МИ КУТАМ ОВНЫ

ВОРСЫСЬЯС:

КЛАЙД ЧЕТМЕН.

МЕРИ ХОРМАН (МЭЙ ДЕ ШЕННИ).

СТОУН.

Нью-йоркскӧй метроын тупиковӧй тоннель. Бетоннӧй руд стен, код вылын тӧдчӧны ульсалӧм да ва пычкӧм пятнояс. Стенас вӧчӧма путеобходчиклы ичӧтик ниша, кытчӧ сійӧ дзебсьывлӧ поезд мунігӧн. Зэв ляпкыдик пӧтӧлӧк. Пидзӧс вылнаын пӧвйысь вӧчӧм кӧрӧб, коді вевттьӧ контактнӧй рельс. Улынджык обыкновеннӧй рельсъяс. Тоннельсӧ югдӧдӧ бусӧн тырӧм, чусалысь электрическӧй лампочка да семафорлӧн гӧрд пӧнар, а сыкӧд орччӧн ӧзтытӧм нюдзвиж пӧнар. Быд куим минут мысти ылысянь кылӧ мунысь поездлӧн шы.

Пырӧны Клайд да Мэри. Кыкнанныс зэв омӧлик паськӧмаӧсь. Но Клайд, том, ён, кыпыд, внешностьыс рабочӧйлӧн. А Мэрилы нелямын арӧс сайӧ нин, сійӧ интеллигентка, дзикӧдз лигышмунӧма. Киас сылӧн киссьӧм саквояж. Клайдлӧн киас газет тубрас. Мэри конйыштчис да уси ӧти пидзӧс вылас. Кисӧ нюжӧдіс кӧрӧбланьӧ.

КЛАЙД. Виччысь!! (кыскыштӧ Мэрилысь кисӧ кӧрӧб дінысь, отсалӧ сылы сувтны.) Тайӧ ӧд смерть! (Индӧ кӧрӧб вылӧ.)

МЭРИ (вашнитӧ). Смерть?

КЛАЙД. Тайӧ кӧрӧб увтіыс мунӧ контактнӧй рельс. Эн гӧгӧрво? Тані, кӧні ми сулалам, тайӧ рельсъяс вылас — плюс. Эстӧн — минус. Напряжениеыс некымын сюрс вольт. Инмыштан кӧ и — пом. (Няйт носӧвикӧн чышкалӧ пӧсьсӧ.) Уф, кутшӧма ті менӧ повзьӧдід!

МЭРИ (кӧрӧб вылысь синъяссӧ вештывтӧг). Электрическӧй стул вылын моз?

КЛАЙД. Сідз кымын.

МЕРИ (думайтӧмӧн). Тырвыйӧ американскӧй нога смерть.

КЛАЙД. Дзик сӧгласен тіянкӧд. (Гӧгӧр видзӧдлӧ.) Тӧданныд мый? Чомнымӧс вай татчӧ вӧчам. Местаыс зэв туяна... Аддзанныд? Семафор. Гӧрд биыс висьталӧ, мый тоннельӧ пыран туйсӧ тупкӧма. Тайӧ запаснӧй тупик. Мыйӧн татчӧ лэдзасны поездсӧ — пыр жӧ ӧзъяс нюдзвиж би. Ми удитам дзебсьыны.

МЕРИ. Кытчӧ?

КЛАЙД. Со этійӧ нишаас. Тайӧс нарошнӧ вӧчӧмаӧсь путевӧй обходчикъяслы.

МЭРИ. Татчӧ найӧ поездысь дзебсьӧны?

КЛАЙД. Да.

МЭРИ. А обходчикыс кӧ оз удит дзебсьыныс? Пӧгибнитас?

КЛАЙД. Сідз, буракӧ. Мед колӧкӧ удитас! Спид ап, спид ап! Та вылын сулалӧ Америка. (Серавлӧ, сэсся решительнӧя шуӧ). Пуксьылам татчӧ. (Туй вылас вольсалӧ уна листа газет.) Пуксьӧй. Кӧсъяд кӧ, вермад водны. Бумагаыд зэв бура видзӧ уль мусьыс.

МЭРИ. Аттьӧ. (Пуксьӧ.) Кутшӧма ме мудзи! Ӧні сӧмын кылі мудзӧмӧс.

КЛАЙД. Шойччӧй.

МЭРИ. Весиг кӧть мунны кутас поездыс, ме ог чеччы. Клянитча!

КЛАЙД. Пукалӧй спокойнӧя. Семафор бӧрся ме видзӧда. Печенье сёяд? (Зепсьыс кыскӧ ичӧтик пачка.)

МЭРИ. Мый ті, мистер Четмен! Кыдзи нӧ позьӧ? Сійӧ тіянлы аслыныд колӧ.

КЛАЙД. Ме велалӧма юксьыны ёртъяскӧд. Сёйӧй.

МЭРИ. Ог, ог...

КЛАЙД. Миссис Хорман... Приказывайта, ме ыджыдджык.

МЭРИ. Ті ме дорысь ёна томджыкӧсь.

КЛАЙД. Ті уджтӧмӧсь сӧмын на витӧд тӧлысь, а ме коймӧд во.

