ПӦСЬ СЫНӦД
ВОРСЫСЬЯС:
Савин — трестса представитель.
Гудков — главнӧй инженер.
Красов — леспромхозса директор.
Елена Андреевна — Красовлӧн гӧтыр.
Кочев — знатнӧй тракторист.
Валя — том ныв.
Дымов — тепловоз вылын уджалысь.
Сокерин — парторг.
Курыдкашин — поточнӧй линияса мастер.
Сямтомов — лебёдка вылын уджалысь.
Нина — электростанция вылын уджалысь, том ныв.
Липин — лесоучастокӧн веськӧдлысь.
Зорина — лесоучастокса главнӧй механик.
Груня — ОРС-са лавкаын уджалысь.
ПЕРВОЙ ДЕЙСТВИЕ
ПЕРВОЙ КАРТИНА
Леспромхозса директор квартиралӧн кык вежӧс: шуйгавылас столовӧй, кысянь веськыда ӧдзӧс коридорӧ, шуйгавыв — кухняӧ, а веськыдвыв — кабинетӧ; веськыдвыв вежӧсас — директорлӧн гортса кабинет, кысянь веськыда ӧдзӧс — спальняӧ. Кабинет стенын Сталинлӧн ыджыд портрет, стен пӧлӧн книжнӧй шкап, этажерка, кушетка, ӧшиньясын шторы, занавесъяс. Письменнӧй пызан дорын ыджыд чертёж вылын уджалӧны Красов да Гудков. Столовӧйын ыджыд пызан сайын Валя артасьӧ счёты вылын, кабинетӧ пыран ӧдзӧслы мышкӧн пуксьӧмӧн. Кыкнан вежӧсын сотчӧны электролампаяс. Кабинетын стеннӧй часы петкӧдлӧ час. Кушетка вылысь чеччӧ Савин да киас график кутігтыр матыстчӧ пызан дорӧ.
САВИН. График кузя шуны нинӧм, чертитӧма мичаа. (Пуктӧ пызан вылӧ.)
ГУДКОВ. Абу ӧд мичлунын делӧыс, Александр Иванович. Ті висьталӧй, правильнӧ али абу составитӧма сійӧс?
САВИН. Гашкӧ и, правильнӧ, но абу реальнӧй. Действиеӧ пыртны тайӧс оз позь.
КРАСОВ. Мыйла?
САВИН. Сы вӧсна, мый вӧр кыскалан кӧрттуй ньӧтчыд оз вермы уджавны график серти. Тайӧ тіянлы абу обычнӧй кӧрттуй. Тані ті быд воськолын паныдасяд препятствиекӧд: колея тіян ӧти, разъездъяс да запаснӧй туйяс этша, вагонеткаяслӧн лыд абу тырмымӧн, мастерскӧйяс да депояс абуӧсь, паровоз кӧ жугалӧ — запчастьясла ковмас мунны трестӧ. Ӧти кывйӧн кӧ шуны, тіян мича графикныд кутас торксьыны быд лун. И ме, кыдзи трестсянь представитель, ответственнӧя висьтала: весьшӧрӧ ноксьӧм тайӧ тіян. Тайӧ мича чертёжнас ті сӧмын кӧсъяд сайӧдны план тыртӧм кузя ассьыныд омӧль уджныдтӧ.
ГУДКОВ. Ті правӧсь, Александр Иванович, мый план миян омӧля тырӧ и мый график кутас торксявны, медся нин первой кадас. Но график составитӧма правильнӧя, таысь ме юрнам ручайтча. Вӧр кыскалан кӧрттуйлӧн график вермас лоны сӧмын татшӧмӧн: конкретнӧйӧн, индивидуальнӧйӧн. И ме ньӧти ог жалит, мый тайӧс составитӧм вылӧ ми Михаил Семёновичкӧд воштім кык сутки. Теоретически график составитӧма правильнӧя. Кыдзи ми кужам пыртны практикаӧ — олӧмыс петкӧдлас.
САВИН. Вообще кӧ сёрнитны, дерт, график составитӧма, позьӧ шуны, идеальнӧя, безукоризненнӧя, приспособитӧма буретш вӧр кыскалан узкоколейнӧй кӧрттуйлы. Сы вылӧ ті и инженеръяс кыкнанныд, медым туяна график лӧсьӧдны.
КРАСОВ. Графиклысь правильностьсӧ колӧ видлыны практика вылын. И аски жӧ ми сійӧс пыртам, кӧрттуй кутас уджавны тайӧ график серти.
САВИН. Аски? А ті гӧгӧрвоад, ті думыштлід, мыйӧ вайӧдас татшӧм график серти уджалӧмыс?
КРАСОВ. Да, ми думайтлім, гӧгӧрбок артыштім.
САВИН. Нинӧм ті абу артыштӧмныд и онӧ на гӧгӧрвоӧй, мыйӧ ставыс тайӧ вайӧдас. А ме ногӧн, тайӧ график серти кӧ заводитад уджавны, ковмас быть вежны вӧр лэдзан удж организуйтӧмлысь став методъяссӧ. Сэк лоас бырӧдны миянлысь сквознӧй бригадаяс, кодъясӧс лӧсьӧдӧм вылӧ пуктӧма сы мында труд да воштӧма сы мында кад. Ковмас вежны удждон мынтан система. Ӧти кывйӧн кӧ шуны, ставсӧ, мый вӧлі лӧсьӧдӧма уна вояс чӧжӧн — лоӧ жугӧдӧма, шыбитӧма бокӧ. Тайӧс ті асьныд на онӧй гӧгӧрвоӧй.
КРАСОВ. Весьшӧрӧ тадзи думайтад, Александр Иванович. Графикыд удж методъястӧ оз жуглы. Сійӧ эм уджалан методъяс вежӧмлӧн результат. Райкомса секретарь Сокерин ёрткӧд ми пыдісянь да серьёзнӧя обсудитім вӧрын уджалан способъяс вужвыйӧныс вежны колӧм йылысь вопрос. Важ уджалан методъяс чегъявны да пыртны выль методъяс быть тшӧктӧ вӧр промышленность механизируйтӧм, вӧр промышленностьӧс техникаӧн оснаститӧм. А выль ног уджалӧмын главнӧй места должен босьтны кӧрттуй. Та вӧсна ми первойӧн и босьтчим лӧсьӧдны график.
САВИН. Гашкӧ, тіян знаниеяс и унджык мелӧн дорысь, ті инженеръяс, а ме ставсӧ куим во велӧдчывлі. Но вӧрын уджаланногъяс йылысь ті менӧ эн велӧдӧй, сы кузя ме, кыдз шуасны, не ӧти понйӧс нин сёйи.
ГУДКОВ. А вӧрын уджалан методъясыд, Савин ёрт, збыльысь нин важмисны, найӧс колӧ вужвыйӧныс вежны, найӧ ӧні тормозитӧны вӧр промышленностьлысь развитиесӧ. Дерт, перестройкаыс вермас вель дыр кад мунны, и сэки, гашкӧ, вӧр заготовитӧмыс да кыскӧмыс надзмылас на.
САВИН. Мый? Ті ещӧ и темпъяс чинтыны кӧсъяд? Ті тайӧс шуткаӧн, али збыльысь?
КРАСОВ. Серьёзнӧйтор шуткаӧн оз вӧчлывны.
САВИН. А кӧні тіян серьёзнӧй уджныд? Квартал помасьӧ, а тіян леспромхоз тыртіс квартальнӧй планлысь сӧмын на джынсӧ! А леспромхозса главнӧй инженерлы кӧ эскыны, темпъясныд ещӧ на чинасны. А ті, леспромхозса уважаемӧй директор Красов ёрт, тӧданныд, мый локтан квартал вылӧ тіян леспромхозлы плансӧ лоӧ содтӧма пӧшти кык пӧв?! План тыртӧмысь государство водзын кывкутӧмсӧ ті гӧгӧрвоад?
КРАСОВ. Гӧгӧрвоа, трестса представитель ёрт.
САВИН. Гӧгӧрвоад? А мыйла нӧ эськӧ вӧр лэдзан сезон шӧрын кӧсъян ноксьыны быд сикас экспериментъясӧн?
КРАСОВ. Сы вӧсна, Савин ёрт, и кӧсъям перестроитны вӧрын уджалан методъяссӧ, медым водзӧ вылӧ тыртны планъяс, сетны страналы ӧнія дорысь куим-нёль мында унджык вӧр. А ӧнія важмӧм методъясӧн уджалӧмӧн ми ньӧтчыд ог тыртӧй татшӧм посньыдик планъяс. Гӧгӧрвоӧй ті асьныд. Миянлысь леспромхоз тырвыйӧ механизируйтӧма. Партия да правительство миянлы сетісны трелёвочнӧй тракторъяс, электростанцияяс, электропилаяс, электролебёдкаяс, паровозъяс. Став заготовка и вывозка миян механизируйтӧма...
САВИН. Ме тайӧс тіян висьтавтӧг тӧда.
КРАСОВ. Колӧ вӧлі чайтны, мый та мында техника вӧр промышленностьӧ пыртӧмӧн удж производительность кыптас ӧти рабочӧй вылӧ этша пыдди нёль-вит пӧв киӧн уджалӧм серти. А миян мый? Кык пӧв улынджык! Босьтӧй со Тыдор лесоучасток, кӧні заготовкасӧ нуӧдӧны киӧн, а вывозкасӧ вӧвъясӧн. Сэні удж производительность шӧркодя ӧти рабочӧй вылӧ усьӧ вит кубометр, а миян — кык кубометрысь этша.
САВИН. А коді тіянӧс кутӧ, лэптӧй удж производительностьсӧ! Чорзьӧдӧй дисциплина! Оседлайтӧй техника!
КРАСОВ. Правильнӧ, колӧ и дисциплина ёнмӧдны и техникаӧн овладейтны. Но удж организуйтан системаыс кӧ порочнӧй, сійӧс колӧ кӧть мый, а вежны. Производстволӧн механизированнӧй способ требуйтӧ удж организуйтӧмын выль методъяс. И збыль ӧд: ми пӧлучитім медся выль техника, а удж организуйтӧмын системаыс коли важыс, коді вӧлі киӧн уджалігӧн.
САВИН. А мый ті вӧзъяд? Кутшӧм выль метод?
КРАСОВ. Кутшӧмӧсь лоӧны тайӧ выль методъясыс конкретнӧ, ӧні сьӧкыд на шуны. Но ме чорыда эска, мый вӧрсянь транзитнӧй складӧдз древесина должен мунны оръявлытӧм потокӧн. И тайӧ потокас главнӧй места босьтас миян узкоколейнӧй кӧрттуй, кодлы колӧ подчинитны леспромхозлысь став звенояс да участокъяс. Таӧ ме эска, и тайӧс ме шедӧда, мый кӧть эз ло.
САВИН. Лӧсьыд тай: весиг он на тӧд, кыдзи да мый лоӧ, а эскан нин! Тайӧ челядь сёрни, Красов ёрт!
КРАСОВ. Абу, Савин ёрт. Сквознӧй бригада методӧн уджалігӧн некод абу йитчӧма ӧта-мӧдыскӧд, некод оз ӧтвечайт общӧй удж вӧсна. А колӧ сідз организуйтны уджсӧ, мед ставӧн кывкутісны кубометр вӧсна, ставӧн вӧліны заинтересованӧсь улыс складӧ вӧр кыскӧмын, и медводз трелюйтӧмын да кӧрттуй уджын. Ми тайӧс прӧверитім ӧти поточнӧй линия организуйтӧм вылын.
САВИН. Потокъяс... линияяс... А ме тіянлы категорическӧя запрещайта ноксьыны быд сикас выдумкаясӧн да требуйта выполняйтны план! Выльторъяслы ме абу прӧтив, но план орӧдны ог лэдз! Трест нимсянь запрещайта пыртны ассьыныд график! Ті менӧ гӧгӧрвоид? А медым наверстайтны квартальнӧй план тыртӧмын кольччӧмсӧ, сетам содтӧд вӧвъяс да ыстам ещӧ сезонникъясӧс.
КРАСОВ. Оз, вӧвъяс меным, Савин ёрт, оз ковны, босьтӧй менсьым ӧстатки вӧвъясӧс да мӧдӧдӧй сэтшӧм леспромхозлы, кӧні абу на тырмидз машинаясыс. А меным сетӧма тырмымӧн техника. И сезонникъяс меным оз ковны. Кутшӧм нӧ ме лоа директор, менсьым планӧс кӧ кутасны тыртны став мирӧн!
САВИН. Красов ёрт, ме вои выводӧ, мый тэ умышленнӧя кӧсъян срывайтны квартальнӧй план тыртӧм. Тэкӧд сёрнитны кӧть этійӧ стеныскӧд — дзик ӧткодь — пӧльза абу! Став йывсьыс ме ӧні жӧ доложита трестӧ, и тіянлы звӧнитласны сэсянь. Гӧгӧрвоид? Включитӧй телефонтӧ, да пока исполняйтӧй ассьыныд обязанностьястӧ, директор ёрт да главнӧй механик ёрт.
Савин ӧдйӧ петӧ, столовӧйысь босьтӧ пальтосӧ да мунігас нин пасьтасьӧ.
КРАСОВ. А ме кӧть мый, а нуӧда, мый ми кӧсъям, удж перестроита. Мед кӧть бӧрас судитасны, а поточнӧй метод пырта производствоӧ. Тайӧ случайын пӧльзуйтча директор праваясӧн тырвыйӧ! (Восьтӧ столовӧйӧ ӧдзӧс да висьталӧ Валялы.) Савинӧс сэсся татчӧ эн лэдз, сӧмын мешайтӧ. И некодӧс эн лэдз, миян регыд эштас.
Спальняысь пырӧ халатӧ пасьтасьӧм Елена Андреевна.
ЕЛЕНА АНДРЕЕВНА. Миша, кад нин шойччыны. Тэ ӧд куим сутки нин узьтӧм! Весиг прамӧя он сёйлы!
КРАСОВ. Регыд, Леночка, миян этша нин коли. Ещӧ час-мӧд, и ставыс.
ЕЛЕНА АНДРЕЕВНА. Григорий Осипович, ті кӧть сылы висьталӧй. Кок йывсьыс ӧд усьӧ! Мед кӧть ӧти час шойччыштӧ! Кадыс ӧд со регыд вит час асыв лоӧ, коймӧд асыв нин, а ті эн на водлӧй.
