдлӧ ӧшиньӧд). Ӧдйӧджык, тайӧ бокас некод абу. (Валялы.) А тэ?
ВАЛЯ. Ме кольчча, ме ог пов.
ТУРКЕНИЧ (Олеглы). Асывнас виччыся тэнӧ. Кыдзи тай сёрнитчим.
(Куимнанныс вошӧны ӧшинь сайӧ)
СЕРГЕЙ.
(Олег тэрмасьӧмӧн пӧдлалӧ ӧшинь, тупкӧ шторысӧ. Кылӧны чорыда восьлалӧмъяс.)
ВАЛЯ. Тэ нӧ кытчӧ кӧсйылін мунны Туркеничыскӧд?
ОЛЕГ. Да эм ӧти делӧ...
6.
(Воссьӧ ӧдзӧс, пырӧны офицер, кык салдат да Елена Николаевна.)
ОФИЦЕР. Тайӧ тіян челядьыс?
ЕЛЕНА НИКОЛАЕВНА. Менам.
ОФИЦЕР. Мыйла нӧ найӧ оз узьны?
ЕЛЕНА НИКОЛАЕВНА. Прӧста. Найӧ вӧлі паськӧмнаныс узьӧны да тіян йигӧдчӧм бӧрын чеччисны.
ОФИЦЕР. Тіянын паськӧмӧн узьлӧны? Дикость. (Ставныс вылӧ видзӧдлӧмӧн.) Коді кӧ ӧні вӧліс тіянын?
ЕЛЕНА НИКОЛАЕВНА. Коді нӧ татшӧм сёрӧннас вермис лоны миянын?
ОФИЦЕР (очсалӧ). Адам, видлы ӧшиньяссӧ да лок миян бӧрся. (Петӧ.)
(Комнатаын кольӧны Адам, Валя, Олег. Салдат видлалӧ ӧшиньяс да здӧвель кольӧ, сэсся бергӧдчӧ Валя дінӧ, синъяссӧ сувтӧдӧ сы вылӧ, босьтӧ сійӧс тшӧкаӧдыс. Сэк жӧ Олег лэптыштӧ кисӧ да тойыштӧ немечӧс.)
САЛДАТ. Ого! Тэ, буракӧ, ныртӧ вывті кутін лэптыны! А но лэдз киястӧ да кок бӧрляястӧ ӧтлаӧд. Тэ сёрнитан ассьыд ыджыдджык морткӧд. Вӧч, мый тэныд шуӧма. (Ырыштчӧ.) Но!
ОЛЕГ. Вӧрзьӧдлы сӧмын!
САЛДАТ (кватитӧ Олегӧс пельпомӧдыс). Порсь, роч порсь!
ОЛЕГ (кутчысьӧ салдатлы тасмаас). Лэдз, кылан!
(Салдат повзис Олеглӧн скӧр горӧдӧмысь да лёк ногӧн видзӧдлӧмысь. Найӧ сулалӧны ӧта-мӧдныслы паныд сьӧкыда лолалӧмӧн.)
САЛДАТ. Дикарь, роч дикарь... Ставнытӧ тіянӧс понъясӧс моз колӧ дрессируйтны плетьӧн...
ОЛЕГ. Тайӧ тэ медлёк дикарыс...
7.
ЕЛЕНА НИКОЛАЕВНА (тыдовтчӧ ӧдзӧсын). Олег, сійӧ тэнӧ виас, Олег!
(Салдат друг кучкӧ Олегӧс чужӧмас. Олег усьӧ, а салдат бергӧдчӧ да Елена Николаевнаӧс лёкысь тойыштӧмӧн петӧ ӧдзӧс сайӧ. Олег уськӧдчӧ сы бӧрся.)
Садьсяв, найӧ виасны тэнӧ! Садьсяв!
ОЛЕГ. Лэдз, мамӧ!
ЕЛЕНА НИКОЛАЕВНА. Нинӧм вылӧ ог лэдз!
ВАЛЯ. Оз ков. Ми сыкӧд паныдасьлам на. Ӧти му вывті на ӧні ветлам.
ОЛЕГ. Лэдзӧй, ме сійӧс виа.
ЕЛЕНА НИКОЛАЕВНА. Олег, пиук, дугды. Тэ кылан, бабушка игналіс нин ӧдзӧссӧ... Терпитны колӧ... Терпитны колӧ, кытчӧдз миян бӧр оз воны.
ОЛЕГ. Мыйла тэ менӧ велӧдан терпитныс, мамӧ... (Лӧньӧ.) Порсь! Нӧйтӧ, кор тӧдӧ, мый сылы оз вермыны воча сетны. Лэдз, мамӧ, ме сэсся ог. Но, ладнӧ... Всё-таки сійӧ повзис, а эг ме.
ЕЛЕНА НИКОЛАЕВНА. Енмӧй! Мукӧддырйиыс кажитчӧ, мый синтӧ кӧ кунян, ставыс тайӧ бырӧ кажитчӧм моз. (Мунӧ.)
ОЛЕГ (скӧрысь). Ок кутшӧма нин ме тӧдмалі тайӧ пеж пӧрӧдасӧ. Найӧ абу скӧтъяс, а пежъяс. Миянлы колӧ презирайтны тайӧ выродокъяссӧ, кытчӧдз огӧ на вермӧй найӧс нӧйтны да бырӧдны. Да, да — презирайтны!
(Друг кылӧ, быттьӧ кодікӧ гыжъясьӧ ӧшиньӧ. Олег матыстчис.)
Йӧймин кӧ тэ-а!
СЕРГЕЙ (ӧшиньӧд). Нинӧм, нинӧм. Немечьяс мунісны. Валя нӧ кӧні?
ОЛЕГ. Валяыд меным чойӧ пӧри.
ВАЛЯ. Олег немечкӧд тышкасис.
СЕРГЕЙ (пыддипуктӧмӧн). Мый тэ шуин?
ОЛЕГ. А доктор кӧні?
СЕРГЕЙ. Ставыс лючки-ладнӧ. Ванякӧд муніс. Вот мортыс — вот тайӧ морт!
ВАЛЯ (повзьыштӧмӧн). Бӧр пыр либӧ мун, тэнӧ казяласны.
СЕРГЕЙ (друг). А ме ӧні дзик пыр жӧ тӧдмала, кутшӧм морт дзебсясьӧ Игнат Фомин ордын. Гашкӧ и збыль сійӧ буретш подпольщик.
ОЛЕГ. Кыдзи нӧ тэ тӧдмалан?
СЕРГЕЙ. Ме сылы вӧзъя раненӧйӧс гортас примитны, найӧяс лыдысь, кодъясӧс колӧ на дзебны.
ВАЛЯ (збыльысь). Вузалас.
СЕРГЕЙ. Сідз ме сылы и висьтавлі збыльторсӧ. Мем сӧмын керкаас пырны колӧ. (Валялы). Аски позьӧ тіянӧ, волыны? Мам-батьыд оз видны ?
ВАЛЯ. Мам-бать! Кор окота, сэки и пырав...
СЕРГЕЙ. Сідзкӧ ме пырала тэ ордӧ...
ВАЛЯ. Энлыв... А тайӧ Фоминыс ордын кӧ засада? Сэки мый?
СЕРГЕЙ (делӧвӧя). Кыдзкӧ ӧд бара жӧ...
ВАЛЯ (друг). Сулав ме колльӧда тэнӧ...
СЕРГЕЙ (недыр мысти нимкодя). Мунам...
(Сергей бӧрся Валя ӧдйӧ петӧ ӧшиньӧд. Кыкнанныс саялӧны.)
8.
ЕЛЕНА НИКОЛАЕВНА (порог дорын). Ни ӧти лун тэ, Олег, гортын он овлы. Ме сэтшӧма полі, кор тэ рытнас эн вӧв... Мый нӧ Ленаыд? Тэ вӧлі кӧсъян пыравны сы дінӧ...
ОЛЕГ (зумыша). Ме сы ордын вӧлі. Сы йылысь сэсся ньӧтчыд эн сёрнит. Асьсӧ вузалысь тварь сійӧ...
ЕЛЕНА НИКОЛАЕВНА. Ладнӧ... Ме ог кут юасьны тэнсьыд...
ОЛЕГ. Да и висьтавныс, мама, нинӧм. Ме пыри, а на ордын — офицеръяс, и сійӧ накӧд романсъяс велӧдӧ. А кухняас мамыс рыжӧй деньщик ордысь шоколад да прованскӧй вый примитӧ. Ме сылы тадзи и шуи — прованскӧй выйӧн мынтысьӧны? Ёна жӧ нин тэ донтӧм лоӧмыд — и муні.
ЕЛЕНА НИКОЛАЕВНА. Тайӧс тэ Леналы тадзисӧ шуин?
ОЛЕГ. А мый нӧ сэсся...
ЕЛЕНА НИКОЛАЕВНА. Тэ эн жалит сійӧс. Тэ сійӧс жалитан да сійӧн и волнуйтчан, а тэ эн жалит.
ОЛЕГ. Ме ог жалит. Прӧтивнӧ мем.
ЕЛЕНА НИКОЛАЕВНА. И ӧбиднӧ. А тадзи кӧ сійӧ вермӧ вӧчны, сідзкӧ ньӧтчыд сійӧ эз вӧвлы сэтшӧмнас... кутшӧмӧн тэ сійӧс, кутшӧмӧн ми сійӧс чайтлім... Но тайӧ лёк славаыс кыптӧ сы йылысь, а оз миян йылысь.
ОЛЕГ (самолюбивӧя). Вузӧс тварь. Сійӧ ещӧ кывлас на ме йылысь. Сійӧ ещӧ казьтыштас на менӧ...
ЕЛЕНА НИКОЛАЕВНА (кутлӧ сійӧс). Олег, дона пиӧй менам...
ОЛЕГ. Мамӧ... Кутшӧм лӧсьыд, мый ми ӧтлаынӧсь.
ЕЛЕНА НИКОЛАЕВНА. Сьӧлӧмшӧр менам!
ОЛЕГ. Кутшӧм лӧсьыд мортыдлы, кор сылӧн эм мам... Тэ тӧдан, мамӧ, — збыль висьталӧны бур йӧзыд, мый эм кӧ ӧні нянь кусӧк, да ас вылын паськӧм, да му вылын сёрӧмъяс сулалӧны, да поездъяс мунӧны, да вишняяс дзордзалӧны, да заводъясын пачьяс ломтысьӧны — ставсӧ тайӧс вӧчӧны мамлӧн киясыс, — и йӧзыд бойӧ повтӧг мунӧны сы вӧсна, мый чувствуйтӧны мамлысь благословенье, збыль?
ЕЛЕНА НИКОЛАЕВНА. Дона пиӧй менам... Кутшӧма нин вежсис тэнад олӧмыд, а тэ ӧд, тэ ӧд челядь на.
ОЛЕГ. Муса мамӧй менам... Тэ ӧд ставсӧ гӧгӧрвоан.
ЕЛЕНА НИКОЛАЕВНА. Да, ме гӧгӧрвоа. Ме пыр и гӧгӧрвои, мый он весь тэ гуляйтны ветлӧдлы и тайӧ встречаыс тані эз жӧ вӧв весь, збыль?
ОЛЕГ. Муса мамӧй менам...
ЕЛЕНА НИКОЛАЕВНА. Эн пов... Сӧмын эн пов... Век, быдлаын — эн пов... ёнӧн ло... Сьӧлӧм шӧрӧй менам... Медбӧръя лолыштӧмӧдзыд...
(Чӧв олӧм. Часі кучкалӧ.)
ОЛЕГ (друг). Квайт час, мама. Мем колӧ мунны.
ЕЛЕНА НИКОЛАЕВНА. Тэ ӧд войнас локтін и синтӧ на эн куньлы... Олег...
ОЛЕГ. Менам кадыс этша, мама, збыль?
ЕЛЕНА НИКОЛАЕВНА. И нинӧм эн сёй...
ОЛЕГ (ласкова). Мамук, вай мем нянь кусӧк да ме котӧрта... (Тэрмасьӧ.) Тӧдан мый, ме Ваня Туркенич ордын мыйкӧ сёйышта, збыль, мама...
(Кутлӧ мамсӧ да котӧрӧн петӧ комнатаысь, Елена Николаевна видзӧдӧ сы бӧр вылӧ.
ІІ ДЕЙСТВИЕ
Коймӧд картина
Игнат Фомин мазанкаын горнича, идралӧма чистӧя да ӧкуратнӧя. Посводзсянь ӧдзӧс да орчча комнатаӧ мӧд ӧдзӧс. Ӧшинь ставеньяссӧ пӧдлалӧма. Занавес воссигӧн Фомин сулалӧ орчча комнатаӧ пыран ӧдзӧс дорын да кывзысьӧ. Сэсся джодждӧра кузя ньӧжйӧникӧн мунӧ ӧшинь дорын сулалысь гӧтыр дінӧ.
1.
ФОМИН. Дугдывтӧг сёрнитӧны, а мый — гӧгӧрвоны он вермы. Кокниа кывсӧ он тӧдмав. Подпольщикъяс... Тӧдін сійӧс, коді тай локтіс? И тош лэдзӧма, а тӧдны позьӧ ... Проценко... Обкомса. А вот миян — Остапчук — быттьӧ абу и Остапчук, а коді...
ГӦТЫР (индӧ мӧд горничаӧ пыран ӧдзӧс вылӧ). Бӧр локтасны найӧ... Бара лоӧ пышйыны... Бара паспорт вежны...
ФОМИН. Оз, ӧні пом... Ӧні ми асьным йӧз.
ГӦТЫР. Найӧ бӧр локтасны. Висьтавны, мед мунасны и ставыс.
ФОМИН. (видзӧдлӧ ӧшиньӧд). Оз, ӧні мунны налы оз позь.
ГӦТЫР (повзьӧмӧн, но сэкжӧ нимкодя). Юӧртін?
ФОМИН. Эх, мед кӧть удитісны, кытчӧдз мӧдыс эз на мун...
2.
И тайӧ кадас мӧд горнича ӧдзӧсыс ньӧжйӧникӧн дзуртыштіс да порог вылын тыдовтчисны Шульга да Проценко.
ШУЛЬГА (мудзӧмӧн). Менам ёртӧй мунӧ, Игнат Семенович, а туйыс кузь сылӧн... Оз-ӧ позь мыйкӧ туй вылас лӧсьӧдыштны?
ФОМИН. Лоӧ вӧчӧма. Сӧмын гашкӧ... недыр виччысьыштны ковмас-а. (Гӧтырыслы.) Мунам. (Петӧны.)
ПРОЦЕНКО (мудзӧмӧн). Но, кутшӧм кӧзяиныд?
ШУЛЬГА. Кыдз шуны. Краснодонын тайӧ выль морт, ме сійӧс ньӧтчыд эг аддзыв, но шуӧны, ас морт пӧ, стахановец. Бур, мый сійӧ беспартийнӧй, общественнӧй удж эз нуӧдлыв, собраниеяс вылын эз выступайтлыв, сэтшӧм тӧдчытӧм морт, и ме чайта кыскавны, либӧ шобны сійӧс немечьяс оз кутны...
ПРОЦЕНКО. Тайӧ бур... Абу тай варовджык...
ШУЛЬГА. Да, и чорыд кодь, мӧд ногӧн кӧ шуны. (Нюмдӧ). Тшыгъялі ме.
(Джынвыйӧ сиптӧм ӧшинь весьтті муніс кодлӧнкӧ вуджӧрыс.)
ПРОЦЕНКО. А висьтав меным, Костиевич, сійӧ явкаяс пытшсьыс, кодӧс тэ меным сетін, ачыд тӧдан-ӧ кӧть ӧтик мортӧс — дженьыда шуӧмӧн — сійӧ йӧзыс аслыд тэныд тӧдсаӧсь, — кутшӧм налӧн семьяяс, коді на ордӧ волывлӧ...
ШУЛЬГА. Збыль кӧ висьтавны, тӧда ог ме найӧс — ёнасӧ меным найӧ абу тӧдсаӧсь. Кодсюрӧӧс коммунистъяс пытшкысь тӧда, кодъясӧс кольӧдӧма подпольнӧй удж вылӧ, Старик Лютиковӧс, Вдовенкоӧс — сійӧ шань нывбаба, сӧмын на ордӧ явка сетны ог вермы — найӧ гашкӧ асьныс кутасны дзебсясьны.
ПРОЦЕНКО (беспокойнӧя). А сійӧ патераясас, кодъясӧс тэ меным индін — тэ ачыд волін?
ШУЛЬГА. А мукӧд ордӧ ме ньӧтчыд эг волы, Иван Федорович... Да и кор ме верми волыныс, ӧд муртса на тӧрыт вои и тӧрыт на жӧ и висьталісны, мый ме кольчча... Да и немеч друг сідз воис татчӧ, весиг и... Виччысьтӧг, кыдзи ӧні шуӧны, Иван Федорович (Думайтӧмӧн). Да... Тайӧ став йӧзыс выль и ме найӧс некодӧс ог тӧд. Но лёкторсӧ на йылысь нинӧм эг кывлы. (Сомневайтчӧмӧн). Но ӧд йӧз жӧ ме чайта корсисны, бӧрйисны найӧс, — сӧгласуйталісны, Иван Федорович...
ПРОЦЕНКО. Сідзнадтӧ, дерт, сідз, но век жӧ тадзи оз туй, кор ӧтияс подполье организуйтісны, а мӧдъяс — подпольеас кольччӧны? Вот тайӧ и организуйтісны подполье...
ШУЛЬГА (нюмдӧмӧн). Да эг жӧ ӧд ме организуйт, Иван Федорович.
ПРОЦЕНКО (нюмдӧмӧн). Сійӧ и шуа, мися эн тэ.
(Серӧктӧны.)
Вот ми серавлам, а серавнысӧ быттьӧ и нинӧмысь... Беспечность... Тайӧ беспечностьыс да тэрмасьӧмыс, Костиевич, ещӧ мирнӧй кадсянь на миянлы копрасьӧны...
ШУЛЬГА. Кыдзи нӧ вӧлі не тэрмасьны, Иван Федорович, кор век тӧждысьӧм, удж, — а мыйӧн пансис война, — но кутшӧм нӧ сійӧ вӧлі темп да размах, да мыйдта ставыс — сы йылысь и сёрнитныс нинӧм, и коді муніс и коді кольччис — асьныс сійӧс тӧдӧны... Эг тӧдлӧй кор и узьлім, Иван Федорович...
ПРОЦЕНКО (тӧждысьӧмӧн). Да... Йӧз уджалісны, кыдзи эсійӧ запорожскӧй богатырьяс... Но и подполье лӧсьӧдӧм вылӧ час тэа-меалы век жӧ позьӧ вӧлі аддзыны...
(Чӧв олӧм.)
Мыйкӧ мем кажитчис, Костиевич, быттьӧ кодікӧ миян ӧшиньӧд видзӧдліс?
ШУЛЬГА (видзӧдлӧ). Да, быттьӧкӧ, некод абу, Иван Фёдорович... (Осторожнӧя да почтительнӧя). Но, а ті, Иван Фёдорович, тӧданныд сійӧ йӧзсӧ, кодъяслысь адресъяссӧ меным сетінныд?
ПРОЦЕНКО. Ме?... (Глубокомысленнӧя.) Да ӧд... (Серӧктӧ). Да некодӧс ог тӧд! Но, нинӧм — не тайӧ на вӧліс. Справитчам. Гашкӧ сы понда и кольӧдісны тэнӧ, Костиевич, мый тӧдісны, кутшӧм тайӧ сьӧкыд да ӧпаснӧ.
ШУЛЬГА. Да и тэнӧ, тыдалӧ, сы вӧсна жӧ, Иван Фёдорович.
ПРОЦЕНКО. Справитчам... Миян народ пӧвстын эмӧсь орёл сьӧлӧма йӧз, не ӧти, а уна сё тысяча. Мед сійӧ Гитлерыс йӧймӧдіс дзонь немецкӧй нацияӧс, сы вылӧ найӧ и немечьяс. Но ме ог чайт, мый сійӧ вермас бӧбмӧдны Иван Проценкоӧс. Оз вермы сійӧ лоны... (Матыстчис ӧшинь дорӧ.) Но мый, Костиевич, тэнад кӧзяиныд пыр на абу, а мем важӧн нин колӧ мунны.
ШУЛЬГА. Ӧтнадлы петны абу лада, Иван Фёдорович. Виччысьлы, колльӧдас.
ПРОЦЕНКО. Ог, мунны колӧ... Но мый, видзӧдлам кутшӧм тайӧ немечьяс, кутшӧм найӧ кӧзяева да правительяс...
ШУЛЬГА. Ті асьныдтӧ видзӧй, Иван Фёдорович.
ПРОЦЕНКО. Ме турун кодь винёв. Тэ виччысь, Костиевич, али нӧ Остапчук.
ШУЛЬГА. А ме и дзик нин кувлытӧм.
(Кутчысьлісны да окасисны. Проценко петіс. Шульга сы бӧрся. Недыр мысти Шульга бӧр пырӧ, локтӧ ӧшинь дорӧ.)
Да... видзӧдлам кутшӧм тайӧ немечьясыс, кутшӧм найӧ кӧзяинъяс да правительяс.
3.
ФОМИН (ӧдзӧс дорын). Муніс?
ШУЛЬГА. Муніс... А мый мортыс няньтӧг муніс, сэсь, Игнат Семенович, тэныд да меным грекыс.
ФОМИН. Сёрмышті тай ме...
(Йигӧдчӧны. Фомин дрӧгмунӧ, уськӧдчӧ ӧшинь дорӧ, но сувтӧ да видзӧдӧ Шульга вылӧ.)
ШУЛЬГА. Да... Ичӧтика виччысьышт... Коді сэн?
ФОМИН (видзӧдӧ ӧшиньӧд). Оз тыдав. Дзик ӧдзӧс бердас сулалӧны.
ШУЛЬГА. Мый нӧ, восьты...
(Сійӧ пӧдлалӧ ас бӧрсяыс мӧд горничаӧ пыран ӧдзӧс. Фомин петӧ посводзӧ, кылӧ восьтӧ и сэк жӧ гӧлӧс: «Ыджыд аттьӧ».)
4.
Комнатаӧ зэв ӧдйӧ, Фомин кутӧмысь мынтӧдчӧмӧн, чепӧсйӧ Сергей Тюленин.
ФОМИН. Тьфу, гӧгӧрвоан! Тэ коді? Мый тэд, посводзас местаыс этша? Мун коктӧ чышкав.
СЕРГЕЙ (кольччӧ, но покорнӧй гӧлӧсӧн сёрнитӧ). Извинитӧй гражданин.
ФОМИН. Мый нӧ тэд колӧ?
СЕРГЕЙ. Гражданин! Спаситӧй раненӧй боецӧс.
ФОМИН. Коді нӧ тэнӧ?
СЕРГЕЙ. Эз менӧ, эг ме ранитчы. Боецъяс отступайтісны, раненӧйӧс веськыда улич вылас колисны. Ми зонъяскӧд аддзим сійӧс да саймовтім. Сӧмын сійӧ керкаас, кӧні куйлӧ ӧні, водзӧ кольны оз позь. Вот ме и веськыда тіян дінӧдз.
ФОМИН. Мыйла нӧ буретш ме дінӧ веськыда?
СЕРГЕЙ. А код дінӧ нӧ сэсся, не кӧ тіян дінӧ, Игнат Семенович? Став карыс тӧдӧ, мый тэ миян медбур стахановец.
ФОМИН. А тэ кодлӧн лоан?
СЕРГЕЙ. Ме? Ме — тіянлы тӧдса Прохор Любезновлӧн пи, сійӧ стахановец жӧ.
ФОМИН. Некутшӧм Прохор Любезновӧс ме ог тӧд. Сэтшӧмыс, буракӧ, и свет вылас абу.
СЕРГЕЙ. Кыдзи абу? Сійӧ жӧ бать менам!