МЭРИ. Менам олӧмын тайӧ медбӧръя тӧлысь, Клайд. Вынӧй сэсся менам абу.

КЛАЙД. Но, тырмас, тырмас! Ме тіянӧс эг сы вылӧ спасит асьныдтӧ виӧмысь сэн, выліас, да несчастнӧй случайысь тані, метро тоннельын, медым ті... Босьтӧй печеньесӧ да сёйӧй.

МЭРИ (бергӧдчӧ сы дінысь, медым дзебны синвасӧ). Ок, Клайд! (Босьтӧ печенье да ырсъялігтырйи сёйӧ.)

КЛАЙД. Но, но!

МЭРИ. Ми кӧнӧсь? Мый миян весьтын? Выліас?

КЛАЙД. Миян весьтын? Дзик пыр висьтала тіянлы стӧча. (Думайтӧ.) Гудзон.

МЭРИ. Гудзон?

КЛАЙД. Да. Ми буретш ва пыдӧс улас. (Видзӧдӧ вывлань.) Миян вевдорын метр кызь либӧ комын кыза из. Сэсся пыр васӧдджык и васӧдджык. Сэсся дзик ва лыа. Кизьӧр няйт. Ва пыдӧс. Вӧйӧм мортъяс. (Сералӧ.)

МЭРИ. Абу тешкодь, Клайд.

КЛАЙД. Тешкодь, мый найӧ миян вевдорынӧсь, а абу миянысь улынджыкӧсь. Сэсся, миссис Хорман, донаӧй, висьтала тіянлы: миян положениеын синваыд оз отсав. Отсалас сӧмын кыпыдлун да сюсьлун. Водзӧ, ещӧ вылынджык — раковинаяс, ватурунъяс. Сы вевдорын визувтӧ ва. Зэв кӧдзыд ваас черипиян да быдсяма шыбласыс. Ещӧ вылынджык гырысь гыяс, океансянь пушкысь тӧв, лым сора зэр, Нью-Йорклӧн зык, каляяс, океанскӧй пароходъяс, буксиръяс. Петкӧдлі ме тіянлы став серпассӧ улісянь вылӧдз. Пароходъяссӧ ӧні ме улісяньыс жӧ аддза. Кильыс сылӧн тырӧма тропическӧй ракушкаясӧн. Сэсся трюм. Ящикъяс, бӧчкаяс, мешӧкъяс. Шикарнӧй дук кылӧ, миссис Хорман! Шоколад дук. Сё збыль, шоколад дук кылӧ. Бекон, сыр, кынтӧм фрукты, вина, ӧти кывйӧн кӧ шуны, став сійӧторйыс, мый вылӧ миян эм, ас костын сёрнитӧмӧн, налӧн серти ёна ыджыдджык право.

МЭРИ. Коді найӧыс?

КЛАЙД. Коді? (Нюмдӧмӧн.) Кыпӧдчам ещӧ вылӧджык. Трюм вевдорын, кочегарка вевдорын, машиннӧй отделение вевдорын — палубаяс. Классъяс, дона миссис, обществолӧн классъяс, найӧс медся нагляднӧй петкӧдлӧмӧн. Коймӧд класс — сельди бӧчка. Пӧдмӧн дука, ружтӧмъяс. Мӧд класс — сідз-тадз. А первой класс — сэн вот олӧны! Но ті чайтад, тайӧ медся вылыныс? Абу. Первой вевдорас ещӧ «люкс» эм. А «люкс» вевдорас — «супер-люкс». Сійӧ роскошсӧ, коді сэні эм, ми весиг огӧй представляйтӧй тіянкӧд.

МЭРИ. Да, тіянлы сьӧкыд сійӧс представитны.

КЛАЙД. Тіянлы моз жӧ. Зато трюмъяс йылысь, миссис Мэри, менам эм зэв стӧч представление. Ті думайтанныд, мый сэні сӧмын пызь да шоколад? Эн тӧдӧй! Пулемётъяс, донаӧй менам! Франколы, Чан Кайшилы, Ли Сын Майлы, найӧ кӧ ловъяӧсь на кытӧнкӧ. Войналӧн микробъяс! Со мый найӧ новлӧдлӧны ӧні американскӧй судноясса трюмъясын.

МЭРИ. «Найӧ»...

КЛАЙД. Да, найӧ! Найӧ! Найӧ, кодъяс «Америка» кывсӧ вӧчисны проклятиеӧн! Найӧ, кодъяс лыйлӧны миянӧс портын, кор ми требуйтам мир, ӧтказывайтчам ӧружие грузитӧмысь, кодӧс кӧсйӧны ыстыны Европаӧ да Азияӧ, бастуйтам! Аддзылід эськӧ мед ті, мый вӧчсис недель сайын «Блек Стар Лайн» причалъяс дорын! Брандспойтъясыд, паличьясыд этша лои. Найӧ вайисны танкеткаяс, лэдзисны газъяс, кутісны крӧшитны пулемётъясысь. Сизимӧн усины. Кымынӧн ранитчисны — ог тӧд.

МЭРИ. Кутшӧм ужаснӧ тайӧ ставыс!

КЛАЙД. Долыдтор этша.