ГУДКОВ. Да делӧыс, Елена Андреевна, сэтшӧм, безотлагательнӧй... и зэв интереснӧй... колана.
КРАСОВ. Выль техникалы лӧсялана научнӧй методъяс вӧр уджын разработайттӧг миянлы водзӧ кольччыны оз позь, Лена. Вӧрас ӧд машинаяс эз куйлыны, эз сімны вайны, а кыдз позьӧ унджык вӧр заготовляйтны.
ЕЛЕНА АНДРЕЕВНА. Но, мый сэсся мем тіянкӧд вӧчны?
КРАСОВ. А тэ, Леночка, узь. Тэд аски лунтыр колӧ челядькӧд занимайтчыны. А найӧ йӧзыд беспокойнӧйӧсь. Ми регыд помалам. Сӧмын вот Савин неуна торкыштіс, а то эськӧ эштіс нин.
ЕЛЕНА АНДРЕЕВНА (безнадёжнӧя.). Гашкӧ, тіянлы кӧть чай стӧканӧн вайны?..
ГУДКОВ. Вот тайӧ правильнӧ, Елена Андреевна. Чайысь ог ӧткажитчӧй. Сӧмын сукджыка. Сійӧ отсалӧ. А войвывса морт радейтӧ сук чайтӧ.
КРАСОВ. Збыль, Леночка, вай миянлы морт ӧти стӧканӧн сук чай.
ЕЛЕНА АНДРЕЕВНА. Ок и тшынӧдӧмныд ті тані. (Восьтӧ форточка, восьтывлӧ столовӧйӧ ӧдзӧс, казялӧ Валяӧс да бергӧдчывлӧ.) Ті кӧть мед Валясӧ лэдзид гортас, кык сутки нин ӧд тані дежуритӧ.
ГУДКОВ. Некодӧн вежныс. А сійӧ кӧ мунас, миянлы уджавны оз сетны.
Елена Андреевна петӧ кухняӧ.
И мый вылӧ трестыс ысталӧ татшӧм представительяссӧ? Отсӧг пыдди...
КРАСОВ. Сійӧ добросовестнӧя исполняйтӧ ассьыс обязанностьяс. Сійӧ кӧсйӧ штурмӧн тыртны леспромхозлысь план, но аслас нырысь водзӧ нинӧм оз аддзы. Пиньнас и гыжнас сійӧ кутчысьӧ важас и выльлы оз эскы, весиг кывзыны оз кӧсйы выль йывсьыс.
ГУДКОВ. А трестлы юӧртны сылӧн вежӧрыс, пӧжалуй, тырмас. Вай включитам телефонтӧ. Бокӧвӧй ӧні некод нин звӧнитны оз кут.
Гудков включайтӧ телефон. Елена Андреевна пыртӧ чай да петӧ спальняӧ. Красов да Гудков горша юӧны чай.
КРАСОВ. Прӧста включитін. Ӧні сэн ставыс узьӧны.
ГУДКОВ. Гашкӧ, уджтӧ перестроитны миянлы збыльысь оз разрешитны да? Сезон шӧр ӧд! План тыртны колӧ. А миян уджным надзмис.
КРАСОВ. Георгий Осипович, ме нин шуи, мися, кӧть мый ло, а выль метод ме пырта. Теоретически тайӧ методыс сетӧ позянлун некымын пӧв содтыны удж производительность. Кыдз нӧ позьӧ таысь ӧткажитчыны?! Ми ӧд сӧветскӧй йӧз, коммунистъяс! Давай водзӧ. Вот кыдзи сетны порожняк да петкӧдны грузитӧм вагонеткаяс этійӧ веткаяссьыс? Графикӧ некыдз оз пыр, расстояниеыс разнӧй.
Кыкнанныс думайтӧны, ас костаныс сёрнитӧны. Пырӧ Кочев.
КОЧЕВ. Бур рыт, Валя. Директор гортас?
ВАЛЯ. Бур асыв, Кочев ёрт. Директор абу.
КОЧЕВ. Кыдзи абу, кабинет ӧшиняс би тыдалӧ да?
ВАЛЯ. Ме висьталі: абу, мися.
КОЧЕВ. Кыдзи абу, кор меным сійӧ вывті ёна колӧ.
ВАЛЯ. Мыйла?
КОЧЕВ. Тэ гӧгӧрвоан, Валя, миян маслӧ бырӧма, тракторъяс заправитны нинӧмӧн. Мастер дінӧ шыасьлі — абу пӧ, шуӧ. Пал Палыч дінӧ муні, а сійӧ нин витӧд лун гортас абу вӧлӧма, кыйсьӧ пӧ. Завгорючӧй узьӧ, оз чеччы. Лэдзлы менӧ директор дінӧ.
ВАЛЯ. А мый вылӧ тэныд директорыс? Мун завгорючӧй дінӧ да висьтав, мый директор прикажитіс сетны...
КОЧЕВ. Но сійӧ ӧд эз на прикажит?
ВАЛЯ. Ме кӧ шуи, значит, прикажитіс. Сійӧ меным ӧнтай водзвыв тшӧктіс.
КОЧЕВ. Аттьӧ, Валя, выручитін. Сідзкӧ, аски кутам уджавны. А то ачыд ӧд тӧдан, кызь километр поездӧн локті да витӧс — подӧн, и абу лӧсьыд бӧр тыртӧг мунны. Тракторъяс ӧд сувтасны.
ВАЛЯ. Кыдзи нӧ тэ нуан маслӧтӧ?
КОЧЕВ. Медтікӧ пӧлучитныс сюрӧ, а нуа сійӧ жӧ туйӧдыс: первой поездӧн, а сэсся подӧн, мышку вылын.
ВАЛЯ. Зэв ӧд ылын, дай сьӧкыд?
КОЧЕВ. Нинӧм, абу нин первойысь. Нуа. Аддзысьлытӧдз. Аттьӧ! А гашкӧ, запискатор гижыштан?
ВАЛЯ. Тайӧ позьӧ. (Гижӧ да сетӧ.) Сиа быд бурсӧ!
Кочев мунӧ.
КРАСОВ. Улыс складын порожняк формируйтӧм вылӧ ковмас сувтӧдны торъя паровоз. И тайӧ порожняксӧ индӧм срок кежлӧ нуны распределительнӧй станцияса запаснӧй туйяс вылӧ.
ГУДКОВ. Идея правильнӧй. Тадзи и пасъям порожняк сетан графикӧ.
КРАСОВ. А поточнӧй линияын рабочӧй вын расставитӧм ковмас выльысь видлавны.
ГУДКОВ. Ковмас, дерт, и не ӧтчыд на. Опыт петкӧдлас, кыдзи бурджык. Выльтор век опыт вылын прӧверяйтӧны.
КРАСОВ. И лесопунктъяс ковмас перестроитны. Поточнӧй линияяс ковмас ӧтвывтны лесоучастокъясӧ.
Бара ас костаныс сёрнитӧны. Столовӧйӧ ӧдйӧ пырӧ Дымов. Сійӧ рабочӧй паськӧма, сёрнитӧ гораа.
ДЫМОВ. Валечка, тэ тані? А ме нин тэнӧ дзикӧдз вошті! Бур рыт!
ВАЛЯ. Надзӧджык, эн горзы! Бур асыв, Костя. Мый нӧ тэ войнас йӧз квартираясті ветлан?
ДЫМОВ. А тэ мый тані пукалан?
ВАЛЯ. Пӧрядок наводита.
ДЫМОВ. Директор гортас?
ВАЛЯ. Абу.
ДЫМОВ. Абу? А ме сійӧс ӧшинь пырыс аддзылі.
ВАЛЯ. Всё равно абу гортас.
ДЫМОВ (кӧсйӧ матыстчыны ӧдзӧс дорӧ, Валя потшӧ сылы туйсӧ). Эн шутит, Валечка, меным дзик некор, паровоз сулалӧ. Менам сверхсрочнӧй делӧ...
ВАЛЯ. Тэ, Костя, эн гора. Сэтчӧ оз позь.
ДЫМОВ. Кыдзи оз позь, кор леспромхоз сувтіс!
ВАЛЯ. Леспромхоз ньӧтчыд на эз котравлы, век места вылас сулалӧ, эн выдумывайт. Вешйы ӧдзӧс дорсьыс.
ДЫМОВ. Эн дур, Валя. Дзик некор, честное пионерское. Паровозъяс сувтісны.
ВАЛЯ. Тайӧ нин мӧд делӧ. А тэ шуан: леспромхоз сувтіс. (Дымов бара ӧдзӧс дорӧ.) Но сэтчӧ всё равно ог лэдз.
ДЫМОВ. (Зэв гораа.) Ӧвсьы, Валя, эн дур. Менам служба, государственнӧй делӧ. Вешйы туй вылысь...
Красов восьтӧ ӧдзӧс да видзӧдӧ.
КРАСОВ. Мый лои?
ДЫМОВ. Чолӧм, директор ёрт!..
ВАЛЯ. Да со мырдӧн пырӧ тіян дінӧ.
ДЫМОВ. Водокачка оз уджав... Паровозъяс сувтісны... Кымынысь шулім туйса начальниклы: колӧ запаснӧй водокачка! Нинӧм эз вӧч... Войбыдӧн ни ӧти кубометр эз ло кыскӧма. Став дінас котралі, и быдӧн сӧмын синнысӧ тільӧны. Лои татчӧ локны... А тані Валя туй пӧперег...
ГУДКОВ. Со тэныд и график, немвиччысьтӧг орӧ. А татшӧмторъясыд и водзӧ на лоӧны...
КРАСОВ. Да... (Думайтӧ.) Талун кежлӧ ӧти петан туй: петкӧдны йӧзӧс да ведраясӧн тыртны паровозъяслысь тэндэръяс.
ДЫМОВ. Ведраясӧн?! Тадзсӧ нӧ кымын час лоӧ сулавны?
КРАСОВ. Кӧть кымын сэсся. Мӧд ног оз артмы. (Гижӧ.) Со распоряжение — петкӧдны 50 мортӧс. Пырав рабочкомса председатель ордӧ. Мед кыпӧдӧ служащӧйясӧс. А аски мыйкӧ придумайтам.
ДЫМОВ. А мый тан думайтныс, директор ёрт. Делӧыс дзик прӧстӧй. Колӧ электростанцияӧ сувтӧдны ыджыд бак да пуктыны мотор, медым ты вылысь качайтны сэтчӧ ва. Нюжӧдны сэтчӧ сё метра кузя труба. Тадзӧн ва босьтӧм вылӧ кутас мунны сӧмын дас минут. И оз кут кынмыны. Во джын нин та йылысь кеньга.
ГУДКОВ. Дымов правильнӧ висьталӧ. Аски ме тайӧс прӧверита и лӧсьӧдам. Аттьӧ, Дымов ёрт, сӧветсьыд.
КРАСОВ. Сэтчӧ жӧ и пес босьтанін лӧсьӧдам, циркульнӧй пила да механическӧй колун сувтӧдам.
ГУДКОВ. Сизимдас ӧкмысӧд паровозтӧ ремонтируйтӧм йылысь эн на думыштлӧй?
ДЫМОВ. Думыштлім, Гудков ёрт. Костинӧс да Обросовӧс кӧ сетад да мастерскӧйын кӧ детальяс кутасны ӧчередьтӧг растачивайтны — дас лунӧн вӧча.
КРАСОВ. Дас лунӧн?! А ті, Георгий Осипович, шулід, ковмас пӧ кык тӧлысь?!
ГУДКОВ. Нормаяс серти — да. Но ӧні воисны запаснӧй частьяс, кодъясӧс оз нин ков растачивайтны. А Дымов ёрт босьтӧ вӧчны сдельнӧя.
КРАСОВ. Смена бӧрад шойччӧй и сувтӧй ремонт вылӧ, Дымов ёрт. Ремонтысь петӧм бӧрын тайӧ паровозыс кутас маневрируйтны вылыс веткаясын. Сідзкӧ, миянлысь график колӧ лыддьыны гӧтовӧн! Дымов ёрт, организуйтӧй ва. Паровозъяс долженӧсь уджавны.
ДЫМОВ. Котӧрта, Михаил Семёнович.
Дымов Валякӧд прӧщайтчигӧн ӧдйӧ окыштӧ сійӧс паръяс.
ДЫМОВ. Аттьӧ, Валюша! Ух!
ВАЛЯ. Аддзасны... Ме ӧд пост вылын...
Дымов мунӧ. Красов нимкодя шыасьӧ Гудков дінӧ.
КРАСОВ. Но, Георгий Осипович, ыджыд удж ми вӧчим тэкӧд. Ӧні час-мӧд шойччыштам и... мӧдӧдчам выль туйӧд, коді должен вайӧдны вӧр промышленностьӧс ыджыд победаӧ! И тайӧ победаас лоас тшӧтш и миян пай.
Звӧнитӧ телефон.
ГУДКОВ. Оз-ӧ нин трестсяньыд звӧнитны?
КРАСОВ (босьтӧ трубка). Красов кывзӧ. Бур рыт... да, да, бур асыв. Мыйӧн занимайтчам? Выль график лӧсьӧдам, вӧрын уджалан методъяс заводитам перестраивайтны. Мый? Кыдз нӧ сідз прӧста ноксьӧм? Мыйкӧ дыра, гашкӧ, и оз кут тырны планным, но... Абу, тайӧ абу экспериментӧн ворсӧм, а опыт да механизация подув вылын вӧрын уджалан выль, научнӧй методъяс пыртӧм... Да, рытнас заводитам уджавны выль график серти. Ме ог тӧд стӧча, дыр-ӧ кад ковмас выль методъяс вылӧ вуджны, гашкӧ... Мый? Мый? Леспромхозлысь план тыртӧм орӧдӧмысь менӧ вештанныд удж вылысь? Делӧяс сдайтны Савинлы? Алё! Алё! (Кост.) Пуктіс трубкасӧ.
ГУДКОВ. Тайӧ оз вермы лоны!
КРАСОВ. Шуисны, удж вылысь пӧ вештӧма, делӧяс временнӧ сдайтны Савинлы.
ГУДКОВ. Тайӧ недоразумение! Савинлы сдайтны делӧяс?! Пӧгубитны леспромхоз и миянлысь делӧ?..
КРАСОВ. Вай ещӧ видзӧдлам поточнӧй линияын йӧзӧс расставитӧм... А оз кӧ нин удайтчы миянлы выль методсӧ пыртны — гижам министрлы.