ФОМИН. Со мый, бур вокӧ. Тэнад боецыдлы менам и местаыс абу, и гӧтырӧй менам висьӧ, и тэ, вокӧ, со мый... Мун татысь...
СЕРГЕЙ (мыжалігмоз). Ті, гражданин, зэв аслысног сёрнитанныд. Быдӧн ӧд тӧдӧ, мый тіян мӧд комната эм.
(Фомин и вӧрзьӧдчыныс эз удит, кыдзи Сергей восьтіс орчча горнича ӧдзӧссӧ. Ӧдзӧс дорас сэні сулалӧ Шульга).
ШУЛЬГА (Фоминлы). Энлыв, кум. (Сергейлы, ньӧжйӧ.) А мыйла нӧ раненӧй боечыслы тэ он отсышт гортӧдзыд мунны? Батьыд тэнад эвакуируйтчис?
СЕРГЕЙ (неувереннӧя). Эвакуируйтчис.
ШУЛЬГА. А мамыд? Мый нӧ тэ первой сы дінӧдз эн мун? Сійӧ ӧмӧй сэтшӧм нывбаба, мый оз примит? Сідз... Игнат Семенович збыль висьталіс тэныд, боецтӧ примитны сійӧ оз вермы. А тэ нӧ кодлӧн лоан, хлопец?
(Сергей кӧсӧйтчывлӧ Фомин вылӧ да чӧв олӧ.)
Но, ладнӧ... Ме аддза, мый тэ молодеч. Сы мында йӧз миян гибнитӧ медбурыс, да сэтшӧмъясыс, кодъяс прӧстӧй йӧзсянь народнӧй властьӧдз кыптісны. Найӧс колӧ видзны... Тэ сэтшӧм мортӧс аддзан, коді примитас боецтӧ. Тайӧ бур делӧ. Корсьышт да аддзан.
(Фомин осторожнӧя, быттьӧ пырмунігмоз, видзӧдлӧ ӧшиньӧ да уйкнитӧ посводзӧ.)
Сӧмын тайӧ делӧыд секретнӧй, случайнӧй йӧз дінӧ тэ эн мун. А некӧн кӧ нин оз примитны, ме дінӧ лок. А примитасны кӧ — эн лок. Бурджык — вай меным ӧні ассьыд адрестӧ, медым ме, ковмас кӧ, верма аддзыны тэнӧ...
СЕРГЕЙ (тэрмасьӧмӧн, юрнас индӧ ӧдзӧс вылӧ). А вот эсійӧтӧ случайнӧй морт жӧ. Тёмнӧй. Сы йылысь быдсяма сёрниыс ветлӧ. И посёлокын сійӧ друг тыдовтчис, код тӧдас кытысь.
ШУЛЬГА (синкымъяссӧ кӧрӧ). Мортъясыд найӧ пырджык друг тыдовтчӧны, а вочасӧннад тыдовтчӧны сӧмын привидениеяс...
СЕРГЕЙ (эз гӧгӧрво ирониясӧ, шӧпкӧмӧн). Вот ме и висьтала — кӧть сійӧ и стахановец, а гашкӧ сійӧ сідз, нарошнӧ, гашкӧ и збыль полагайтчӧ сылы ёнджыкасӧ вочасӧн тыдовтчыны, привидениелы моз.
ШУЛЬГА (тэрыба). Кыдзи тэнӧ шуӧны?
СЕРГЕЙ. Тюленин. (Аддзӧ Фоминлысь пырӧм.) Любезнов. Сергей Прохорович Любезнов.
(Шульга шензьӧмӧн видзӧдӧ Сергей вылӧ, сэсся Фомин вылӧ.)
ФОМИН (чирӧм гӧлӧсӧн). Сэн... Тӧдан-ӧ... Локтісны миянӧ...
(Тайӧ здукас ставыс артмӧ ӧтпырйӧ: ӧдзӧсын салдатъяс унтер Фенбонг юрнуӧдӧм улын. Салдатъяс кватитӧны Шульгаӧс.)
СЕРГЕЙ (жугӧдӧ ӧшинь рамасӧ да чеччыштігмозыс Фоминлы). Виччысьлы... Аддзысьлам...
ФЕНБОНГ (лыйӧ). Ме ногӧн, ме инми. Адам, вӧтӧд.
(Салдат чепӧсйӧ.)
Коді тайӧ вӧлі?
ФОМИН. Детинка. Да ылӧдіс буракӧ, эз висьтась.
ФЕНБОНГ. Верман тӧдмавны?
ФОМИН. Да... верма кӧ-а... Тайӧ со кодлысь, господин роттенфюрер, колӧ юавны...
ШУЛЬГА (веськыда видзӧдӧ Фомин вылӧ). Збыль тай тэ, кор ставнад петкӧдчин, привидение вӧлӧмыд...
Нёльӧд картина
Шевцоваяс керкаын комната. Ӧти ӧдзӧс переднейӧ да мӧд ӧдзӧс орчча комнатаӧ. Уличаланьӧ ӧшинь. Занавес воссигӧн Люба йӧктӧ комната шӧрын да ачыс подпевайтӧ аслыс. Кык немецкӧй офицер пукалӧны пызан сайын. Мамыс шога сулалӧ ӧдзӧс дорын.
1.
ЛЮБА (помсьӧдіс йӧктӧмсӧ, гажаа). Но, вот и ставыс. Мӧд ногӧн ме мудзны верма, а менам аски концерт. (Мамыслы.) Сэні кӧнкӧ ставыс нин дась, нянюшка...
МАМ (сьӧкыда). Пырысь-пыр. (Мунӧ.)
ПОЛКОВНИК (аплодируйтӧ).
ЛЮБА. Ме нин прикажиті — сёрнитӧй рочӧн либӧ дзик чӧв олӧй. Нинӧм ог гӧгӧрво...
ПОЛКОВНИК. О! Кыдзи тайӧ...
ЛЮБА. Карзыны кутіс,
МАМ (пыртіс тасьті да пуктіс, гусьӧн моз). Мыйкӧ тай тэ вывті нин ышмин. (Петіс.)
ПОЛКОВНИК. Тіян здоровье. Ме кута бура велӧдны роч кыв.
ЛЮБА (ироническӧя). Благодарита тіянӧс... Ті Ворошиловградӧ мунанныд?
ЛЕЙТЕНАНТ (веськӧдӧ). Луганскӧ.
ЛЮБА (веськӧдӧмсӧ оз пыдди пукты). О, Ворошиловградын менӧ став прамӧй йӧзыс тӧдӧны. Любӧйлысь юалӧй — менам папа известнӧй промышленник — Горловкаын сылӧн вӧліны шахтаяс — но воис революция... и сійӧ кулі Сибирын. А мем лои нажӧвитчыны эстрада вылын йӧктӧмӧн да сьылӧмӧн. А папа пыр мем шуліс, ме кӧ пӧ эськӧ велӧдчи, меысь вермис петны знаменитӧй драматическӧй актриса.
ЛЕЙТЕНАНТ (омӧля гӧгӧрвоас). Ой, ай, ай, (нюжӧдӧ сылы бокал).
ЛЮБА. Ог, аттьӧ, ме растроитчи.
ПОЛКОВНИК. Кор фрейляйн локтас Луганскӧ, фрейляйн вермас пӧльзуйтчыны миян гостеприимствоӧн... Ме!...
ЛЮБА. О, мый ті!... Аттьӧ, но тайӧ вермас ме вылӧ подозрение уськӧдны, а ме ньӧти абу сэтшӧм. Ме ог тӧд код ордӧ, кутшӧм тӧдса ордӧ сувтла, но господин полковник кӧ разрешитас, ме договоритча господин лейтенанткӧд да ми дерт нин ӧта-мӧдӧс аддзам...
ПОЛКОВНИК. О!... Тэнад, Рудольф, мелӧн дорысь шудыд, тыдалӧ, ыджыдджык.
ЛЕЙТЕНАНТ. Тайӧ кӧ сідз, ме кута тіяндор старайтчыны, герр Оберст.
ЛЮБА (увтыртӧмногӧн). Господин полковник, буракӧ, интендант?
ПОЛКОВНИК (кывзӧ лейтенантлысь немецкӧй кыв вылӧ вуджӧдӧм). Тайӧ, фрейляйн, некутшӧм роль оз ворс. Сетӧй сылы тӧдны, Рудольф, мый ми огӧ сӧмын солдатскӧй гачьясӧн ноксьӧй. Менам мыйсюрӧ вермас на сюрны и мича нывка фрейляйнлы.
ЛЮБА (аддзӧ полковниклысь часі вылӧ видзӧдӧм). Машинаыд регыд нин ӧмӧй?
ЛЕЙТЕНАНТ. Да, фрейляйн, регыд.
ПОЛКОВНИК (код). Ме, ме! Машина! (Нюмъялӧ, ӧвтӧ Любалы кинас.)
ЛЮБА (повзьыштӧмӧн вешйӧ). Ме кори тіянӧс рочӧн сёрнитны либӧ дзик чӧв овны...
ЛЕЙТЕНАНТ (мыччӧ сылы бокал). Господин полковник корӧ тіянӧс ешӧ ичӧтика юыштны сыкӧд...
ЛЮБА. Аттьӧ... (Уськӧдӧ бокалсӧ.) Ах! Менам нин юрӧй бергӧдчӧ...
ПОЛКОВНИК. Зо... «
Волга-Волга, руслянд флюс.
(Сійӧ нюмъялӧ).
А? Да, ми мунам
ЛЮБА. Збыль ӧмӧй фронтыс сы ылнаын? (Асьсӧ киӧ босьтӧ.) Тайӧ зэв гажа... А Верхний Дон?
ПОЛКОВНИК. Вас? (Кывзӧ переведитӧм.) Ха-ха! Переведит сылы, Рудольф, — фронт вылын делӧяс сэтшӧмӧсь, мый мича нывка вермас нин сыӧн не интересуйтчыны. Тайӧ лунъясӧ ми босьтам Сталинград. Ми пырим Кавказӧ. Тайӧ кажитчӧ сылы?
ЛЮБА (усьӧм гӧлӧсӧн). Эн переведит, аттьӧ. Мый сюрӧ ме гӧгӧрвои.
ЛЕЙТЕНАНТ (нюмъялӧ). Шуӧны, став мича роч нылыс пӧ шпионкаяс, збыль тайӧ?
ЛЮБА. Мый?... Дерт жӧ! Вот, шуам ме.
ЛЕЙТЕНАНТ (заигрывайтӧмӧн). Фрейляйн вылӧ некутшӧм подозрение абу.
ЛЮБА. Ой, кор мем тӧдвылам усьӧ ставыс, мый терпитісны менам бать-мамӧй — ме войяссӧ ог узь. И сэки ме чувствуйта — найӧ путкыльтасны миянӧс да орӧдасны фронтсӧ. Да, да. Кыдзи тай артмис тіянкӧд Верхний Донын.
ЛЕЙТЕНАНТ. Тайӧ эз миянкӧд вӧв, фрейляйн, сэні
ЛЮБА (вештыштӧ полковникӧс, коді матыстчӧ сы дінӧ бокалӧн). Ме ногӧн ті дзебанныд меысь кутшӧмкӧ несчастье. Фронттӧ, кӧнкӧ, орӧдісны нин? Збыль?
ПОЛКОВНИК.
ЛЮБА (сералӧ). Ті чайтанныд?
ПОЛКОВНИК. Куш сӧмын Ростовскӧй областьын миян эм кӧкъямыс отборнӧй дивизия — ті фрейляйн, верманныд овны спокойнӧя.
ЛЮБА (зільӧ мездыны кисӧ). Ой, ей бог. Господин полковник кӧ шуӧ, мый некутшӧм несчастье на оз тыдав, то мукӧдыс ставыс меным абу нин интереснӧ. Менам юрӧй зэв ёна бергӧдчӧ...
ПОЛКОВНИК (оз лэдз). Кутшӧм тіян ичӧтик ки, Фрейляйн... Тані — Сталинград. (Друг гажтӧма). Ах, кутшӧм ыджыд страна... Сылы помыс абу...
ЛЮБА. Полковник мыйӧнкӧ растроитчӧма?
ПОЛКОВНИК. Вас? О, ньӧти эг! (Сійӧ кӧсйӧ кутлыны Любаӧс, ӧшинь сайын машиналӧн тутӧстӧм).
ЛЮБА (чепӧсйис ӧшинь дорӧ). Машинаыд тіян тані нин.
(Порог дорын салдат-шофер. Сійӧ босьтӧ пельӧсын сулалысь чемоданъяс. Но лейтенант сувтӧдӧ сійӧс, зепсьыс перйӧ шоколад да чургӧдӧ сійӧс Любалы. Полковник мыйкӧ корсьӧ жӧ зепсьыс.)
ПОЛКОВНИК. О! (Шатлалӧмӧн сійӧ мунӧ стен бердӧ да ӧшӧдӧ сэтчӧ Гитлер чужӧма открытка. Люба видзӧдӧ. Ӧдзӧсӧд тыдовтчӧ мамыс. Друг Люба уськӧдчӧ стен бердӧ да нетшыштӧ открыткасӧ.)
ЛЮБА (полковник кватитӧ сійӧс киӧдыс). Лэдз, балда!
ПОЛКОВНИК (сералӧ). Тайӧ эм пӧдарок.
ЛЮБА. Тайӧ менам комнатаыс, а абу тіян. Ме ог кӧсйы, мед менам комнатаын Гитлер ӧшаліс.
ПОЛКОВНИК (кужӧмӧн музгыльтӧ сылысь кисӧ).
ЛЮБА. Урӧдъяс!
МАМ. Господи!
ЛЮБА (уськӧдчис, камод ящикысь кватитіс Сталинлысь неыджыд портрет, котӧртӧ мӧдар стен дінас да крепитӧ сэтчӧ.)
ПОЛКОВНИК (нимкодясиг: Люба весиг скӧр дырйиыс зэв мича).
ЛЕЙТЕНАНТ. Сталин лёк, фрейляйн.
МАМ (ӧдзӧс дорын). Господи...
ЛЮБА (кокнас зымгӧ). Абу, Сталин бур морт! Сійӧ тіян Гитлерныд — урӧд, вир юысь, сійӧс сӧмын нужникӧ вӧйтны.
МАМ. Любушка!
(Ӧшинь сайын тутӧстӧ машина.)
ЛЕЙТЕНАНТ. Кад мунны, герр Оберст.
ПОЛКОВНИК (век на серавлӧ). Немтор оз гӧгӧрво тайӧ тіян ичӧтик нывканыд... Мунам.
Сійӧ мунӧ, сы бӧрысь салдат петӧ, лейтенант видзӧдӧ мам вылӧ, но сійӧ ӧдзӧс сайӧ жӧ саялӧ. Люба сулалӧ стен дорын, кытчӧ крепитӧма Сталинлысь портрет.
2.
ЛЕЙТЕНАНТ (гусьӧнмоз). Ті локтанныд Луганскӧ, фрейляйн? Фюрер армияысь офицер виччысьӧ тіянлысь вочакыв, фрейляйн.
(Сійӧ матыстӧ Любаӧс ас дінас, но Люба скӧрмытӧг, но вель чорыда швачкӧбтӧ сылы чужӧмас да сэк жӧ гажаа нюмъялӧ.)
ЛЮБА. Ворошиловградын аддзысьлытӧдз, господин лейтенант.
ЛЕЙТЕНАНТ (кӧсӧя нюмдӧмӧн). Аддзысьлытӧдз, фрейляйн (мунӧ).
(Пырӧ мам. Ылысмысь машиналӧн тутӧстӧм.)
ЛЮБА (мудзӧмӧн). Мама, нетшышт портретсӧ.
(Мам матыстчӧ Гитлер портрет дінӧ).
Эн сійӧс...
(Мам шемӧсмӧ, матыстчӧ да ньӧжйӧник босьтӧ Сталинлысь портрет).
Да ылӧджык дзеб, мама, бурджыка тубырт... Сэні менам шӧвк ковта эм... А этайӧ мед на ӧшалыштас, лешаклы.
МАМ. Тэ эськӧ мед виччысьыштін кӧть, Любушка. Прӧстӧй йӧзыс тӧдан мый шуӧны? Вывті нин пӧ немечьяс дінас матыстчис сійӧ.
ЛЮБА (дӧзмыштӧмӧн). Йӧзыс тадз шуӧны? А тӧдан мый, тайӧ зэв бур. Тайӧ, мамук, меным зэв кивыв... (Меліа). Ме вӧсна эн пов... Мамук, видзӧдлы ме вылӧ. Збыль ӧмӧй тэ чайтан, мый ме ог помнит, кыдзи найӧ миянлысь... папаӧс виисны.
МАМ. Любушка... Люба...
ЛЮБА. Ой, эн бӧрд, оз ков. Мамук, кылан, эн бӧрд. Вот немечьясӧс вӧтласны, война помасяс, муна уджавны радиостанцияӧ, лоа знаменитӧй радисткаӧн, станция бердас тэныд квартира лӧсьӧда — сӧстӧмӧс, гажаӧс, и кутам ми тэкӧд овны кыкӧн, сэтшӧм лӧсьыда...
(Ӧшиньӧ ньӧжйӧник таркӧдӧны).
МАМ. Бара...
ЛЮБА. Оз, немечьяс оз тадзи таркӧдчыны. (Видзӧдӧ ӧшиньӧд). Мый колӧ? (Чуймӧ). Серёжа! Сергей! (Чепӧсйис комнатаысь).
(Мам ӧдйӧ мунӧ ӧдзӧс дорӧ, а Люба пыртӧ нин Сергей Левашовӧс, кодлӧн пельпом саяс ӧшӧдӧма ноп мешӧк).
ЛЮБА. Ӧдйӧджык, ӧдйӧджык пыр.
МАМ. Тайӧ тай Серёжа! Тайӧ тай Серёжа Левашов!
ЛЕВАШОВ (видзӧдӧ бутылкаясӧн тырӧм пызан вылӧ, Гитлер портрет вылӧ). Муртса на мунісны? Аддзывлі...
МАМ. Эн думайт мыйкӧ лёктор, Серёжа...
ЛЮБА (лэптышталӧ пельпомъяссӧ). Прӧйдит, пуксьы. Тэд, гашкӧ, сёйны окота... Ме ачым, мамук...
МАМ. Но, но... (Сійӧ петӧ орчча комнатаӧ).
ЛЕВАШОВ. Миян ордын, немечьясыс эмӧсь абу, он тӧд?
ЛЮБА. Ог тӧд. Ӧтияс локтӧны, мӧдъяс мунӧны. Тэ нӧ кысянь? Но, висьтав, Серёжа...
(Левашов чӧв олӧ).
Со мый, Сергей, тэ ӧд локтін ме ордӧ. Сідзкӧ, эскин. Мый ӧні майшасян? (Меліа). Ми ӧд тэкӧд ӧти пувывса коръяс.
ЛЕВАШОВ (вочавидзтӧг видлалӧ бутылка). Да... Кымын тӧлысь нин ме тайӧс эг видлыв... А куритчыны тіян сюрас жӧ?
ЛЮБА. Сюрас... Мама, табак эм миян?
МАМ. Дзик пыр... (Сійӧ ньӧжйӧник петӧ мӧд комнатаысь, пызан вылӧ пуктӧ табак, пӧдӧмкодь гӧлӧсӧн.) Батьыдлӧн... (И ньӧжйӧник мунӧ бӧр.)
ЛЕВАШОВ. Мыйла нӧ сійӧ тадзи шуис? Тіян кутшӧмкӧ шог эм? Татшӧмнас тэ ньӧтчыд эн вӧвлы.
ЛЮБА (дӧзмыштӧмӧн). Ӧні быдӧнлӧн шог... Сёй, сёй...
ЛЕВАШОВ. Мыйла нӧ ми прӧстӧйджыка огӧ сёрнитӧй, Люба?
ЛЮБА. Ачыд тай первой дудін...
ЛЕВАШОВ. Да... Вот ми ӧти пуысь коръяс, а весиг аскостаным эгӧ велалӧй шӧпкӧдчыны. Ӧтлаын ӧд курсъяс вылын велӧдчим, Люба, а ӧні...
ЛЮБА. А тэ локтін да суин менӧ гортысь, тадз?
ЛЕВАШОВ (юӧ). Эг чайт ме тэнӧ тась суны, сідз пыри, а... И делӧыс кӧ эськӧ муніс тэ йылысь, ме йылысь, а тані ӧд сэтшӧм делӧыс, колӧ мунны медся жар инас да аддзыны ас пытшкад мужество, мудерлун, дявӧллӧн кодьӧс.
ЛЮБА (дӧзмыштӧ). А тэ чайтан ме ассьым лолӧс спаситӧм йылысь думайта? «Любка-артистка» — кокни тӧлысь кындзи юрас сылӧн ньӧтчыд нинӧм эз вӧвлы. Сідз? Тэ висьтав — тадз?
ЛЕВАШОВ. Тэ кӧ эськӧ, Люба, тӧдін, кутшӧмторъяс ме аддзывлі тайӧ каднас. Самолётсянь лэдзисны миянӧс Сталинскӧй областьын. Уджалім ми торйӧн, но йитӧд кутім. А сэсся и помъяссӧ оз позь вӧлі аддзыны. Менам напарниклысь кияссӧ чегъялісны и кывсӧ вундісны, да и мем эськӧ пом вӧлі, случайнӧ мыні. И сэк мем прикажитісны локны татчӧ... А тэ вӧсна ме кутшӧма полі! А мый, думайта, тэнӧ кӧ со тадзи жӧ лэдзисны, кыдзи миянӧс, тылӧ да тэ кӧ ӧтнад колин? А то сюрин кытӧнкӧ да немечьяс нетшкӧны тэнсьыд ловтӧ.
ЛЮБА. Серёжа. (Юрсӧ пуктӧ кияс вылас.) Сергей...
ЛЕВАШОВ. Люба...
ЛЮБА (юрсӧ кыпӧдлытӧг). Колисны менӧ татчӧ, тэ ачыд гӧгӧрвоан мыйла — радиопередатчикӧн. Тшӧктісны виччысьны приказ, и вот пыр некод абу и абу. Немецкӧй офицеръяс лезитӧны, кыдзи ма вылӧ гутъяс, аслам олӧмын первойысь на петкӧдла ачымӧс не сыӧн, коді ме эм, чӧртыс тӧдӧ мыйяс ме вӧча, кыдзи бергала, зывӧк босьтмӧн, и сьӧлӧмӧй висьӧ ас вӧсна. А ӧні, буретш эвакуируйтчигӧн, Донец дорын немечьяс обстрел дырйи виисны батьӧс... И сэтшӧм ненависть, сэтшӧм ненависть менам, сідз эськӧ и вундалі ме найӧс аслам киясӧн...
ЛЕВАШОВ. Прӧстит менӧ...
ЛЮБА (кыпӧдіс юрсӧ). А тӧдан, Сергей, кор ме пукала радиопередатчик дінын — пукта киӧс ключ вылас и мем кажитчӧ, мый ме ӧтлаын накӧд, кодъяс Москваынӧсь, Сибирынӧсь, кытӧнкӧ Волга вылынӧсь... А сэсся помала передавайтны, орӧдся ключсьыс, и бара аддзан, мый тэ тані, немечьяс улын. (Тӧждысьӧмӧн.) Менсьым со куим лун нин ыджыд му вывсянь Устинскӧй станция йылысь юасьӧны, а ме и гӧгӧрвоа, мый тайӧ налы зэв ёна колӧ, но тӧдмавны нинӧм ог вермы. И тайӧяслысь ёна со юаси, но бара нинӧм.
ЛЕВАШОВ. Тэ эськӧ мед осторожнӧйджыка...
ЛЮБА. Ме — осторожнӧя... Арестуйтавны кутасны зэв унаӧс. Миян том войтыр зільӧны мездыны кодсюрӧӧс, но немецкӧй тюрьмаысь ӧмӧй мездан?