МЭРИ (думайтӧмӧн). Тупик...

КЛАЙД. Тіянлы оз кажитчы тані?

МЭРИ. Ме мӧд тупик йылысь сёрнита, Клайд, сійӧ ужаснӧй, петны позьтӧм тупик йывсьыс, кытчӧ пырис Америка ставнас.

КЛАЙД. Ставнас? Эз! Тані ме тіянкӧд абу сӧгласен. Категорически. Та вылӧ менам дзик мӧдпӧлӧс видзӧдлас. (Кост.) Бурджык висьталӧй: ловкӧя ме вайӧді тіянӧс татчӧ? А кутшӧма ми сійӧ рыжӧй дінтіыс чишкӧбтім! Ми тані зэв бура шойччам, эскӧй меным.

МЭРИ (иронияӧн). О, дерт, жӧ.

КЛАЙД. Вӧлі эськӧ, дерт, ещӧ на гажаджык, восьтыны кӧ чӧскыд сур бутылка либӧ, кӧть нин, «Кока-Кола» бутылка. Но, шуӧны, абу вылӧ пӧ и суд абу.

МЭРИ. Ті зілянныд менӧ ышмӧдны, Клайд, а ме синъяс сертиыд аддза, мый ті асьныд муртса кок выланыд сулалад.

КЛАЙД. Мый збыль, сійӧ збыль. Ныр вылӧ усьмӧн мудзи. Тайӧ вежонас менӧ ёна котрӧдлісны сэні, выліас.

МЭРИ. Коді?

КЛАЙД. Та кузя специалистъяс.

МЭРИ. Полиция?

КЛАЙД. И полиция и ещӧ кодсюрӧ.

МЭРИ (синъяссӧ паськӧдӧмӧн шӧпкӧдӧ). Ті вӧчинныд преступление?

КЛАЙД. Найӧ видзӧдӧм серти — да. Ме серти — эг. Ме, миссис, Хорман, обыкновеннӧй рабочӧй. Грузчик. Но сэтшӧм рабочӧйяс пӧвстысь, кодъяс оз чышкавны, кор налы кӧзяеваыс сьӧдалӧны синъясас, а примитӧны ассьыныс мераяс. Тӧданныд миянлысь уджнымӧс? (Скӧра нерӧмӧн.) «Спид ап! Спид ап! Зільджыка вӧр!» Тайӧс сӧмын и кылан. Лебёдкасӧ арталӧма тоннаӧн-джынйӧн вылӧ, а компаниялы «некор», «кад — сійӧ деньга». Тшӧктӧны лэптыны куим-нёль тоннаӧн. Люкъяс вылысь вевтъяссӧ колана ногӧн закрепитны сідзжӧ «некор». Мынӧ стрелаысь грузыс, усьӧ вевт вылас, и ставыс лэбӧ трюмӧ дявӧлыслы: и вевтыс, и грузыс, тонна вит! — веськыда йӧз вылас.

МЭРИ. Енмӧй...

КЛАЙД. Пыровланатор. Сӧмын и кылан: скорая помощь омлялӧ. Войдӧр во ректім голландецӧс, и буретш татшӧм случай. Куимӧс виис. Ставныслӧн семья. Ми кутім бастуйтны. Потребуйтім, медым, ӧти-кӧ, семьяясыслы пособие сетісны, мӧд-кӧ, мед лебёдкаяс эз перегружайтны да мед люкъяс вылысь вевтъяссӧ колана ногӧн крепитісны. Компания ӧткажитчис. Став пунктъяс кузя. «Принципиальнӧ». Но, ми «принципиальнӧ» жӧ накӧд сёрнитім, агентлысь бокъяссӧ гындыштім. Тані, дерт, портӧ уськӧдчис национальнӧй гвардия. Сюрсӧн-джынйӧн. Пулемётъясӧн, газъясӧн. Накӧд небось он шумит! Вот тайӧ кадсяньыс и лои ме безработнӧй. Веськыдджыка кӧ шуны: уджала безработнӧйяс пӧвстын.

МЭРИ. Кыдзи «уджалад»?

КЛАЙД. Организуйта найӧс. Ыджыд удж, и будущӧйыс сылӧн бур. Но, дзик некутшӧм доход оз сет, и мистер Трумэн да сылӧн сӧветникъяслӧн абу почётын.

МЭРИ. Ті кодьясыс меным веськыд загадка. Видзӧдан тіян вылӧ — обыкновеннӧй американец, кутшӧмыс уна миллион. Ме американка жӧ. Америкаын чужлі, нэмӧс олі. Но, тыдалӧ, ме тіян дорысь омӧльджыка американка. Тіянлӧнкодь оптимизмыд менам абу. Торъя нин абу сійӧ кадсяньыс, кор ме... (Ӧвсис.)

КЛАЙД. Мый?

МЭРИ. Ах! (Ӧвтыштіс кинас, бергӧдчис мышкӧн.) Фактъяс, Клайд, фактъяс! Со найӧ. Кыкнанным ми патератӧмӧсь, тшыгӧсь, мудзӧмаӧсь, уджтӧмӧсь, некодлы ковтӧмӧсь...