Сёрнитӧны ас костын. Пырӧ Сокерин.
СОКЕРИН. Здравствуйте!
ВАЛЯ. Здравствуйте.
СОКЕРИН. Красов гортас?
ВАЛЯ. Абу.
СОКЕРИН. А Дымов меным гусьӧник висьталіс, сійӧ пӧ тані Гудковкӧд.
ВАЛЯ. Абуӧсь.
СОКЕРИН. А биыс мыйла ӧзйӧ кабинетас?
ВАЛЯ. Сідзи.
СОКЕРИН. Час либӧ прӧверитам. (Матыстчӧ ӧдзӧс дорӧ.)
ВАЛЯ (потшӧ ӧдзӧссӧ). Найӧ абуӧсь. Оз позь татчӧ.
СОКЕРИН. Мыйла? Меным срочнӧ колӧ. Ме секретарь райкома...
ВАЛЯ. Ме вӧсна кӧть обкомса секретарь. Красов ёрт весиг Савинӧс эз тшӧкты лэдзны.
СОКЕРИН. Но и нывка! Мый меным тэкӧд вӧчны?
ВАЛЯ. А нинӧм. Мунӧй гортад.
СОКЕРИН (матыстчӧ ӧдзӧс дінӧ). Но, шутитыштін и тырмас. Мем некор. (Валя потшӧ ӧдзӧс.) Э, да ме тэнӧ тӧді, тэ Пал Палычлӧн статистик! Мый нӧ тані вӧчан?
ВАЛЯ. Но и мый? Ме тіянӧс тӧда жӧ. Ті райкомса первой секретарь Сокерин ёрт. Но всё равно ог лэдз пырны, эз тшӧктыны некодӧс. Сэні срочнӧй государственнӧй делӧ решайтӧны...
СОКЕРИН (гораа). Красов ёрт, восьтлы ӧдзӧстӧ...
ВАЛЯ. Эн горзӧй, Сокерин ёрт, тадз ті выль график орӧданныд!
Красов ӧдйӧ локтӧ ӧдзӧс дорӧ да восьтӧ.
КРАСОВ. Иван Петрович, чолӧм!
СОКЕРИН. Чолӧм, Михаил Семёнович. Рытбыд звӧниті — шуӧны, телефон пӧ оз уджав. Гусьӧник висьталісны, гортад пӧ. Локті, а пырны оз лэдзны. Министр дінӧ кокниджык веськавны, директор ёрт.
КРАСОВ (нуртӧма). Вӧвлӧм директор нин, Иван Петрович.
СОКЕРИН. Коді нӧ тіянлы татшӧм титулсӧ сетіс?
КРАСОВ. Муртса ӧні звӧнитлісны трестсянь. Делӧяс сдайтны тшӧктісны трестса представитель Савинлы.
СОКЕРИН. Но, делӧяс терпитласны, вӧрӧ оз пышйыны... Ме рытнас на вои, обкомын вӧлі. Висьталі сэні миян кӧсйӧмъяс йылысь: и график йылысь, и тырвыйӧ механизация подув вылын вӧр лэдзан уджӧ поточнӧй метод пыртӧм йылысь. Сэні ёна заинтересуйтчисны, шуисны, поддержитам пӧ. Тэныд привет первой секретарсянь. Корис быд лун информируйтны. Регыд татчӧ комиссия воас, медым изучитны опыт поточнӧй линиялысь да паськӧдны сійӧс мукӧд леспромхозъясӧ.
КРАСОВ (взволнованнӧя). Аттьӧ, Иван Петрович, татшӧм юӧрсьыд. А ме нин збыльысь повзьылі, мися, оз удайтчыны кӧсйӧмъясным.
СОКЕРИН. Таысь эн шогсьы. Висьталӧй, кыдзи график?
КРАСОВ. График дась, Иван Петрович. (Сетӧ.) Талунсянь кутам уджавны выль график серти.
СОКЕРИН (видлалӧ график). Сідзкӧ, график обеспечивайтӧ суткиын квайтсё кубометр кыскӧм?
КРАСОВ. Ӧні квайтсё, а мӧдысьджык — тысяча. Порожняк кузя со лои мӧд график вӧчны. Быд поточнӧй линиялы торйӧн, татӧг оз артмы.
СОКЕРИН. Гӧгӧрвоана. Ме ногӧн, график правильнӧя составитӧма. Кольӧ сӧмын пыртны сійӧс олӧмӧ. Но тайӧ лоас ёна сьӧкыдджык. Но вывті тэрмасьны ог кутӧй. Обсудитам райком бюро вылын, партийнӧй да комсомольскӧй собраниеяс вылын, рабочӧй собраниеяс вылын. Сэні выль метод кузя унатор содталасны, подскажитасны. Вӧр уджын техника используйтӧмыд — выль делӧ. А выльтор пыртны век сьӧкыд, унаӧн кутасны паныд мунны, важас кутчысьны.
ГУДКОВ. Савин со и матӧ оз сибӧд выль метод йылысь сёрнисӧ.
СОКЕРИН. Савин кодьяс унаӧн сюрасны. Но найӧ оз решайтны. Решайтны кутасны рабочӧйяс. Найӧ и отсаласны внедритны сійӧс. Найӧ сетасны лыдтӧм уна рационализаторскӧй предложениеяс, медым кыпӧдны удж производительность вӧвлытӧм вывнаӧ. Колӧ сӧмын кывзысьны найӧ гӧлӧсӧ.
КРАСОВ. Савин меным вӧзйис квартальнӧй план тыртӧм обеспечитӧм могысь сетны содтӧд вӧвъяс да сезонникъясӧс.
СОКЕРИН. И тэ босьтін?
КРАСОВ. Эг. Ӧткажитчи. Ме весиг ассьым вӧвъясӧс вӧзйи ыстыны мӧдлаӧ. Ме ногӧн, колӧ техника тырвыйӧ используйтны, а не вӧвъяс вылӧ надейтчыны.
СОКЕРИН. Правильнӧ. А сезонникъясысь колӧ дзикӧдз ӧткажитчыны. Сійӧ важ привычка. Важӧн крестьянинлы колӧ вӧлі тӧвнас нянь вылӧ нажӧвитны, и гожся да арся уджъяс эштӧм бӧрын сійӧ вӧлі медасьӧ пӧдрадщикъяслы кер лэдзны донтӧм донысь. А леснӧй фирмаяслы сійӧ и колӧ — донтӧм уджалан вын. А миянлы колӧ вӧр лэдзӧм нуӧдны во гӧгӧр чӧж, и гожӧмнас ёнджыка. Та вылӧ сезонникъясыд оз туйны. Сэсся, машинаясӧн уджалігад, джын кадыс кольӧ найӧс быд во велӧдӧмӧ. Миянлы колӧны постояннӧ уджалысь квалифицированнӧй кадръяс. Либӧ босьтӧй мӧд важ привычка. Важӧн и думыштны оз позь вӧлі войын уджалӧм йылысь. Мыйӧн пемдас, вӧрсьыд и петан туйсӧ он аддзы. А ӧні миян электрическӧй би эм тырмымӧн, войын позьӧ уджавны лунын моз жӧ. Вӧрын удж ӧні позьӧ организуйтны сутки чӧж, медым тырвыйӧ используйтны став механизмъяс.
ГУДКОВ. Торъя нин тракторъяс. Мунан туйсӧ найӧ асьныс югзьӧдӧны, а площадкалы би сетӧ станция.
КРАСОВ. Артмас кӧ тракторъяс кык смена вылӧ вуджӧдӧм, ми кутам сетны тысяча кубометрӧн сутки! Со кӧні миян резервъясным!
Прожектор югдӧдӧ занавес водзвылысь: Красовӧс, Курыдкашинӧс, Дымовӧс, Кочевӧс, Сямтомовӧс, Нинаӧс.
КРАСОВ. Тэнад распоряжениеын, Курыдкашин ёрт, кыдзи поточнӧй линияса мастерлӧн, лоӧны: электростанция ПЭС–40, коді сетас ток электропилаяслы, лебёдкаяслы да югдӧдас погрузочнӧй площадка. Сэсся лоӧ нёль трактор. Став рабочӧй тэ ордын лоӧ комын кӧкъямыс морт.
КУРЫДКАШИН. Мый нӧ ме кута вӧчны та мында техниканас, Красов ёрт? Татшӧм машинаяссӧ ме первойысь на аддза. Кыдзи нӧ кута веськӧдлыны?
КРАСОВ. Тэ, Курыдкашин ёрт, йӧзнас веськӧдлӧм да древесиналӧн качество бӧрся видзӧд. А машинаяс вылын кутасны уджавны мотористъяс, трактористъяс, механикъяс. Кымын во нин веськӧдлан лесоучастокӧн да пыр на сяммылін, и ӧні сямман.
КУРЫДКАШИН. Вӧвъясӧн уджалігӧн веськӧдлӧмыд майбыр вӧлі, а ӧні ӧд ставыс машина. Вӧвъяснад ӧд мый вӧлі: вердін-юкталін, и кыскась лунтыр, кубометръяс артав, премияяс виччысь. Некутшӧм аварияяс ни простойяс! А ӧні мый, машинаяснад? Гӧгӧр оз ладмы. То порожняк абу, то маслӧ, то трос, то чокер, то оз заводитчы, то ремонт...
КРАСОВ. Первой, дерт, сьӧкыд лоӧ. Но кутам велӧдчыны рытъясын, восьтам мастеръяслысь курсъяс. А талун заводитам уджавны тадзи: пӧрӧдчыны сувтӧдан мотористӧс да сылы отсасьысьӧс...
КУРЫДКАШИН. Электропилаӧн пилитчысьӧс, сідзкӧ?
КРАСОВ. Да. Тракторъяс кутасны трелюйтны увйытӧг.
КОЧЕВ. Увйытӧг? Пӧрӧдӧм пусӧ дзоньнас?
КРАСОВ. Да. Увйыныс кутам погрузочнӧй площадка вылын.
КУРЫДКАШИН. Сэсся нӧ ӧти увйытӧм пуӧн и кутас кыскыны тракторыс?
КРАСОВ. Мыйла нӧ ӧтиӧн? Миян тракторлӧн вын тырмас, кыскыны кутас сы мында жӧ, мыйта и увйӧмнас кыскалӧ.
ДЫМОВ. Вот дивӧыд! Регыд, кӧнкӧ, пӧрӧдтӧгыс став делянкасьыс вӧрсӧ кутам складӧ кыскыны!
КРАСОВ. Тракторъяс заводитасны уджавны кык сменаӧн: лунын и войын.
КОЧЕВ. Вот тайӧ правильнӧ! Тадзнад ми тракторӧн кык мында вӧр кутам кыскыны! Сменщикнас лоӧ менам помощник, аски сійӧ сдайтӧ экзамен тракторист вылӧ.
КУРЫДКАШИН. Войнас нӧ кыдзи? Джын пуыс кольӧ пасекаӧ?
КОЧЕВ. Трактор вылын уджавны лунын кӧть войын дзик ӧткодь, мед сӧмын луннас тырмымӧн хлыстъяс заготовитӧны.
КРАСОВ. Правильнӧ. Ещӧ ӧти выльтор. Вагонеткаяс вылӧ грузитны кутам пусӧ вундавтӧг, хлыстъясӧн.
СЯМТОМОВ. Вундавтӧг? Комын метр кузьта пуяс? Сідзкӧ, кык вагонеткаӧ сразу?
КРАСОВ. Да. Тадзӧн паровоз кутас кыскыны улыс складӧ пӧшти кык мында. Сэні и кутам разделывайтны сортиментъяс вылӧ.
КУРЫДКАШИН. Тані, сідзкӧ, разделочнӧй эстакадаяс вӧчны ог кутӧй?
КРАСОВ. Дерт, огӧй. Тані лоас прӧстӧй погрузочнӧй площадка.
СЯМТОМОВ. А менам лебёдкалы энергияыс тырмас? Сьӧкыдӧсь ӧд комын метра кузя пожӧм хлыстъясыд, мукӧдас куим кубометрысь уна!
НИНА. Энергия вӧсна, Сямтомов ёрт, эн тӧждысь, тырмас ставлы, верма делянкасӧ дзоньнас югдӧдны.
КРАСОВ. Порожняк кутасны сетны ас кадӧ, а тэ, Сямтомов ёрт, грузит найӧс индӧм срокӧ, медым кӧрттуйлӧн график эз торксьы. Кӧрттуй миян главнӧй конвейер. Сы кузя дугдывтӧм потокӧн должен мунны вӧр миян страналы, коммунизмлӧн великӧй стройкаяслы.
КУРЫДКАШИН. Вот тайӧ перестройка! Став уджыс выль ногӧн!
НИНА. Тадзи кӧ кутам уджавны, ми вит пӧв унджык кутам сетны вӧр!
КРАСОВ. Да. Сы вӧсна и пыртам выль уджалан методсӧ... Поточнӧй линияын, Курыдкашин ёрт, главнӧйыс лоӧ тракторъяслӧн удж. Тракторъяс долженӧсь ветлыны пасекасянь погрузочнӧй площадкаӧдз смена чӧж пӧшти сувтлытӧг, часы маятник моз. Кымын этшаджык сулалӧ трактор, сымын унджык вӧр сійӧ кыскӧ. Миян арталӧм серти, смена чӧжӧн трактор вермӧ трелюйтны сё ветымын кубометрӧдз. Трактор уджлы колӧ обеспечитны став условиеяс...
КОЧЕВ. Вот тайӧ правильнӧ шуӧма! А ми, трактористъяс, ог подкачайтӧй, кутам уджавны по-стахановски!
КРАСОВ. Но, ӧні ставныд гӧгӧрвоид, кыдзи колӧ уджавны выль, поточнӧй методӧн?
КУРЫДКАШИН. Кызвыннас, буракӧ, гӧгӧрвоим. Видлам, ог кӧ сибдӧй.