ЛЕВАШОВ. Кутшӧм том войтыр? Коді?
(Люба чӧв олӧ.)
Люба, всё равно ӧд ме тіянкӧд лоа — бокӧ ог кольччы... Ачыд жӧ шуин — ми ӧти пу вылысь коръяс. Кодъяс тэкӧд?
ЛЮБА. Но, ме, Олег, Серёжа Тюленин, Уля Громова, Земнухов, а кыкӧн эмӧсь сэтшӧмъяс, кодъяс прамӧя нин воюйтӧмаӧсь — Ваня Туркенич да Евгений Стахович, сійӧ партизанскӧй отрядын вӧлӧма.
ЛЕВАШОВ. Стахович?
ЛЮБА. Да. А мый? Мыйла тэ тадз юалін?
ЛЕВАШОВ. Энлыв. Сійӧ кысянь локтіс? Отрядысь?
ЛЮБА. Сійӧ вӧлі отрядын, а сэсся штаб ыстіс сійӧс Краснодонӧ удж организуйтны. А тані миян неыджыд группа ачыс котыртчис.
ЛЕВАШОВ. Сійӧ шуӧ — ыстісны пӧ? Тіян йылысь сійӧ ставсӧ тӧдӧ?
ЛЮБА. Да... Но... А мый, Сергей?
ЛЕВАШОВ. Сійӧс некод эз ыстыв, сійӧ пӧръясьӧ.
ЛЮБА. Оз вермы лоны...
ЛЕВАШОВ. Ворошиловградын ме Проценко дінӧ веськалі. Помнитан? Но вот, сы дінӧ. Буретш сійӧ и веськӧдліс Митякинскӧй районын отряднас. Сэсся немечьяс окружитісны найӧс да отрядыс бойӧн кутіс писькӧдчыны степь вылӧ. И вот, кор найӧ мунісны прорывайтчыныс — видзӧдӧны — Стахович абу. И вины быттьӧкӧ сійӧс эз вины, а абу. Проценко оз тӧд вӧлі, мый думайтны... А сійӧ, вӧлӧмкӧ, ловъя да и здоров... Немецкӧй киясын кӧ эськӧ сійӧ эз вӧв...
ЛЮБА. Немечьяс ордын? Эз — тайӧ оз вермы лоны. Гашкӧ инӧ прӧста повзис да муніс, а татшӧмыс...
ЛЕВАШОВ. Мыйла тэ тадзи чайтан?
ЛЮБА. Оз, сійӧ та вылӧ оз мун. Сійӧ мортыд аслыссяма. Но ӧд сійӧ комсомолец! Серёжа, батьыс сылӧн пӧрысь шахтёр, вокъясыс коммунистъяс, армияынӧсь...
ЛЕВАШОВ. Но и мый... Мед кӧть сійӧ и прӧста повзис, а вермас на и ещӧ ӧтчыд повзьыны. (Друг.) А ёртъясыд гӧгӧрвоӧны, мыйла тэ татчӧ кольччин?
ЛЮБА. Олег — сійӧ пыр жӧ гӧгӧрвоис, мый миян курсъясным абу нин сэтшӧм фельдшерскӧйяс, а мукӧд ёртъяс... ог тӧд. Проценкоӧс быть колӧ аддзӧдлыны? Ме всё равно лӧсьӧдча Ворошиловградӧ ветлыны.
ЛЕВАШОВ. Кыдз нӧ тэ мунан?
ЛЮБА. А зэв кокниа. (Лэптіс кисӧ, быттьӧ машина сувтӧдӧ, мудера.) Со и ставыс. Ме тані кытчӧ сюрӧ ветлі нин.
ЛЕВАШОВ. И новлӧдлӧны? Немечьяс?
ЛЮБА. Оз, райземотделысь ответработникъяс... Гажтӧм налы — со и новлӧдлӧны. А неважӧн сюрлі сэтшӧм машина — ичӧтик, ляпкыдик, кельыдлӧз, а пытшкас лейтенант.
ЛЕВАШОВ (зумыша). Да... Гашкӧ подӧннас ветлыны збыль бурджык да...
ЛЮБА. Мыйла нӧ? Ах, со мый!... Кыдзи тэ лысьтан? Мый ме тэныд? Гашкӧ любовь?
ЛЕВАШОВ. Ме думайті... Гашкӧ мися...
ЛЮБА. Некутшӧм гашкӧ! Сымындатор виччысьӧ быдӧнӧс, ме и думайтныс нинӧм йылысь ог кӧсйы, а тэ — юасьӧмъяс, ӧтветъяс — збыльысь, мый тэ мӧвпыштӧмыд сэтшӧмсӧ, медым менӧ мучитны? Ми тэкӧд прӧстӧ ёртъяс и некутшӧм отчёт сетны тэныд абу быть.
ЛЕВАШОВ (зумыша). Но мый нӧ, ме гӧгӧрвоа. Мем кад нин и гортӧ. (Но сійӧ оз тэрмась.) Висьтав, Люба, помнитан — Ворошиловградын ми гуляйтім садъяс, а войнас менӧ друг тылӧ ыстісны. Сэк тэ менӧ казьтывлін эн?
ЛЮБА (чӧв олыштӧм бӧрын). Тӧдан, вот ни ӧти войт... ни ӧти войт... Рытӧдзыс... А сэсся кыдзкӧ гажтӧм лои... Эг, эг тэнӧ — гортӧй дум вылӧ уси, школаын велӧдчысь ёртъясӧй... А сэсся бара ставсӧ вунӧді...
ЛЕВАШОВ (шога). Но мем кад мунны.
ЛЮБА (меліа). Серёжка!... (Бара чорыда.) Сергей! Кыдз нӧ миянлы, мый вӧчны Стаховичнас?
ЛЕВАШОВ. Мем колӧ аддзӧдлыны Олегӧс... Сійӧ ӧд, кӧнкӧ, тіян медыджыдыс... Збыль?
ЛЮБА. Да, ӧні сійӧ миянлы абу Олег, сійӧ — Кашук.
ЛЕВАШОВ. Кытчӧдз ставсӧ ог тӧдмалӧй, сэтчӧдз колӧ лоны зэв осторожнӧйӧн.
ЛЮБА (мӧвпалӧ). Стахович...
Витӧд картина
Тюрьмаын камера, рытъя югӧрыс писькӧдчӧ ӧшинь пыр, кодӧс крест-на-крест тувъялӧма ывласяньыс кык пӧвйӧн. Ӧшинь сайын шувгӧ тӧв, камераын ӧтнас Шульга. Сійӧ ньӧжйӧникӧн ветлӧдлӧ ӧти пельӧссянь мӧдӧ. Сувтлӧ. Камера дінын кылӧны гӧлӧсъяс, ключӧн зёльӧдчӧм. Ӧдзӧс гурйыв воссьӧ да порог вылас тыдовтчӧ том морт, сояс повязка полицайлӧн. Тайӧ — Пирожок. Сы бӧрвылын — жандарм.
1.
ЖАНДАРМ. Вот тэ и зверь клеткаын... Ха-ха-ха! (Пӧдлыштіс ӧдзӧссӧ.)
ПИРОЖОК (негораа, Шульгалы). Тіян другъяс оз вугравны. Мӧд неделяс войнас виччысьӧй, ме водзвыв висьтала... (Гораа.) Он повзьӧд, эн сэтшӧм шӧрӧ веськав...
(Жандарм восьтіс ӧдзӧс.)
Тэ менам кутан йӧктыны! Тэнад шуд, мый ме честнӧй морт... (Жандармлы.) Ог, тайӧс ме ог тӧд. Мунам.
ЖАНДАРМ. Ме чайті, меся косявліс сійӧ... Сулав. Тані ещӧ...
(Сійӧ вешйӧ — порог дорын петкӧдчӧ Валько. Пирожок шемӧсмӧ. Муртса видзӧдлӧ Шульга вылӧ да Пирожок вылӧ — Валько, мунӧ камера пельӧсӧ. Сӧмын кор ӧдзӧсыс пӧдлассьӧ, Валько бергӧдчӧ Шульга дінӧ.)
2.
ВАЛЬКО. Матвей!
ШУЛЬГА. Андрей.
ВАЛЬКО. Судьба... Ставторсӧ вӧчи, медым мездыны тэнӧ, а судьба шуӧма аслым веськавны тэ дінӧ...
ШУЛЬГА. А ме чайті, меся дзикӧдз нин вунӧдӧмаӧсь. Рӧдвуж карын абу, важ ёртъяс — да ӧд ме слесарь, Евдоким Остапчук.
ВАЛЬКО. Гӧгӧрвоим ми...
ШУЛЬГА (мрачнӧя). Ладнӧ, эн тшыкӧдлы ассьыд нервъястӧ, пуксьы, висьтась, кыдзи мый сэн.
ВАЛЬКО (пуксис джоджӧ, водзвылас сійӧс кинас видлӧмӧн, серӧктыштіс). Вывті ответственнӧй, эг на привыкнит... (Доймигӧн моз). А мый тэд висьтавныс — облава мунӧ став человеческӧй рӧд вылас... Шахтаясын стволъясыс шойясӧн тырӧмаӧсь...
ШУЛЬГА. А ме вот пукала, пукала и кадсӧ нин вошті. А ӧні пыраліс ме дінӧ полицай, сьӧдіник сэтшӧм, аддзылін? Бур кывъяс шӧпкӧдіс. Шуӧ, виччысь пӧ, тіян пӧ оз вугравны. Веритан, Андрей, ме думышті — провокация, а сэсся вот меным веськыда сьӧлӧмӧ кучкис надея, а гашкӧ и эмӧсь на вӧля вылын йӧз, кодъяс помнитӧны Матвей Шульга йылысь.
ВАЛЬКО (зумыша). Да, том мортыс — миян. Сӧмын ӧтнасӧн на тані... Сьӧкыд подполье. Татшӧм сьӧкыдыс ещӧ свет вылас на эз вӧвлы...
ШУЛЬГА. Ок, Андрей, петны кӧ эськӧ... Кутшӧм делӧяс вылӧ ме эськӧ муні. Кымын мортӧс эськӧ ме кыпӧді, Андрей... А тэ кыдзи сюрин?
ВАЛЬКО. А таысь ме ӧтнам мыжа. Котӧрті ме Лютиковӧс предупредитны, мый кар пасьта арестъяс мунӧны, а Лютиковӧс, вӧлӧмкӧ, войнас нин босьтӧмаӧсь, да сы ордын засада вӧлӧма. Но, сэн менӧ и тӧдісны.
3.
Кок шыяс да ключӧн зёльӧдчӧмъяс. Шульга да Валько ылыстчисны ӧта-мӧд дінсьыс. Камераӧ пырисны Майстэр Брюкнер, Балдер, унтер Фенбонг, переводчик. Салдатъяс йӧткыштісны Лютиковӧс.
БРЮКНЕР. Тӧдан тайӧс?
ШУЛЬГА (спокойнӧя). Дерт жӧ... Тайӧ жӧ менам начальник, механическӧй цехӧн заведуйтысь...
БРЮКНЕР (ироническӧя). Тэ слесарь, а тайӧ тэнад начальник?
ШУЛЬГА. Правильнӧ.
БРЮКНЕР. (Лютиковлы). А тайӧ? Тэнад начальник?
ЛЮТИКОВ. Абу, тайӧ менам рабочӧй, слесарь, Евдоким Остапчук.
БРЮКНЕР. О, тэ пӧръясьысь, пӧрысь крыса. (Шульгалы.) Тэ абу рабочӧй, тэ эм — коммунист, большевик.
ШУЛЬГА. Ме коммунист, большевик, тайӧс ньӧтчыд эг дзеблыв и тайӧ званиесьыс ньӧтчыд ог ӧткажитчы. Тайӧс ті кывлід нин. А мукӧдторсӧ ті кывлінныд жӧ нин — менӧ шуӧны Остапчукӧн.
БРЮКНЕР. Тэ эм пӧръясьысь. (Лютиковлы.) Гашкӧ тэ прӧстӧй рабочӧй жӧ да?
ЛЮТИКОВ. Но и мый? Ме рабочӧйяс пӧвстысь. Прӧстӧй рабочӧй начальник.
БРЮКНЕР. А мыйла прӧстӧй рабочӧй начальниклӧн вӧлі книжка, мый сійӧ большевик?
ЛЮТИКОВ. А кыдзи нӧ ме, пӧрысь русскӧй мастерӧвӧй, ог кут сулавны аслам партияын?
БРЮКНЕР (сетіс знак, да Лютиковӧс петкӧдӧны. Фенбонг перйӧ револьвер). Важӧн-ӧ тӧданныд тайӧ мортсӧ и коді тайӧ?
ВАЛЬКО. Камераын тӧдмасим.
БРЮКНЕР. Коді сійӧ?
ВАЛЬКО. Мый нӧ миянлы больгыныс? Асьныд гӧгӧрвоад — ме тӧда сӧмын сійӧ, мый мем висьталіс тайӧ гражданиныс ачыс.
БРЮКНЕР. Ми тӧдам, мый тэ первой-бис шахтаысь директор.
ВАЛЬКО. А ме ньӧтчыд эг соссьыв, мый миян бассейнын сійӧ медся ыджыд шахта.
БРЮКНЕР. Ме видзӧді ... Ті кӧ кӧсъянныд, мед тіянкӧд бура обращайтчисны, ті кутанныд висьтавлыны йӧзӧс, кодъясӧс кольӧдӧмаӧсь тіянкӧд подпольнӧй удж вылӧ.
ВАЛЬКО. Сэтшӧм йӧзӧс ог тӧд. И ог чайт, мый удитісны кольны найӧс. Ме, шуам, Донец дорсянь бергӧдчи, эг удит эвакуируйтчыны. Быд морт тайӧс вермас подтвердитны.
БРЮКНЕР (перйис да мыччис сигара). Ті инженер?
ВАЛЬКО (наросьнӧ оз аддзы сигарасӧ). Шуам сідз.
БРЮКНЕР. Тілӧн кодь образованиеа да опыта морт вермис эськӧ выль пӧрадок дырйи займитны вылынджык да обеспеченнӧйджык положение. Тайӧ кӧ вӧлі колӧ сылы.
ПЕРЕВОДЧИК (шӧпкӧдӧ). Босьт, босьт сигарасӧ...
БРЮКНЕР (сигаратыра киыс дрӧжжитӧ.) Став Донецкӧй изшом районыс, став шахтаяснас да заводъяснас вуджис восточнӧй промышленнӧй обществолы. Общество поручитӧм серти ме вӧзъя тіянлы местнӧй дирекцион бердын главнӧй инженерлысь места ...
ПЕРЕВОДЧИК (шензьӧмӧн). А...
ВАЛЬКО (переводчиклы). Мед висьталас немеч кыв вылын, а ті переведитанныд меным роч кыв вылӧ. Ме мыйкӧ эг гӧгӧрво.
ПЕРЕВОДЧИК. Майстер Брюкнер вӧзйӧ тіянлы местнӧй дирекцион бердысь главнӧй инженерлысь места.
ВАЛЬКО. А... (Кучкӧ Брюкнерӧс кык синкостас, Брюннер усьӧ.)
БАЛДЕР. Кутӧй сійӧс, кутӧй!
(Фенбонг да салдатъяс уськӧдчӧны Валько вылӧ, но тышӧ пырӧ Шульга.)
ШУЛЬГА (кучкалігтырйи). Эк, миян царлӧн Сибирь!
ВАЛЬКО (тышын). Бур! Вот тайӧ, Матвей, зэв бур!
БАЛДЕР. Эн лыйӧй, кутӧй найӧс, кутӧй, будь проклятъяс... Найӧ ставсӧ на висьталасны, эн лыйӧй.
ВАЛЬКО. Кывлін, Матвей?
ШУЛЬГА. Висьталам...
(Балдер чирзӧмӧн пышъялӧ сыысь камераӧд.)
Ак, кутшӧм бур тайӧ, Андрей. Жуглав пӧвъяссӧ, чеччышт ӧшиньӧдыс. Кылан?
ВАЛЬКО. А тэ матыстчы ме дінӧ.
ШУЛЬГА (кучкӧ сьӧкыд кулакнас ӧшинь пӧвъяса). Ук, миян царлӧн Сибирь!
(Переводчик чепӧсйис камераысь).
БАЛДЕР. Кутӧй найӧс, кутӧй!
ШУЛЬГА. Ух!
(Сійӧ жуглӧ пӧвъяс, бара кучкӧ, но сійӧ кадас камераӧ уськӧдчӧны переводчиккӧд тшӧтш салдатъяс. Ставныс ӧшйӧны Валько да Шульга вылӧ. Ставыс лӧнис.)
4.
СОЛИКОВСКИЙ (пырис да шензьӧмӧн видзӧдӧ червидзысь Брюннер вылӧ). Майстер Брюннер...
БАЛДЕР. Докладывайт меным.
СОЛИКОВСКИЙ. Воис окружнӧй жандармериялӧн курьер. Прикажитӧма арестованнӧйяскӧд вӧчны ас окота серти, кыдзи и пыр вӧчлам (тӧдчӧдӧмӧн)... Лыйсьытӧг...
БАЛДЕР. Генерал Клер — оз лок?
СОЛИКОВСКИЙ. Оз.
БАЛДЕР. Да, всё равно чӧв олӧны. (Фенбонглы.) Тюрьмасӧ, парксӧ оцепитӧй. (Матыстчӧ ӧшинь дорӧ.) Паркӧ некодӧс не лэдзны. Со эстӧн — кодйӧй гу, морт сизимдас вылӧ...
(Петӧны. Брюннерӧс петкӧдӧны салдатъяс, зёльӧдчӧны заторъяс, камераын кольӧны куйлан кык морт. Ӧшинь сайын шувгӧ тӧв. Шульга ньӧжйӧникӧн ружтігтырйи кыпӧдчӧ. Сэки жӧ ышловзьӧмӧн кыпӧдчӧ Валько. Камераын джынвыйӧ пемыд).
5.
ВАЛЬКО. Тэ менӧ аддзан, Матвей?
ШУЛЬГА. А тэ, Андрей?
ВАЛЬКО. Аддза, Матвей. Аддза тэнӧ ёнӧн да мичаӧн, ньӧтчыд на татшӧм багатыръяссӧ эг аддзывлы.
ШУЛЬГА. Ок и бур сечевик тэ, Андрей! (Сералӧ.)
ВАЛЬКО. Да и тэ ён козак, Матвей, сет тэныд, енмыс, вынсӧ!... (Сералӧ.)
ШУЛЬГА. Ха-ха-ха! Найӧ чайтісны, мый миян революционеръясыд, налӧн кодь жӧ, раминикӧсь да буриникӧсь. Сэтшӧм революционеръяс, мый делӧыс кор воис восстаниеӧдз да ковмис ӧружйӧа киӧн вокзал босьтны, сэк найӧ котӧртӧны кассаӧ перроннӧй билетла. Мед жӧ инӧ тӧдӧны, кутшӧмӧсь миян революционеръяс-коммунистъяс, мед гӧгӧрвоӧны. Ха-ха-ха!
(Найӧ ваксьӧны, сэсся друг лӧньӧ).
...А кылан, Андрей, кутшӧм лӧнь тюрьмаас!
ВАЛЬКО. Но мый, Костиевич! Ме дась.
ШУЛЬГА. И ме дась, Андрей.
(Чӧв олӧм. Кылӧ часӧвӧйлӧн восьлалӧм.)
Андрей, кывзы менӧ. Кыдзи нӧ вермис артмыны, мый ме, пӧрысь морт, эски сійӧ ылӧга явкаыслы? (Мучитчӧмӧн.) Вот и веськалі татчӧ ассьым долгӧс олӧмӧ пӧрттӧг, ачым и мыжа таысь...
ВАЛЬКО. Мыйла нӧ ачыд? Да, а коді сійӧ проклятӧй Фомин ордас явкасӧ колис?
ШУЛЬГА. Ачым ме, Андрей, мыжа тайӧ камераас локтӧмысь, ачым. (Курыда.) Ӧд гӧгӧр жӧ вӧліны йӧзыс, Андрей, дерт жӧ вӧліны миян йӧз. А тані — бумагатор вылын ӧти адрес сетісны и ме вериті...
ВАЛЬКО (серӧктӧмӧн). Бумага... Да, тадзтӧ миян унаысь овлӧ, ми асьным сійӧс гижам, а сэсся огӧ и аддзӧй, кыдзи сійӧ миян дорысь вылӧджык лоӧ, быттьӧ ловъя мортыс матігӧгӧрын некоді нин абу... Видзӧдан, а бумажнӧй формаыс тэнсьыд синъястӧ и тупкӧма...
ШУЛЬГА. Тайӧ збыль, тайӧ дзик збыль, Андрей.
(Ӧшинь сайын кылӧ матысмысь мотор шы. Ӧшиньын югнитісны прожектор лучьяс.)
ВАЛЬКО. Начальство, тыдалӧ, воис.
ШУЛЬГА. Да, ӧні, тыдалӧ, абу нин дыр... Эх, Андрей, Андрей. Ми ӧд тэкӧд низӧвӧй йӧз, не миянлы тэкӧд артасьны, кутшӧм ыджыд труд уси миян пельпомъяс вылӧ олӧманым, народлы бур вылӧ. А эз вӧв этша миян олӧмын и суетаыс, сійӧ бумагаыс да формаыс, согласовательскӧйыс да представительскӧйыс... А ӧд свет вылас меддона торйыс, код вӧсна сулалӧ овны, уджавны, кувны — сійӧ миян йӧз... Да эм-ӧ мыйкӧ свет вылас миян морт дорысь мичаджыкыс? Мыйдта удж, сьӧкыдлунъяс босьтіс сійӧ аслас пельпом вылӧ государство вӧсна, народнӧй делӧ вӧсна. Гражданскӧй война дырйи восьмина нянь сёйис, эз ропкы. Реконструкция дырйи ӧчередьясын сулаліс, киссьӧм паськӧм новліс, а ассьыс сӧветскӧй первородствосӧ эз веж галантерея вылӧ... А ӧні? Да мый нин и сёрнитныс... А тайӧ ӧд ставыс миян йӧз, сэтшӧмӧсь жӧ, кутшӧмӧсь тэ да ме...
ВАЛЬКО. Дзик збыль, Матвей...
ШУЛЬГА. Эх, Андрей, да вот буретш менӧ арестуйтӧм водзвылын пыравліс сійӧ Фомин ордас том морт, — ме дінӧ воліс, кыдзи ме бӧрас гӧгӧрвои, — а сэні буретш немечьяс. Андрей! Кутшӧмӧсь вӧліны синъясыс сылӧн! Кыдзи сійӧ видзӧдіс ме вылӧ. Коркӧ войнас садьми тані камераас, — менӧ весиг дрӧжжитӧдны кутіс. Комсомолецъяс! Сійӧ дерт жӧ комсомолец вӧлі. Андрей! А этша ӧмӧй найӧ карас?... Кыдзи нӧ ме найӧс ордйи? Кыдзи тайӧ вермис артмыны?... Ме тӧда мыйла! Кымынысь шыӧдчылісны ме дінӧ: — Шульга ёрт, вӧч доклад том йӧзлы — а ме — мем некор, ті комсомолия асьныд... А мукӧддырйиыс он и вермы мынтӧдчыны, а сэсся сэтшӧм сьӧкыд сійӧ докладсӧ вӧчны! И збыль ӧд некор, а колӧ жӧ вӧлі кадсӧ аддзыны. А тэ уджъяс костын, лӧсьӧдчытӧг котӧртан доклад вылӧ, висьталан мый юрад эм, вобщем да
ВАЛЬКО. Да... комсомолецъяс. Кутшӧм сійӧ прамӧй том йӧз, Матвей! Кутшӧма найӧ кӧсйӧны, кутшӧма найӧ кутасны тышкасьны! Ме ӧтилы сэтшӧмлы синмас видзӧдлі да думышті — ставсӧ вермас: и мечтайтны, и уджавны пӧсь петтӧдз, и радейтны, и врагъясӧс казнитны. Сылӧн быттьӧкӧ сьӧлӧмас ставыс эм — и миян олӧмысь, и книгаясысь — мый эм сэні медбурыс, и асланыс пӧсь олӧмысь. Ок, и радейтӧны жӧ найӧ олӧмсӧ, Матвей, и юрнысӧ пуктасны сы вӧсна повтӧг, ковмас кӧ. Сійӧ, Матвей, миян йӧз. Сійӧ миян озырлун, мый быдмисны миян татшӧм йӧз...