КЛАЙД. Ас йылысь ме тайӧс ог вермы шуны. Ме уналы колана. И найӧ меным колӧны. Газетъяс ті лыддьывлад?

МЭРИ. Зэв шоча.

КЛАЙД. Гм.. Но кӧть, гашкӧ, кывлід, мый Нью-Йоркын бастуйтӧны лифтёръяс, металлистъяс? Талун должен заводитчыны став нью-йоркскӧй транспортлӧн всеобщӧй забастовка. Тайӧ ставторъяс дінас менам эм кутшӧмкӧ отношение. Гӧгӧрвоанныд ӧні, мыйла ме татшӧма мудзи тайӧ вежоннас да мыйла найӧ вӧтлысисны ме бӧрся? Эн шогсьӧй, миссис Мэри. Уськӧдӧй тӧд вылад: сэні, миян весьтын, гыяс, шторм, океансянь уль тӧв, зэр, лым. Уличьяс вылын шлякӧть, пеж няйт, полисменъяс, кодъяслӧн кианыс дубинкаяс, наручникъяс да мукӧдтор. Бррр! Збыль ӧмӧй тіянлы окота сэтчӧ? А? Тані шоныд, лӧнь, сэн серти косджык. Оз кыв проклятӧй нью-йоркскӧй грымгӧмыс. Курорт!

Мэри сайӧдіс чужӧмсӧ кияснас, бӧрддзис.

Миссис Хорман! Мэри! Мый тіянкӧд? Мый ті?

МЭРИ. Нинӧм, нинӧм. Прӧститӧй.

КЛАЙД. Ме тіянлы мыйкӧ гажатор лыддя. Кывзанныд?

МЭРИ. Лыддьӧй.

КЛАЙД (чеччӧ газет вылысь, паськӧдӧ сійӧс). Дзик пыр. Дзик пыр. Со, пример... Ха-ха-ха-ха! Кывзӧй. «Всевышньӧйӧн да судьбаӧн миянлы, американечьяслы, водзвыв индӧма...» (Сералігмоз). «Водзвыв индӧма»! Абу кыдзкӧ мукӧдногӧн. (Водзӧ лыддьӧ.) «...югдӧдны истиннӧй христианскӧй светӧн став му шарсӧ да, атомнӧй нэмса техническӧй вынйӧр вылӧ мыджсьӧмӧн, ӧтлаӧдны человечествоӧс сійӧ медвылыс да медся разумнӧй оланногыскӧд, код благоясӧн пӧльзуйтчам ми, Америкалӧн пиян да нывъяс...» Мый нӧ ті онӧ сералӧй?

МЭРИ. Нинӧм ог аддзы тешкодьсӧ.

КЛАЙД. Кыдзи он аддзы? Атомнӧй бомба вылӧ мыджсьӧмӧн, йӧртны человечествоӧс истиннӧ христианскӧй райӧ, кӧні благоденствуйтам ми тіянкӧд, Америкалӧн пи да ныв? Тайӧ ӧмӧй абу тешкодь? Абу омӧль оланног став мирлы! А? Пола сӧмын, мый тайӧ оз во сьӧлӧм вылас не сӧмын русскӧйяслы либӧ чехъяслы, но весиг Африка центрын медся шудтӧм сьӧдъяслы. (Недыр лыддьӧ аслыс.) А эта йылысь ті мый шуанныд? (Сералігтыр лыддьӧ.) «Нелямын арӧса фермер окотитӧ тӧдмасьны ар комына нывкӧд, кодлӧн эм аслас трактор. Цель — гӧтрасьӧм. Кора пуктыны тракторлысь фотоснимок. Почтовӧй ящик 342...» (Сералӧ.) Тіян ногӧн и тайӧ абу тешкодь? Мый ради нӧ ме сэсся лыддя тіянлы, ті кӧ онӧ сералӧй?

МЭРИ (муртса нюмдыштӧ). Лыддьӧй ещӧ.

КЛАЙД (серьёзнӧя, тэрмасьӧмӧн). «Винтовкаӧн челядьӧс виавны оз ков. Та вылӧ тырмӧ револьвер».

МЭРИ (паськӧдӧ синъяссӧ). Мый сэтшӧмыс?

КЛАЙД (сідзжӧ). «Инвалидлысь юр жугӧдлыны оз ков ружье прикладӧн. Та вылӧ ёна бурджык лоӧ бутылка».

МЭРИ. Тайӧс печатайтӧма?!

КЛАЙД. Еджыд вылӧ сьӧдӧн. «Кор герой нӧйтӧ нылӧс чужӧмас либӧ чегъялӧ, музгыльтӧ сылысь кисӧ, сійӧ должен тайӧс вӧчны сідзи, мед аслас чужӧм вылын тӧдчис жалитӧм».

МЭРИ. Мый ті лыддянныд, Клайд?

КЛАЙД. Голливудса кинорежиссёръяслы выль, «ёнджыка гуманнӧй» инструкция, кыдзи тані гижӧма.

МЭРИ (дрӧгмунӧ). Голливудса?

КЛАЙД. Мый ті повзинныд? Тіянлы лоліс сэні уджавны?

МЭРИ. Эз, эз.

КЛАЙД. А профессия сертиныд ті коді?