КРАСОВ. Препятствиеяс, нелючкияс, дерт, кутасны паныдасьлыны. Но ми, сӧветскӧй йӧз, ставсӧ венам! Тась ми вӧрсӧ мӧдӧдам коммунизмлӧн великӧй стройкаяслы. Сідзкӧ, миян лесоучасток эм коммунизм стройкалӧн ӧти участок. А вӧр промышленность миян дзоньнас уджалӧ да сетӧ вӧр коммунизм стройкаяслы. Сідзкӧ, ми непосредственнӧ уджалам коммунистическӧй строительство вылын. Партия тӧждысьӧмӧн, Сталин ёрт тӧждысьӧмӧн сьӧкыд вӧр лэдзан удж лои дзоньнас механизируйтӧма. Ми весиг ог нин представляйтӧй, кыдзи важӧн вӧр лэдзысьяс уджавлісны черӧн да зорйӧн, узьлісны нелямын градуса кӧдзыд дырйи ноддя би дорын. Ми ӧні олам благоустроеннӧй квартираясын, став уджъяс нуӧдам машинаясӧн. Сідзкӧ, партия тӧждысьӧм вылӧ вочавидзамӧй выль, поточнӧй метода стахановскӧй уджӧн! Лунысь-лун кутам совершенствуйтны ассьыным уджнымӧс, медым нӧшта вылӧджык кыпӧдны производительность!
Би пемдӧ.
Занавес.
МӦД ДЕЙСТВИЕ
МӦД КАРТИНА
Действие мунӧ мастер Курыдкашинлӧн поточнӧй линияын. Сцена шуйга бокын тыдалӧ уджалысь электростанция ПЭС–40 вагонлӧн пом. Сэні вентиляторнӧй ӧшиньлӧн восьса ставнияс, кодъяс костын ӧшалӧ газочурка тыра кӧрт кӧрзина-сетка. Сэні жӧ электростанциялӧн пес чипӧс. Сы сайын сцена пӧперег мунӧ узкоколейнӧй кӧрттуй. Задник вылын гырысь пожӧма вӧр. Чипӧс дорын Нина. Шуйгавывсянь пырӧ Сямтомов.
СЯМТОМОВ. Чолӧм, Ниночка!
НИНА. Ме тіянлы, Сямтомов ёрт, абу Ниночка, а Нина Николаевна, либӧ прӧстӧ Нина.
СЯМТОМОВ. Но мыйла ті сразу вунданныд? Ме тіян дінӧ, позьӧ шуны, став душаӧн, а ті...
НИНА. Сямтомов ёрт, мый ті корсяд татысь, мыйла он грузитӧй? Уджалан луныс ӧд важӧн нин заводитчис?
СЯМТОМОВ. Грузитны нинӧм, хлыстъяс эз вайны. Простой менам, Нина Николаевна. А татчӧ ме локті...
НИНА. Мыйла?
СЯМТОМОВ. Нина Николаевна! Нина! Тіянтӧг ме... Ӧти лун ме ог вермы овны тіянӧс аддзывтӧг. Ыпъялӧ менам сьӧлӧмӧй быттьӧ вӧрса пӧжар!
НИНА. Татшӧм тема вылӧ сёрни менӧ оз интересуйт, Сямтомов ёрт.
СЯМТОМОВ. Ок, Нина, Нина, пурттӧг ті менӧ вундалад. Тіян морӧсын, буракӧ, абу сьӧлӧм, а газочурка. Кӧть мед жаляддза радейтыштід...
НИНА. Сямтомов ёрт, ті эн тӧдмалӧй, мыйла мӧд поточнӧйын татшӧм жӧ погружательӧн грузитӧны кык мында унджык тіян дорысь?
СЯМТОМОВ. Сэні, гашкӧ, хлыстъяссӧ ас кадӧ вайӧны, а тані миян площадканым век тыртӧм.
НИНА. А вот и неправда. Миян трактористъяс медуна подвозитӧны.
СЯМТОМОВ. А мыйла нӧ эськӧ?
НИНА. Ті онӧ на кужӧй лебёдчик Холопов моз грузитныс. Тіянлы колӧ сы дінӧ ветлыны велӧдчыны, а не татчӧ котравны.
СЯМТОМОВ (думыштӧм бӧрын). Пӧжалуй, сы дінӧ ветлыны оз мешайт, видзӧдлыны...
НИНА. Обязательнӧ ветлы. И ещӧ ӧтитор тіянлы оз тырмы...
СЯМТОМОВ. Мый?
НИНА. Колӧ, мед тіян сьӧлӧмныд вӧрса пӧжар моз ыпъяліс удж дінӧ, мед ті ассьыд уджтӧ медъёна радейтід, мед удж вылад ыпъялід.
СЯМТОМОВ. А ме ӧмӧй омӧля уджала? Но мый вӧчны сьӧлӧмкӧд, сійӧ кӧ ыпъялӧ-сотчӧ радейтӧм вӧсна? Нина Николаевна, ветлам талун рыт клубӧ. Сэні талун концерт. А менам кык билет!
НИНА. Аттьӧ, Сямтомов ёрт. Но талун ме ог эшты.
СЯМТОМОВ. Жаль. А ме ньӧби первой ряд...
НИНА. Ой, вунӧді... котӧрта... (Пырӧ электростанцияӧ.)
СЯМТОМОВ. Некыдз, некутшӧм боксянь та дінӧ он сибав. Али ме подходсӧ вӧчны ог куж? Али красноречиеӧй оз тырмы? А нылыс ӧд кутшӧм? Свет вылас медшань! Нина радейтӧ сэтшӧмӧс, коді бура уджалӧ. Кочев кодьӧс. А ме? И ме петкӧдла, кыдзи колӧ уджавны! Гашкӧ, сэк...
Мунӧ шуйгавылӧ. Веськыдвывсянь пырӧ Курыдкашин, видзӧдӧ чипӧс вылӧ.
КУРЫДКАШИН. Кӧть мед ӧти кубометр кос кыдз пу пес аддзыны!
ЛИПИН (пырӧ веськыдвывсянь, ружьеа, тасма костас ӧшалӧны сьӧла да байдӧгъяс). Чолӧм, мастер!
КУРЫДКАШИН. О, чолӧм, начальник ёрт! Важӧн нин тіянӧс эг аддзыв.
ЛИПИН. Но, кутшӧма нин олад? Кутшӧмӧсь успехъяс? Кутшӧма перестроитчид, кыдзи уджалад выль, красовскӧй метод серти? Кутшӧма кажитчӧ поточнӧй способыс?
КУРЫДКАШИН. Выль метод серти уджалам, Пал Палыч. Подвозитам увйытӧг, грузитам хлыстъясӧн. Бӧръя кадӧдзыс пыр на графикын вӧлім! Веськыда кӧ шуны, ме эг эскы первойсӧ, мый выль методӧн уджалӧмӧн унджык кутам кыскыны. А ӧні, видзӧдтӧ, куим пӧв содіс выработка! Ставӧс шензьӧдӧ! И велавны кутім...
ЛИПИН. И процентъяс быдмӧны?
КУРЫДКАШИН. Ньӧжйӧник быдмӧны, Пал Палыч.
ЛИПИН. Сӧмын ньӧжйӧник? Тайӧ меным оз кажитчы. Ньӧжйӧникнад ті, Курыдкашин ёрт, менам лесоучастоклысь плансӧ орӧданныд!
КУРЫДКАШИН. Да старайтчам кыдз вермам, Пал Палыч! Но...
ЛИПИН. Мый старайтчад? Орӧдны?
КУРЫДКАШИН. Мый ті, мый ті, начальник ёрт! Старайтчам тыртны плансӧ! Став вынъяс пуктам сы вылӧ...
ЛИПИН. То-то жӧ, мися.
КУРЫДКАШИН. А кыдзи тіян кыйсьӧмныд, Пал Палыч?
ЛИПИН. Омӧль, Курыдкашин ёрт. Эз везит талун. Быттьӧ наросьнӧ, пыр неудача. Тарӧс аддзылі, час джын кыйӧдчи. А сійӧ эрд вылын. Эз сибӧд. Лэбзис. Сэсся понӧль улысь кӧч чепӧсйис. Лэптышті ружьеӧс, метитны кӧсъя, а сылӧн сӧмын местаыс. Сьӧла да байдӧгъяс тай со сюрины.
КУРЫДКАШИН. Жаритыштныд тырмас.
ЛИПИН. А тӧрыт зато!.. Но и кыйсьӧм вӧлі! Кыдз шуасны, кыйсьысь дінӧ и зверь локтӧ! Асывсяньыс рытӧдз. Гортысь ме петі водз. Югдігас вӧлі нин Якуньёльын.
КУРЫДКАШИН. Пемыднас куим километр мунід? А ме вот ог нин вермы. Пӧрысьмысьӧма. Кашма.
ЛИПИН. Друг аддза: кык байдӧг ӧтлаынӧсь. Метиті. Кыдз тай гымышта кыкнан стволсьыс! Кыкнанныс усины!
КУРЫДКАШИН. Ӧтчыд лыйӧмӧн?
ЛИПИН. Кык зарядӧн.
КУРЫДКАШИН. Здорово!
ЛИПИН. Муна водзӧ. Видзӧда: кыдз вылын пукалӧны дас вит тар!
КУРЫДКАШИН. Ӧти кыдз вылын?
ЛИПИН. Ӧтикын. А мый шензян? Унджык на овлӧ! Но ылын. Кыйӧдча ӧти куст дінсянь мӧдӧ, а юрын бергалӧ ӧти кыйсьысьлӧн висьт. Сійӧ тадзи жӧ вӧлі ӧти кыдз вылысь аддзӧма кызь вит тарӧс...
КУРЫДКАШИН. Мый нӧ сійӧ висьталіс?
ЛИПИН. Висьталіс, мый первой сійӧ лыйӧма медулын пукалысьсӧ. Сэсся выліджыксӧ, сэсся ещӧ выліджыксӧ. И татшӧм ногӧн уськӧдӧма кызь витнансӧ!
КУРЫДКАШИН. Но и ті, дерт, первой лыйид медулыс тарсӧ жӧ?
ЛИПИН. Да, метиті медулыссаас.
КУРЫДКАШИН. А сэсся дорвыв мукӧдсӧ?
ЛИПИН. Эг, зон. Ме промажиті, и ставныс лэбзисны.
КУРЫДКАШИН. Жаль.
ЛИПИН. Мыйла жаль? Ме найӧс суӧді. И куимӧс уськӧді.
КУРЫДКАШИН. Кык байдӧг дінӧ куим тар — абу этша.
ЛИПИН. Тэ кывзы водзӧ. Муна ме лызь вылын. Друг лызьяс костӧд мыччысис чукчи юр...
КУРЫДКАШИН. Но-о?! Репасын вӧлӧма?!
ЛИПИН. Да. Ме сылысь голисӧ топӧді лызьнам да сідзи киӧн и куті.
КУРЫДКАШИН. Збыльысь тіянлы везитӧ!
ЛИПИН. Чистӧй яйыс вит килограмм да нёльсё грамм!
КУРЫДКАШИН. Недель чӧж сёймӧн!
ЛИПИН. Восьлала водзӧ. Видзӧда, и мый ті чайтад? Йӧра туй! Менам пидзӧсъяс тірзьыны кутісны нимкодьла. А кутшӧм ыджыд! Дзонь сывйӧн восьлалӧ! А кучикыс джоджад оз тӧр! (Шӧпкӧдӧ.) А яйыс пуд комын лоӧ! Тӧвбыд кежлӧ! Татшӧмтӧ небось ас вылад он кыскы. Трактор ковмас!
КУРЫДКАШИН. Трактор сайын делӧ оз сувт, асланым кипод улын сійӧ. Турышевлы висьталам да ветлас. Уна оз кор и некодлы оз висьтав. А ылын тасянь?
ЛИПИН. Да километр дас кык лоӧ.
КУРЫДКАШИН. Но, тайӧ абу ылын. Ме ӧні жӧ прикажита сылы, войнас ветлас и ваяс.
ЛИПИН. Мый ваяс?
КУРЫДКАШИН. Кыдзи мый? Йӧра тушатӧ ваяс.
ЛИПИН. Кутшӧм йӧра туша?
КУРЫДКАШИН. А кодӧс ті лыйид, Пал Палыч.
ЛИПИН. Ме лыйи? Ме ӧд тэныд висьталі, мися, йӧра кок туй аддзылі.
КУРЫДКАШИН. Сӧмын кок туйсӧ? А йӧрасӧ эн лый? А ме гӧгӧрвои, мися, котшкӧмыд нин...
ЛИПИН (ышловзьӧмӧн). Эг, другӧ, сӧмын кок туйсӧ аддзылі! Лымйыс ляпкыд, он су ӧні. Вот тулыснас, кор чарӧмалас...
КУРЫДКАШИН. Кыйсьыныс ті, Пал Палыч, ёна радейтад! Во гӧгӧр чӧж кыйсяд. Кӧдзыд кӧть зэр — тіянлы дзик нинӧм.
ЛИПИН. Кыйсьысьлы быд поводдя бур.
КУРЫДКАШИН. А ружьеыдкӧд ті, ме ногӧн, ньӧтчыд он янсӧдчывлӧй?
ЛИПИН. Позьӧ ӧмӧй сыкӧд янсӧдчывны? Вӧрын ӧд олам! Поточнӧй линияяс костад тӧдан кымын километр? Вот ме поточнӧйысь поточнӧйӧ и ветла лызь вылын ружьеӧн. То сьӧлаӧс, то тарӧс лыян пӧпуттьӧ...
КУРЫДКАШИН. И век свежӧй пӧтка яй!
ЛИПИН. Велалі нин ме ружье дінас. Привыкниті.
КУРЫДКАШИН. Привычка ыджыд делӧ.
Кост. Липин ӧзтӧ папироска, видзӧдлӧ гӧгӧрбок, кывзысьӧ.
ЛИПИН. Мыйла нӧ татшӧм лӧнь тані? Выходнӧй али мый тэнад поточнӧйын?
КУРЫДКАШИН. Абу жӧ выходнӧй. Уджалӧны.
ЛИПИН. Кыдзи нӧ уджалӧны? Час джын пукала, а ни ӧти трактор на эз волы погрузочнӧй площадка вылӧ.
КУРЫДКАШИН. Тракторъясыд талун, збыль, перебойясӧн уджалӧны.
ЛИПИН. Мыйла?
КУРЫДКАШИН (гӧгӧр видзӧдлӧ, шевгӧдӧ кияссӧ). Песным абу.
ЛИПИН. Пес абу?! Тэ меным, Курыдкашин ёрт, комедия эн ворс! Вӧрын пес абу.
КУРЫДКАШИН. Пал Палыч, ме збыль висьтала. Тракторъяслы газочурка абу.
ЛИПИН. Ыстылӧй, сідзкӧ, мортӧс складӧ и мед вайӧ мыйта колӧ. Ог жӧ ме кут тіянлы газочурка кыскавны! И татшӧм сёрни мед эг кыв ме мӧдысь. А вайтӧдзыс кондаӧн заправляйтӧй!