(Лӧнь. Сійӧс торкисны коридор кузя восьлалӧмъяс, ӧдзӧсъясӧн клопӧдчӧм, горзӧмъяс. Челядьлӧн бӧрдӧм да нывбаба гӧлӧс.)
ВАЛЬКО (спокойнӧя). Тэ кылан, Матвей? Тайӧ кӧртавлӧны йӧзыслысь кияссӧ. Тайӧ миян медбӧръя час.
(Чӧв олӧм).
ШУЛЬГА (пыді гӧлӧсӧн). Да... Кутшӧм вояс вомӧн вуджим ми тэкӧд, Андрей... Тупка ӧні синъясӧс — и аддза Донбасснымӧс ставнас стрӧитчысь странанымӧс ставнас, став штурмовӧй войяснымӧс, и Сталинӧс трибуна вылысь аддза и кыдзи сійӧ миянлы индіс дас воӧн суӧдны капиталистическӧй странаясӧс, а не то бӧрӧ колям. А бӧрӧкольӧмъясӧс нӧйтӧны.
ВАЛЬКО. Да, сійӧ кӧ миянлысь странанымӧс эз крута бергӧд индустриализация да колхозъяс туй вылӧ, — кутшӧмӧсь эськӧ ми ӧні вӧлім войнаад, Китай дорысь омӧльджыкӧсь...
ШУЛЬГА. А ме ӧд Сталинтӧ тэнӧ моз жӧ аддзылі. Колхознӧй совещание вылын.
ВАЛЬКО. Ме аддзылі жӧ сійӧс кыдзи ӧні тэнӧ аддза, Москваын хозяйственникъяс совещание вылын, буретш сэні, кӧні сійӧ шуис, мый сэтшӧм хозяйственникыд, коді делӧсӧ оз тӧд, сійӧ анекдот, а абу хозяйственник. Помнитан?...
ШУЛЬГА. А коді нӧ сійӧ кадсӧ оз помнит?...
ВАЛЬКО (ньӧжйӧ). А ме ӧд и Ленинӧс аддзылі, Матвей, со дзик жӧ тэнӧ моз... Сӧветъяс мӧд съезд вылын на, Октябрьскӧй переворот дырйи. Ме сэки салдат-фронтовик на вӧлі. Помнита, матыстчи сы дінӧ да чуньяснам видлалі, эг эскы, мый сійӧ ловъя морт, ме кодь жӧ... А помнитан, Матвей, кутшӧм вояс водзӧ лоины?...
ШУЛЬГА. Да, сійӧ вӧліны великӧй вояс, самӧй гражданскӧйсянь да ӧніӧдз — вунӧдан ӧмӧй найӧс? Эг тӧдлӧй, кор и узьлім... А война водзвылад — кутшӧма нин чувствуйтлім сійӧ воясыслысь плодъяссӧ.
ВАЛЬКО (думыштӧмӧн). Збыль ӧд, лӧсьыда заводитлім овны война водзвылын, Матвей...
ШУЛЬГА. Аддза ме ӧні, Андрей, став олӧмӧс ассьым — мичаа, пыдӧдз правдивӧя аддза... Да, историяын некутшӧм морт пельпом вылӧ эз усьлы сы мында, мыйта миянлы сюри, и аддзан — эг гӧрбыльтчӧй. Вот и юала: — кутшӧм йӧз нӧ ми?
(Коридорын зыкыс содӧ, но найӧ оз кӧсйыны кывны либӧ збыль оз кывны.)
ВАЛЬКО. А немеч, йӧйыд, думайтӧ, мый ми смертьысь полам. Ми — большевикъяс, смерть дінад привыкнитім нин. Кутшӧм враг сӧмын миянӧс эз вилы, а ми век ловъяӧсь народ радейтӧмӧн. Мед ӧні миянӧс виасны немеч-фашистъяс, а всё-таки налы лоӧ куйлыны муас, а не миянлы. (Кывзысьӧ.) Со, миян камера дінын чукӧрмӧны, Матвей...
ШУЛЬГА. Ставыс, мый тэ висьталін, Андрей, ставыс дзик збыль. Нэм чӧж ме кута гӧрдитчыны сыӧн, мый меным, прӧстӧй рабочӧй мортлы, судьба тшӧктіс вуджны ассьым олӧмӧс миян коммунистическӧй партияын, вуджны ӧтлаын сэтшӧм йӧзкӧд, кыдзи Ленин да Сталин, кодъяс индісны йӧзлы шуда олӧмӧ туй.
ВАЛЬКО. Дзик збыль, Матвей, тайӧ миян ыджыд шуд. Менам сьӧлӧм вылын ещӧ на эм ӧти нимкодьтор, Матвей — кулан часӧ меным шуд вылӧ эм менам сэтшӧм ёрт — большевик, кыдзи тэ.
ШУЛЬГА. Зэв ыджыд аттьӧ тэныд тайӧ честьсьыс, ме пыр жӧ гӧгӧрвои, Андрей, кутшӧм мича тэнад душа.
6.
Зёлькмунӧ запор, порог дінын салдатъяс. Кианыс автоматъяс. Найӧ ньӧжйӧникӧн матысмӧны.
ВАЛЬКО (быттьӧ оз аддзы найӧс). Ен мед сетас шуд миян йӧзлы, кодъяс миян бӧрын кольӧны му вылын...
ШУЛЬГА. Видзӧд, Андрей, найӧ полӧны, мый ми найӧс бара шыблалам каньпиянӧс моз.
ВАЛЬКО (презрительнӧя). Огӧ, ми вылынӧсь нин. И найӧс ми огӧ нин аддзӧй...
ШУЛЬГА. Но, мый, Андрей, мӧдім...
ВАЛЬКО. Но, мый, Костиевич, мӧдім...
(Найӧ петӧны, салдатъяс на бӧрысь, восьса ӧдзӧс весьтті мунӧны выль и выль заключённӧйяс. Камераӧ пырӧ Пирожок.)
7.
ПИРОЖОК (курыда). Нуӧдісны...
ФОМИН (порог вылын). Мый? Кӧнкӧ, гижӧдтор корсян?
ПИРОЖОК. Кутшӧм гижӧдтор? Да... прӧста тайӧ ӧшиньсяньыс, пӧжалуй, бурджыка кутас тыдавны.
ФОМИН. Смотри, видзӧда тэ бӧрысь...
(Ӧшинь сайын ӧтмоза шувгӧ тӧв.)
ПИРОЖОК (ӧшинь дорын). Эх, кымынӧн найӧ...
ФОМИН. Талун ставсӧ нин весаласны.
ПИРОЖОК. Неужели найӧс ловйӧн гуаласны?
ФОМИН. Эм приказ лыйлытӧг, сідзкӧ лыйлытӧг...
(Ӧшиньӧд пырысь тӧв вайӧ команда, кодӧс горӧдӧ сибдӧм нывбаба гӧлӧсӧн Фенбонг. Слаба горӧдӧмъяс. Друг ылысянь ён торжественнӧй гӧлӧс.)
ПИРОЖОК (нимкодя). Сійӧ!...
ШУЛЬГАЛӦН ГӦЛӦС. Ёртъяс! Дона ёртъяс! Мед тіянлы лоӧ вечнӧй память да слава! Мед олас миян пресветлӧй рӧдина-мам! Мед олас сійӧ врагъяслы страх вылӧ, миян йӧзлы шуд вылӧ, став мувывса гӧль йӧзлы нимкодь вылӧ! Мед олас...
ПИРОЖОК. Ой, найӧ — штыкӧн сійӧс...
ШУЛЬГАЛӦН ГӦЛӦС (сійӧ быттьӧ тиски костысь нетшыштчис выль вынӧн). Мед олас великӧй коммунистическӧй партия, коді йӧзыслы индіс справедливость туй...
ПИРОЖОК. Ой, ловъя вывсьыс гуалӧны...
ВАЛЬКОЛӦН ГӦЛӦС. Смерть врагъяслы!...
ШУЛЬГАЛӦН ГӦЛӦС.
ВАЛЬКОЛӦН ГӦЛӦС.
(Сьылӧмӧ ӧтлаасьӧны выль гӧлӧсъяс. Интернационал сьылӧмлӧн шыясыс кыптӧны, паськалӧны енэжын. Фомин нетшыштчӧ места вывсьыс ӧшинь дорысь да петӧ камераысь, ӧдзӧссӧ клопкӧмӧн.)
ПИРОЖОК (сьӧлӧмсянь). Ой, Фомин, тӧдвылад коркӧ уськӧдлан тайӧ чассӧ... Ой, казьтыштлан...
(Юргӧ Интернационал и ӧні сійӧ оз лӧнь, а гораммӧ:
ПИРОЖОК. Став му пасьтаыс... Став му пасьтаыс лэбзьӧ сьылӧм...
(Свет кусӧ. И кор Интернационаллӧн мелодияыс паськалӧ тыр вынӧдз, прожекторлӧн югыд лучыс сцена пельӧсысь петкӧдлӧ том йӧз чукӧрӧс.)
— Ме, Олег Кошевой... Ме, Ульяна Громова... Ме, Иван Туркенич... Ме, Иван Земнухов... Ме, Сергей Тюленин... Ме, Любовь Шевцова...
ОЛЕГ. Том гвардияса членъяс радӧ пыригӧн, ӧружие кузя аслам другъяс водзын, рӧднӧй, многострадальнӧй му водзын, став народ водзын торжественнӧя клянитча, кыв шутӧг выполняйтны организациялысь любӧй задание, видзны гусьӧн ставсӧ, мый ме уджала да вӧча Том Гвардияын. Ме клянитча пӧщадатӧг мститны сотӧм да рӧзӧритӧм каръяс да сиктъяс вӧсна, миян йӧзлысь кисьтӧм вир вӧсна... герой-шахтёръяслӧн мученическӧй смерть вӧсна. И тайӧ местаыслы кӧ ковмас менам олӧмӧй, ме сета сійӧс ньӧти повтӧг. Ме кӧ торка тайӧ священнӧй клятвасӧ пыткаяс улын либӧ повзьӧм вӧсна, сэк мед менсьым нимӧс, менсьым рӧдвужӧс лоӧ нэм кежлӧ проклянитӧма, а менӧ ачымӧс мед покарайтас менам ёртъяслӧн суровӧй ки...
СТАВӦН. Вир пыдди вир... Смерть пыдди смерть...
(Торжественнӧя юргӧ Интернационаллӧн мелодия.)
ІІІ ДЕЙСТВИЕ
Квайтӧд картина
Дзик пемыд, сӧмын ломтысян пач вомысь би югӧрыс усьӧ Уля да Олег чужӧмъяс вылӧ. Комнатасьыс мукӧдторсӧ позьӧ гӧгӧрвоны, но аддзыны он вермы. Олег да Уля видлалӧны кутшӧмкӧ листъяс да шыблалӧны пачӧ либӧ тэчӧны бокӧ.
УЛЯ. Ок, кутшӧм уна, Олег... А мыйдта наын шогыс, страданиеыс...
ОЛЕГ (сосредоточеннӧя). Со, видзӧдлы тайӧс... Цензура тушӧн мавтӧма, но все равно — татшӧм письмӧыд быдся листовкаысь ёнджыка сотӧ... Тэ тӧдан, ме кӧ эськӧ верми — ме эськӧ дзонь книга лӧсьӧді татшӧм письмӧяссьыс, кодъясӧс найӧ дзебӧны йӧзсьыс — медым нэм кежлӧ видзны, став йӧзыслы...
УЛЯ. Весиг лыддьыныс сьӧкыд... А кыдз нӧ найӧ ставсӧ тайӧс терпитӧны сэні. Мем мӧвпыштны страшнӧ... Тэ аддзылін Иванихина Лиляӧс?
ОЛЕГ. Эг на...
УЛЯ. Тэ сӧмын думышт — зэригӧн, войын, кӧмтӧм, тшыг, Германия вомӧн, Польша вомӧн — и всё-таки локтіс... Но мый найӧ вӧчӧмаӧсь сыкӧд!... Ёсиник нырыс да старушкалӧн кодь чужӧмыс сӧмын кольӧма... А кашляйтӧ — оз и дугдыв. Тӧдан мый, Олег, мукӧддырйи ме сьӧлӧмам кыла сэтшӧм мстительнӧй чувство, весиг пола, мися мыйкӧ думайттӧг вӧчсяс. Ме весиг видзӧдны на вылӧ ог вермы... Менам пыр тӧдвылын, кыдзи найӧ шобсисны миян квартираын — сундукын, вольпасьын, платьеясӧс шарфъяс вылӧ вундалісны, а киясыс налӧн вӧліны няйтӧсь, сьӧдӧсь, курасьысь кияс — а ме видзӧді да весиг кажитчӧ на вылысь вир аддзылі... А ӧні найӧ кӧсйӧны судзӧдчыны миян ловъяс дінӧдз... Ӧд быдӧнлӧн сьӧлӧм вылас эм мыйкӧ ыджыд, мича, югыд — кыдзи миян войнаӧдзся олӧм... И мед ми мунам став сьӧкыдтор пырыс — сӧмын тайӧс оз ков воштыны, колӧ мед ми колим сэтшӧмӧн жӧ, кутшӧмӧсь вӧлім... весиг мед бурджыкӧн лоим...
ОЛЕГ (лӧня). Тӧдан, ме тэд веськыда висьтала — мукӧддырйиыс тэ шуан ӧти кыв — и быттьӧ ставыс ӧтпырйӧ воссяс — и мый думайті ме, мый Ваня, и ставӧн... Вот тадзи жӧ и ӧні... Тэ быттьӧ миян лов да и сӧвесть.
(Восьса пач ӧдзӧссьыс биыс югзьӧдӧ налысь чужӧмъяссӧ. Чӧв олӧм.)
УЛЯ. Ок, эськӧ тайӧс кӧ ми вермим...
ОЛЕГ. Мый?
УЛЯ. Гӧгӧрвоан, Олег, ме кӧ эськӧ аддзи мужественнӧй-мужественнӧй йӧзӧс, кодъяс вермӧны вӧчны ставсӧ. И тайӧ йӧзыс кӧ эськӧ спаситісны ставсӧ, кодъясӧс лӧсьӧдчӧны нуны Германияӧ. Тэ гӧгӧрвоан, кутшӧмӧн долженӧсь лоны тайӧ йӧзыс?... А ме... ме слаб... А ме эськӧ тшӧтш муні накӧд. Ме эськӧ эг жалит ачымӧс, кӧть мый лои!
ОЛЕГ (видзӧдӧ сы вылӧ). Дона друг тэ, менам...
УЛЯ. А тӧдан мый, менам кӧ эськӧ вӧлі сэтшӧм ёрт, коді эськӧ вунӧдіс асьсӧ да муніс йӧз ради — ставтор вылас. И ме сыкӧд... Ён, ыджыд, сэтшӧм веськыд морт, кодӧс гашкӧ ньӧтчыд эг аддзывлы, а сійӧ оліс тэнад лолын... Сӧмын ме ногӧн позьӧ нэмтӧ овны и не паныдасьны татшӧм морткӧд.
ОЛЕГ (волнуйтчӧ). Обязательнӧ паныдасян... Ме вот весиг аддза сійӧс. Збыль, ме видзӧда тэ вылӧ и аддза сійӧс — сылӧн сэтшӧм ыджыд лолыс, сэтшӧм сӧстӧм... Дзик тэлӧн кодь. И сійӧ сэтшӧм мужественнӧй... (Негора да откровеннӧя.) Тӧдан, Уля, ми сэтшӧм ёна лӧсялам Нина Иванцовакӧд, сэтшӧм ёна, — сійӧ сэтшӧм прӧстӧй, сэтшӧм повтӧм... Мукӧддырйиыс ми огӧ и сёрнитӧй, а чӧв олам, а сійӧ тӧдӧ, мый йылысь ме думайта. И мем кажитчӧ — ме тӧда, мый йылысь сійӧ. Гӧгӧрвоан? Мем кажитчӧ, позьӧ лунтырӧн тадзи ӧтлаын овны — и оз ло гажтӧм. И сійӧ сэтшӧм гордӧй, сэтшӧм решительнӧй...
УЛЯ (веськыда видзӧдлӧ сылы чужӧмас). А Нина ӧд мем тайӧс жӧ висьтавліс тэ йылысь, Олег... Кутшӧм тайӧ лӧсьыд...
ОЛЕГ (смущеннӧя). Збыль?... Со ещӧ письмӧ, видзӧдлы...
УЛЯ. Кутшӧм ужаснӧ тайӧ ставыс, Олег... Верман ӧмӧй став мобилизуйтӧмсӧ хуторъясӧ дзебны, верман ӧмӧй ставыслы врачсянь справка судзӧдны?... А найӧ ӧд нӧшта на кык сюрс мортӧс чукӧртісны. Мыйкӧ колӧ страшнӧйтор вӧчны. Гашкӧ уськӧдчыны, кор найӧ кутасны нуӧдны партиясӧ, гашкӧ вины эсійӧ Шприксӧ, коді сэні командуйтӧ... Видзӧд, Олег, кутшӧм аслыс ногӧн сотчӧ этійӧ письмӧыс... (Мстительнӧя). Колӧ бырӧдны став списокъяссӧ, дзугны налысь став картотекасӧ, бырӧдны адресъяссӧ, фотографияяссӧ, йӧзыслысь фамилиеяссӧ, кодъясӧс найӧ босьтісны лыд вылӧ...
(Би югзьӧдӧ сылысь чужӧм.)
И ме тӧда кыдзи — биржасӧ колӧ сотны!...
ОЛЕГ. Сотны?
УЛЯ. Тэ кылан, Олег? — Сотны!
(Би кусӧ.)
Сизимӧд картина
Декорацияыс мӧд картиналӧн — Кошевойяслӧн комната. Лун, ӧшиньӧд пырӧ яр шонді югӧр. Шахматнӧй пӧв дорын Олег да Николай Сумской. Нина видзӧдӧ ворсӧмныссӧ. Уля, Тюленин, Валя, Жора Арутюнянц, Туркенич, Ваня Земнухов — бокынӧсьджык, составляйтӧны листовка.
1.
СУМСКОЙ. Извинит, оз кӧ ло сідз юалӧма, биржасӧ ӧд тіян отсӧгӧн сотісны?
ОЛЕГ (сетӧ гӧгӧрвоны правдасӧ). А код тӧдас...
СУМСКОЙ. Бур... Мыйӧн листовкаясыс воасны посёлокӧдз — фрицъясӧс быттьӧ биа-висьӧм треситӧ...
ОЛЕГ (спокойнӧя). Да и тані миян, быттьӧ, сэтшӧм кодь жӧ...
СУМСКОЙ (видзӧдӧ дӧска вылӧ). Ого, тані колӧ мӧвпышты... А ещӧ со мый — эстӧн станция вылас ссыпнӧй пункт: мыйӧн вартӧм бӧрас сэтчӧ вайисны нянь — ми сэтчӧ клещӧс лэдзим.
ОЛЕГ. Тэныд петны. Няньсӧ идралӧма лои? Сёрӧмъяссӧ колӧ сотны быдлаын.
СУМСКОЙ. Гӧгӧрвоа... Висьтав, а тӧрыт войнас тані караныд штаб дінысь постовӧйӧс виӧмны. Тайӧ тіян жӧ?
ОЛЕГ (вештӧ фигура). Да, эмӧсь сэтшӧмъяс, кодъяс оз узьны войяссӧ...
НИНА. Бокысянь кӧ кывзыны — тіян сёрниныд быттьӧ кык злӧдей костын сёрни.
ОЛЕГ (нюмдӧ). Да, Ниночка, гӧгӧрвотӧм морт кӧ эськӧ тадзи и мӧвпыштіс.
СУМСКОЙ. Миян базар вылын фотокарточкаяс ӧшлісны — Краснӧй площадь вылын немецкӧй парад. Мӧд карточка вылын — фрицъяс миян нывъяскӧд Сталинградса набережнӧйті гуляйтӧны.
ОЛЕГ (зумыштчӧ). Вот и колӧ правдасӧ висьтавлыны. Приёмникныд эм тіян?
СУМСКОЙ. Эм.
ОЛЕГ. Но вот... Жарыс налы воас на, казьтыштлы менсьым кывъясӧс...
СУМСКОЙ (видзӧдӧ Олег вылӧ). Миян хуторын том йӧз чайтӧны, мый тані тоша подпольщикъяс действуйтӧны...
ОЛЕГ (неопределённӧя). Да...
СУМСКОЙ (зэв надзӧн). А коді нӧ сійӧ ачыс Кашукыс? Эн аддзыв?
(Олег чӧв олӧ.)
НИНА (гораа). Тэнад ладьяыд вермас вошны.
СУМСКОЙ (оз кывзы). Район пасьта сэтшӧмторъяс вӧчсьӧны, мый сёрнияслы и помыс абу...
НИНА (настойчивӧя). Тэныд мунны...
СУМСКОЙ. Аддза...
ОЛЕГ. Ӧружиеныд эм тіян?
СУМСКОЙ. Этша.
ОЛЕГ. Степь вылысь колӧ чукӧртны. И налысь гусявлӧй, найӧ беспечнӧя олӧны.
НИНА. Шах! Олег!
ОЛЕГ. Нинӧм. Тайӧ сылы тӧдчас, кыдзи агрессорлы... А тэ гӧгӧрвоан — воас кад, немечьяс кутасны пышйыны, а ми выступитам армиялы отсавны. Тэ казялін, асыввылӧ частьяс мунӧны, а переформируйтчыны бӧр сэсся оз нин локны. Тайӧ Сталинград найӧс изӧ, збыль.
СУМСКОЙ. Да... а биржанад бура артмис. А тэ ачыд пӧжарсӧ аддзылін?
ОЛЕГ. Удайтчис аддзывны. Сэн, вокӧ, сэтшӧм би ыпнитіс, весигтӧ тӧв кыптіс...
СУМСКОЙ (шӧпкӧмӧн). А гашкӧ ещӧ кодӧс сюрӧ чукӧстам?
ОЛЕГ (видзӧдлӧ ёртъяс вылас). Шш... Асьным вермам вӧчны...
СУМСКОЙ. Но, смотри, ме тэнӧ кута виччысьны.
ОЛЕГ. А вот — сёрнитыштам — и ме дась...
СУМСКОЙ. А тэ найӧс тэрмӧдлышт.
ОЛЕГ. Ладнӧ.
СУМСКОЙ. Тӧдан мый, ме пӧжалуй сдайтча, петны сэсся некытчӧ... колльӧдан менӧ?
ОЛЕГ. Мунам. (Туркеничлы.) Ме регыд бӧр локта, Ваня...
(Олег да Сумской петӧны.)
2.
УЛЯ (водзӧ нуӧдӧ сёрнисӧ). Ме вӧзъя тадзи гижны татчӧ: — Мый вермас паныд сувтны мортлӧн чорыд вӧлялы? Вӧляыс ас пытшкас кутӧ душасӧ ставнас да чудеса вӧчӧ...
СЕРГЕЙ. Зэв бур... Молодеч, Уляша...
ВАНЯ (велӧдӧмӧн). Тайӧ абу Улялӧн, тайӧ Лермонтовлӧн. А помалам тадзи: миян народлӧн эм чорыд вӧля и сійӧ победитас.