МЭРИ. Уличьяс весалысь. Меным узьны окота, Клайд.

КЛАЙД. Водӧй. Налӧй ещӧ газет. Шебрасьӧй сійӧн. А юр улад саквояжтӧ пуктӧй. (Отсалӧ сылы.)

МЭРИ. Аттьӧ. Кутшӧм ті бур сьӧлӧмаӧсь!

КЛАЙД. Узьӧй. А ме пукалышта, синпӧвнам вугралышта, а мӧднас кута видзӧдны семафор вылӧ. Бура узьны.

Мари дыр оз вермы лӧсьӧдчыны «вольпасяс». Но дырӧн кыдзкӧ артмӧдчис да ланьтіс. Клайд вугралӧ пукалӧмӧн, юрсӧ киясас дзебӧмӧн. Пырӧ Стоун. Сійӧ путеец формаа, кыз, рыжӧй.

СТОУН. Эй!

Мэри пыр жӧ садьмис. Повзьӧма. Клайд узьӧ.

Кыдзи ті веськалінныд татчӧ, чӧртыс мед нӧбӧдас тіянӧс?

Мэри чеччис. Чӧв олӧ. Стоун локтіс Клайд дінӧ, грубӧя пыркнитіс сійӧс пельпомӧдыс.

Садьмӧдчы!

КЛАЙД (чеччыштӧ). Ме ог узь.

СТОУН. Ті кодъяс? Кытысь? Мый тані вӧчанныд?

КЛАЙД. Ог радейт лишнӧй юасьӧмъяс.

СТОУН. А ме шуа: вочавидз!

КЛАЙД. Пӧжалуйста, тіянлы кӧ сэтшӧма нин колӧ. Кодъяс ми? Чикагскӧй университетысь президент да сылӧн секретарь. Тӧданныд Чикагскӧй университетсӧ? Буретш сійӧ, кӧні кутшӧмкӧ тип, студент, заклад вартӧмӧн сёйӧма вес сертиыс унджык бифштекс, сы дорысь, мыйта сёйӧ йӧла тюря куим арӧса порсь. Он веритӧй? Верманныд лыддьыны со этійӧ газетсьыс. (Петкӧдлӧ.) Кытысьӧсь, юаланныд? Выліысь, дерт, ми ӧд мортъяс, а абу чӧртъяс. Мый вӧчам? Изучайтам. Мый ми тіянкӧд изучайтам, миссис Хорман? Уськӧдӧй тӧд вылӧ?

Мэри чӧв олӧ.

А-а! Уси дум вылӧ. Стенъяс ульсалӧм. Со тайӧ.

СТОУН (пыр на кывзіс напряженнӧя, сэсся взорвитчис). Мый морсӧ ті менӧ ылӧдланныд?! (Грубӧя кутӧ Клайдӧс пельпомӧдыс.) Мунамӧй мекӧд!

КЛАЙД. Кокньыдджыка, кокньыдджыка.

СТОУН. Ме линейнӧй!

КЛАЙД. А ме силометр вылын ки пӧвнам кучка комын кило, а кыкнан кинам — сизимдасӧс. Университетса президентӧн лотӧдз меным лоліс уджавны грузчикын да выступайтлыны ринг вылын.

СТОУН. Тэ, вокӧ, вывті уна сёрнитан! (Кыскис револьвер.) Мунӧй татысь! Но?

МЭРИ (кевмысьӧмӧн). Кывзӧй...

СТОУН. Нинӧм ог кӧсйы кывзыны!

МЭРИ. Ме кевмыся тіянлы! Ті ӧд морт жӧ!

СТОУН. Абу..

КЛАЙД. Сійӧ линейнӧй.

СТОУН. Да!

МЭРИ. Ме ог нин помнит, кор ме узьлі морт моз. Эсійӧ ночлежкаясыс. Первойсӧ дас цент вылӧ — общӧй наръяс вылын. Сэсся вит цент вылӧ пукалӧмӧн, кияс и юр гез вылӧ пуктӧмӧн. А квайт час асылын гезсӧ разьӧны да ставӧн усьӧны! Ті кыланныд? Америкаын тадзи обращайтчӧны миянкӧд, кӧреннӧй американецъяскӧд, актрисакӧд, кодлысь нимсӧ, гӧлӧссӧ, чужӧмсӧ тӧдліс став Америка, став мир!

КЛАЙД (шемӧсмӧ). Ті вӧвлӧм актриса?

МЭРИ. Ме — Мей де Шенни.

КЛАЙД (чуймӧмӧн). Эг кывлы. Тайӧ кӧнкӧ важӧн нин вӧлі?

СТОУН. Морӧн лыйӧм! А ме помнита. Кымынысь ме тіянӧс аддзывлі экран вылысь. Збыль ӧмӧй тайӧ ті? Менам и ӧні на эм пластинка тіян сьылӧмӧн. Лӧсьыд сьыланкывйыс. (Заводитлӧ сьывны.) Кыдзи нӧ ті ночлежкаӧдзыс исковтінныд?