КУРЫДКАШИН. Ысті, Пал Палыч, асывнас на ысті. Дымов должен порожняк вылын вайны. А конда йывсьыд ме ог тӧд...
ЛИПИН. Мый он тӧд? Кыдзи шуи — сідзи и вӧчӧй! Пӧрӧдчыныд удитӧны?
КУРЫДКАШИН. Пӧрӧдчӧны бура. Кык недель кежлӧ запас пӧрӧдӧма.
ЛИПИН. Тайӧ нин абу бур. Лым кӧ усьӧ — джын вӧрыс вошӧ.
КУРЫДКАШИН. Сідзкӧ, пӧрӧдчӧмсӧ дугӧдлыны ковмас?
ЛИПИН. Пӧжалуй, дугӧдлан кӧ, бурджык. А кольӧм пятидневкаысь графикыс кыдзи тыри?
КУРЫДКАШИН. Сводкатӧ ме, Пал Палыч, войдӧрлун ысті. И быд лун телефон пыр юӧрта.
ЛИПИН. Контораӧ ме недель чӧж нин эг волыв.
КУРЫДКАШИН. Кольӧм пятидневкаын ми вӧлім графикын. А ӧні вот сибдыны кутім...
ЛИПИН. Но, нинӧм, газочурка ваяд да наверстайтанныд.
КУРЫДКАШИН. Постарайтчам, Пал Палыч. Но...
ЛИПИН. Некутшӧм «но». Водзын ещӧ некымын лун на, а миян лесоучасток тыртіс нин плансӧ. (Шӧпкӧмӧн.) Тайӧ тӧлысьысь, чайта, переходящӧй знамя да премия сетасны!
КУРЫДКАШИН. Да, тайӧ эськӧ эз вӧв лёк. Премияӧн важӧн нин эз балуйтӧдлыны.
ЛИПИН. Выходнӧй лунӧ волы ме ордӧ. Жаритӧм пӧткаӧн гӧститӧда.
КУРЫДКАШИН. Аттьӧ корӧм вылад, но...
ЛИПИН. Бара «но»! А тэ волы. Ме особӧй настойка вӧчи спиртӧн. Воронкоӧс тэла ыстывла. Выль додь вӧчисны, карса кодьӧс. Сэки жӧ пӧ и райкомса секретарь Сокерин кӧсйӧ волыны. Тыдалӧ, миянлы знамя вайӧ. Сійӧ пыр ачыс вручайтӧ, некодлы оз дӧверяйт... Нолы, ветлам, петкӧдлы, кыдзи погружательыд уджалӧ, уджалӧмсӧ ме эг на аддзыв.
КУРЫДКАШИН. Уджалӧ зэв бура.
Мунӧны. Станция сайсянь петӧ Нина, локтӧ чипӧс дорӧ, сэки казялӧ Зориналысь сылань локтӧм.
НИНА. Ой, лесоучастокса главнӧй механик локтӧ, а менам станцияӧй пӧшти нагрузкатӧг уджалӧ. Мый ме сылы висьтала?
Пырӧ Зорина.
ЗОРИНА. Чолӧм, Нина.
НИНА. Чолӧм, Лидия Харитоновна! Мыйкӧ ті шоча кутід волыны миянӧ.
ЗОРИНА. Да пыр кыдзкӧ кадыс абу. Юр выв тыр удж! То ӧтитор, то мӧдтор.
НИНА. Ме тырвыйӧ гӧгӧрвоа, кутшӧм уна лоӧ тіянлы уджавны. Ӧд мыйта техника вӧрад! Став уджъяс механизируйтӧма, а кадръясным унджыкыс на выльӧсь, велавтӧмӧсь, отсӧг корӧны. А главнӧй механикыд ӧти став квайтнан поточнӧй линия вылӧ. Быдлаӧ колӧ удитны ас кадӧ волыны, мед машинаяс эз сулавны.
ЗОРИНА. Вот и лэбала ӧти поточнӧйсянь мӧдӧ. А ӧні ещӧ гортын быдса несчастье...
НИНА. Мый нӧ лои? Висьмис кодікӧ, али?..
ЗОРИНА. Эн нин сёрнит. Шогыс кутшӧм! Машенькаӧй менам висьмис!
НИНА. Нылукыд?
ЗОРИНА. Тэ мый? Ен мед видзас! Машенька — сійӧ миян порсьпи.
НИНА. Али порсьпи!..
ЗОРИНА. Да, порсьпи. Миян куим вӧлі. Ӧти — английскӧй пӧрӧдаа, пуд кӧкъямыс лоӧ, дзик Черчилль кодь! Мӧдыс пуд вита. А коймӧдыс ичӧтик. И вот ичӧтикыс и висьмис. Нинӧм оз сёй. Мыйта ми сыкӧд ноксим! Верӧсӧй сутки чӧжӧн синсӧ эз куньлыв, эз вешйыв сы дінысь. Со кыдзи вӧлі жалитӧ сійӧс. Весиг аслас орсӧ эз кут ветлывны. Ачыс висьмис, зэв ёна омӧльтчис. И фельдшерӧс вайӧдлім. И врачӧс районысь корим. А сылы пыр лёкджык и лёкджык. Коньӧрӧй, сідзи эз и вермы виччысьны врачтӧ. Кулі.
НИНА. Кулі?!
ЗОРИНА. Да, кулі сьӧлӧмшӧрӧй...
НИНА. Мужикыд кулі?!
ЗОРИНА. Тэ йӧймин али мый! Кывйыд мед косьмас тэнад татшӧм сёрнисьыд! Порсьпиным, мися, кулі.
НИНА. Али порсьпиныд!
ЗОРИНА. А районсянь врач сӧмын на тӧрыт воис миянӧдз. Вскрытие вӧчис. Висьталіс, висьӧмыс пӧ абу заразнӧй вӧлӧма. Разрешитіс сёйны.
НИНА. Яйыс ӧд, кӧнкӧ, зэв нин омӧль.
ЗОРИНА. Видзӧднысӧ первой сорт. Банкет вылӧ жаритам.
НИНА. Позьӧ ӧмӧй кулӧм порсьӧс банкет вылӧ?
ЗОРИНА. Врач кӧ разрешитас — быдтор позьӧ. Ой, мыйдыра ме тані олі! Котӧртла погрузочнӧй площадка вылӧ, видзӧдла, кыдзи погружатель уджалӧ.
НИНА. Лесоучастокса начальник Липин ёрт сэтчӧ жӧ муніс.
ЗОРИНА. Мый нӧ ті сразу эн висьталӧй? Котӧрта! (Мунӧ.)
НИНА. Кодлӧн кыйсьӧм, кодлӧн порсьпиян. А кыдзи уджалӧны механизмъяс — некод оз интересуйтчы.
Ӧдйӧ пырӧ Кочев, киас газочурка тыра кӧрзина, но аддзӧ Нинаӧс да друг сувтӧ. Нина бергӧдчӧ сыланьӧ.
КОЧЕВ. Бур лун, Ниночка!
НИНА. Сенюк! Кӧні нӧ тэ вӧлін? Тӧрытсянь нин эг аддзыв! Кутшӧма гажӧй бырис!
КОЧЕВ. Менам гажӧй бырис жӧ. Но верит, Ниночка, ӧти минут прӧст кад эз вӧв. Пыр нокся свадьбанымлысь сроксӧ матыстӧмӧн.
НИНА. А тэ, Сеня, этшаджык думайт свадьба йывсьыд, сэки и срокыс оз ло кузь.
КОЧЕВ. Кыдз сійӧ «этшаджык думайт»? Тэ ӧмӧй...
НИНА. Ме нинӧм. Но ми ӧд тэкӧд сёрнитчим свадьбанымӧс вӧчны сӧмын сы бӧрын, кор тэ помалан механикъяслысь курсъяс.
КОЧЕВ. Энлыв, Нинук, ме...
НИНА. Мый энлыв? Гӧтрасям, а тэ мунан велӧдчыны некымын тӧлысь кежлӧ! Интереснӧй свадьба!
КОЧЕВ. Тэ, Нинук, ньӧтчыд он сет меным висьтавны...
НИНА. Мый нӧ тан висьтавныс? И сідз ставыс яснӧ: кытчӧдз курс вылысь бӧр он во, сэтчӧдз и свадьба миян оз ло. Ме ог и кӧсйы свадьба мӧд лунӧ жӧ кольччыны соломеннӧй дӧваӧн.
КОЧЕВ. А ме кӧ дзик некытчӧ ог мун?
НИНА. Сэки и свадьбаным дзик ньӧтчыд оз ло. Збыль ӧмӧй тэ нэмтӧ кӧсъян лоны сӧмын трактористӧн?
КОЧЕВ. Тракторист — бур профессия. И курсъяс бӧрын ме кута уджавны трактористӧн жӧ. Поточнӧйын тракторист — сійӧ главнӧй фигура, сійӧ кыскӧ вӧр, сы сайын сулалӧ план тыртӧм. А механикӧн ме кута уджавны, кор арлыдӧй ыджыдджык лоӧ. Гашкӧ, ещӧ и инженерӧн на лоа.
НИНА. Та могысь колӧ велӧдчыны. А тэ он кӧсйы мунны.
КОЧЕВ. Ниночка, лэдз меным висьтавны ситуациясӧ...
НИНА. Бара ситуация?
КОЧЕВ. Ситуация крута вежсис.
НИНА. Вежсис? Кыдзи?
КОЧЕВ. Механикъяслӧн курсъяс организуйтсьӧны тані, миянын, миян лесоучасток бердын! Та вӧсна некытчӧ мунны оз ковмы.
НИНА. Збыльысь?
КОЧЕВ. Стӧч.
НИНА. Ой! Сенюк! Шудным миян мыйта! Сенюк! Донаӧй!
КОЧЕВ. Сідзкӧ, выходнӧй лунӧ свадьба? Ладнӧ?
НИНА. Ставыс кӧ тадзи, дерт, ладнӧ...
КОЧЕВ. Нинук! Сьӧлӧмшӧр менам! (Кутлӧ.)
НИНА. А свадьба вылӧ кодӧс корам?
КОЧЕВ. Ме эськӧ машинист Дымовӧс кори... Но и трактористъясӧс, дерт, тшӧтш.
НИНА. А ме мастер Курыдкашинӧс да Валяӧс кора.
КОЧЕВ. А Липинӧс да Зоринаӧс?
НИНА. Огӧ, найӧ меным оз кажитчыны. Бурджык, корам, райкомса секретарь Сокеринӧс!
КОЧЕВ. Сійӧ оз лок миянӧ.
НИНА. Локтас. Ставӧн локтасны, кодӧс корам! А кутшӧм гажа лоӧ миян свадьба вылын! Ми сэні исполнитам ассьыным радейтана сьыланкывнымӧс. Сӧгласен?
КОЧЕВ. Дерт жӧ, исполнитам. Вай ӧні прӧверитам, сьылам?
НИНА. Сьылам. Энлы, час ме гудӧкла пыравла, Сямтомовлӧн век на станцияын. (Котӧртлӧ да бӧр локтӧ гудӧкӧн. Кочев заводитӧ ворсны, кыкнанныс сьылӧны.)
КОЧЕВ. Ок и лӧсьыд олӧм!
НИНА. И овны лӧсьыд! Ой, муна приборъяс видзӧдла. Волы рытнас клубӧ. Сэні концерт лоӧ!
КОЧЕВ. Но, дерт жӧ, вола.
НИНА. Ӧтитор сӧмын ме ог гӧгӧрво.
КОЧЕВ. Мый, Нинук?
НИНА. Тэнад лунысь-лун кыптӧ выработкаыд, а мукӧд трактористъяс норманысӧ оз тыртны. Колӧ налы кыдзкӧ отсавны, медым миян поточнӧй линия дзоньнас тыртіс плансӧ.
КОЧЕВ. Медводз колӧ, медым быдӧн ачыс кывкутіс аслас удж вӧсна. И кыдзи налы отсалан? Абу ӧд ичӧтӧсь! И тракторъясыс налӧн сэтшӧм жӧ выльӧсь. Ог жӧ кут ме на пыдди подвозитны?
НИНА. Не подвозитны, а велӧдны найӧс, кыдзи колӧ кыпӧдны удж производительность.
КОЧЕВ. Но, Нинук, ме абу учитель, ачым на велӧдчыны лӧсьӧдча. А уджалӧм вылӧ менам стимулыс ыджыд, та вӧсна и выработкаӧй ыджыд.
НИНА. Кутшӧм стимул?
КОЧЕВ. А сэтшӧм, мый гӧтрасьны кӧсъя, семья лӧсьӧдны. Меным деньга унджык колӧ.
НИНА. Тайӧ абу збыль, Сеня. Мукӧдлӧн семьяыс эм жӧ... Но, ме пырала станцияӧ.
Нина саялӧ станция сайӧ. Вентиляция ӧшиньысь Кочев ӧдйӧ босьтӧ кос газочурка тыра кӧрзина да сы местаӧ ӧшӧдӧ мӧдӧс. Нина пыр жӧ мыччысьӧ бӧр да чӧла видзӧдӧ Кочев вылӧ.
НИНА. Мый нӧ тэ вӧчан, Сеня?
Кочев повзьыштӧмӧн друг бергӧдчӧ да усьӧ, уськӧдӧ кос газочурка тыра кӧрзинасӧ, пидзӧс вылас сулалӧмӧн да синъяснас тэрыба лапйӧдлӧмӧн, ватник пӧланас зільӧ вевттьыны киссьӧм газочуркаяссӧ.
КОЧЕВ. Ме... ме нинӧм... ме сідз... ме кӧсйи, но... (Кевмысигмоз.) Нинук!..
НИНА. Мый тэ кӧсйин?
КОЧЕВ. Да нинӧм торъясӧ... Ме прӧста... (Заводитӧ чукӧртны газочуркаяс.)
НИНА. Вай ме отсышта тэныд чукӧртныд. (Сувтӧ пидзӧс вылас жӧ.)
КОЧЕВ (повзьӧмӧн). Эн... эн вӧрзьӧд!..
НИНА (чукӧртӧ). Мый тайӧ? Мыйла нӧ пӧсь? И кутшӧм кокни! Дзик кос! Сеня, кытысь нӧ тайӧс босьтін?
КОЧЕВ (бокӧ). Но и ситуация! Помӧдз сибді.
НИНА. Мый нӧ чӧв олан?