ТУРКЕНИЧ. Правильнӧ.
ВАНЯ (тӧждысьӧмӧн). Ме ногӧн быть колӧ Лермонтов вылас ыстысьны.
ВАЛЯ. Листовкаын? Мыйла?
ЖОРА (авторитетнӧя). Ме ногӧн, тані абу быть. Ми кӧ тані ыстысям став народ вылӧ, то Лермонтов вылӧ ыстысьны абу быть...
ОЛЕГ (пырӧ). Сумской пыр биржа йылысь юасьӧ — коймӧд лун область пасьта мунӧ шум... Ме, дерт, нинӧм эг висьтав... А збыль кӧ шуны, — мем окота вӧлі, да, мем окота вӧлі висьтавны, — а кор миян воасны — обязательнӧ висьталам: Тюленин, Люба Шевцова — со найӧ. (Нимкодя). А мый?...
СЕРГЕЙ (смущеннӧя.) Ачыд гӧгӧрвоан, ми эгӧ та ради.
ОЛЕГ. Тэ эн скӧрмы, ме ӧд рад, гӧгӧрвоан... Ок, тэ шаньӧй менам. (Туркеничлы.) Коді нӧ ещӧ абу?
ВАЛЯ. Медсясӧ — Люба абу на. И эсійӧ, Стаховичыс.
УЛЯ. Биржа бӧрад бара арестъяс мӧдісны. Тӧрыт став улич кузя шобсисны.
ОЛЕГ (тревожнӧя). А тэ ордын?
УЛЯ. Ми кыдзкӧ мынім. А Петров Витялысь батьсӧ арестуйтісны.
НИНА. Витялысь? Тайӧс позьӧ вӧлі чайтны... Осторожнӧйджыка колӧ уджавны...
ТУРКЕНИЧ. Быд вой делӧ вӧчам — тайӧ со и ярмӧдӧ найӧс...
ОЛЕГ (пӧся). Мед... (Друг.) А вот — Горький нима клуб — йӧзлы сэні овны оз позь, учреждениелы оз жӧ позь, а чукӧртны кӧ неыджыд группа том йӧзӧс, локны городскӧй управаӧ да юавны, позьӧ оз восьтыны клуб населениеӧс культурнӧя обслуживайтӧм могысь — «выль порядок сямӧн». А?
ВАНЯ. Правильнӧ!
ТУРКЕНИЧ. Вот тайӧ эськӧ вӧлі ширма!
ВАНЯ. Дерт жӧ. Локта, шуам, ме том поэт, кодлы зэв ёна колӧ слава да развлечениеяс. Вермасны разрешитны.
ОЛЕГ. Вермасны. Найӧ асьныс пӧдӧны гажтӧмысла. Бургомистр дінас тэ и мунан.
ВАНЯ. Ме? Сійӧ юысь скӧтина дінас? (Вежӧ тонсӧ.) Пӧжалуйста! (Ворсӧ.) Карын паськалӧны слухъяс, господин бургомистр, быттьӧ пӧ немецкӧй армия Сталинград улын поражение терпитӧ, да...
ОЛЕГ (бургомистрлысь рольсӧ босьтӧ, скӧрысь). Мый?
ВАНЯ. Лӧжнӧй слухъяс, господин бургомистр, дерт лӧжнӧй, но такӧд йитӧдын ми... Том йӧз юръясын тӧдчӧ кутшӧмкӧ шаткость...
ОЛЕГ (водзӧ ворсӧ). Ну-с.
(Том йӧз сералӧны.)
ВАНЯ. Том йӧз нимсянь, кодъяс преданнӧйӧсь выль пӧрадоклы, ми корам тіянӧс, тіянлысь небыд сьӧлӧмныдтӧ тӧдӧмӧн...
ОЛЕГ (серам пыр). Оз ӧткажит! И жандармъяс ме ногӧн оз жӧ ӧткажитны...
(Йигӧдчӧны.)
НИНА. Тайӧ Люба.
ОЛЕГ. Абу, Нинук, тайӧ, ме ногӧн, Стахович. Восьтасны сэн.
СТАХОВИЧ (пырис). Видза оланныд, ныв-зон... (Валялы, снисходительнӧя). Володя Осьмухинӧс тэ аддзылін?
ВАЛЯ. Аддзылі.
СТАХОВИЧ (важнӧя). Сійӧ нинӧм эз тшӧкты висьтавны?
ВАЛЯ. Ме абу почтовӧй контора и абу телеграфнӧй станция... Ме связист — но ме выполняйта сӧмын штаблысь поручениеяс...
СТАХОВИЧ. Да, но, ме ӧд штабса член жӧ, Валя... И тоныд мыйкӧ тэнад аслыссяма?
ВАЛЯ. Тэ меным заданиеяс эн сетлыв. А тон йывсьыд — сійӧ тэ сідз сёрнитан, быттьӧ ме тэнӧ дыр нин кори босьтны менӧ личнӧй секретарӧ и бӧрвылас сэсся тэ примитін менӧ... Аттьӧ тіянлы.
СТАХОВИЧ. Ог гӧгӧрво. (Олеглы.) Погорелое хуторын — пленнӧйяс уджалӧны, вӧр кералӧны. Тэ кывлін?
ОЛЕГ (нездӧвӧля). Да, ме тӧда...
СТАХОВИЧ. Но вот! Кӧсъянныд кӧ менсьым сӧвет кывзыны — сулалана делӧыс. Эм позянлун бара шызьӧдны, бырӧдны охранасӧ, сэтшӧм демонстрация вӧчны...
ОЛЕГ. Делӧыс ӧд абу демонстрацияын.
СТАХОВИЧ. Коркӧ колӧ жӧ решитчыны збыль партизанскӧй действиеяс вылӧ...
УЛЯ. Ми эгӧ на быдмӧй татшӧм операцияяссӧ нуӧдны.
СТАХОВИЧ. Да, но сэні йӧзыс тшыглаыс пыкталӧны, кулӧны. Йӧзсӧ кольны пӧгибнитны? Кӧн нӧ тан логикаыс?
ВАНЯ. Мыйла тэ чувствояс вӧрзьӧдан? Миянлы ставнымлы жальӧсь йӧзыс. Но — жандармъяскӧд веськыда косясьӧм вылӧ мунны... Олег прав, ми ӧд збыль абу нин челядьяс.
ОЛЕГ. Действуйтны кӧ, колӧ войын, зыктӧг, часӧвӧйсӧ снимитны да... Но тайӧс должен штаб решитны...
СТАХОВИЧ. Ме ногӧн, неправильнӧя анализируйтанныд положениесӧ. Тані колӧ объективнӧя. Коді тіян пӧвстысь кутас кывкутны, часӧвӧй вылӧ «шумтӧг» уськӧдчыны челядьнога тайӧ босьтчылӧмыс кӧ орӧ!
(Чӧв олӧм.)
ОЛЕГ (самолюбивӧя). Ме босьта. Ме. Кыдзи организациялӧн комиссар.
СТАХОВИЧ. Ставыс тайӧ абу серьёзнӧ. Кутшӧм кӧ неразбериха миян; либӧ миянлы колӧ опытнӧйджык руководство, либӧ, кора прӧститны, ме кута действуйтны ас ногым.
ОЛЕГ (гӧрдӧдӧ). Сійӧ мортыс, коді вермӧ тадзи сёрнитны, тыдалӧ, вообще оз признайт ни организациясӧ, ни дисциплинасӧ...
СТАХОВИЧ. А ме кӧ тайӧ вопрос кузяыс торъяла организацияыскӧд?
(Йигӧдчӧны.)
ОЛЕГ (коса). Извинит, Женя. (Сійӧ петіс да бӧр пырӧ Любакӧд. Любаӧс зэв нимкодя встречайтӧны — «Любушка,
(Нывъяс окалӧны.)
(Стаховичлы.) Мый тэ висьталін, Женя?
СТАХОВИЧ. Ме шуа, меся, партизанскӧй отрядын ми эгӧ тадзи действуйтлӧй.
ЛЮБА (бергӧдчис). А кыдзи ті действуйтлінныд?
ОЛЕГ. Энлыв, Люба. Кад заседание восьтыны.
НИНА (Валя Борцлы). Мунам, Валюша ... (Олеглы.) Ми дежурство вылӧ ...
ОЛЕГ (локтӧ Нина дінӧ). Сӧмын ті, нывъяс, осторожнӧйджыка сэні. Кыланныд?
ВАЛЯ. Абу нин ичӧтӧсь и огӧ нин первойысь, Олег.
НИНА. Ладнӧ, Олег... Ми виччысьӧмӧн...
ВАЛЯ. Мунам. (Сійӧ да Тюленин видзӧдлӧны ӧта-мӧд выланыс.)
(Нывъяс петісны.)
4.
ОЛЕГ. Кыв сетсьӧ Любалы.
ЛЮБА (синъяссӧ читкыртіс). Но мый... Тіян задание серти ме вӧлі Ворошиловградын. Унакӧд паныдасьлі, уна сикас приключениеяс вӧліны, выльторъяс, сӧмын медводз мем колӧ висьтавны мӧдтор йылысь: ме аддзылі Иван Федорович Проценкоӧс.
(Ставӧн чӧв олӧмӧн видзӧдӧны Стахович вылӧ.)
СТАХОВИЧ (повзьытӧг). Сійӧ ловъя?
ЛЮБА. Да, ловъя. И сійӧ висьталіс, Женя, со мый: штабыд тэнӧ миян дінӧ абу ыстывлӧма. И отрядсьыд тэ вошӧмыд кыдзкӧ аслыс ногӧн, и миянлы висьталін мыйкӧ дзик мӧдтор... (Синсӧ читкыртіс.) Гашкӧ тэнӧ миян дінӧ немечьяс ыстісны?
СТАХОВИЧ. Мый?
ЛЮБА. Тадзи и шуис Иван Федорович.
СТАХОВИЧ. Сійӧ вермис тадзи мӧвпыштны?
ЛЮБА (чорыда). А мый нӧ ещӧ позьӧ тэ йылысь мӧвпыштны?
СТАХОВИЧ. Мыйла нӧ сійӧ тэныд эз висьтав, мый отрядсӧ недель чӧж нин вӧтлӧдлісны и сійӧ ачыс гӧгӧрвоӧ вӧлі, мый колӧ разӧдчыны.
(Ставӧн чӧв олӧны, Стахович вежӧ тонсӧ.)
Ме вылӧ уси сэтшӧм подозрение, мый ме...
ОЛЕГ. Тэ висьтав миянлы ставсӧ дорвыв...
СТАХОВИЧ (негораа да полыштӧмӧн). Ме висьтала... Миянӧс сэки окружитісны да ми лӧсьӧдчим прорыв вылӧ. Воддза группаяс кутісны бӧрыньтчыны, медым сосредоточитчыны, а ме... но, вермисны чайтны, мый ме пола, и ме сразусӧ эг бӧрыньтчы... А сэсся сэтшӧмтор кыптіс — став сынӧдыс быттьӧ вӧлі тырӧма свинеч бусӧн, и биыс вӧлі сэтшӧм... Зэв страшнӧ вӧлі... Сэки некод нин некод вылӧ эз видзӧд... А ме думышті: найӧ мунӧны прорыв вылӧ, медым спаситчыны, а всё равно пӧгибнитасны, а гашкӧ и ме пӧгибнита тшӧтш. А ме верма спаситчыны и полезнӧйӧн на лоны. Но, сэки ме и воді кустӧ... Сэк ме тадзи думышті, а ӧні, дерт, гӧгӧрвоа, мый тайӧ вӧлі лазейка. Но, ме кустас и кольччи.
УЛЯ. Сідзкӧ тэ йӧз син водзас асьтӧ сюсьӧн петкӧдлан, а мыйӧн ӧтнад колин — кустӧ пырин?
СТАХОВИЧ. Мыйла тэ, Уля, тадзи шуан?...
УЛЯ. Сы вӧсна, мый тайӧ (гӧлӧсыс сылӧн дрӧгмуні)... Тайӧ некытчӧ туйтӧм да позорнӧ... Да, да, позорнӧ и пеж... Мыйта шогыс гӧгӧр, мыйта йӧз, дзоньвидза, бур йӧз гибнитӧны фронт вылын, лагерьясын, тюрьмаясын, а мый переживайтӧны налӧн гӧтыръясыс, мамъясыс, челядьыс... Но быдӧн уджалӧ, тышкасьӧ, а тэ...
ЛЮБА. Но, тэ кустӧ пырин, а немечьясыс кытӧнӧсь вӧліны?
СТАХОВИЧ (тэрмасьӧмӧн). Ме висьтала. Ме куйлі, а сэк заводитісны ёна лыйлыны, сӧмын дзик мӧд местаын. Ме мӧвпышті, меся кад воис — и чеччышті юӧ. Мышку вылӧ водӧмӧн кывті увлань... (Сылы кажитчис, мый сійӧ асьсӧ оправдайтас нин.) Тадзи со ме спаситчи!... А тадзи подозревайтны — вермас ӧмӧй лоны? Мыйӧн ме петі юсьыс, сэтчӧ и уси степь вылас, войын, сулик ва.
СЕРГЕЙ. Кынмин кӧнкӧ, коньӧрӧй... Заводитісны лыйсьыны мӧд местаын, а сійӧ водіс мышку вылас да кывтіс. А лыйсьыны заводитісны сы вӧсна, мый отряд прорыв вылӧ муніс...
ЖОРА. Артмӧ, быттьӧ ставныс мунісны гибель вылӧ, медым тэнӧ спаситны...
СТАХОВИЧ. Ме всё-таки ог лыддьы, мый ме вӧчи зэв ыджыд преступление. Мукӧдыс тай со спаситчӧмаӧсь жӧ. И ачыс Проценко спаситчӧма жӧ со!
ЛЮБА (ӧзйис). Проценкоӧдз миянлы ставнымлы зэв ылын, Женя. И тэ асьтӧ сыкӧд орччӧн эн пукты.
ТУРКЕНИЧ. Проценко — командир. Сійӧ став отряд йывсьыс думайтіс. А тэ — боец...
СЕРГЕЙ. Да медся прӧстӧй боецыс эськӧ эз повзьы, а тайӧ повзьӧма...
ТУРКЕНИЧ (негораа). Ме эськӧ веськыда смертьыслы паныд муні, а эг янӧд тадзи ачымӧс...
ВАНЯ. Мед сідз. Тэ спаситчин. А мыйла тэ миянлы висьталін, мый тэнӧ штаб ыстіс?
СТАХОВИЧ. Менӧ штаб збыльысь кӧсйыліс ыстыны, та вӧсна и висьталі. Ме мӧвпышті — ме кӧ коли ловъя, сідзкӧ нинӧм оз вежсьы. Кӧсйӧны вӧлі ыстыны — Проценко подтвердитас тайӧс.
УЛЯ. Ми тэд эскам... И всё-таки, Женя, тайӧ зэв мисьтӧмтор и сэтшӧм абу лӧсьыд, мый артмис миян пӧвстын... И висьталін тэ ставсӧ кыдзкӧ не сідз, быттьӧкӧ тэ нинӧмысь абу мыжа, быттьӧ абу сӧвестьын делӧыс.
ЛЮБА. Талӧн семьяыс зэв шань — вокъясыс — коммунистъяс фронт вылынӧсь... А тайӧ... ӧбиднӧ весиг...
СТАХОВИЧ. Сӧвестьӧй менам сӧстӧм. Ме пыр вӧлі активистӧн и...
ВАНЯ. Мем кӧ, например, эськӧ яндзим вӧлі сідзи мӧвпыштны, мый ме мукӧдсьыс вылынджык. А тэ со асьтӧ Проценкокӧд орччӧн пуктан. А тэ ӧд ачыд тӧдан, кутшӧм ыджыд да сьӧкыд олӧмыс миян быд коммунистлӧн...
СТАХОВИЧ. Мый веськӧдлыны абу кокни — тайӧс быдӧн тӧдӧ. Кывкутны да...
УЛЯ. А код водзын кывкутны, Женя?
СТАХОВИЧ. Код водзын? Вылынджык сулалысь организацияяс водзын, да этша на мӧй...
ОЛЕГ (скӧрысь). Партия водзын, народ водзын — со мый йылысь помнитӧны миян гырысьджыкъясыд... А тэ кӧнкӧ ньӧтчыд на эн мӧвпыштлы та йылысь, та вӧсна и кыссин... кустъясад. (Жалиттӧг.) А ачыд шуан, верман пӧ атакуйтны немецкӧй жандармерияӧс...
ТУРКЕНИЧ (негораа). Салдат должен приказ выполняйтны. А тэ бой дырйи пышйин, дженьыда кӧ шуны, — дезертируйтін бой вылысь. Фронт вылын миян татшӧмторсьыд вӧлі лыйлӧны либӧ ыстӧны штрафнӧй батальонӧ. Асланыс вирӧн йӧзыс вештылісны мыжнысӧ.
СТАХОВИЧ. Вирсьыд ме ог пов.
СЕРГЕЙ. Ӧтчыд повзин нин.
ЛЮБА. Тэ сӧмын асьтӧ вылӧ пуктан... А сэсся и нинӧм...
(Дыр чӧв олӧм.)
ЖОРА. Менам, дерт, решающӧй гӧлӧсыс абу, но ме ногӧн ставыс яснӧ...
(Ставӧн видзӧдӧны Олег вылӧ.)
ОЛЕГ (кост бӧрын). Ваня Туркенич ставсӧ нин висьталіс, бурджыктор сэсся он шу. А сы серти, кыдзи Стахович асьсӧ кутӧ, сійӧ, тыдалӧ, дисциплинасӧ некутшӧма оз признавайт.
СЕРГЕЙ. Сійӧ чайтӧ — эта мында йӧзыс воюйтӧны сӧмын сы могысь, медым сійӧс спаситны.
ЛЮБА. Синсӧ лапнитлытӧг примитіс миянлысь клятва, а ачыс пӧръяліс. Кыдз нӧ сійӧ вермис сетны клятвасӧ, кор сэтшӧмтор вӧлӧма сӧвесть вылас? Бур и ёрт!...
СТАХОВИЧ (шӧйӧвошӧмӧн). Неужели ті меным онӧ эскӧй? Вайӧ меным любӧй испытание.
ОЛЕГ (чорыда). Но тэ ачыд гӧгӧрвоан, мый штабӧ кольны тэнӧ оз позь?
СТАХОВИЧ (шензьӧмӧн). Оз позь кольны? (Усьӧм гӧлӧсӧн.) Гӧгӧрвоа...
ОЛЕГ. Колӧ мед тэ тайӧс ачыд гӧгӧрвоин. А задание ми тэныд сетам — и не ӧтиӧс... (Видзӧдлӧ став вылӧ.) Сідзкӧ решитім — Евгений Стаховичӧс Том Гвардия штабысь исключитны. Коді прӧтив? Некод... Но, кад помавны заседаниесӧ...
СТАХОВИЧ (чеччис). Ставыс тайӧ мем зэв сьӧкыд... Ті асьныд гӧгӧрвоад. Но ме тӧда, мӧд ногӧн вӧчны ті энӧ вермӧй. И ме ог элясь тіян вылӧ. Ёртъяс, ме клянитча... (Чепӧсйӧ комнатаысь.)
5.
ОЛЕГ (мӧвпалӧ). Да... Збыльысь сылы задание колӧ сетны. Колӧ прӧверитны сійӧс... И кужас кӧ сійӧ бӧр кыпӧдны ассьыс бур нимсӧ, сэк... (Надеяӧн.) А, гашкӧ, сійӧ исправитчас на ёртъяс, ей-бог...
ТУРКЕНИЧ. А ті чайтанныд татшӧмторъясыд фронт вылын оз овлыны? Том боецыд первойсӧ повзяс, а сэсся сыысь сэтшӧм солдат артмӧ — любӧ видзӧдлыны. Сылы позьӧ мыйкӧ клубын поручитны.
ОЛЕГ (меліа). Люба, висьтав миянлы дорвыв ставсӧ.
ЛЮБА (волнуйтчӧ). Медводз меным тшӧктісны висьтавны Областнӧй партизанскӧй штабсянь боевӧй большевистскӧй привет том гвардеец-ёртъяслы, прӧста кӧ шуны, тіянлы...
ЖОРА. Вот тайӧ да!
ЛЮБА. Проценколы ме ставсӧ висьталі. И мый вӧчам висьталі. (Олеглы.) Висьталі тшӧтш, мый тэнад велӧдӧм серти организуйтчим пятеркаясӧн... И тӧдан, мый сійӧ шуис? Сійӧ шуис — тіян Олегыд молодеч.
ОЛЕГ. Збыль?
ЛЮБА. Сійӧ шуис, мый ми аддзим организациялысь да тышлысь правильнӧй туй: котыртавны посньыдик группаяс, но быдлаын, со кыдз сійӧ шуис. Сійӧ шуис, мый областьса большевикъяс надейтчӧны миян вылӧ, мый ми долженӧсь отсавны йӧзыслы тышкасьӧмас.
СЕРГЕЙ. Вот тайӧ сідз!...
ОЛЕГ (наивнӧя да шуда чужӧмӧн). Сідзкӧ, Том Гвардияӧс признайтісны... Мӧвпыштӧй сӧмын ті... Олӧмным миян принадлежитӧ не миянлы, а партиялы, став народлы...
УЛЯ (негораа). Тэ молодеч, Люба.
ЛЮБА (окыштӧ сійӧс). Улечка!
ОЛЕГ. Веськыда кӧ шуны, ме рад. Ме збыль вылӧ рад, (Ванялы.) Проценко! Аддзылін? Со, вокӧ!
(Оживление. Ныв-зон сёрнитӧны.)
ЛЮБА (негораа, Олеглы). А помнитан, Олег, ме тэд Устинская станция йылысь висьтавлі? Ыджыд мувывсянь менсьым юасьлісны, помнитан?
ОЛЕГ (негораа). Тӧдмалін?
ЛЮБА. Тӧдмалі да и передайті нин — войдӧрлун — веськыда Ворошиловградсянь. Сӧмын чӧв ов...
ОЛЕГ. Смотри, передатчика йӧзсӧ фондъяс став область пасьта корсьӧны.
ЛЮБА. Мый? Сэтшӧма и тӧдан тэ Любаӧс?
СЕРГЕЙ (чеччис). Менам эм юӧртӧм. Ме кӧсъя висьтавны тайӧ Игнат Фомин йывсьыс. Збыль ӧмӧй ми водзӧ кутам терпитны тайӧ сволочсӧ? Тайӧ иудаыс выдайтіс Остапчукӧс, а кымын шахтёр ещӧ сійӧ сӧвесть вылын! Посёлокын шуӧны. Остапчук пыр пӧ Фоминыс кӧсйыліс эрдӧдны став организациясӧ, да мортыс сійӧ вӧлӧма осторожнӧй. И сійӧ сӧвсем абу Игнат Фомин — 1930-ӧд воӧдз сійӧ овлӧма Воронежскӧй областьын, кулак сійӧ, и нимыс сылӧн вӧлӧма мӧд. И вокъясыс сылӧн вӧлӧмаӧсь кулакъяс, сӧмын вокъяссӧ сійӧ судӧдз вайӧдӧма, а эмбурсӧ налысь аслыс курыштӧма. Сійӧ весиг племянникъяссӧ беспризорнӧявны вӧтлӧма.
УЛЯ. А кытысь тэ тайӧс тӧдан?
СЕРГЕЙ. Сы йылысь ме ставсӧ тӧда... Старикӧс ме тась аддзи, батракын овлӧма сы усадьбаын. А комынӧд воын, кор заводитісны раскулачивайтны, тайӧ Фоминыс виӧма сельсӧветса председательӧс да ячейкаса секретарӧс да пышйӧма. Со кутшӧм морт тайӧ...
ТУРКЕНИЧ. Да сійӧ абу и морт.
ЖОРА. Ӧти лун оз коль, мед кодӧскӧ сійӧ оз вузав...
