ГАЗЕТӦ ГИЖЫСЬЯСЛЫ

Ӧні миян «Югыд Туй» газетӧ гижысьяс эмӧсь быд сиктын. Налы миян ыстӧма эскӧданпасъяс. Воддза серти ӧні гижысьяс унджыкӧн нин дай тшӧкыдджыка гижӧны. Тӧдӧны, мый йылысь колӧ гижны. Сӧмын сійӧ гижӧдыс абу на тырмымӧн газет лэдзанінлы.

Гашкӧ, гижысьяс омӧльджыка уджавлісны гижӧд ыстӧм вылас, пошта пыр колӧ вӧлі мынтыны сьӧм да. Ӧні редакция сёрни серти Сыктывдінкарса пошта удж нуӧданін ыстіс быд сиктса пошта юкӧдӧ юӧр, тшӧктіс налы газетӧ гижысьяссянь редакция ним вылӧ письмӧяссӧ босьтны донтӧг. Сідзкӧ тайӧ боксянь газетӧ гижысьяслы кокньыдджык, гижӧд мӧдӧдӧмысь оз ков мынтысьны, позьӧ унджыкысь гижны.

Сэсся сиктса гижысьяс гижӧны мый йылысь кӧ сёрӧн, дыр мысти вӧлӧм бӧрас. Сідз, вӧлі Октябр праздник лун колльӧдӧм. Мукӧд сиктса гижысьяс гижӧны сійӧ лун празднуйтӧмсӧ вежон мысти вӧлисти, либӧ вежонӧн-джынйӧн кольӧм бӧрти. Кутшӧмкӧ тор, шуам, вӧлі августын, гижӧны сентябрын. Поштаӧн кымынкӧ лун, ыліджык сиктъясысь вежонъясӧн локтӧ. Сэтшӧм юӧръясыд ёна сёрмӧны, абу нин сэтшӧм коланаӧсь, дай редакциялы газетӧ лэдзӧм пыдди лоӧ пошта кудйын пасйыны. Сідзкӧ, колӧ мый йылысь гижанныд гижны вӧлӧм бӧртиыс пырысьтӧм-пыр.

Комиӧн роч дорысь омӧльджыка на гижӧны газетӧ. Ӧти-кӧ — этша. Дерт, войдӧр серти ӧні уна, вель уна нин коми гижӧд локтӧ. Сӧмын газетлы оз на тырмы. Мӧд-кӧ, комиӧн гижӧны оз дзик комиӧн, а роч ног, роч слогӧн. Газетӧ гижысь комиӧн сёрнитӧ зэв лӧсьыда, мыйӧн заводитчас гижны — артмӧ роч ног. Сійӧ медъёнасӧ со мый вӧсна: гижигӧн коми морт мӧвпалӧ роч ногӧн, роч кывъяссӧ вуджӧдӧ комиӧ да сідзи и гижӧ. Сы вӧсна коми гижӧд лоӧ роч оборота. Колӧ комиӧн гижысьлы гижӧмсӧ мӧвпавны комиӧн. Сэсся комиӧн гижны позьӧ велавны коми нига, газет лыддьӧмӧн. Зэв бур велӧдчӧм боксянь, коми гижысь кӧ ассьыс ыстӧм гижӧдсӧ лыддяс зіля (внимательно) редакцияын лӧсьӧдӧм мысти газетысь.

Тайӧ тӧлысь миян Коми муын кутасны мунны: МОПР вежон, крестьяна конференцияяс велӧдчӧм йылысь кык вежон чӧж, кооператив ёнмӧдан тӧлысь. Быд сиктса гижысьлы лоӧ тайӧ удж мунӧм йылысь гижны. Сы кындзи, ещӧ на гижанторйыд сюрӧ. Кад нин тшӧтш гижны, ёна-ӧ гижысьяс вермисны «Югыд туй» вылӧ крестьянаӧс гижсьӧдны.

Ноко, газетӧ гижысьяс! Коді медӧдйӧ, медрегыд да медбура гижас та йылысь газетӧ?