КОЧЕВ. А тэ некодлы он висьтав?
НИНА. Мый йылысь?
КОЧЕВ. Мый тэ аддзан и кутшӧм тайна ме тэныд ӧні восьта.
НИНА. Но, тайна кӧ, ог висьтав.
КОЧЕВ. Нинук, менам социалистическӧй обязательство — подвезитны дас кык тысяча кубометр...
НИНА. Та йылысь ме важӧн нин тӧда.
КОЧЕВ. А пескыс уль...
НИНА. Кыдзи нӧ уль? Сійӧ дзик кос, весиг пӧсь!
КОЧЕВ. Энлыв, Нинук, лэдз висьтавны. А то он гӧгӧрво. Но вот. Пес уль, кос пес абу...
НИНА. А тайӧ мый?
КОЧЕВ. Да энлыв. Ме сідзи и тӧді, мый он гӧгӧрво. Час, ме дорвыв висьтала. (Кыкнанныс чеччӧны пидзӧс вылысь.)
НИНА. Но, но, висьтав дорвыв.
КОЧЕВ. Кыдзкӧ арнас на, первой кӧдзыдъяс дырйи, ме киясӧс шонті тайӧ вентиляция дінас, а кепысьясӧс ставни вылас пукті. Ки шонтіг да папирос ӧзтіг кості кепысьясӧй косьмисны. Пӧсь тіян воздухыс тані, весиг ки оз терпит.
НИНА. Воздухыс тані шоналӧ пар конденсируйтігӧн. Конденсационнӧй бакъясын да трубаясын воздухыс кӧдзӧдӧ парсӧ, пӧртӧ ваӧ, медым котёлӧ шочджыка качайтны. Но парсӧ кӧдзӧдігас воздухыс ачыс пӧсялӧ, и ми сійӧс вӧтлам ывлаӧ тайӧ вентиляторнас.
КОЧЕВ. Тӧда. Но вот. А ме деревняын быдми, Сталин ёрт нима колхозын. Мамӧ тшӧкыда вӧлі сюйӧ пачӧ кыдз пу пес. Ломзьӧдчыны сартас дасьтӧ. Но вот. Меным тӧд вылӧ уси тайӧ. И думайта, мися, пачын кӧ быдса пес косьмӧ, мыйла эськӧ посньыдик газочурка оз косьмы, кор тані пӧсь воздухыс дугдывтӧг пӧльтӧ? Вот ӧтчыд ме видлыны и ӧшӧді татчӧ уль газочурка тыра кӧрзина.
НИНА. Но и мый?
КОЧЕВ. Локті смена помын, видлала и аслым ог эскы: порох кодь кос.
НИНА (возбуждённӧя). Збыль?
КОЧЕВ. Стӧч.
НИНА (зэв возбуждённӧя). И тайӧ газочуркаясыс тані жӧ косьмисны?
КОЧЕВ. Тані, дерт. А мый?
НИНА. И важӧн нин тэ тані косьтысян?
КОЧЕВ. Мыйӧн газочуркаясӧн кутіс лоны перебойяс, ме и займиті тайӧ позициясӧ.
НИНА. Та вӧсна, сідзкӧ, тэнад тракторыд уджалӧ перебойястӧг, а мукӧд трактористъяс сулалӧны кос газочурка абутӧм вӧсна?
КОЧЕВ. Находчивӧйӧн колӧ лоны.
НИНА (серьёзнӧя). Мыйла нӧ тэ мукӧд трактористъяссьыс дзеблалан тайӧс? Мыйла нӧ тэ мукӧдыслы эн висьтав, мый тані позьӧ косьтыны газочуркасӧ?
КОЧЕВ. А кыдзи нӧ висьтавныс? Та йылысь кӧ тӧдмаласны мукӧд трактористъяс да кутасны татчӧ ӧшлыны ассьыныс кӧрзинаяссӧ, сэки ме кытчӧ ассьым ӧшӧда?
НИНА. Ассьыд? Со кутшӧм тэ вӧлӧмыд?
КОЧЕВ. А кутшӧм? Дзик обыкновеннӧй.
НИНА. Абу, тэ абу обыкновеннӧй.
КОЧЕВ. Сідзкӧ, особеннӧй?
НИНА. Да, особеннӧй! Тэ тӧждысян сӧмын аслад благополучие йылысь, думайтан сӧмын ас вӧснаыд.
КОЧЕВ. А кыдзи нӧ? Обязательствоыс ӧд менам абу ичӧт — 12 тысяча!
НИНА. Мун! Мун ме дінысь! Менам тэкӧд абу ӧти туй! Ме сӧветскӧй ныв, а тэ...
КОЧЕВ. А ме коді тэ ногӧн? Абу сӧветскӧй?
НИНА. Абу. Тэ — капитализмлӧн пережиток! Тэ он сӧветскӧй йӧз ног ов. Тэ сӧмын асьтӧ тӧдан...
КОЧЕВ. А кутшӧм ме преступление вӧчи? Ассьым задание ме выполняйта, коммунизмлӧн великӧй стройкаяслы вӧр сетӧм вӧсна тышкася, и ог омӧля. Леспромхоз пасьтаын первой тракторист! Газетын ме йылысь гижӧны.
НИНА. Тэ, Кочев ёрт, эгоист! Ассьыд личнӧй выгодаястӧ тэ пуктан миян общӧй, государственнӧй интересъясысь вылӧджык! Миян поточнӧй оз тырт план, лесоучастокын пес вӧсна квайт трактор сулалӧ. А тэ тӧдан, мый быд поточнӧйын эм татшӧм станция, кӧні позьӧ косьтыны пес и он висьтав мукӧдлы, медым ӧтнадӧн нажӧвитчин да рекордъяс пукталін! А кутшӧм ущерб тэ вӧчан государстволы — думыштлін? И татшӧм сайӧ ме кӧсйылі мунны верӧс сайӧ? (Бӧрдігтыр мунӧ.)
КОЧЕВ. Вот тайӧ... ситуация!..
Кочев чукӧртӧ ӧстатки газочуркаяс. Пырӧ Курыдкашин.
КУРЫДКАШИН. Тэ мыйла татчӧ газочуркасӧ вайин?
КОЧЕВ. Ме эг вай... Тайӧ сідз... Ме, мастер ёрт, кӧсйи петкӧдлыны тіянлы... Кутшӧм нӧ тайӧ пес? Ставнас ва! (Кӧрзинасӧ дзебӧ мыш саяс.) Оз ломтысь. Трактор оз уджав. Мастер ёрт, кор нӧ кос пессӧ пӧлучитам? Кор пес вӧсна сулавны ог кутӧй?
КУРЫДКАШИН. Кытысь ме босьта, абу кӧ кос пескыс?
КОЧЕВ. Пестӧгыс нӧ кыдзи уджавныс?
КУРЫДКАШИН. Асьным кутам вӧчны. Мӧд петан туй менам абу. Ог жӧ ме вермы орӧдны поточнӧй линиялысь план пес вӧсна!
КОЧЕВ. А кыдзи косьтам?
КУРЫДКАШИН. Конда заготовляйтны кутам, сійӧ кос.
КОЧЕВ. Конда?!
КУРЫДКАШИН. Витӧд поточнӧйын важӧн нин уджалӧны конда вылын. И ми кутам уджавны. Пал Палыч ачыс прикажитіс!
КОЧЕВ. Ог. Бункерӧ ме конда ог лэдз.
КУРЫДКАШИН. Кыдзи он лэдз, прикажита кӧ?
КОЧЕВ. Конда пескыд сирӧн тыртӧ бункеръяс да поршеньяс, топливник сотчӧ, клапанъяс ӧшйӧны. Трактор воштӧ ассьыс вынсӧ. Ме ог кӧсйы петкӧдны стройысь ассьым машина. Тракторсӧ ме босьті социалистическӧй сохранность вылӧ и сохранита сійӧс. Меным тайӧ сезонын аслам тракторӧн колӧ трелюйтны дас кык тысяча кубометр. И локтан воын уджавны капитальнӧй ремонттӧг. А кондаыд пыр жӧ петкӧдас стройысь трактортӧ. Татшӧм приказлы ме ог подчинитчы! (Мунӧ.)
КУРЫДКАШИН. Некод оз отсав пӧрысь мастерлы. А пес абу, кӧть караул горзы. Став тракторъяс сувтасны. Мый вӧчны? Мый вӧчны? Гӧгӧр вӧр (индӧ кинас), а пес абу! Кытчӧ Дымовыс воши? Асывсянь муніс и пес оз вай! (Кӧсйӧ мунны.)
СЯМТОМОВ (горӧдӧ станция сайсянь). Мастер ёрт! Курыдкашин ёрт! Ӧти минут!
КУРЫДКАШИН (сувтӧ, но оз бергӧдчы). Кытчӧ бара сибдін?
СЯМТОМОВ. Мастер ёрт, висьталӧй меным: кор помасясны простойяс? Кор заводитам уджавны прамӧй ногӧн?
КУРЫДКАШИН (сідзжӧ). Простойяс сӧмын на заводитчӧны. (Бергӧдчӧ Сямтомовланьӧ, нервнӧя.) Газочурка эз вайны! Джын тракторным сувтӧ! Кор Дымов ваяс пес, сэки и уджавны заводитам прамӧя.
СЯМТОМОВ. Эновтӧй шуткатӧ, мастер. Ті ӧд тӧданныд менсьым социалистическӧй обязательство: сменаын грузитны сё кызь кубометр!
Кылӧ паровоз тутӧстӧм шы.
Кыланныд, грузитӧм сцепъясла воисны, выль порожняк вайисны, а менам кык сцепысь ӧтисӧ сӧмын джынвыйӧ грузитӧма. И грузитны нинӧм, трактористъяс вӧр оз вайны.
КУРЫДКАШИН. Но мый тэ менӧ пилитан ныж пила моз? Мый ме вӧча, пес кӧ абу?
СЯМТОМОВ. Ті мастер, тіянлы тыдалӧджык, мый вӧчны. А меным хлыстъяс грузитны вай! Меным обязательство выполнитны колӧ. Ме ог кӧсйы гӧрдӧдны Соколов ёрт водзын, коймӧд потокса лебёдчик водзын.
КУРЫДКАШИН. А меным, чайтад, окота гӧрдӧдны коймӧд потокса мастер Панкрат Онуфрич водзын? Али чайтад, меным план оз ков тыртны? Вот Дымов кӧ пес вайис, сэки и хлыстъяс лоӧны.
СЯМТОМОВ. Да гӧгӧрвоӧй ті, паровоз кутас сулавны, а машинист Дымов менсьым горшӧс йирас! Ті ӧд тӧданныд, кутшӧм сійӧ.
КУРЫДКАШИН. Горшыд сійӧ пустяки. План кӧ ог тырт, леспромхозса директор Красов менсьым юрсиӧс кӧсйис вундыны ӧтлаын юрӧйкӧд! А юрыд горш дорсьыд коланаджык!
СЯМТОМОВ. Юртӧ, шуан? Да, юртӧгыд, пӧжалуй, лёк лоӧ. Сэки план тыртӧм йывсьыд думайтны он нин вермы. (Локтӧ авансценалань.)
КУРЫДКАШИН. Тіянлы со век шутка.
ДЫМОВ (станция сайсянь). Чолӧм, Курыдкашин ёрт! Сямтомовӧс эн аддзылӧй? (Пырӧ, казялӧ Сямтомовӧс.) Э-э, со сійӧ кӧні! Тэ нӧ мый, другӧ, сцепъясыд тыртӧмаӧсь, а локтӧмыд механик Нинаӧс караулитны? Прӧста кад воштан. Веськыда висьтала: эновтчы тэ сы дінысь, налӧн Кочевкӧд регыд свадьба. И эн мешайт шуда паралы.
СЯМТОМОВ. Личнӧй почва вылӧ кора не вуджны, Дымов ёрт. Код тӧдас, кодлӧн лоӧ свадьбаыс. А грузитны меным нинӧм, площадка тыртӧм.
ДЫМОВ. Кутшӧм меным делӧ тэнад площадкаӧдз? Тэ меным грузитӧм сцепъяс вай! Ме тэныд выль порожняк кыски, а тэнад важыс тыртӧм.
СЯМТОМОВ. Тэ мастерлысь юав, мыйла сійӧ хлыстсӧ оз ваяв.
ДЫМОВ. Мастер вылӧ, Сямтомов ёрт, эн ыстысь, ачыд грузит. Тэ миянлысь график орӧдан. А тэ гӧгӧрвоан, мый сійӧ лоӧ график орӧдӧмыс? Али он тӧд, мый вылӧ выль поточнӧй методсӧ пыртісны?
СЯМТОМОВ. Гашкӧ, шуан, ог гӧгӧрво? Менам аслам обязательство эм. Да и нажӧвитыштны выль во кежлӧ абу прӧтив.
ДЫМОВ. Гӧгӧрво: кор тэ он грузит, тэ сійӧн орӧдан миянлысь общӧй социалистическӧй обязательство сетны коммунизмлӧн великӧй стройкаяслы планысь вывті вӧр, орӧдан леспромхозлысь план тыртӧм!
КУРЫДКАШИН. Тырмас агитируйтны, Дымов ёрт. Висьтав, уна-ӧ вайин газочуркатӧ?
ДЫМОВ. Кытысь?
КУРЫДКАШИН. Тэ мый, первойысь на ветлін? Он тӧд, кӧні пес складыс?
ДЫМОВ. Пес сэні абу.
КУРЫДКАШИН. Кыдзи абу?
ДЫМОВ. Кос газочурка абу. Арнас складсӧ ва ойдлӧма, да ставыс кынмӧма. Колӧ взорвитны да выльысь косьтыны.
КУРЫДКАШИН. Вот тайӧ номер! Трактористъяс сулалӧны нин, пӧрӧдчысьяс дугдӧны уджалӧмысь, а налӧн обязательство — сетны сезонын дас вит тысяча кубометрӧн морт вылӧ. Мый вӧчны? Кытысь босьтны пес?
ДЫМОВ. Вӧрын, и пес вӧсна ставыс сувтӧ! Комедия!
КУРЫДКАШИН. Комын куим во вӧр заготовляйта, нэм чӧж вӧрын олі, но первойысь на тӧдмала, мый вӧрын пес абу. Кӧть караул горзы, кӧть Москваӧ пес вылӧ заказ ысты!
Кылӧ тракторлӧн шум. ПЭС–40 сайысь петӧ Нина.