СЕРГЕЙ. А ми видзӧдам... Ме мый вӧзъя? Ме вӧзъя сійӧс вины... Поручитӧй тайӧс меным, ме сійӧс всё равно виа, и некод менӧ таысь кутны оз вермы...
(Чӧв олӧм.)
ЖОРА (негораа, но серьёзнӧя). Бать висьталіс, мый асыввылын... эм татшӧм поговорка «Предательяс асланыс смертьӧн оз кувны»... Ме ногӧн, тайӧ поговоркаыс правильнӧй.
(Чӧв олӧм.)
ТУРКЕНИЧ. А мый?... Сергей правильнӧ сёрнитӧ Игнат Фомин миянлысь йӧзнымӧс вузавлӧ и сійӧс колӧ джагӧдны. Ӧшӧдны сэтшӧм местаӧ, кӧні сійӧс унджык йӧз аддзас. А морӧсас плакат кольны, мый вӧсна джагӧдӧма. А мый нӧ сэсся? Сійӧ ӧд дзик нин звермис...
СЕРГЕЙ. Сійӧ, кӧнкӧ, чайтіс — ловсӧ немечлы вузалас и немеч сійӧс кутас уважайтны, да и йӧзыс, грешнӧй рабъяс, сыысь повны кутасны. А ӧні и немечыс сійӧс медбӧръя холуй пыдди видзӧ, да и «рабъясыс» весиг сьӧвзьыны сы вылӧ оз кӧсйыны. Вот и ветлӧдлӧ сійӧ лёкысла лӧзӧдӧмӧн...
ТУРКЕНИЧ. Сійӧ эськӧ, небось, миянӧс эз жалит... Со мый — поручитӧй тайӧс меным да Тюленинлы.
ЖОРА. Меным тшӧтш, ме зэв ёна кора.
ОЛЕГ (чӧв олӧм бӧрын). Ме первой пукта голосование вылӧ Фомин йылысь Тюленинлысь предложение... А сэсся — кодлы поручитны...
ВАНЯ. Вопросыс тырвыйӧ гӧгӧрвоана.
ОЛЕГ (настойчивӧя). Вопросыс гӧгӧрвоана, но ме всё-таки Фомин йылысь вопроссӧ торйӧн пукта. Быдӧн должен ас вӧснаыс решитны. Нимъяс серти кутам гӧлӧсуйтны — штабса быд член... Тюленин, Туркенич, Земнухов, Кошевой, Шевцова, Громова... Вӧзъя поручитны Тюленинлы, Туркеничлы да Кошевойлы...
ВАНЯ. Ме прӧтив.
СЕРГЕЙ. Мыйла прӧтив?
ВАНЯ (упрямӧя). Ме Кошевойлы прӧтив... Мый нӧ сэсся? Тырмас сэсся, ерунда кутшӧмкӧ артмӧ.
ОЛЕГ. Тэ мый йылысь?... Заседание колӧ помсьӧдны, ёртъяс.
ВАНЯ (Олег вылӧ видзӧдтӧг броткӧмӧн сёрнитӧ). Штабӧн ӧлӧдӧм вылӧ видзӧдтӧг, Кошевой быдлаӧ ачыс уськӧдчӧ. И листовкаяс, и немечьясӧс лыйлыны, и сёрӧмъяс сотны... А ме ногӧн тайӧ вывті кокниа мӧвпалӧм. И челядь ру...
ОЛЕГ (смущеннӧя). Ёртъяс, ме...
ВАНЯ (сідз жӧ). Тэ комиссар, и тэ кывкутан план вӧсна, быд операция дасьтӧм вӧсна, ставлӧн судьба вӧсна, а тэ... Тэ со муртса на Сумскойкӧд сёрнитчин хуторӧ мунны, сёрӧмъяс сотны. Чайтан ме эг кывлы? Миянсянь дисциплина требуйтан, а ачыд... Та вӧсна тэ и тэрмӧдлан миянӧс, кӧнкӧ, виччысьӧ нин сійӧ тэнӧ.
ОЛЕГ (серавлӧ). Ни ӧти кыв эз вӧв. Сумской! Мыйӧн Нина локтас, юав сылысь, сійӧ орчча вӧлі...
ВАНЯ (прокурорскӧй тонӧн). Ланьт. Нинаыд век тэ дор, тӧдам...
ТУРКЕНИЧ. Сӧмын тэ эн дӧзмы, Олег — Ваняыд збыль висьталӧ — челядь мӧвп тайӧ.
ОЛЕГ (дудіс). Ме ог дӧзмы. (Друг нюмдӧ). Асьныд ветланныд, а тані... Но ладнӧ... (Серьёзнӧя.) Пӧручайтам Тюленинлы, Туркеничлы, Арутюнянцлы. Но тіян ковмас ещӧ аддзыны войтырӧс — сэтшӧмӧс, кодъяслӧн киныс оз дрӧгмун, кодъяс став пытшкӧснаныс гӧгӧрвоасны, мый тайӧ делӧыс чистӧй, справедливӧй...
ЖОРА. Дзик сідз. Тайӧ и справедливӧ, и мукӧд подлецъяссӧ велӧдӧ. Таысь кындзи, колӧ вынсьӧдны трибуналлысь состав. Дыр разбирайтчыны нинӧмла, колӧ мед сӧмын обвиняемӧйыс аддзис, мый сійӧс суд серти казнитӧны.
ОЛЕГ. Тіянӧс штаб вынсьӧдіс — ті и трибунал.
ЖОРА. Ми сійӧс народ нимсянь кутам судитны. Тані ми ӧні народлӧн законнӧй представительяс, збыль.
ОЛЕГ. Стӧч тадзи.
ЖОРА. Аслам пятёркасянь ме вӧзъя Радик Юркинӧс. Верманныд эскыны сылы, менлы моз жӧ. Сылы дас нёль арӧс нин и сійӧ корӧ примитны комсомолӧ.
ТУРКЕНИЧ. Сійӧ ӧд детинка на, ещӧ кутас переживайтны.
ЖОРА. Мый тэ! Детинкаяс ньӧтчыд оз переживайтны. Сійӧ ми, гырысь йӧз, век мыйкӧ переживайтам. А детинкаяс нинӧм оз переживайтны. Сійӧ сэтшӧм спокойнӧй, сэтшӧм ӧтчаяннӧй...
ОЛЕГ. Сӧмын — ставыс мед вӧлі биржакӧд моз, тӧдӧны сӧмын найӧ, кодӧс назначитӧма.
ЖОРА. Будь уверен... Ми корам тэнӧ ньӧти нинӧмысь не сомневайтчыны, Олег...
ОЛЕГ (друг). Кӧсъянныд Москва кывзыны?
(Весиг дрӧгмунісны ставӧн.)
ЛЮБА. Кыдзи Москва?
ОЛЕГ. Сӧмын ӧти условие — нинӧм йылысь не юасьны.
(Сійӧ петӧ орчча комнатаӧ, ӧдзӧссӧ восьса кольӧ. Том войтыр виччысьӧны. Виччысьӧмӧн пырӧны Валя да Нина.)
6.
ВАЛЯ. Помасис?
(Сергей гогнитӧ юрнас.)
НИНА. Мыйкӧ тайӧ?
СЕРГЕЙ. Москва...
(Нина чуймалӧ.)
ОЛЕГ (гӧлӧс). Ниночка? Лок, отсышт мем!
(Нина муніс Олег дінӧ. Лӧнь. Став му вывсьыс передача торъяс и друг Левитанлӧн гӧлӧс: «Сӧветскӧй информбюросянь. Сентябрь 7-ӧд лунся оперативнӧй сводка. Рытъя юӧртӧм».)
ВАНЯ (Валялы). Гижав, гижав, ми аски жӧ лэдзам тайӧс.
(Олег да Нина тыдовтчӧны ӧдзӧс дорын, кывзӧны ставкӧд тшӧтш).
ГӦЛӦС. «Сентябрь 7-ӧд лун чӧж миян войска нуӧдісны чорыд бойяс противниклы паныд Сталинградсянь рытыввылын да рытыв-лунвылын, а сідзжӧ Новороссийск да Моздок районъясын. Мукӧд фронтъяс вылын тӧдчана вежсьӧмъяс эз лоны...» (Треск да грозовӧй разрядъяс)...Сентябрь 6-ӧд лун чӧжӧн миян авиация вӧчис куим бомбовӧй удар Устинскӧй станция районын чукӧрмӧм прӧтивниклӧн войска кузя...»
ЛЮБА. Олег!...
ОЛЕГ. Кыла, Люба...
ГӦЛӦС. «...Да бырӧдіс прӧтивниклысь уна ловъя вын да техника резервъяссьыс, кодӧс немецкӧй командование кӧсйӧ вӧлі шыбитны Сталинград вылӧ...»
ЛЮБА. Олег...
ОЛЕГ (тшӧтш волнуйтчӧ). Кывзы, Люба, кывзы...
ГӦЛӦС. «Сентябрь 7-ӧд лун чӧжӧн...
(Друг кытӧнкӧ ылын кылӧ полицейскӧй свисток, Олег уськӧдчӧ орчча комнатаӧ да выключайтӧ радио.)
УЛЯ (котӧрӧн локтӧ ӧшинь дорӧ, видзӧдӧ). Нинӧм оз тыдав... Тайӧ зэв ылын...
НИНА. Всё равно оз ков рискуйтны.
СЕРГЕЙ. Тайӧ кӧнкӧ Фомин вӧтлысьӧ кодкӧ бӧрся...
(Сьӧкыда чӧв олӧм. Бара свистокъяс, горӧдӧмъяс, лыйӧмъяс)
ОЛЕГ (тыдовтчис, кывзысьӧ). А кутшӧм лӧсьыд, мый ми татшӧм кадас ставным ӧтлаынӧсь...
НИНА (негораа). Да збыль...
ОЛЕГ (друг, Туркеничлы). Ваня... (Решительнӧя.) Командир ёрт... Ёртъяс... Медбӧръяысь... Ме кӧсйыси нин...
ТУРКЕНИЧ. Сумскойкӧд?
ОЛЕГ. Да.
ТУРКЕНИЧ. А ми?
ОЛЕГ. Хуторас сэн асланыс команда чукӧртчӧ...
ТУРКЕНИЧ (видзӧдӧ став вылас, чӧв олыштӧ). Медбӧръяысь, комиссар, ладнӧ...
ОЛЕГ (нимкодя). Шуда коляд, ёртъяс... (Ниналы). Шуда колян...
НИНА. Тэд шуда туй...
(Ставӧн видзӧдӧны сы бӧрся.)
УЛЯ (негораа). А коді тіян пиысь азбука Морзе тӧдӧ?
(Чӧв олӧм. Ваня Туркенич локтӧ стен бокӧ да сэтчӧ валитчӧмӧн котшкӧдчӧ сідз, кыдзи котшкӧдчӧны тюрьмаын).
ТУРКЕНИЧ. Мый?
СЕРГЕЙ (кывзысьӧ). Чолӧм тэныд, ёрт...
УЛЯ (расшифруйтӧ). Эн волнуйтчы... Менам... Ӧні... Ставыс лючки...
(Туркенич водзӧ тотшкӧдчӧ. Ставӧн кывзӧны.)
Кӧкъямысӧд картина
Пемыд. Карса парк помын ыджыд пашкыра пу. Енэжын шочиник кодзувъяс. Шутлялӧ тӧв.
1.
(Пу дінӧ дзебсьӧмаӧсь Сергей Тюленин да Ваня Земнухов.)
СЕРГЕЙ (видзӧдӧ пемыдас, шӧпкӧмӧн). Ме сійӧс быд лун кыйӧда. И кор сійӧ дежуритны ветлӧ, и кор облава вылӧ, и кор тані. А тӧрыт ӧшиньӧд аддзывлі, кыдзи сійӧ бабаыскӧд виӧмъяс вылысь кульӧм паськӧмсӧ видлаліс.
ВАНЯ (ӧчки пырыс внимательнӧя видзӧдӧ Сергей вылӧ). Но, и чӧрт сыкӧд. Оз сулав сёрнитны сы йылысь! Тӧдан мый? Талун ме купайтчыны кута, волы. Ме кухня ломта, — зэв жара. Ӧтлаын мыссям... Локтан?
СЕРГЕЙ. Кор нӧ?
ВАНЯ А рытнас сёрӧнджык.
СЕРГЕЙ. Ме ог тӧд...
ВАНЯ. Волы, йӧюк. Ме, вокӧ, тэнӧ первой разряд серти мыська. Мочалкаыс менам мый сулалӧ! Вот миян сиктын, ӧні сійӧ Московскӧй область, Шатскӧй район, — вӧлі ӧти старик. Нэм чӧжыс сійӧ Москваын банщикын служитлӧма, Сандунов купеч ордын. А тэ гӧгӧрвоан, мый сійӧ лоӧ банщикыс? Вот, шуам, тэ локтін пывсянӧ. Шуам, тэ барин либӧ прӧстӧ тэныд дыш мыссьыныд. Медалан банщикӧс, сійӧ тэнӧ и зыртӧ. Эстшӧм уска чӧрт, гӧгӧрвоан. Сійӧ, старикыс висьтавліс, ас нэм чӧжын пӧ ме миллионӧн-джынйӧн мортӧс мыськалі. А? Мый тэ думайтан? Сійӧ гӧрдитчӧ вӧлі таӧн. А, тӧдан, ӧд мортыд — мыссяс, а недель мысти бара няйт.
СЕРГЕЙ. Миллионӧн-джынйӧн! Уна! Ӧні кӧ эськӧ — сылы кутшӧмкӧ значок сетісны, шуам, «Почётнӧй банщик миллионер», а? (Сергей серӧктӧ). А мый? Вермисны сетны. Сійӧ заслужитіс тайӧ... Ме пыр тэд кӧсъя висьтавны... Тайӧ Фоминыд...
ВАНЯ. Да мый тэ, вокӧ, ме дінӧ сибдін быдсикас земноводнӧйяснас... Тӧдан мый, вай ме тэныд кута стихъяс лыддьыны. Думышт, вот тадз — гӧгӧр тӧв омлялӧ, а керкаыс ичӧтик, а сыкӧд сӧмын няня — Арина Родионовна... Тӧлыс омлялӧ, а няняыс пукалӧ печканӧн да чӧрсыс жбыргӧ, жбыргӧ, а пачын би трачкакылӧ. Ме вот сідзи и аддза сійӧс тайӧ ичӧтик керкасьыс. Ме сійӧс чувствуйта. Ме ачым деревняса, и мамӧ менам, тӧдан, дзик жӧ неграмотнӧй нывбаба, кыдзи и тэнад — ме зэв на лӧсьыда помнита ассьыным керканымӧс... Ме куйла паччӧр вылын, ар квайта, а Саша вок школаысь локтіс, стих велӧдӧ... (Смущеннӧя). Ме, дерт, ог кӧсйы сравнивайтны, но... Гӧгӧрвоан, кӧнкӧ ылын лымйӧн тырӧм сикт, битӧм, сэки ӧд сартасӧн овлісны ... Тэ, дерт, помнитан, менӧ пыр волнуйтӧ тайӧ местаыс —
Тихо за морем жила,
Спой мне песню, как девица
За водой по утру шла...
2.
(На мышсянь пемыдінсьыс петӧны Арутюнянц, Радик Юркин, Туркенич, Анатолий Ковалев.)
СЕРГЕЙ. Ті?
АРУТЮНЯНЦ. Ми.
СЕРГЕЙ. А менӧ Ваня колльӧдны кӧсйӧ... Олег — хуторӧ муніс?
ТУРКЕНИЧ. Важӧн нин. Найӧ морт кызь кымын, сӧмын разнӧй туйясӧн мунасны.
СЕРГЕЙ. А эсійӧ кытӧнкӧ тані брӧдитӧ, колӧ виччысьлыны... Сійӧс талун караульнӧйӧ пуктісны...
ТУРКЕНИЧ (Земнуховлы). Но, Ваня, тэ буретш абу военнообязаннӧй, и вай, вокӧ, мун тась. Ӧні ми тані кӧзяеваыс... Сӧмын видзӧд, Фомин шӧрӧ эн зурась...
ВАНЯ. Ладнӧ, муні...
ТУРКЕНИЧ. Сулав... Патруль...
3.
(Зонъяс кывзӧны, лӧнисны. Кылӧ немеч сёрни.)
ГӦЛӦС.
МӦД ГӦЛӦС. Иоганн Миллер,
ГӦЛӦС. Лок ме бӧрся...
КОЙМӦД ГӦЛӦС (ньӧти виччысьтӧг рочӧн). Игнат Фомин,
КОВАЛЕВ (негораа). Пон...
ТУРКЕНИЧ. Ланьт...
(Пемыдінӧ дзебсьӧм том йӧз дінті мунӧны унтер Фенбонг да куим салдат. Фенбонг сувтіс, ӧзтіс папироска. Спичкинас муртса кежлӧ югзьӧдлӧ сылысь чужӧмсӧ)
ФЕНБОНГ. Локтӧй ме бӧрся.
(Ылысмӧны.)
ТУРКЕНИЧ (шӧпкӧдӧ). Ӧні сійӧ ӧтнас коли... (Ванялы) Мун, Ваня, мун... Тайӧ миянлы войыс югыд, а тэныд... Сӧмын виччысьӧмӧн, кылін? И лӧня...
ВАНЯ (Сергейлы). Тэ волы ме ордӧ, кылан? Ме кута виччысьны тэнӧ.
(Мунӧ, лӧнь.)
4.
РАДИК (негораа). Видзӧдлӧй зэрмис.
ЖОРА. Тэ, Радик, надзӧнджык. Ӧні абу кад поводдя вылӧ видзӧдны. Да и зэрыс посни да шоныд, позьӧ не казявны.
ТУРКЕНИЧ. Зэрӧмыс пӧжалуй бурджык.
СЕРГЕЙ (шӧпкӧдӧ). Кыланныд, восьлалӧ.
КОВАЛЕВ. Быттьӧ чепйыв пон...
ТУРКЕНИЧ. Зэрыс посни да шоныд, а кадыс ӧд ар нин...
РАДИК. Мукӧд кадӧ кӧ эськӧ буретш велӧдчыны заводитім.
КОВАЛЕВ. А помнитан, Сергей, кыдзи ми зэригӧн купайтчыны ветлім ю вылӧ... Ваыс шоныд, шоныд... Да, лӧсьыд миян Донецыд... А вот Борька Гловань висьтавліс, кутшӧм налӧн юыс, Молдавияын, — Днестр — визув, берегъясас пуяс — сывнад он судз, а йывъясыс енэжас пыксьӧны...
ЖОРА. Мед эськӧ сэні и оліс, Донецыс кӧ оз кажитчы сылы.
КОВАЛЕВ. Но, вот! А немечьясыс?
ЖОРА. Да, всё-таки некытчӧ оз шогмы — йӧзлы оз удайтчы овны сэн, кӧні налы кажитчӧ. Бразилияын кӧ кажитчӧ — сэні и ов. А ме эськӧ спокойнӧя Донбассын олі. Мем, тані зэв ёна кажитчӧ.
СЕРГЕЙ. Ланьт, ланьт тэ...
ТУРКЕНИЧ. Тайӧ зэрыс шумитӧ.
СЕРГЕЙ. Локтӧ.
5.
Тыдовтчӧ Фомин. Электрическӧй фонарик би югӧрӧн сійӧ видласьӧ пемыдас. Сэки сы водзын кыптӧ Тюленин.
СЕРГЕЙ. Олан-вылан, Игнат Семенович!
ФОМИН (дрӧгмунӧ). Сулав! Тэ кодлӧн? Кытысь? Тэ коді сэтшӧмыс?...
СЕРГЕЙ (оз видз воча). Олан-вылан, Игнат Семенович! (Шӧпкӧмӧн). А мый ме кӧсйылі шуны тіянлы...
ФОМИН (настороженнӧя). Сёрӧн тат ветлан... Но? (Видзӧдӧ Сергейӧс.)
СЕРГЕЙ. А помнитад... Тіян ордын морт овліс... Зэв бур морт... Остапчукӧн сійӧс шулісны...
ФОМИН (тӧдіс, кватитіс киӧдыс). Сулав!... Тэ кодлӧн? Кытысь?
СЕРГЕЙ (мстительнӧя). Менам фамилия Сергей Тюленин...
(Фомин кыскӧ револьвер, но Ковалев чеччыштӧ да кутӧ сійӧс, топӧдӧ сылысь вомсӧ.)
СЕРГЕЙ. А... Помнитад менӧ?... Мунам, привидение...
(Ставныс мунӧны пемыдӧ. Шумитӧ зэр.)
СЕРГЕЙЛӦН ГӦЛӦС. Тані медбур... Кык пӧвса морскӧй гӧрӧдӧн кӧртав.
ТУРКЕНИЧЛӦН ГӦЛӦС. Сулав веськыда... И кывзы...
ЖОРАЛӦН ГӦЛӦС. Сӧветскӧй Социалистическӧй Республикаяс Союз нимӧн...
(Шумитӧ зэр. Лӧнь. Ӧти бӧрся мӧд пемыдысь петӧны том йӧз.)
СЕРГЕЙ. Ваня...
ТУРКЕНИЧ (суӧдіс сійӧс). Ме записка сутшки...
ЖОРА (Радиклы). Но кыдзи тэ асьтӧ чуствуйтан?
РАДИК (прӧстӧя). Он мӧй локтӧ, узьны окота. Ме велалӧма водз водны.
(Ставӧн мунӧны, колины сӧмын Туркенич да Тюленин.)
ТУРКЕНИЧ. Но вот и ставыс...
СЕРГЕЙ (веськодя). Да...(Пӧся.) Тадзи и колӧ накӧд, сволочьяскӧд...
(Зэв ылын тыдовтчӧ пӧжар би.)
Тайӧ кӧні?
ТУРКЕНИЧ. Тайӧ Кантук... Сергей... Мунам колӧ кӧ ме ордӧ?
СЕРГЕЙ. Тэ ордӧ? (Тӧдвылас уси.) Ог, тӧдан, ме муна Земнухов Ваня ордӧ. Ме кӧсйыси сылы... Мунам тшӧтш? Тэ кывлін, кыдзи Ваня стихъяс лыддьӧ? Пушкинлысь...
ІV ДЕЙСТВИЕ
Ӧкмысӧд картина
Сизимӧд картиналӧн декорация. Кошевойяслӧн комната. Сэні ӧтнас Нина Иванцова. Сійӧ сулалӧ ӧшинь дорын, чуймыштӧмӧн кывзысьӧ. Ӧшинь сайын пыр матысмӧ немецкӧй сёрни, горзӧм, шутёвтӧмъяс. Лыйӧм шы, мӧдысь. Сэсся кылӧ, кыдзи клопмунӧ керка ӧдзӧс. Нина бергӧдчӧ. Ӧдзӧс порог вылын Олег.
1.
НИНА (волнуйтчӧмӧн). Тайӧ тэ бӧрся?... Ме тэ ордӧ час сайын нин локті...
СЕРГЕЙ (кывзысьӧ). Водзӧ котӧртісны... Да, тайӧ ме бӧрся.
НИНА. А кӧнӧсь нӧ миян войтырыс?
ОЛЕГ. Войтыр, ме ногӧн, удитісны дзебсьыны. Фрицъяссӧ ме ас бӧрся нуӧді, а тані буретш пельӧс саяс, ылӧді. Пельӧссяньыс найӧ шуйга вылӧ, а ме татчӧ. Ладнӧ кӧть пемыд на уличас.
(Шутёвтӧмъяс да немецкӧй гӧлӧсъяс ӧні ылысмӧны.)
ОЛЕГ. Ваня эз волы?
НИНА. Земнухов? Эз...(Сэсся видзӧдӧ Олег вылӧ.) Тэ лыйсин?...
ОЛЕГ. Да...
НИНА. Тэ сюран, всё-таки...