МЭРИ. Кызь вит во сайын ме вӧлі бӧр локта Европаысь Нью-Йоркӧ. Ме вӧлі эстӧн, выліас, «Мажестик» вылын, супер-люксын. Ті и мӧвпыштныд он кужӧй сійӧ роскош йывсьыс! Дзонь море цветъяс, хрусталь, музыка, бриллиантъяс... (Чужӧмсӧ сайӧдіс кияснас.) Ах! Быттьӧ вӧтын.

СТОУН. Ті донаӧсь вӧлінныд?

МЭРИ. О!

СТОУН. Кытчӧ нӧ ставыс воши?

МЭРИ. Висьӧм бӧрын гӧлӧсӧй воши. Кор татшӧмторйыс лои, сэк менам импрессариоӧй — сійӧ жӧ вӧлі и верӧсӧй менам — гусяліс менсьым ставсӧ да муніс ме дінысь. Сэсся уволитісны театрысь. Ме вӧлі йӧйман бешенствоын. Став мирыслы лёксьӧмӧн ме лои сапӧгъяс весалысьӧн. Тайӧ кыпӧдіс сенсация. Менӧ снимайтісны киясын щёткаяс кутігӧн. Ме сапӧгъяссӧ весалі Даффи плӧщадь вылын. Нарошнӧ мукӧд дорысь донтӧмджыка. Снимокъяс петісны газетъясын. Ӧтчыд сійӧ, менам вӧвлӧм верӧсӧй, медым тешитчыны ме вылын, пуктіс ме водзӧ ассьыс коксӧ. Бӧрыннас меным висьталісны, мый тайӧс сійӧ вӧчӧма заклад вартӧмӧн. Сыкӧд споруйтӧмаӧсь, мый сылӧн оз тырмы решимостьыс видзӧдлыны меным синъясӧ. Ме сылы щётканам чужӧмас мыськышті. Менӧ судитісны.

СТОУН. Верманныд водзӧ не висьтавны. Ставыс гӧгӧрвоана.

КЛАЙД. Абу, висьталӧй водзӧ.

МЭРИ. Вит во тюрьмаын. Сэсся служиті уличьяс чышкысьӧн. Во джын сайын уволитісны. Эз ло юр сюянінӧй. Тшыг. Ог нин помнит, кыдзи узьӧны крӧватяс, мортногӧныс.

КЛАЙД. Став дінас содтӧй, мый талун асывнас ме эг лэдз тіянӧс шыбитчыны Гудзон юӧ. (Индӧ вывлань)

МЭРИ (гортӧма). Ме кӧсйи ваӧ вӧйтчыны.

СТОУН. Сэк ті и тӧдмасинныд?

КЛАЙД. Ми тӧдмасим ночлежкаын. Орччӧн узим, гез вылӧ мыджсьӧмӧн и асывнас ӧтлаын узим. Миссис бӧрдіс. Сэсся ме сійӧс аддзи пос вылысь да куті, мед эз чеччышт ваас.

СТОУН (Мэрилы). Сьӧкыд велавныс?

МЭРИ. Американскӧй оласногӧ? О, да. Ме вӧлі велалӧма мортлӧн оласногӧ.

СТОУН. Меным оз зэв кажитчы, мый ті ӧні шуид, миссис.

МЭРИ. А меным оз зэв кажитчы менам олӧмӧй, мистер....

СТОУН. Менам нимӧй Стоун.

МЭРИ. Мистер Стоун, ме кевмыся тіянлы: лэдзӧй менӧ коллявны тані войсӧ, кӧть нин куим-нёль час узьыштны.

СТОУН. Сэсся тіян нинӧм абу содтыштны?

МЭРИ. Менам весиг ӧти цент абу.

КЛАЙД. Менам эм доллар. Но сійӧ меным сёйӧм вылӧ колӧ. Сытӧг ме кокъясӧс нюжӧда.

СТОУН. Нюжӧдӧй кытӧнкӧ мӧдлаын. Менам тані абу ночлежка.

МЭРИ. Мистер Стоун!

СТОУН. Тані метролӧн тоннель, а абу ночлежнӧй керка, ме висьтала тіянлы.

МЭРИ. Кытчӧ нӧ меным водныс? Кӧні узьыштны? Выліын зэр, кӧдзыд, ар.

СТОУН. А меным кутшӧм делӧ сыӧдз?

КЛАЙД. Чистӧ американскӧй вочакыв.

СТОУН. Мый ті кӧсъянныд шуны тайӧн?

КЛАЙД. Ме кӧсъя шуны, мый ті некутшӧма абу американец, коді тадзи сёрнитӧ. Тадзи унаӧн шуасны. Тадзи миянӧс воспитайтісны, радейтны матыссаӧс. Истиннӧ христианскӧй страна! Збыль ӧд?

СТОУН. Тырмас сӧрны! Петӧй тоннельысь! Лыддя куимӧдз, и тэ кӧ....

КЛАЙД (повзьӧмӧн видзӧдӧ вывлань). Видзӧдӧй! Видзӧдӧй!

СТОУН. Мый сэні?!

КЛАЙД (ӧдйӧ нетшыштӧ сы киысь револьверсӧ). Ха-ха-ха! (Спокойнӧя, грӧзиттӧг.) Лэпты киястӧ, мистер Стоун. Ті кывлід? Киястӧ вывлань, ме тіянлы шуи. (Кыпӧдӧ револьверсӧ.)

