МИЯНСЯНЬ ВОЧАКЫВ АНГЛИЯЛЫ

Раковскӧй ёрт (сӧвет власьтлӧн посол Англияын) ноябр 28-ӧд лунӧ сетӧма Англияса правительстволы кык заявленньӧ (шусьӧ нота).

Ӧтикас шуӧма: «Сӧветса правительство ёна жалитӧ, мый ӧнія Англияса правительство торкис (орӧдіс) важ правительствокӧд (Макдональд дырйи) лӧсьӧдчӧм Англияа-Россияа костын. Сӧветса правительство тайӧ лӧсьӧдчӧм вӧсна вӧчис мый вермис, ыджыд уступкаяс вылӧ муніс. Выль Англияса правительство кӧ ӧні став вӧчӧм уджсӧ нинӧмӧ воштіс, сыысь мыжыс ставнас усяс ас вылас».

Мӧд заявленньӧас гижӧма: «Сӧветса правительство бара тшӧктіс менӧ висьтавны Англияса правительстволы пальшивӧй письмӧ йылысь, кодӧс быттьӧкӧ вӧлі ыстӧма Зиновьев Англияса коммунист партиялы. Ме Макдональдлы первойсяньыс шулі: мися, письмӧыс абу Зиновьевсянь, сійӧ, мися, пальшивӧй. Сы бӧрын сэсся Мӧскуаын зэв бура тӧдмалім-прӧверитім. Сэки аддзим: письмӧыс абу вӧлӧма, ставыс письмӧ йывсьыс вӧлӧма подлог. Сӧветса правительство сы бӧрын шуліс Англияса правительстволы та йылысь делӧсӧ разберитны третейскӧй судын. Бура дыр мысти Англияса правительство гижис миянлы воча: делӧсӧ пӧ Зиновьев письмӧ йылысь огӧ сетӧ третейскӧй судӧ, разберитас пӧ правительствосянь лӧсьӧдӧм комиссия. Тайӧ комиссияыс лючки видлаліс делӧсӧ да шуис: некутшӧм письмӧ пӧ Зиновьевлӧн абу, некод пӧ сійӧс эз аддзыв. Сы бӧрын миян правительство думайтліс: сэсся пӧ Англияса правительство дугдас нин прӧста мыжалӧмысь Сӧветса правительствоӧс Зиновьев письмӧ понда.

Неважӧн Мӧскуаын вӧліны Англияса профсоюзсянь делегатъяс. Найӧ лючки тӧдмалӧм бӧрын ӧти кывйӧн ставныс шуисны: «Письмӧ лӧжнӧй, став подлогсӧ письмӧ йывсьыс вӧчисны англияса озыр йӧз, мед выльысь депутатъясӧс бӧрйигӧн Палатаӧ (Государственнӧй Думаӧ) эз веськавны сэтчӧ унджык рабочӧйяс пӧвстысь да мед рабочӧй правительствосӧ Англияысь шыбитны».

Ӧні Сӧветса правительство ёна шензьӧ: выль Англияса правительство бара пондіс мыждыны сійӧс Зиновьев письмӧ понда. Нинӧмӧ кутчысьтӧг, доказательствотӧг, мыж босьтны ас вылас Сӧвет власьт оз вермы, оз босьт.

Татшӧм пальшивӧй документъяс серти войдӧр ёна жӧ мыждавлісны Сӧветса правительствоӧс, сӧмын пыр на бӧрвылас сійӧ вӧлі мыжтӧм, бура видлалӧм бӧрын пыр аддзывлісны подлогъяс.

Сӧветса правительство зэв бура тӧдӧ: быд государствоын, гырысьджык каръясын, эмӧсь организацияяс, кодъяс сы вылын и олӧны — вӧчалӧны пальшивӧй документъяс Сӧвет власьт йылысь, мед эськӧ кыдзкӧ-мыйкӧ торкны миянӧс мукӧд государствояскӧд лӧсьӧдчӧмысь. Англияын сэтшӧм организацияясыд эм жӧ тырыс: найӧ сідз жӧ вӧчалӧны да разӧдалӧны лӧжнӧй документъяс Сӧветса Республика вылӧ.

Менам правительство надейтчӧ: водзӧ вылӧ Англияса правительство кутас видзчысьӧмӧн мыждыны миянӧс, быдтор бура гӧгӧр видлалӧмӧн, ӧтарӧ и мӧдарӧ пуктылӧмӧн.

Ӧні ещӧ шуа: выль Англияса правительство кӧ пыдди оз кӧсйы пуктыны важ правительствоса комиссиялысь шуӧмсӧ Зиновьев письмӧ йылысь — Сӧветса правительство тшӧктӧ делӧсӧ сетны третейскӧй судӧ.

Англияса правительство ачыс зэв бура гӧгӧрвоӧ: третейскӧй судысь бӧрыньтчӧмсӧ ставмувывса йӧзыс кутасны лыддьыны, мый ӧнія Англияса правительство нинӧмӧн оз вермы мыждыны миянӧс Зиновьев письмӧ понда, мый ставсӧ вӧлі вӧчӧма подлогӧн Палатаӧ депутатъясӧс бӧрйӧм кузя».