ОЛЕГ. Чӧртлы, мый найӧ тӧдӧны! Бабушка стӧча висьталӧ — ставныссӧ найӧс колӧ лудікӧс моз сотны да пычӧдны... (Кывзысьӧ.) Но, буракӧ ставыс лӧнис. (Пуксьӧ, дӧвӧля нюмъялӧ.) Мудзи...
НИНА (укӧрбаӧнмоз). И сьӧлӧмыд бурмис...
ОЛЕГ (лукава). А мый нӧ... Энлы, гӧгӧрвоан, — асывнас петӧ уличӧ майстер Балдер либӧ весиг генерал Клер, а сэні флагъяс.
НИНА. Ӧні фрицъясыс нинӧм эз казявны
ОЛЕГ. Эз. Ме ногӧн, эз. Найӧ миянӧс бӧрвылас нин, уличын кутісны котшкӧдны... А Серёжа кинотеатрысь сеанс бӧрас немецкӧй знамя пышйӧдіс. Помнитан, ӧшалӧ тай вӧлі экран велдорас. А тайӧ ӧд зэв ыджыд скандал! Воштыны знамя! Тайӧ дзик жӧ бой поле вылын поражение кодь...
НИНА. Мыйкӧ тайнӧ ёртъяс оз локны...
(Чӧв. Лӧнь.)
Тэ век сьӧрсьыд новлӧдлан ӧружйӧтӧ?
ОЛЕГ (лӧньӧдӧ-бурӧдӧ). Ог, да мый тэ...
(Бара чӧлӧсь.)
Тэ мый йылысь думайтан?
НИНА (веськодя). Нинӧм йылысь ог.
ОЛЕГ. Эн пов, менӧ оз шобны.
НИНА. Ме та йылысь эг и мӧвпыштлы.
(Чӧв олӧм.)
НИНА (мӧвпыштӧмӧн). Интереснӧ, кодъяс эськӧ ми ӧні вӧлім, эз кӧ вӧв войнаыс? Збыль?
ОЛЕГ. Да... А тӧдан, мый ме мӧвпала? Ме мӧвпала — интереснӧ, кодъяс эськӧ ми лоам, кор войнаыс помасяс, — война бӧрас? А?
НИНА. Да, интереснӧ. А войтыр век абуӧсь.
ОЛЕГ. Тӧдан, ме сӧмын кильчӧ вылӧдз петыштла, видзӧдла. Сӧмын кильчӧ вылӧдз, сё збыль.
НИНА (эскытӧгмоз). Ме петала жӧ кильчӧ вылас...
ОЛЕГ. Мыйла? (Лукава.) Ок, и мудер тэ, Ниночка.
(Ылі ӧдзӧсӧ йигӧдчӧм.)
НИНА. Тайӧ миян.
ОЛЕГ. Бабушка сэн, восьтас.
2.
(Олег ӧдйӧ локтӧ ӧдзӧс дорӧ да гурйыв восьтӧ, а порог сайын — Люба, Левашов, Борц, Тюленин, Арутюнянц, Радик Юркин, Уля, Туркенич — ставныс кӧтасьӧмаӧсь, няйтӧсь, но шудаӧсь. Паныдасьӧм.)
ЖОРА. Пыр, пыр, Радик, эн пов.
ЛЮБА. Ой, мыйдаӧн ми! Но и радейта ме, кор гӧгӧр гажа шум! Ей-бог!
ТЮЛЕНИН. Но и вой. Кык ныр воча зурасим, а чайтім бокӧвӧйяс...
ОЛЕГ (Валялы да Тюленинлы). Кытчӧ нӧ ті вошинныд? Ме нин лӧсьӧдчи тіянӧс корсьны.
ТЮЛЕНИН. А ми, фрицъясысь пышйӧм бӧрын, ещӧ дирекцион вылӧ на кайлім.
ОЛЕГ. Дирекцион вылӧ? А пӧлицайыс?
ТЮЛЕНИН. А пӧжарнӧй поскыс?
ВАЛЯ. Ме нин чайті, меся сійӧ оз пет сэтысь.
ТЮЛЕНИН. Чердакас сэні поскыс сісь, ме и ачым чайті, меся бара став фрицсӧ садьмӧда.
ОЛЕГ. Ваня век на абу...
УЛЯ (повзьыштӧмӧн). Сійӧ нӧ абу?
ОЛЕГ. А мый?
УЛЯ. Ог гӧгӧрво, Олег, ме сы ордӧ пыри да мем шуисны, сійӧ пӧ важӧн нин тэ ордын...
ОЛЕГ. Да? (Мӧвпалӧмӧн). Гашкӧ сійӧ Клавала пырис?
ТУРКЕНИЧ. Сылы нӧшта клубӧ колӧ вӧлі пыравны.
НИНА (Любалы). А тіян кыдзи?
ЛЮБА. Эн сёрнит! Казарма вылын — ӧти, кинотеатр вылын — мӧд. Зэрӧ, тӧла, а найӧ шпоракылӧны тӧв йылас. Вывті нин вылын, но Серёжа со отсаліс...
ЛЕВАШОВ. Асьныд аддзанныд — Люба мыджсьыліс меӧ аслас ботинокъясӧн, быттьӧ ме абу морт, а пос... Кӧсйи вежсьыны пыравны, но эз лэдз.
ЛЮБА. Примитӧй кутшӧм эмӧсь. Праздник ради ӧд тадзи няйтчим.
ОЛЕГ. Ӧти кывйӧн кӧ шуны. Сергей Левашов веськалӧма башмак улӧ. Тэнад судьбаыд, Сергей, миянлы мичаа тыдалӧ — ковмас тэд царевналысь шедӧдны черевичкисӧ.
ЛЮБА. Фу! Ме прӧстӧ ог гӧгӧрво...
ТЮЛЕНИН (Туркеничлы). Ме сэні, дирекцион вылас прамӧй мина пукті. Вӧлі менам. Мед шедӧдӧны аски.
ОЛЕГ. А тэнад, Жора?
ЖОРА. Миян, Радиккӧд, кык флаг больнича вылын. А прӧстыня судзӧдны, пӧжалуй, медсьӧкыд вӧлі. Батьӧ шуӧ, позьӧ пӧ краситны, но век жӧ сійӧ прӧстыня, а мам? Но ме батьӧлы шуи, меся колӧ уточнитны вопрос: коді гортын главнӧйыс — сійӧ али мамӧ?
ОЛЕГ (нюмъялӧ). Кыдзи нӧ сэсся ті уточнитінныд?
ЖОРА. Батьӧ шуис, мамӧ характерӧн пӧ татшӧм вопростӧ бурджык не уточняйтны. Сійӧ миянлы прӧстынясӧ сетіс аслас личнӧй кывкутӧм улӧ... Но, збыль кӧ шуны, менам гортын, дерт, компот. Мамӧ шуӧ, мый ме мыжа район пасьта став происшествиесьыс, а гашкӧ став оккупированнӧй территория пасьта происшествиеясысь. Сійӧ пыр кайтӧ, менӧ пӧ ӧшӧдасны...
(Том войтыр серавлӧны).
ОЛЕГ (тӧждысьӧмӧн). Мый нӧ Ваняыс эз во... Ёртъяс, штабса членъясӧс дай ставнытӧ кора пуксьыны. Миян эм Радик Юркин ёртлӧн комсомолӧ пырӧм йылысь заявление.
УЛЯ (меліа). Пуксьы, Радик, пуксьы.
РАДИК. Ыджыд аттьӧ.
ОЛЕГ. Радик Юркин заводитіс уджавны Арутюнянц пятёркаын. Тшӧтш участвуйтіс Фоминӧс казнитӧмын. Ӧні Тюленин ордын боевӧй группаын. Серёжа, висьтав.
ТЮЛЕНИН (сувтіс). Радик участвуйтіс уна туйяс вылын немецкӧй машинаяс вылӧ уськӧдчылӧмъясын. Действуйтіс, ме ногӧн, сюся. Вот и ставыс.
ОЛЕГ. Коді мый кӧсйӧ юавны Радик Юркин ёртлысь?
ТУРКЕНИЧ. Мед биографиясӧ висьталӧ.
РАДИК (сувтіс). Ме чужи Краснодон карын 1928 воын. Велӧдчи Горький нима школаын. (Чӧвлӧ.) А мыйӧн немечьяс локтісны — ӧні сэсся ог нин велӧдчы.
ТУРКЕНИЧ. Общественнӧй обязанностьяс эн ну?
РАДИК (ышловзьӧмӧн). Эг ну.
УЛЯ. Висьтав, Радик, коді тэнад радейтана геройыд?
РАДИК (мӧвпыштӧ). Чкалов.
ТЮЛЕНИН (здӧвӧля) Молодеч! А минаяс обезвреживайтны велалін?
РАДИК (усьӧм гӧлӧсӧн). Ме велала.
ЛЮБА. А мый эськӧ тэ вӧчин, тэнӧ кӧ Германияӧ нуисны?
РАДИК. Менӧ? Ме эськӧ сэні мыйкӧ ӧзті налысь да и пышйи.
ОЛЕГ (паськыда нюмдӧ). Ӧзтін эськӧ?
РАДИК (збоя). А мый...
УЛЯ. А кутшӧм стихъяс тэ медся ёна радейтан? Пушкинӧс, Лермонтовӧс, Маяковскийӧс, кодӧс?
РАДИК (бара падмыштӧ). Ме ёнджыкасӧ рассказъяс радейта.
ОЛЕГ. Но, Уля, тайӧ нин кодлы кыдзи кажитчӧ.
ТЮЛЕНИН. А тӧдан, кымынысь Сталин ёрт ссылкасьыс пышйыліс?
РАДИК (сюся). Сталин ёрт ссылкаысь пышйыліс квайтысь.
ТЮЛЕНИН. Правильнӧ.
УЛЯ. Комсомоллысь могъяссӧ тӧдан?
РАДИК. Комсомоллӧн мог — вины немецко-фашистскӧй захватчикъясӧс, кытчӧдз ни ӧти оз коль...
ТУРКЕНИЧ. Мый сэсся, ме ногӧн зонмыс политически тырвыйӧ грамотнӧй.
ЛЮБА. Примитны, дерт, примитны.
УЛЯ. Примитны колӧ.
ОЛЕГ. Коді сы вӧсна, медым Радик Юркин ёртӧс примитны комсомолӧ членӧ? Ставӧн? Локыл татчӧ. (Торжественнӧя). Штаб поручение серти вручайта тэныд временнӧй комсомольскӧй билет. Видз сійӧс, кыдзи ассьыд честьтӧ. Членскӧй взносъяс кутан мынтыны аслад пятёркаын. А кор воас бӧр Краснӧй Армия, сэк райкоммол вежас тэнсьыд временнӧй билеттӧ постояннӧй вылӧ.
РАДИК. Ме сійӧс курткаӧ вура да пыр аскӧдым кута новлыны.
ОЛЕГ. Поздравляйтам тэнӧ. (Ставӧн поздравляйтісны Радикӧс. Уля кутлӧ сійӧс, а Люба эз терпит да весиг окыштіс.)
РАДИК (лӧсявтӧг). Ыджыд аттьӧ.
ОЛЕГ. Верман мунны.
РАДИК. Аддзысьлытӧдз. (И друг, челядьног чеччалігтырйи, сійӧ чепӧсйис комнатаысь).
3.
ОЛЕГ. Шань зон. (Видзӧдліс часі вылӧ.) Но, муса нывъяс, кад нин. Лоас тіянлы дежуритыштны.
НИНА. Сӧмын ті миянлы гижӧднытӧ сетӧй да висьталӧй ставсӧ, кыдзи вӧлі.
(Нина да Валя петӧны.)
ОЛЕГ (ӧдзӧс сайӧ). Бабушка, мама — кад нин. (Сійӧ ӧдйӧ мунӧ орчча комнатаӧ.)
(Том войтыр лӧсьӧдчӧны кывзыны. На дінӧ ӧтлаасисны Елена Николаевна да бабушка Вера. Кылӧ овация, сэсся грозӧвӧй разрядъяс пыр кылӧ сӧмын ӧти кыв — «Сталин». Овация шы ӧддзӧ.)
4.
ОЛЕГ (гӧлӧсыс). Лӧсьӧдчӧй гижавны.
ЛЮБА. Дасьӧсь нин, чӧвлӧй.
(Лӧнь. Эфирын шочиник разрядъяс. И вот гӧлӧс — спокойнӧй да мужественнӧй.)
ГӦЛӦС. Ёртъяс! Талун ми празднуйтам миян странаын сӧветскӧй Революция победалы кызь вит во тырӧм.
(Олег петӧ да сувтӧ ӧдзӧс дорӧ, ставӧн кывзӧны.)
ЕЛЕНА НИКОЛАЕВНА (волнуйтчӧмӧн). Збыль ӧмӧй сійӧ?
ОЛЕГ (пӧся). Дерт жӧ! Чӧвлӧ, гижалӧй...
ЛЮБА (Левашовлы шӧпкӧмӧн). Помнитан, кыдзи кольӧм во Краснӧй площадь вывсяньыд?
(Левашов копрӧдлӧ юрсӧ.)
ГӦЛӦС. Ме чайта, мый некутшӧм мӧд страна и некутшӧм мӧд армия эз вермы эськӧ выдержитны немецко-фашистскӧй разбойникъяслӧн звермӧм бандаяслысь да найӧ союзникъяслысь татшӧм натисксӧ.
(Зонъяс да нывъяс, водзлань сетчыштӧмӧн, шытӧг кывзӧны свободнӧй мулысь гӧлӧс. Грозӧвӧй разрядъяс.)
УЛЯ (шӧпкӧмӧн). А сійӧс ӧд ӧні став мирыс, став йӧзыс кывзӧ...
ТЮЛЕНИН (гусьӧн). Ме чайта ӧні сійӧс и Гитлер тшӧтш кывзӧ. Лӧсьӧдіс приёмник да и кывзӧ.
ЛЮБА (зывӧктӧмӧн). Небось кӧнкӧ кывзӧ да тірзьӧ, проклятӧй Урӧд.
ГӦЛӦС. Ёртъяс красноармеецъяс, командиръяс да политработникъяс, партизанъяс да партизанкаяс! Миян упорство да стойкость сайын, воинскӧй умение да Рӧдина водзын ассьыным долг выполнитны дасьлун сайын сулалӧ немецко-фашистскӧй армияӧс разгромитӧм, сӧветскӧй муӧс гитлеровскӧй захватчикъясысь весалӧм! Ми вермам дай долженӧсь весавны сӧветскӧй мунымӧс гитлеровскӧй пеж няйтысь. Абу ылын сійӧ луныс, кор враг тӧдмалас Краснӧй Армия выль ударъяслысь вынсӧ. Лоас и миян улич вылын праздник! Мед олас миян славнӧй сӧветскӧй Рӧдиналӧн свобода да независимость! Проклятие да смерть немецко-фашистскӧй захватчикъяслы, найӧ государстволы, найӧ армиялы, налӧн Европаын выль порядоклы! Миян Краснӧй Армиялы — слава! Миян партизанъяслы да партизанкаяслы — слава!
(Эфирын шум, аплодисментъяс.)
ОЛЕГ. Кывлінныд ті? Тайӧ сійӧ шуис. Партизанъяслы да партизанкаяслы.
(Эфирын кузь овация. Олег уськӧдчӧ орчча комнатаӧ да друг ставыс вошӧ. Повзьӧдана лӧнь. Ывлаын тӧв шувгӧ.)
БАБУШКА ВЕРА (шога). Со и сёрнитыштім... А меным кажитчис, быттьӧ Москваын ме.
(Елена Николаевна ньӧжйӧник петӧ. Ставӧн мӧвпалігтыр чӧв олӧны.)
БАБУШКА ВЕРА. Ой, видзӧда ме тіян вылӧ, зонъяс да нывъяс, да позьӧ ӧмӧй тадз? Татшӧм ыджыд праздник! Видзӧдлӧй пызан вылас! Не век жӧ мича пыдди тайӧ горилкасӧ видзны. Юны колӧ сійӧс!
ОЛЕГ. Ой, бабуся, тэ ӧд менам быдӧнысь шань. Матыстчӧй пызан саяс, матыстчӧй... Поздравляйта тіянӧс Великӧй Октябрьскӧй социалистическӧй революциялы кызь вит во тыран лунӧн... Казьтыштамӧй талун бур кывйӧн миян боевӧй группаясысь ёртъяснымӧс: и найӧс, кодъяс мездісны Погорелое хуторысь военнопленнӧйясӧс, и найӧс, кодъяс бырӧдалӧны штабнӧй машинаяс Каменскӧйын да Ворошиловградскӧйын, да, дерт нин, и Тюленин группаысь отважнӧй ёртъясӧс. Ме лэпта миян медся боевӧй ёртъяс вӧсна тост!
УЛЯ. А талунъя задание выполнитысьяс вӧсна?
ОЛЕГ. На вӧсна торйӧн. На вӧсна асывнас став карыс тост лэптас.
ЛЕВАШОВ (инмӧдчӧ гитара струнаясӧ).
Возле дома моего...
(Ӧти, мӧд, коймӧд гӧлӧс, ставӧн босьтчисны сьывны).
ЛЮБА (сьылӧм шӧрын). А помнитад, ёртъяс, кутшӧм сьыланкывъяс Москвасянь радио пыр сьывлісны... Быд лун.
(Сьылӧм мунӧ водзӧ.)
ОЛЕГ (Тюленинлы негораа). Кыдзи чайтан, Ваня эз вермы шедны?
ТЮЛЕНИН. Ме ачым та йылысь пыр мӧвпала...
ОЛЕГ. Эн повзьӧд войтырсӧ, оз ков...
(Сьылӧны водзӧ.)
ЛЮБА (сьылӧм шӧрын). Улечка! Лыддьы вай кутшӧмкӧ лӧсьыдджык стихъяс! Помнитан, кыдзи коркӧ лыддьылін!
УЛЯ. Кутшӧмӧс нӧ?
(Ставӧн лӧньӧны.)
ЛЮБА. Лыддьы «Демонӧс».
УЛЯ. А мый нӧ «Демонсьыс»?
ТУРКЕНИЧ. Ачыд бӧрйы.
ТЮЛЕНИН. Мед ставсӧ лыддьӧ.
СТАВӦН. Лыддьы, лыддьы, Улечка...
УЛЯ. Ладнӧ. Сӧмын ог ставсӧ. (Лыддьӧ.)
Летал над грешною землёй,
И лучших дней воспоминанья
Пред ним теснилися толпой...
ЛЮБА (негораа). Молодеч, Улечка...
УЛЯ (лыддьӧ).
Трудов и бед толпы людской,
Грядущих, прошлых поколений
Перед минутою одной
Моих, непризнанных мучений...
ЛЮБА (сьӧлӧмысь). Молодец, Уля... (Друг гораа) Серёжа! Ноко...
(Левашов инмӧдчӧ гитара струнаясӧ, а Люба чепӧсйӧ йӧктыны.)
БАБУШКА ВЕРА. Тайӧ жӧ нин йӧктӧм!
ЛЮБА (йӧктігтырйи). Серёжа! Сувт тшӧтш!
(Тюленин дінын сійӧ зымгӧ кокнас. Тюленин заводитӧ йӧктыны. Гитара пыр ӧтарӧ ӧддзӧ).
ОЛЕГ (нимкодя). Вот тайӧ Люба!
БАБУШКА ВЕРА. Тайӧ жӧ нин йӧктӧм! Серёжа! Ворс гопак!
(Чышъянӧн ӧвтчигтырйи заводитӧ йӧктыны бабушка Вера).
ОЛЕГ. А ме? (И сійӧ нин йӧктӧ бабушкаыскӧд.)
(Йӧктӧмыс пыр ӧддзӧ).
БАБУШКА ВЕРА (усьӧ диван вылӧ). Ой, пӧрысь, кулан! (Ӧвтчӧ чышъянӧн.)
(А йӧктӧм пыр ӧддзӧ. Зіля йигӧдчӧны ӧдзӧсӧ).
ОЛЕГ. Ланьтӧй! Йигӧдчӧны.
УЛЯ. Гашкӧ, Ваня тайӧ?
ОЛЕГ. Виччысьлӧй.
(Сійӧ чепӧсйӧ комнатаысь. Пыранінсянь кылӧны гӧлӧсъяс. Олег пырӧ Ковалева Клавакӧд, на бӧрся Валя да Нина.)
УЛЯ. Мый нӧ лои?
КЛАВА. Ваняӧс арестуйтісны, Уля!
ОЛЕГ. Арестуйтӧмаӧсь Ваняӧс, Стаховичӧс да Мошковӧс...
КЛАВА. Ме ачым аддзылі... Ёртъяс.
ТУРКЕНИЧ. Кӧні?
КЛАВА. Клуб дорын... Первой найӧ Стаховичӧс кутісны, а сэсся Ваняӧс да Женя Мошковӧс. Мый нӧ вӧчны, ёртъяс?
ЖОРА. Колӧ босьтчывны мездыны ёртъяснымӧс.
ОЛЕГ. Дерт, эськӧ, бур, но... Мыйкӧ йӧзасис.
КЛАВА. Немечьяс мыйкӧ клубын вӧлі горзӧны.
ТУРКЕНИЧ. Сідзкӧ, найӧ шобисны клубсӧ. Пӧдвалас сэні вӧлі ӧти-мӧдтор, мый зонъяс чӧвтавлісны немецкӧй машинаяс вылысь.
ОЛЕГ. Ваня... Мошков, Стахович...
ТУРКЕНИЧ. Найӧ оз вузавны.
ОЛЕГ. Да... Но делӧыс, тыдалӧ, мунӧ став организация судьба йылысь. Найӧ буретш организация центрӧ веськалісны.
ТЮЛЕНИН. Виччысьны оз позь. Найӧ и татчӧ быд здук вермасны локны.
КЛАВА. Люба, мый нӧ кутам вӧчны?
ЛЮБА. Успокоитчы, успокоитчы, Клава...
ОЛЕГ. Миянлы некыдз оз позь виччысьны, мый ставыс тайӧ бур ногӧн помасяс. (Мужественнӧя.) Мӧд ногӧн ми асьным вермам пӧгибнитны да и ассьыным йӧзнымӧс ставнысӧ погубитам. Ми долженӧсь мунны карсьыс. Ми честнӧя тышкасим да ӧні миян эм право янсӧдчыны ассьыным долг выполнитӧм сознаниеӧн. Быдӧнлы колӧ босьтчывны фронт вуджны... Быдӧнӧс колӧ предупредитны, став организациянымӧс, — рӧдвужлы висьтавны. Эмӧсь мӧд сикас мӧвпъяс?
(Чӧв олӧны.)
ОЛЕГ (Тюленинлы, негораа). Тэ ставсӧ гӧгӧрвоин, Серёжа?
ТЮЛЕНИН (негораа). Ставсӧ... Стахович вермас не выдержитны? Тадз?
ОЛЕГ. Да. И эз вӧв лӧсьыд висьтавны та йылысь. Абу лада не дӧверяйтны, кор он тӧд. Сійӧс кӧнкӧ мучитӧны нин, а ми вӧля вылынӧсь...
ТУРКЕНИЧ (торкӧ чӧв олӧмсӧ). Ставыс правильнӧ. Кор лоам Краснӧй Армия радъясын — тані жӧ паныдасям, ёртъяс...
УЛЯ. Ме ногӧн мем нинӧмла на ӧні мунны. Ме виччысьла. Гашкӧ ме водзӧ на верма уджавны тані. Ме кута виччысьӧмӧн.
ОЛЕГ. Тэнӧ, кыдзи штабса членӧс, быд здук вермасны эрдӧдны.
ТЮЛЕНИН. Сылы быть колӧ мунны.
УЛЯ. Ме кута осторожнӧя.
ОЛЕГ. Гортын узьны тавой некодлы нин оз позь.
ТУРКЕНИЧ. Аддзысьлытӧдз, Олег.