Стоун лэптӧ кияссӧ.

МЭРИ. Клайд!

КЛАЙД. Ме сійӧс лыя сӧмын сэк, кор сійӧ оз кут менӧ кывзыны. (Чорыда.) Кывзы, тэ! Из! Тадз, буракӧ, тэнад фамилияыд? Ме грузчик. Меным комын арӧс. Ме бизон кодь ён. Мый морла меным оз сетны спокойнӧя овны да уджавны аслам Америкаын? Висьтав. Чӧв олан? Чӧв олан сы понда, мый тэ ачыд он тӧд, мый тэкӧд лоӧ аски, кутан он тэ уджавны. Казьтыштлы менсьым кывъясӧс: тэнӧ шыбитасны жӧ. А колӧкӧ, верман кыскыны менӧ выліӧ да висьтавны ставлы, мый ме Эвансвильса Клайд Френк Четмен, сьӧлала пӧрядокъяс вылӧ, кодъяс дырйи вит тысяча тунеядец оз тӧдны, кытчӧ воштыны зарнилысь зэв гырысь гӧраяс, а сё миллион честнӧй американецъяс, зіль уджалысьяс, оз тӧдны, кытчӧ воштыны ассьыныс зарни киныссӧ, кӧні кольны вой, кыдзи шедӧдны вит цент, медым мынтысьны узьӧмысь. Ме сьӧвзя татшӧм пӧрядокъяс вылас да на вылӧ, кодъяс сійӧс лӧсьӧдісны, сэтшӧм господаяс вылӧ, кодъяс вердӧны порсьясныссӧ йӧла тюряӧн, а рабочӧйясӧс заставляйтӧны корсьысьны помойкаясысь! Ме сьӧвзя сійӧ господаяс вылас, кодъяс сэні, выліас, панӧны выль война, лӧсьӧдчӧны шыблавны не сӧмын колорадскӧй жукъясӧс, но и чума, холера, тиф! Чумаысь да атомнӧй бомбаысь кындзи найӧ сэсся тэныд да меным нинӧм оз вермыны придумайтны. Миянлы шинель да винтовка, налы выль барышъяс? Тадзи? Миян вирным — налӧн доход, миллиардъяс, виллаяс, яхтаяс? Чӧртлы ставыс! Мед тэ кодь понъяс воюйтӧны йӧзкӧд, кодъяс меным нинӧм лёксӧ эз вӧчны и эска, мый оз кӧсйыны нинӧм вӧчны. Мед сӧмын миянлы сетасны ӧружие! Ми сэк видзӧдлам, кытчӧ лэбзясны пуляяс! (Кост.) Лэдзан тэ миянӧс узьны тоннеляд, скӧтина? Али он? Меным колӧ кӧть ӧти час узьны. Асывсяньыс менам юрвывтыр удж. (Индӧ Мэри вылӧ.) Тайӧс жалитыштан? Эм тэнад сьӧлӧмлӧн кӧть ичӧтиктор?

СТОУН (киргигмоз). Лэдз револьвертӧ.

КЛАЙД. Пӧжалуйста. (Лэдзӧ.)

МЭРИ. Ми ӧд зэв этша корам, мистер Стоун. Сетӧй миянлы сӧмын войсӧ колльӧдны не улич вылын, не зэр да тӧв улын. Жалитыштӧй!

СТОУН. Миссис де Шенни, менам револьверӧй тіян приятель киын. Ті, гашкӧ, корад сійӧс, мед сійӧ менӧ жалитыштас?

МЭРИ. Ог гӧгӧрво.

СТОУН. Менам нёль челядь, мам, гӧтыр, вок-инвалид, некоднан кокыс абу. Ме ставныссӧ верда. Кодкӧ кӧ тӧдлас, мый менам туннельын восьтӧма ночлежка, да ещӧ сэтшӧм краснӧйяслы, кыдзи тайӧ зонмыс, — менӧ став семьянам пыр жӧ шыбитасны ывла вылӧ.

КЛАЙД. Некод оз тӧдлы.

СТОУН. А тӧдласны кӧ? Тэ, зонмӧ, эн думайт, мый ме изйысь вӧчӧм идол. Ставсӧ гӧгӧрвоа. Ме тӧда, мый миян кӧсйӧны жӧ бастуйтны. Гашкӧ, весиг ме ачым сочувствуйта налы, коді дасьтӧ забастовкасӧ. Ме, гашкӧ, и ачым на тшӧтш забастуйта. Кылан?

КЛАЙД (Мэрилы). Видзӧдлӧй жӧ! Изъяс весиг заводитӧны сёрнитны.

СТОУН. Ме ставсӧ гӧгӧрвоа тіян дорысь не омӧльджыка. Но тэ меным висьтав, мый меным вӧчны, ми кӧ ворссям забастовкасӧ? Коді меным чургӧдас кисӧ тайӧ странаын, семьяӧйкӧд кӧ ме лоа улич вылын? Некод! Ни ӧти дьяволыс! (Кыкнанныс вылӧ видзӧдӧ зывӧктӧмӧн.) Тіянлы чургӧдісны?

