СУВТӦДӦЙ КОК ЙЫЛӦ МӦДА-МӦДЛЫ ОТСАСЯН КОМИТЕТЪЯСӦС

Ӧні быд крестьянин зільӧ ассьыс овмӧс кыпӧдны. Сӧвет власьт судзсьытӧм крестьяналы отсалӧ быд ногӧн: удждӧ сьӧм, кокньӧдӧ налог мынтӧмысь. Сӧмын Сӧвет власьт оз на вермы ӧні сетны сы мында сьӧм, мыйта колӧ став крестьяналы овмӧс лэптыны, му-видз уджалӧм бурмӧдны. Кыдзи эськӧ медрегыд, медкокниа, кутшӧм ногӧн крестьяналы позьӧ корсьны отсӧг? Сӧмын аслыныс мӧда-мӧдлы отсасян комитетъяс лӧсьӧдны. Ӧні Коми муын быд сиктын эм сэтшӧм комитетъяс. Сӧмын сылӧн уджыс оз на кыдзи колӧ мун, сійӧ омӧля на вермӧ уджсӧ ассьыс нуӧдны. Коми крестьянин дыша пырӧ мӧда-мӧдлы отсасян комитетӧ, омӧля на сы вылӧ видзӧдӧ, зэв сьӧкыда пуктӧ сэтчӧ сьӧм. Медся ёна сы вӧсна и комитетъяс уналаын муртса ловъяӧсь, муртса тӧдчыштӧны. Сэсся уна коми морт видзӧдӧ комитетлысь сьӧмсӧ босьтны, ассьыс сэтчӧ ӧти грӧш не сетны, быттьӧ мӧда-мӧдлы отсасян комитетлӧн сьӧмыс кыськӧ ачыс чужӧ.

Крестьяна мӧда-мӧдлы отсасян комитет эськӧ омӧльджык овмӧса йӧзлы ёна буртор, ёна колантор. Сійӧ отсалӧ гӧль крестьянинъяслы, кӧсйӧны кӧ найӧ ӧтувтчӧмӧн видз-му уджавны, ньӧбалӧ обществолы му-видз уджалан кӧлуй, отсалӧ сьӧмӧн пикӧ воӧм йӧзлы (сетӧ сьӧмсӧ уджӧн либӧ дзикӧдз), сы пыр босьтӧны уджалӧмӧн либӧ сьӧмӧн отсӧг гӧрдармеечьяслӧн семьяныс, инвалидъяс, мукӧд гӧля олысь семьяяс.

Сэсся мӧда-мӧдлы отсасян комитетъяс пыр гӧль крестьяна кокниджыка вермасны удждыны сьӧм ассьыныс овмӧс кыпӧдӧм вылӧ государстволысь. Комитетъяс дорйӧны гӧля да шӧркоддьӧма крестьянинӧс кулакъясысь, оз лэдзны донтӧм донысь кулакъясӧс кӧртмавны гӧль крестьянинлысь му-видз. Комитетъяс лӧсьӧдалӧны магазея-амбаръяс, отсалӧны школаяслы, лыддьысян керкаяслы, с. в.

Кымын уна морт пырӧма мӧда-мӧдлы отсасян комитетӧ, сымын сійӧ ёнджык да озырджык, сымын сійӧ бурджыка вермас паськӧдны ассьыс крестьяналы отсасян уджсӧ.

Исполкомъяслӧн мог — чорыда кутчысьны крестьяна мӧда‐мӧдлы отсасян комитетъясӧс ёнмӧдан бердӧ, тшӧктыны пырны сэтчӧ унджык йӧзӧс.

Став крестьяналы колӧ пырны мӧда-мӧдлы отсасян комитетӧ.