НИНА. Мастер ёрт, дыр-ӧ нӧ ме кута тыртӧгыс уджавны? Электропильщикъяс дугдісны уджалӧмысь. Сямтомов асывсяньыс оз грузит. Некутшӧм нагрузка абу. Нелямын киловатт энергия прӧста вошӧ!
КУРЫДКАШИН. Тӧда.
НИНА. Но тайӧ ӧд преступление! Энергия мунӧ, а кубометръяс ог сетӧй. Мастер ёрт, примитӧй мераяс!
КУРЫДКАШИН. Сямтомов ёрт, кылан, трактор локтіс! Мун грузит.
СЯМТОМОВ. Мый меным ӧти доддьыд? Сцеп вылӧ ещӧ кык колӧ!
КУРЫДКАШИН. Мун, мися, грузит, регыд мӧд воас.
Сямтомов мунӧ.
ДЫМОВ (раздражённӧя). Кутшӧм нӧ тайӧ удж, мастер ёрт, мыйла нӧ водзджык эн думыштлӧй пес йывсьыд?
КУРЫДКАШИН. Пал Палыч кӧ эськӧ прикажитіс миянлы аслыным заготовитны пессӧ, перебойяс эськӧ эз вӧвны. Да и заптӧма вӧлі пессӧ во гӧгӧр кежлӧ, но ачыд тай висьталан йи пытшкӧ кынмӧмӧн.
ДЫМОВ. Колі водзджык видзӧдлыны сійӧс, а не сэк, кор заправитны лои нинӧмӧн. Ті менӧ извинитӧй, но олад ті Липинкӧд тӧрытъя лунӧн, видзӧданныд сӧмын бӧрӧ, кыдзи ыръянь вӧл мегыр пырыс. А руководительлы колӧ видзӧдны, медым аддзыны, лоӧ оз газочурка куим тӧлысь мысти.
КУРЫДКАШИН. Мый лоӧма, ӧні он нин веж... Талун жӧ колӧ сушилка вӧчны заводитны.
НИНА. Ті кӧсъяд быд поточнӧйын аслыс сушилка вӧчны? Вывті дона сувтас!.. А важ сушилкасӧ оз позь используйтны?
ДЫМОВ. Сійӧ сушилкаыд кык тракторлы сӧмын вермас косьтыны. Эх! Лоӧ мунны тыртӧг. Кӧрттуй заводитіс уджавны часы моз, график серти, а потокъяс вӧр оз сетны. Бара, тыдалӧ, директорлы аслыс ковмас инмӧдчывны тайӧ пес делӧас. (Мунӧ.)
КУРЫДКАШИН. И мыйла миян инженеръяс нинӧм оз придумайтны сэтшӧмӧс, медым ӧддзӧдны газочурка косьтӧм? Нинушка, кӧть мед тэ мыйкӧ придумайтін? Со тай нӧ мукӧд механикъяс да инженеръяс быдсяма выльторсӧ придумывайтӧны! Придумайтісны вӧрын уджалан выль, поточнӧй метод? Придумайтісны. Придумайтісны электролебёдкаӧн штабелюйтчӧм, керъяс дас метр вылнаӧ лэптӧм? Придумайтісны. Кольӧм во на пурга дырйи кӧрттуйлӧн уджыс ставнас вӧлі сувтӧ, а ӧні кык часӧн весалӧны став лым туй кузялаыс. Быдтор придумывайтӧны. Оз ӧмӧй позь кыдзкӧ ӧддзӧдны газочурка косьтӧмсӧ? А! Нинук? Мӧвпыштлы вай?
НИНА. Мый ті, мастер ёрт, ме ӧд абу изобретатель. Мый ме верма придумайтны? Газочуркаыд абу менам специальность серти. Ме сӧмын электростанцияса механик. Велӧдчи курсъяс вылын и вои удж вылӧ. И водзті эз ковмыв нинӧм изобретайтны. Олі колхозын да нинӧм йылысь торъя эг думайтлы. Сӧмын велӧдчи да скӧтнӧй дворын уджалі. Нинӧмӧн ме тіянлы отсавны ог вермы.
КУРЫДКАШИН (огорчённӧя). Некод, некод оз кӧсйы отсавны пӧрысь мастерлы!
НИНА. Кӧсъя, мастер ёрт, но ог куж. Вӧлі кӧ эськӧ ме изобретатель, войяссӧ эськӧ эг узь, а изобретиті мыйкӧ! Эх, эськӧ кужи кӧ ме изобретайтны! Инженеръясӧс колӧ корны, мед найӧ изобретитӧны. Со главнӧй механик Зорина ёрт локтӧ. Шыӧдчылӧй сы дінӧ!
Пырӧ Зорина.
КУРЫДКАШИН. Лидия Харитоновна, зэв ёна кевмыся тіянлы, придумайтӧй мыйкӧ, медым газочурка ӧдйӧджык косьтыны. А то став удж сувтӧ, план орӧ. Ті ӧд инженер, быдтор вермад...
ЗОРИНА. Тайӧ делӧыд сложнӧй. Колӧ изучитны, расчётъяс вӧчны. Та вылӧ уна кад ковмас.
КУРЫДКАШИН. Пес косьтӧмыс нӧ мыйся сложнӧйтор? Дивӧ тай! А ещӧ инженеръяс!
ЗОРИНА. Тайӧ проблемасӧ должен решитны министерство, научно-исследовательскӧй институтъяс пыр, а не ми, практическӧй работникъяс.
КУРЫДКАШИН. Збыль ӧмӧй асьным, министерствотӧг да институттӧг, ог сяммӧй пес косьтыны?
ЗОРИНА. Сяммад кӧ и, косьтӧй!
КОЙМӦД ДЕЙСТВИЕ
КОЙМӦД КАРТИНА
Лесоучастокын нывъяслӧн общежитие. Куим койка, пызан, тумбочкаяс, чветъяс. Пызан дінын табуреткаяс. Этажерка вылын книгаяс.
Занавес воссигӧн Нина лыддьысьӧ, Валя кыӧ кружева, Груня дӧмсьӧ.
ГРУНЯ. Уна и тӧвар бара вайисны ОРС магазинӧ. И крепдэшин, и бостон, и котиковӧй манто, и духи, и помада...
ВАЛЯ. А тӧвся пальтояс эмӧсь?
ГРУНЯ. Эм, дерт. Мися тай, весиг котиковӧй мантояс вайисны. Ёна жӧ мича мантоыс! Вот эськӧ ньӧбны! Да деньгаӧй оз судзсьы. Ньӧба платтьӧ вылӧ крепдэшин да каблука французскӧй туфли.
ВАЛЯ. А меным пальто колӧ ньӧбны. Талун восьтылан магазинтӧ?
ГРУНЯ. Рытнас восьтыла. Лок бӧрйы да ньӧб. Быдсямаыс эм: мича и мисьтӧмджык, дона и донтӧмджык.
НИНА. Гынсапӧгъяс эмӧсь абу?
ГРУНЯ. Воисны сьӧд и руд гынсапӧгъяс. Сьӧдъясыс зэв мичаӧсь, буретш тэнлы кодьӧсь, но, дерт, донаджыкӧсь.
НИНА. Ме ньӧба донтӧмджыксӧ, деньгаыс унатор вылӧ на колӧ.
ГРУНЯ. Тэ жӧ верӧс сайӧ лӧсьӧдчан мунны, знатнӧй тракторист сайӧ, а сылӧн деньгаыд — додь тыр. Пӧльзуйтчы моментӧн, мед жӧникыд пасьтӧдас и кӧмӧдас юр вывсяньыд да кок улӧдзыд!
НИНА. Тэ, Груня, ньӧтчыд сэсся эн казьтыв ни свадьба йылысь, ни Кочев йылысь. Ме сы сайӧ ог мун.
ГРУНЯ. Но и йӧй. Эстшӧм жӧникӧс киысь лэдзны! Сійӧ жӧ некымын тысячаӧн тӧлысь босьтӧ! Шӧвк пиӧ пасьтӧдас!
ВАЛЯ. Верӧс сайӧ мунны колӧ радейтана ёрт да друг сайӧ, а не уна деньга босьтысь сайӧ. Верӧстӧ ӧд нэм кежлӧ корсян.
ГРУНЯ. Оз кӧ кажитчы — позьӧ на и юксьыны. Зато деньгаа мортыд пасьтӧдас-кӧмӧдас и чӧскыда вердас.
НИНА. Тэ, Груня, лыддян, мый мужиктӧ позьӧ чышъянӧс моз жӧ вежлавны: талун — ӧтикӧс, аски — мӧдӧс.
ГРУНЯ. Оз кӧ нӧ кажитчы, нэм чӧж овны али мый?
НИНА. Та вӧсна и колӧ водзвыв тӧдмавны жӧниктӧ, мед недель мысти эз ковмы юксьыны.
ГРУНЯ А мыйла нӧ тэ Кочев саяс он кӧсйы мунныс?
НИНА. Тэ, Груня, он гӧгӧрво тайӧ помкасӧ. Ме Кочевӧс радейта и сійӧ менӧ радейтӧ. Но сылӧн пытшкас вывті гырысь пережитокъяс, кодъяс оз лэдзны лӧсьӧдны миянлысь шуда олӧм.
ГРУНЯ. Аддзӧмыд тай сёрни кутшӧмкӧ пережиток вӧсна ӧткажитчыны эстшӧм жӧникысь! А ме пайысь бара кӧть сизимсё пережиток, медтыкӧ вӧлі уна деньга босьтӧ. Веритӧй менсьым, ме абу нин том, опыт эм менам.
ВАЛЯ. Тэнад опытыд, Груня, абу завидьтана. Кымынкӧд нин заводитлін овны, а пыр ӧтнад. Комын арӧсӧдз олін, а семья лӧсьӧдны пыр на эн вермы.
ГРУНЯ. А мый меным семьясьыс? Ӧтнамӧн овны доза лӧсьыдджык!
НИНА. А ме лыддя, мый сӧветскӧй морт оз вермы овны топыд семьятӧг.
ВАЛЯ. Кутшӧм нӧ олӧм семьятӧг, абу ӧд скӧтъяс.
НИНА. Шуда олӧм позьӧ аддзыны сӧмын топыд семьяын, кор тайӧ олӧмыс сочетайтчӧ общественнӧй олӧмкӧд. А ён семья лӧсьӧдӧм вылӧ миян странаын эм став условиеяс.
ГРУНЯ. Пыр больганныд семья йылысь, а асьныд некоднанныд жӧникӧс он аддзӧй.
ВАЛЯ. Прамӧй жӧникӧс аддзыны абу дзик прӧста, сійӧ абу пальто ньӧбӧм либӧ юрад шляпа пуктӧм.
ГРУНЯ. Век кӧть тіянкӧд споруйт, пом оз во. Ветла контораӧ.
Пасьтасьӧ да мунӧ.
ВАЛЯ. Мый и думайтӧ Груняыс? Мыйла сійӧ торкӧ семьясӧ Липиныслысь?
НИНА. А ачыс Пал Палычыс... Абу жӧ ӧд юртӧм! Челядь эмӧсь, а треплитчӧ Грунякӧд. И уджсӧ ӧд эновтіс дзикӧдз: лунын кыйсьӧ, а рытын Грунякӧд. Гортас пӧ оз и волыв.
ВАЛЯ. Мыйла сійӧс Красовыс лесопунктса начальникас видзӧ?
НИНА. Гашкӧ, оз на и тӧд сійӧ Липин поведение йывсьыс да. Красов ӧд ӧні лун и вой ноксьӧ выль поточнӧй метод внедряйтӧмӧн, оз и петавлы поточнӧй линияясысь, пыр велӧдӧ удж организуйтны да техника бурджыка используйтны. Леспромхозлӧн став аппаратыс пӧ ӧні пыр вӧрын. Регыд миянӧ воасны. И райкомса секретарь Сокерин тшӧтш вӧрын...
ВАЛЯ. Тӧндзия бӧрас меным век на абу лӧсьыд сы водзын. Красов ордӧ пырныс эг лэдз да.
НИНА. Тэнӧ ӧмӧй сэсь видісны?
ВАЛЯ. Эз, сералігтыр ошкисны бӧрыннас.
НИНА. Но, Красов да Сокерин кӧ босьтчисны, найӧ внедритасны поточнӧй методтӧ дзоньнас леспромхоз пасьтаӧ. Кыкнанныс зэв настойчивӧйӧсь.
ВАЛЯ. Ӧд сійӧ жӧ машинаяс и сы мында жӧ, а выль методнад уджалӧмӧн кык мында нин содіс вӧр кыскӧмыс!
НИНА. А ӧні вот чинны вермас, и зэв ёна.
ВАЛЯ. Мыйла?
НИНА. Тракторъяслы газочурка абу, ӧти сменаӧн уджалӧм вылӧ оз удитны косьтыны важ сушилкаясын. А запасыс йи пытшкӧ кынмӧма.
ВАЛЯ. Ті пӧ, шуӧны, Кочевкӧд газочурка вӧсна и лӧгасьӧмныд? Мый нӧ лои? Висьтав лючки? Кыдзи нӧ газочуркаыс вермӧ жӧника-невеста костас сюйсьыны? Да ещӧ дзикӧдз лӧгӧдны?
НИНА. Абу газочуркаын делӧыс, Валя. Кочев, вӧлӧмакӧ, ыджыд эгоист, сӧмын ас вӧснаыс тӧждысьӧ, а государственнӧй интересъяс пыдди оз пукты. Тэ тӧдан, Валя, ме сійӧс сэтшӧма радейті, сӧмын сыӧн и олі, ачымӧс лыдди свет вылас медся шудаӧн, думайті, мый аддзи аслым другӧс да ёртӧс нэм кежлӧ... Но чорыда ӧшибитчи.
ВАЛЯ. А гашкӧ, тэ эн гӧгӧрво сійӧс? Гашкӧ, сійӧ ӧшибитчис, гашкӧ, эз продумайт да сідз вӧчис? Обсудитам комсомольскӧй собрание вылын?
НИНА. Огӧй. Ещӧ думыштас, мый ме сылы вештыны кӧсъя либӧ ещӧ мыйкӧ. А сылӧн поступокыс абу сӧветскӧй мортлӧн кодь.