КЛАЙД. Чургӧдісны. И ещӧ на чургӧдасны.

СТОУН. Коді?

КЛАЙД. Став Америкаса рабочӧйяс, став мирса рабочӧйяс.

СТОУН (тешитчӧмӧн). Рабочӧйяс. А мыйла нӧ либӧ тэ тані, а абу рабочӧй курорт вылын.

КЛАЙД (долыда). Олам на ми рабочӧй курортъяс лотӧдзыд. Эн шогсьы.

СТОУН. Сӧветскӧй лад вылӧ?

КЛАЙД. А мыйла нӧ бурторсӧ не перенимайтны?

СТОУН. Тэ мед эськӧ сэтчӧ и мунін. Мыйла нӧ он мун?

КЛАЙД. Гортын кӧ няйт, пӧрадочнӧй йӧз сэк гӧститны оз мунны, а босьтӧны корӧсь да гӧгӧр чышкалӧны, пелькӧдӧны.

СТОУН (серавлӧ). Варов тэ, кыдзи ме аддза. Коммунист?

КЛАЙД. А тэ антиамериканскӧй деятельность расследуйтӧм кузя комиссияса член?

СТОУН (друг повзьыштӧмӧн). Кымын час ӧні? Кодлӧн эм часі? Менам сувтӧма часіӧй.

МЭРИ (жугыля нюмдӧмӧн). Мый ті?

КЛАЙД. Чужӧмсяньым часіяс эг новлыв. Менам часі — портовӧй сирена.

СТОУН. Регыд татчӧ состав сетасны. Мунӧй кытчӧдз абу на сёр! Пычӧдас. (Клайдлы.) А менсьым револьверӧс тэ сідзи и колян ас ордад? Виччысь! Таысь — электрическӧй улӧс. Вай бурӧн. Ме некодлы ог висьтав тэнад проделкаяс йылысь.

КЛАЙД. На! Ме абу бандит. (Сетӧ.)

СТОУН (кватитӧ ӧружьесӧ да сыӧн ворсігтырйи). Но, брӧдягаяс? Чайта, ті ӧні мунад?

МЭРИ. Ті со кыдзи! (Решительнӧя.) Ме некытчӧ ог мун.

СТОУН. Предупреждайта: кор ӧзъяс нюдзвиж би, сэк мунны лоӧ сёр. Нишаас куимӧн ог тӧрӧй. Коймӧдсӧ кыскыштас — и кӧлеса улӧ.

КЛАЙД. Сідзкӧ котӧрт ӧдйӧ! Эн виччысь!

СТОУН (скӧрмӧ). Весасьӧй тоннельсьыс, канальяяс! Весасьӧй! Лыйла! Ог кӧсйы ме тіян вӧсна удж воштыны! Тіян агитация дорысь менам аслам шкураӧй донаджык....

Ӧзйӧ нюдзвиж би. Гӧрдыс кусӧ.

МЭРИ. Ах!!

КЛАЙД. Нишаӧ! Ӧдйӧджык! (Йӧткыштӧ сійӧс сэтчӧ.)

СТОУН. Проклятие! (Кӧсйӧ кыскыны Мэриӧс рельс вылӧ.)

КЛАЙД. Эн лысьт!

Стоун веськӧдӧ сы вылӧ револьвер, но Клайд ӧдйӧ мырддьӧ сы киысь.

Сувтӧд поездсӧ!

СТОУН. Ог вермы! Уволитасны! (Уськӧдчӧ пидзӧс вылӧ.) Челядь... гӧтыр... Сетӧй пӧщада!

МЭРИ (чепӧсйӧ нишаысь, Стоунлы). Спасайтчы!

КЛАЙД. Миссис де Шенни!

Стоун пырысь-пыр сувтӧ нишаӧ Мэри местаӧ.

МЭРИ. Ме сэсся ог вермы, Клайд! Ог вермы! Прӧщайтлӧй! (Кӧсйӧ сюйны кисӧ кӧрӧб улӧ.)

КЛАЙД (уськӧдчӧ сы дінӧ). Садьсялӧй! (Кватитӧ киӧдыс да бӧр пыртӧ нишаӧ.) Ми олам и кутам овны! Кыланныд?!

МЭРИ. Тіянӧс талялас! Клайд!!

КЛАЙД (паськӧдӧ кияссӧ, сувтӧ поездлы паныд). Сувт! Сувт! Сувт! Тані йӧз!

Поезд шы содӧ. Клайдлысь тушасӧ пыр ёнджыка югзьӧдӧ тоннельысь локтан свет. Шумыс сэсся лӧньӧ.

Тормозитіс! (Горзӧ поездланьӧ.) Хеллоу! Мый сэн линия вылас вӧчсьӧ?

ГӦЛӦС. Забастовка заводитісны!

КЛАЙД (Мэрилы). Кыланныд? Забастовка! Мый ме тіянлы висьталі? Ми налы петкӧдлам асьнымӧс! (Стоунлы.) Тэ кылан, из юр? Не найӧ, а ми олӧмыслӧн кӧзяеваыс! Америкалӧн кӧзяеваыс — ми (Мэрилы.) Висьтала тіянлы: ми кутам овны!