МОПР ВЕЖОН
Отсалам 46 мортлы!
Во сизим сайын ми вӧлім ставным озыръяс кипод улын, быд ногӧн найӧ миянӧс нартитлісны, ӧтдортлісны. Коді кутчысьліс туйдыны уджалысь йӧзлы бурджык олӧмӧ зільны, вермасьліс озыръяскӧд, лёк оласногыскӧд — сэтшӧмъяссӧ сюявлісны тюрмаясӧ, мӧдӧдлісны катаргаӧ, джагӧдавлісны да лыйлісны.
Уна вир киссьӧма, уна морт лов пуктӧма миян революция вӧсна, Октябрса революцияӧдз!
Мукӧд государствоясын, став му пасьтала, ӧні сідз жӧ мунӧ вермасьӧм уджалысь йӧзлӧн озыръяскӧд. Озыръяс кыдз-мый вермӧны пӧдтӧны найӧс: лыйлӧны, ӧшӧдӧны, тюрмаясын сісьтӧны. Сё сюрс морт — медсьӧлӧмсянь гӧль йӧз вӧсна тӧждысьысьяс — коллялӧны олӧмнысӧ тюрмаясын. Кытысь он босьт — Германияысь, Францияысь, Польшаысь, Болгарияысь, Италияысь — быдлаын ӧткодь, быдлаын ымзӧны озыръяс кабыр улын уджалысь йӧз, революция вӧсна вермасьысьяс. Челядьыс, гӧтыръясныс, чой-вокыс, бать-мамныс налӧн бӧрдӧны, шогсьӧны, тшыгъялӧны, кынмӧны. Отсасьысьясныс налӧн пыдынӧсь: кодыс важӧн нин муын куйлӧ, кодыс — тюрмаын. Буржуйяслӧн томанъяс крепыдӧсь, дыр на лоӧ жуглыны, мед тюрма ӧдзӧсъясыс воссясны.
Медым регыдджык вермасны революционеръяс мездысьны озыр кипод улысь, медым налӧн тюрмаас пукалігӧн эз усь сьӧлӧмныс — колӧ налы отсавны.
Медым семьяясыс налӧн эз тшыгъявны, эз кынмыны, медым этшаджык налӧн синваыс киссис, медым кӧть неуна налысь курыд шогсӧ ӧлӧдны — колӧ налы отсавны.
Отсӧг колӧ быд лун, быд здук.
Коді отсалас?
Отсалӧны ставмувывса уджалысь йӧз. Медъёна колӧ отсавны миянлы — Сӧветса Республикаын олысьяслы.
Мыйла миянлы колӧ ёнджыка отсавны? Ми — вӧльнӧйӧсь, миянӧс оз тюрмаясын сісьтыны озыръяс, миян вылӧ видзӧдӧны став гӧль нартитӧма йӧзыс. Миян Республика — ӧтик государство став му вылас, коді вермӧ некодысь повтӧг тӧждысьны революционеръяс понда. Миян Республика гӧгӧр ставыс на озыр государствояс, пыр видзӧдӧны найӧ миян вылӧ уськӧдчыны войнаӧн. Сӧмын войнанас локтӧмсьыс видзӧны сэтчӧс рабочӧйяс, сэтчӧс революционеръяс, кодъясӧс куталӧны буржуйяс, лыйлӧны, тюрмаясӧ йӧртӧны. Став уджалысь йӧзыс — миян бур ёртъяс, бур вокъяс. Со мыйла колӧ миянлы медъёна налы отсавны.
Кыдзи нӧ отсавны налы?
Отсасьӧм мунӧ МОПР пыр. МОПР лоӧ «Ставмувывса организация отсасьны революционеръяслы». Татшӧм организацияясыс эмӧсь быдлаын, эм Сӧветса Республикаын, эм и миян Коми обласьтын.
Тӧрытсянь самӧй воссис революционеръяслы отсасян вежон (
Тайӧ вежон чӧжыс колӧ быд коми мортлы, мыйӧн вермас, отсавны налы. Колӧ гижсявны МОПР-ӧ.
Сэсся быд губерня босьтӧ ас отсӧг вылӧ быдса тюрмаясӧн, кӧні пукалӧны революционеръяс. Бур йӧз важӧн нин тадзи вӧчӧны.
Ми Коми обласьтувса МОПР организация улӧ босьтім жӧ ӧтик тюрма — Лембергскӧй тюрма (Польшаын). Сэні пукалӧ 46 революционер.
Коми войтыр! Быдса Обласьтӧн ӧд вермам жӧ кӧть ичӧтика налысь сьӧкыд олӧмнысӧ кокньӧдыштны! Босьтчыламӧй налы отсавны ӧтвылысь ставным!
Мед регыдджык лоас ставмувывса революция!