(Прӧщайтчӧны. Мунӧны Туркенич, Уля, Жора, Люба, Левашев).
ОЛЕГ (прӧщайтчӧ Улякӧд). Аттьӧ... Аттьӧ сыысь, мый тэ вӧлін да мый эм ӧні...
(Прӧщайтчӧны).
Люба, Серёжа, прӧщайтлӧ... Жора, а тэ нӧ кытчӧ?
ЖОРА (муртса кутӧ синвасӧ). Эх, Олег, мыйла ӧні ме абу Ванякӧд? Клава, мунам, мунам ӧтлаын...
ОЛЕГ (прӧщайтчӧ). Клава...
6.
(Ставӧн мунісны. Колины Олег, Тюленин, Валя да Нина).
ОЛЕГ (мунысьяслы бӧрвылас). Во джын дорысь на этша коли, а кутшӧма ставыс вежсис. Быттьӧ уна во коли.
НИНА (муртса оз бӧрд). Энӧ дӧзмӧй, мый ме висьтала. Та ыджда чукӧрӧн миянлы фронт вомӧн не вуджны. Миянлы, нывъяслы, колӧ мездыны зонъяснымӧс, медым не подведитны найӧс. Ми вермам саймовтчыны кутшӧмкӧ деревняӧ. Гашкӧ нӧ Валя абу сӧгласен?
ВАЛЯ. Мыйла нӧ ме абу сӧгласен? Правильнӧ тайӧ...
ТЮЛЕНИН. Тэтӧг ме некытчӧ ог мун.
ВАЛЯ. А вот мунан!
ОЛЕГ. Мунӧй, ёртъяс, ми регыд... (Сергей да Валя мунӧны. Ниналы негораа.) Помнитан, ме пыр кори ӧтчыд тэнӧ окыштны бандзибад. И со кор лоӧ окасьны. Прӧщай... Тэ помнитан?
НИНА. Ме ставсӧ помнита. Ме помнита унджык, мый тэ чайтан. Ме кута виччысьны тэнӧ.
7.
(Пырӧны Елена Николаевна да бабушка Вера.)
ОЛЕГ. Мама.
ЕЛЕНА НИКОЛАЕВНА. Ме тӧда, Олег...
ОЛЕГ. Мама, и тэ, бабушка... Мем лоӧ прӧститчыны тіянкӧд.
ЕЛЕНА НИКОЛАЕВНА (сьӧкыда). Ывлаын лым нин усьӧ, кӧдзыд.
ОЛЕГ. Мем колӧ тэрмасьны... Прӧстит менӧ, мама.
ЕЛЕНА НИКОЛАЕВНА (негораа). Коль мем комсомольскӧй билеттӧ, Олег. Ме бура дзеба сійӧс... Аддзасны кӧ ӧд...
ОЛЕГ. Мама, ме пыр тэнӧ кывзылі... Оз позь... Тэ ачыд тӧдан... Ме не должен... Сійӧ ме ордын лоӧ...
ЕЛЕНА НИКОЛАЕВНА. Мыйкӧ кӧ лоӧ... Найӧ кӧ кутасны шуны, мый ме либӧ бабушка пӧ, либӧ коді кӧ пӧ рӧдвужысь признайтчисны, ставсӧ висьталісны, — эн эскы налы, эн эскы и чӧв ов. Ми тэд клянитчам, кылан?
ОЛЕГ. Но, видзӧдлы ме вылӧ, мама... Сотӧй ставсӧ... Ме бӧр локта асланым армиякӧд. Прӧстит менӧ мама.
ЕЛЕНА НИКОЛАЕВНА. Олег... Нинук...
(Прӧшайтчӧны. Прӧшайтчӧны бабушкакӧд. Олег да Нина петӧны. Елена Николаевна петӧ на бӧрысь. Сэсся сійӧ ньӧжйӧник пырӧ бӧр, видзӧдӧ чӧв сулалысь мам вылас, матыстчӧ ӧшинь дорӧ, восьтыштӧ шторысӧ. Ывлаын югдӧ).
ЕЛЕНА НИКОЛАЕВНА. Кутшӧм страшнӧй мигыс... Кутшӧм чорыд тышыс... (Сійӧ друг горӧдыштӧ.) Мама, видзӧд!
(Тӧвся шонді медводдза югӧръясын ылын, кутшӧмкӧ джуджыд здание вылын дӧлалӧ гӧрд флаг).
Ворошилов нима школа вылын тайӧ. А со ещӧ... Мама, видзӧд... Больнича вылын, райисполком вылын, ок кутшӧм уна, мама.
БАБУШКА ВЕРА. Мый нӧ тэ, Лена, бӧрдан? Мый нӧ тэ бӧрдан? (Аслас петӧ синваыс.) Тэнад пиыд ӧд тайӧ флагъяссӧ ӧшліс. Лена, мый тэ бӧрдан, кор радлыны колӧ. Тэ видзӧд, видзӧд, кавшасьӧны сэтчӧ, лэдзны кӧсйӧны флагсӧ... Мед кӧть уси коді кӧ... Лена, видзӧд. (Взрыв шы, сэсся лӧнь.) О, тайӧ бур... Ен мед сетас шуд налы, миян челядьлы...
ЕЛЕНА НИКОЛАЕВНА (кыпыда). Ме сӧмын ӧтитор йылысь думайта, мама, мед сійӧ вӧлі ён. Весиг кӧть найӧ и кутасны сійӧс, медым найӧ кувтӧдзыс сылысь оз чегны бордъяссӧ. Медым сійӧ эз тірав на водзын, медым сійӧ чужӧмас сьӧлалас налы...
(Кык нывбаба видзӧдӧны кар весьтын дӧлалысь гӧрд знамя вылӧ).
Дасӧд картина
Кӧдзыд вой. Тӧвлӧн шувгӧм. Шахта двор. Югыд чарла кодь тӧлысь. Пыдіас, пемыдінас, тӧдчӧ сӧмын баракысь восьса ӧдзӧсӧд петан югӧр. Сэні — арестуйтӧм том гвардеецъяс, двор выліас часӧвӧй. Ывлаас, кӧдзыдінас — Олег, Ваня, Сергей, Люба, Уля — киссьӧм паськӧмаӧсь, мучитчӧмаӧсь.
1.
УЛЯ. Ог, ме кула, а нинӧм ог висьтав налы. Мед кӧть во гӧгӧр видзасны миянӧс кӧдзыд йылас... Люба, Любочка... Кыпӧдышт менсьым ковтаӧс, сотӧ...
ЛЮБА. Улечка, донаӧй менам... Куйлы, куйлы спокойнӧя, тайӧ бурдас...
СЕРГЕЙ. Эх, не кӧ эськӧ киӧй — ме эськӧ пышйи, сё збыль, пышйи эськӧ...
ВАНЯ. Тӧданныд мый, ёртъяс, ӧд генералыс тайӧ, Клерыс, буракӧ, ачыс кӧсйӧ допроситны... Вот аддзанныд... (Кызӧ.)
ОЛЕГ (суровӧя). А тэ тӧдан, Сергей, ме весиг рад, да, ме рад, мый тайӧ эз кодкӧ мӧд, а буретш сійӧ, Стахович... Вот миян ёртъяс вуджисны сэтшӧм мучениеяс вомӧн, мый йӧзыс кӧнкӧ чайтныс оз вермыны, а ӧд некод нинӧм...
СЕРГЕЙ (негораа). Эх, тӧдны эськӧ миянлы, Олег, мый Нинакӧд да Валякӧд... Чайтан найӧс эз босьтны?
(Олег чӧв олӧ. Орудиеысь лыйсьӧм шы, артиллерийскӧй залпъяслӧн югнитлӧмъяс).
ЛЮБА. Видзӧдлӧй, видзӧдлӧй, кутшӧм матын ыпъялӧ...
УЛЯ. И гымалӧ... Тэ кылан?
ЛЮБА. Дерт кыла...
УЛЯ (слаба). А ме чайті меся менам юрын... (Вӧта-вемӧса.) А лымйыс кутшӧм... шоныд, шоныд, да? Кутшӧм тешкодь... Лым и шоныд... А помнитан, Люба, кыдзи ми «Демонтӧ» лыддьылім... А тӧдан... Ме эськӧ Демоныскӧд лэбзи... Мӧвпышт, сійӧ сувтіс енлы паныд!...
ЛЮБА (негораа). А мый? Мед ми пӧгибнитам кӧ, ме ог пов... Ме ньӧти ог пов. Мем дерт эськӧ абу окота... Эх ӧбиднӧ, кор батьӧӧс виисны, мамаӧс ме век бурӧді — бур олӧм кӧсйысьлі, висьтавлі, меся знаменитӧй радисткаӧн лоа, а артмӧ — ставсӧ ылӧді...
УЛЯ. А тэ ӧмӧй радисткаӧн кӧсйылін лоны?
ЛЮБА. Э, мыйӧн сӧмын ме эг кӧсйыв лонысӧ... Вот, кор ме зэв на ичӧтик вӧлі, ме кӧсйи докторӧн лоны. Ме весиг став понсӧ и каньсӧ бинтуйтлі. А сэсся, кор нин школаын куті велӧдчыны, кӧсйи лоны учительӧн, инженерӧн, мореплавательӧн, лётчикӧн, — сэсся ӧтчыд кӧсйи лоны домашньӧй кӧзяйкаӧн. Збыль! Ме и джодж мыськавлі, и шыд пулі — зэв чӧскыдӧс. А сэсся ме, Уля, мӧвпавлі лоны Чапаевӧн. Вот, дзик збыль, шомӧн мавта аслым усъяс и давай тышкасьны зонпосникӧд победнӧй помӧдз. Найӧ меысь полӧны вӧлі... А сэсся йӧктыны радейтны куті, сьывны куті. Сідз ме ог и тӧд, кодӧн эськӧ ме лои. Ог, ме ог пов. Окота сӧмын помӧдз водзӧс мынтыны налы, тайӧяслы... Да сьылыштны. А кымын лӧсьыд сьыланкыв миян му вылын!... Да эм ӧмӧй свет вылас ещӧ мӧд татшӧм народ, кыдзи миян? Кодлӧн татшӧм бур душаыс? Коді вермӧ сымында терпитны? Оз, миянӧс некод оз жугӧд...
ОЛЕГ (негораа). А тэ сьылышт... Сьылышт ӧні...
ЛЮБА. А мый?
ОЛЕГ. Кутшӧмкӧ сьыланкыв, миянлысь, дзик ӧткодь кутшӧмӧс...
ЛЮБА. Кутшӧмӧс нӧ...
(Петкӧдчӧны Соликовский, Брюкнер, салдатъяс, генерал Клер кымынкӧ офицеркӧд.)
СОЛИКОВСКИЙ. Сувтӧй!... Вайӧ ставнысӧ...
(Салдатъяс вӧтлӧны баракысь том гвардеецъсясӧс, кодъяс сувтӧны главнӧй пятёрка бӧрвылас.)
КЛЕР (коса). Кошевой...
БРЮКНЕР. Тайӧ Кошевой, герр фельдкомендант.
КЛЕР (шемӧсмӧ). Кошевой?
(Офицеръяс видзӧдӧны Олег вылӧ любопытствоӧн, шензьӧмӧн, кыдзи тӧдчана морт вылӧ.)
ОФИЦЕРЪЯС (ас костаныс). Дзик на детинка...
КЛЕР (кыліс). Кӧть и детинка, а миянӧс новлӧдліс нырӧдным во джын чӧж. (Соликовскийлы). Мед найӧ тӧдӧны, мый найӧ вочакывъяс сайын налӧн олӧмныс... (Земнухов да Тюленин вылӧ ) Тайӧ том войтырыс тӧдӧны ӧта-мӧднысӧ?
ЗЕМНУХОВ. Ми разнӧй школаясын велӧдчим.
СОЛИКОВСКИЙ. А машинаяс вылас ӧтлаын уськӧдчывлінныд?
ЗЕМНУХОВ. Ог тӧд, мый йылысь тэ сёрнитан.
СОЛИКОВСКИЙ. Аддзылід? Татшӧм образование тайӧяслы сетӧма сӧветскӧй власть.
ВАНЯ. Образование вылӧ ми огӧ норасьӧй.
СОЛИКОВСКИЙ. Генерал тшӧктӧ висьтавны, кодъяскӧд тэ уськӧдчылін машинаяс вылас, кодъяс ещӧ колины вӧля вылас.
ВАНЯ. Кыдзи нӧ ме верми машинаяс вылӧ усьласьны, кор ме близорукӧй? Ме весиг со тэнӧ ог аддзы, а генерал пыдди аддза сӧмын зэв вӧсньыдик потш. И ставыс.
КЛЕР. Вас?
СОЛИКОВСКИЙ. Пыдди эн пуктӧ, герр фельдкомендант.
КЛЕР (Уля вылӧ). Тайӧ?
УЛЯ (негораа). Ме ставсӧ нин висьталі... Ме ог кут вочавидзны тіян юасьӧмъяс вылӧ сы вӧсна, мый ог признайт менӧ судитӧм вылӧ тіянлысь право. Вӧчӧй мекӧд мый кӧсъянныд, а месянь сэсся нинӧм он кывлӧй...
КЛЕР (коса, медым не уськӧдны достоинствосӧ). Зоо... Шевцова...
СОЛИКОВСКИЙ. Со сійӧ, герр фельдкомендант.
КЛЕР (весиг тані сійӧ донъяліс Любалысь мичлунсӧ). Шон... Здравствуйте ...
ЛЮБА. Здрасте, кыдзи олад.
СОЛИКОВСКИЙ. Господин фельдкомендант генерал Клер юалӧ, мыйла ті вӧчлінныд прогулкаяс Луганскӧ, Каменскӧ, Ровенькиӧ да весиг Миллеровоӧ. Немецкӧй командование та йылысь тӧдӧ.
ЛЮБА. Тӧдӧ кӧ нӧ мыйла юасьӧ? А мый вӧсна вӧчлӧны прогулкаяс, господин генераллы, сійӧ арлыдӧн, позьӧ нин тӧдны.
СОЛИКОВСКИЙ. Господин фельдкомендант тӧдӧ, мый тэнад вӧлі радиопередатчик. Кӧні тайӧ радиопередатчикыс?
ЛЮБА. Кутшӧм передатчик? Мый ті! Нэм чӧж репродуктор лӧсьӧдны эг вермыв...
БРЮКНЕР. Миян господин Клерлӧн кадыс дона. Мӧвпыштӧй, абу-ӧ бурджык висьтасьны тіянлы.
СОЛИКОВСКИЙ. Мӧвпышт, кылан!
ЛЮБА (коса). Плеша дурак...
КЛЕР (безнадежнӧя ӧвтыштӧ кинас). Тайӧ? (Тюленин вылӧ.) Мед сёрнитӧ.
СОЛИКОВСКИЙ. Ми сійӧс гез йылӧ лэптывлім, господин фельдкомендант. Сійӧ чӧв олӧ.
КЛЕР (Олеглы). Кӧні ті дзебсясинныд бӧръя кык тӧлысьсӧ?
ОЛЕГ. Тайӧ некутшӧм роль оз ворс.
КЛЕР. Зоо... Ті ранитінныд миянлысь салдатӧс. Ті кӧ абу мыжаӧсь, мыйла ті лыйлінныд миянлысь салдатъясӧс?
ОЛЕГ. Сы вӧсна, мый найӧ мыжаӧсь, господин генерал. Ті асьныд панінныд войнасӧ, а ӧні норасянныд, мый тіянӧс лыйлӧны...
КЛЕР. Зоо... Коді поручитіс тіянлы Краснодонын да матыса посёлокъясын гӧрд флагъяссӧ ӧшлыны? И мыйла?
ОЛЕГ (спокойнӧя). Генерал, буракӧ, оз тӧд миянлысь народнӧй обычайяссӧ. Миян йӧз Великӧй Октябрьскӧй революция годовщиналы честь кузя век ӧшлӧны гӧрд флагъяс. Тайӧ вӧлі вӧчӧма великӧй праздникӧн поздравитӧм кузя...
КЛЕР (коса). Зоо... Коді ещӧ коли вӧля вылӧ тіян организацияса членъяс пӧвстысь?
ОЛЕГ. Уна... Ме эськӧ верми висьтавны Том Гвардия удж йылысь, менӧ кӧ вӧлі судитӧны восьса судӧн. Но дзик нинӧмла висьтавны тані, висьтавны йӧзлы, кодъяс, збыль кӧ шуны, кулӧм мортъяс нин...
СОЛИКОВСКИЙ. Генерал шуӧ, ті кӧ он заводитӧ сёрнитны, — тіян ёртъяслӧн смертьыс да тіян смертьныд локтас кымынкӧ минут мысти...
ОЛЕГ (презрительнӧя). Сійӧ ӧд господин Клерлӧн специальность серти и ми огӧ сомневайтчӧй, мый ставсӧ лоас вӧчӧма стӧча да урчитӧм срокын... Меным жаль сӧмын сійӧ, мый сэсся ог нин вермы тышкасьны аслам народ да став человечество радъясын став му вылын олӧмлӧн справедливӧй, честнӧй строй вӧсна...
КЛЕР (раздраженнӧя). Ме сӧмын кӧсъя тіянлы шуны, мый ӧні локтас команда, и тіянӧс шыблаласны шурфӧ, дзик ставнытӧ. Кымынкӧ минут мысти ті лоанныд нин тайӧ кӧдзыд шурфас...
ОЛЕГ. Господин фельдкомендант, мыйла нӧ сійӧ кӧдзыд? Тайӧ шурфсьыс вӧлі разалӧ югыдыс да шоныдыс став миян страна пасьта...
(Клер крута бергӧдчӧ, мунӧ, немечьяс мунӧны сы бӧрся.)
3.
ВАНЯ (на бӧрвылӧ). А! Он вермӧй! Сымында страна босьтінныд, ӧткажитчинныд честьысь, сӧвестьысь — а онӧ вермӧй, вынныд тіян абу!
(Чӧв олӧм).
ОЛЕГ (негораа). Висьтав, Серёжа, ӧні кӧ ставсӧ выльысь заводитны, кутін эськӧ тэ овны мӧд ногӧн, медым асьтӧ видзны?
СЕРГЕЙ (пыді гӧлӧсӧн). Ме эськӧ ставсӧ вӧчи тадзи жӧ, сӧмын зіли ещӧ на унджык, тысяча пӧв унджык эськӧ...
ОЛЕГ (ёртъясыслы). Ёртъяс! Ті кыланныд?... Ми мунам паныд тайӧ мортвиысьясыслы, кыдзи коммунистъяс! Мед ми кулам сэтшӧм жӧ честнӧя, кыдзи и олім!
(Кылӧ уна кок шы, немецкӧй команда, локтӧны салдатъяс.)
ЛЮБА (негораа). Прӧщай, мама... Тэнад Любаыд мунӧ уль му пытшкӧ...
(Кок шыяс пыр матынӧсьджык. Ставӧн кывзысьӧны.)
ОЛЕГ. Ёртъяс! Менам дона ёртъяс! Мед ми кулам сідзи, кыдзи кувлісны медбур большевикъяс миян югыд Рӧдина вӧсна! Мед ми кулам тысяча пӧв, сӧмын мед нэм чӧж югъяліс му вылас миян великӧй Рӧдиналӧн югӧрыс! Ёртъяс!... (Заводитӧ сьывны. )
Весь мир голодных и рабов...
(Том гвардеецъяс чукӧртчисны Олег гӧгӧр. Пыдіас воротаас — немецъяс. Гимныс юргӧ, кыдзи вызов. Салдатъяс сулалӧны пыранінын да быттьӧ кутшӧмкӧ вын оз лэдз найӧс воськовтны водзӧ. Кажитчӧ весиг найӧ бӧрыньтчыштісны. А гимныс пыр паськалӧ.)
И в смертный бой идти готов!
Весь мир насилья мы разрушим...
ОЛЕГ. Мед нэм чӧж дзирдалас став мирас миян великӧй Рӧдина-мамлӧн югӧрыс!...
(Интернационал пыр гораммӧ. Гимныс сӧльнитчӧ артиллерийскӧй канонада гымкӧд да пӧртмасьӧмкӧд. Шахта дворыс вӧйӧ сап пемыдӧ. И друг ставыс ори. Ӧзйӧм би югзьӧдӧ сійӧ жӧ шахта дворсӧ тӧвся лунын. Йӧз чукӧр пӧрччӧмаӧсь шапкаяснысӧ. Туркенич военнӧй паськӧма. Валя Борц, Жора Арутюнянц, Нина Иванцова, Анатолий Ковалев, Елена Николаевна, шахтёръяс, боецъяс, офицеръяс, генералъяс, карсаяс, Иван Фёдорович Проценко, Радик Юркин.)
4.
ПРОЦЕНКО (негораа, скорбнӧя). Ньӧтчыд... Ньӧтчыд, кытчӧдз миян пиысь медбӧръяыс оз ло гуын, миян паметьысь оз вушйыны налӧн нимъясыс. Найӧ морӧсъясын быдӧнлӧн тіпкис отвагаӧн, дерзостьӧн, подвиг жаждаӧн тырӧм орлинӧй сьӧлӧм... И миян зонъяслысь да нывъяслысь, миян пиянлысь, комсомолецъяслысь, миян бур ёртъяслысь историяын вӧвлытӧм стойкостьсӧ Рӧдина ньӧтчыд оз вунӧд... Пресветлӧй Рӧдина-мамлы найӧ эз дыр служитны, но тайӧ — абу налӧн мыж. Но найӧ служитісны сылы честнӧя да доблестнӧя — и таын славаыс налӧн нэмъяс кежлӧ, таын налӧн кувлытӧмлуныс... Клянитчӧй жӧ, ёртъяс, боецъяс да офицеръяс миян, мый ті век кутанныд помнитны миянлысь том ёртъяснымӧс да кутанныд метитны на вӧсна проклятӧй палачьяслы.
ТУРКЕНИЧ (негораа.) Клянитчам...
ПРОЦЕНКО. Клянитчӧй тшӧтш и ті, мамъяс да батьяс, асланыд челядьлысь телӧяссӧ ки выланыд босьтысьяс, клянитчӧй тшӧтш и ті, ӧти арлыдаяс налӧн да соотечественникъяс, миян мувывса став труженикъяс, мый святӧ кутанныд хранитны ставсӧ, мый завещайтісны миянлы миян прекраснӧй ёртъяс... (Залӧ.) Сувтӧй, ёртъяс, почтитам пӧгибнитысьяслысь паметь.
(Виччысьтӧг, лӧняс заводитӧ юргыны волнуйтчан да торжественнӧй гӧлӧс Радик Юркинлӧн. Сійӧ юргӧмӧн кыпӧдчӧ вылі нотаӧдз, но не дзебны сыын ӧні благоговейнӧй дрӧж да трепет.)
РАДИК. Ме, Радик Юркин, менам ёртъяслӧн гу дорын, кодъяс пӧгибнитісны сы вӧсна, медым водзӧ муніс менам олӧмӧй, Рӧднӧй му водзын, став народ водзын торжественнӧя клянитча, мый асланым Рӧдина делӧлы, асланым народ делӧлы, коммунизм делӧлы — сета ассьым став вынъясӧс, став сямлунӧс... А ковмас кӧ тайӧ делӧ победалы, миян йӧз шудлы менам олӧмӧй, — ме сета сійӧс ӧтик минута колебайтчытӧг. Кыдзи миян Рӧдиналӧн, миян большевистскӧй партиялӧн пи, кыдзи том йӧзлӧн Ленинскӧй коммунистическӧй союзса член — ме торжественнӧя висьтала тіянлы, менам гырысьджык ёртъяс соотечественникъяс да, медводз тэныд, Сталин ёрт, — верманныд ме вылӧ надейтчыны. Любӧй кадӧ...
(Лӧнь. Сэки оркестрын заводитчӧ мелодия
Пом