ВАЛЯ. А тэ, Нина, правильнӧ вӧчин, кор ассьыд муса морттӧ видін да эновтін ас кежас? Тадзи ӧмӧй коліс вӧчны сӧветскӧй нывлы? Ме кӧ эськӧ тэ местаын, убедиті сійӧс, мыйын сійӧ не прав. Сійӧ ӧд абу враг. Сійӧ комсомолец, медбур тракторист. А тэ сы вылӧ сьӧвзин дай мунін... Нина, думыштлы та йылысь. Абу на сёр исправитны... Ме контораӧ жӧ ветла. (Пасьтасьӧ.)
НИНА. Менам эськӧ колӧ жӧ ветлыны Курыдкашин дінӧ, но бӧртіджык.
ВАЛЯ. Ветлы Кочев дінӧ, сёрнитӧй прамӧйджыка, сьӧлӧмсянь.
НИНА. Ог, Кочев дінӧ ме ог мун.
Валя мунӧ. Нина сьылӧ нора сьыланкыв. Пырӧ Курыдкашин.
КУРЫДКАШИН. Чолӧм, Нина. Эг вермы виччысьны, аслым лои локны.
НИНА. Чолӧм. Пуксьы, шойччы. Мыйла нӧ нин сэтшӧма ковми?
КУРЫДКАШИН. Витӧд поточнӧйысь газочурка вайисны. Тракторъяс заводитісны уджавны. Час кык мысти колӧ станция заведитны.
НИНА. Ме кӧть ӧні верма мунны.
КУРЫДКАШИН. Ӧні нинӧмла на... А мыйла нӧ тэ сэтшӧм жугыль?
НИНА. Сідз прӧста.
КУРЫДКАШИН. Сідз прӧста нинӧм оз овлы. Со бледман, косьман.
НИНА. Гашкӧ, уна уджала да сійӧн.
КУРЫДКАШИН. Уджалан уна, сійӧ збыль. Но уджалӧмысь оз омӧльтчыны, а гажа сьыланкывъяс сьывлӧны. Омӧльтчӧны да нор сьыланкывъяс сьылӧны сӧмын влюблённӧйяс.
НИНА. А ті мыйӧн тӧданныд?
КУРЫДКАШИН. Ог нин ӧд тэнӧ первойӧн татшӧмнас аддзы. Да и ас вылам тайӧс жӧ испытайтлі неважӧн, во комын сайын.
НИНА. Неважӧн тай.
КУРЫДКАШИН. Ме виччыся свадьба вылӧ корӧм, а тіян костӧд пӧ сьӧд кань котӧртӧма. Мый нӧ лои?
НИНА. Капитализм пережитоккӧд менам некутшӧм свадьба оз ло.
КУРЫДКАШИН. Пережиток сайӧ мунны, дерт, оз лӧсяв. А мыйын нӧ сійӧ пережитокыс, позьӧ тӧдмавны?
НИНА. Сійӧ сӧмын асьсӧ тӧдӧ, ас вӧснаыс тӧждысьӧ...
КУРЫДКАШИН. Вот тайӧ нин и абу збыль. Войдӧрлун Кочев дзонь лекция лыддис миян трактористъяслы, кыдзи сійӧ уджалӧ, кыдзи трелюйтӧ сё кызь кубометрӧн сменаын и... кыдзи сійӧ вентиляция ӧшиньын косьтӧ газочурка...
НИНА. Та йылысь висьталіс и?
КУРЫДКАШИН. Висьталіс. А мый? Тӧрыт татшӧм жӧ лекция лыддис коймӧд потокса трактористъяслы.
НИНА. Збыль?
КУРЫДКАШИН. А чайтан, ме тэнӧ ылӧдлыны локті? Кочев миян леспромхозын медбур тракторист! Збыль, сійӧ зэв упрямӧй, эз выполнит приказ кондаӧн заправляйтӧм йылысь. Но сійӧ лои прав. Сылӧн трактор пыр ӧтмоза уджалӧ, а коді заправляйтіс кондаӧн, сылӧн тракторыс ремонт вылын. Сӧмын Кочев ӧні мыйлакӧ зэв скӧр да тайӧ скӧр йывсьыс кутіс смена чӧжӧн трелюйтны сё комын кубометрӧн, а ӧтчыд войся сменаын трелюйтіс сё ветымын кубометр.
НИНА. Газочурка косьтӧмнад нӧ век на нинӧм эз артмы?
КУРЫДКАШИН. Мый нӧ артмас, асьным кӧ ми нинӧм ог вӧчӧй та кузя?
НИНА. А ми нӧ мый вермам вӧчны?
КУРЫДКАШИН. Ог кӧ тай вермӧй, со мукӧд поточнӧйысь жӧ и лоӧ водзӧсасьны. А некымын лун мысти и сэні оз ло. Но, тэ, сідзкӧ, час кык мысти локтан? А ме муна.
НИНА. Локта, локта. Ме час петала жӧ магазинӧ гынсапӧг ньӧбны.
Пасьтасьӧ, сэсся кыкнанныс мунӧны. Недыр мысти пырӧ Груня, гӧгӧр видзӧдлӧ, сэсся бӧр петавлӧ да пыртӧ гажакодь нин Липинӧс. Груня ӧдйӧ вайӧ пызан вылӧ литра джын вина да закуска, гӧститӧдӧ сійӧс.
ГРУНЯ. Юышт, Паша, юышт, ӧні некод оз лок.
ЛИПИН. Ӧтлаын юыштам! (Юӧны, закусывайтӧны.) Груня... Грунюша... (Нюжӧдчӧ окавны.)
ГРУНЯ (быттьӧ ӧтдортчӧ). Кутшӧм мича котиковӧй мантояс воисны магазинӧ... (Кутлӧ да окалӧ Липинӧс.). Ньӧб меным ӧтикӧс, мантосӧ... Тэныд ӧд премия сетасны... Пӧдарит меным... радейтан кӧ...
ЛИПИН. Ещӧ тай юасян... Кор нӧ ме тэныд ӧткажитлі? (Окалӧ, ещӧ юӧны.)
ГРУНЯ. А гашкӧ, талун и петалам магазинас? Бырны вермас! Йӧзыдлӧн ӧні деньгаыс уна! (Ещӧ кисьтӧ, Липин юӧ.)
ЛИПИН. Час либӧ сберкассаысь деньгасӧ босьтла да петалам!
ГРУНЯ. Ёна жӧ тэ менам шань, Пашенька. (Окыштӧ.) А кор нӧ нин ми ӧтлаын кутам овныс? Кор кутам чӧсмасьны ӧтласа олӧмнас, кор нин дугдам повны суӧмысь да йӧз сёрниысь?
ЛИПИН. Вот мыйӧн эштӧдасны кык квартираа керка стрӧитӧм, пыр жӧ и овмӧдчам сэтчӧ ӧтлаын.
ГРУНЯ (бара кисьтӧ да юкталӧ). Кор нӧ сійӧ эштас?
ЛИПИН. Локтан неделяс эштас. Аскисянь сэтчӧ дас рабочӧйӧс содта.
ГРУНЯ. Гашкӧ либӧ ветлам сберкассаад. Ме тшӧтш ветла. (Пасьтасьӧ.)
ЛИПИН (чеччӧ). Ветлам. Кыкӧн гажаджык... Да... Коркӧ эськӧ колі жӧ кутшӧмкӧ потокӧ ветлыны, важӧн нин эг вӧв сэн, ог тӧд мый и вӧчсьӧ... Ладнӧ мастеръяс бурӧсь да уджалӧны, оз подведитны, а то вермасны...
Занавес.
Занавес водзвылын, прожектор югӧр улын: ӧтмӧдар боксянь паныд петӧны Липин да Груня. Липин ружьеа, Груня котиковӧй мантоа.
ЛИПИН. Грунюша, чолӧм! Сьӧлӧм косьтысьӧй менам, мый дыра нин ме тэнӧ эг аддзыв!
ГРУНЯ. Чолӧм.
ЛИПИН. Вай кӧть ӧтчыд окышта, донаӧй менам!
ГРУНЯ. Мун сэтысь, пӧрысь ловелас!
ЛИПИН. Грунюша, мый тэкӧд лои? Мыйысь тэ ме вылӧ лӧгасин?
ГРУНЯ. А мый меным радлыныс тэ вылӧ? Удж вылысь тэнӧ снимитісны! Кодлы тэ ӧні колан, пӧрысь выжыв? (Ӧдйӧ мунӧ.)
ЛИПИН. Груня! Груня!.. Муніс. Ставӧн ме дінысь бергӧдчӧны...
Пырӧ Курыдкашин.
КУРЫДКАШИН. Олан-вылан, Пал Палыч!
ЛИПИН. Чолӧм, Курыдкашин ёрт!
КУРЫДКАШИН. Бара нин кыйсьыны мӧдінныд?
ЛИПИН. Кутшӧм нин кыйсьӧм. Сідз тай со петі... Вай куритчам. (Сетӧ папироска.) Омӧлик олӧм, зон, пуксис менам. Коркӧ ӧтчыд, во дас сайын кымын...
КУРЫДКАШИН. Кыйсигӧн?
ЛИПИН. Кыйсигӧн...
КУРЫДКАШИН. Кыйсьӧм йывсьыд, зон, меным некор кывзыныд, план тыртны колӧ. Тэрмася ме. Вот юав зрительяслысь. Кӧсйӧны кӧ найӧ кывзыны — висьтав, сӧмын пӧръясьтӧг.
ЛИПИН. Найӧ, зон, оз кывзыны, чужӧмъяс сертиыс аддза.
КУРЫДКАШИН. Но, меным некор жӧ. Прӧщай! (Мунӧ.)
ЛИПИН. Мунны кӧть ӧдйӧджык йӧз син водзсьыс, дзикӧдз юрӧй яналіс.
Мунӧ.
НЁЛЬӦД ДЕЙСТВИЕ
НЁЛЬӦД КАРТИНА
Сцена сэтшӧм жӧ, кутшӧм и мӧд действиеын.
Сцена вылын Кочев да Дымов.
ДЫМОВ. Но мый тэ паръястӧ ӧшӧдін? Отчаивайтчыны нинӧмла. Тайӧ сылӧн сӧмын ичӧтик каприз.
КОЧЕВ. Абу. Тайӧ абу каприз. Сійӧ менам... ме кӧсйи шуны... мися, Нина ньӧти абу капризнӧй. И посниторйысь сійӧ оз скӧрав. Характер сылӧн прӧстӧй. Сійӧ зэв добродушнӧй. Но принципиальнӧй. Решитас кӧ — сэк ставыс.
ДЫМОВ. Но тэ сійӧс радейтан?
КОЧЕВ. Ещӧ тай юасян.
ДЫМОВ. И сійӧ тэнӧ радейтӧ?
КОЧЕВ. Радейтліс. А ӧні ненавидитӧ.
ДЫМОВ. Збыль кӧ радейтліс, сразу ненавидитны оз вермы.
КОЧЕВ. Шуӧны, радейтӧмсянь пӧ ненавистьӧдз сӧмын ӧти воськов.
ДЫМОВ. Мунам сы дінӧ да ставсӧ объяснитам.
КОЧЕВ. Таысь пӧльза оз ло.
ДЫМОВ. Мыйла? Сійӧ ӧмӧй абу морт, абу сӧветскӧй ныв?
КОЧЕВ. Ог мун ме сы дінӧ объяснитчыны та кузя.
ДЫМОВ. Он мун сы дінӧ? А код дінӧ нӧ мунан?
КОЧЕВ. Некод дінӧ ог, и корсьны ог кут, ассьым нэмӧс ӧтнам ола.
ДЫМОВ. Но, тайӧ нин тэнад челядь сёрни.
КОЧЕВ. А тэ ногӧн пӧдругаӧс, ёртӧс позьӧ вежлавны, позьӧ аддзыны быд лун выльӧс? Оз. Мӧдӧс радейтны ме ог вермы. И овмӧдчыны кӧ семейнӧй олӧмӧн, то сӧмын сыкӧд. Гӧтырыд абу трактор. Прамӧй тракторист и тракторсӧ ассьыс оз вежлав.
ДЫМОВ. Но мый тэ меным доказывайтан. Ме ӧмӧй сы вӧсна, медым тэ выльӧс аддзин? Ме сӧмын тэнӧ Нинакӧд миритны кӧсъя.
КОЧЕВ. Мый менӧ миритны сыкӧд, ме ӧд ог лӧгав сы вылӧ. Радейта сійӧс важ моз, а гашкӧ, и ещӧ на ёнджыка, позьӧ кӧ ёнджыкасӧ...
ДЫМОВ. Ог гӧгӧрво ме тэнӧ, Сеня. Мый нӧ тэ ӧні кӧсъян вӧчны? Шогсьыны?
КОЧЕВ. Ог. Ме муна татысь. Гашкӧ, кокниджык лоӧ. Мунтӧдз сӧмын ассьым обязательствоӧс тырта. И кора ме вӧсна не беспокоитчыны. А татчӧ, Нина дінӧ, ме локті дзик мӧд вопрос кузя.
ДЫМОВ. Но, но, сідзкӧ, тэд отсӧг оз ков?
КОЧЕВ. Оз, Костя, оз ков. Аттьӧ.
ДЫМОВ. Сідзкӧ, аддзысьлытӧдз.
Дымов мунӧ. Кочев недыр чӧв пукалӧ.
КОЧЕВ. Мыйла нӧ ме газочурка косьтӧм йывсьыс сылы эг висьтав, гашкӧ, отсаліс-а... (Лӧсьӧдчӧ мунны сы бӧрся, но паныдасьӧ Нинакӧд.) Чолӧм, Нина Николаевна. Меным колӧ сёрнитыштны тіянкӧд.
НИНА. Нинӧм йылысь миянлы сёрнитныс, Кочев ёрт. Ставсӧ нин висьталӧма. Мӧд пӧв висьтавны тӧлк абу.
КОЧЕВ. Нина Николаевна, неужели ми врагъяс, весиг и сӧветуйтчыны оз позь?
НИНА. Мый йылысь нӧ сӧветуйтчыныс?
КОЧЕВ. Менам абу любовнӧй вопрос, а производственнӧй.
НИНА. Производственнӧй?
КОЧЕВ. Да. Ме зэв ёна переживайті, кор тэ менӧ шуин эгоистӧн, пережитокӧн, не сӧветскӧйӧн. Сэсся дыр думайті. И вои выводӧ, мый тэ правильнӧ шуин. Ме вӧлі чайта, мый газочурка йылысь вопрос сійӧ инмӧ директорлы, лесоучастокса начальниклы, мастерлы. А менам делӧ — трактор да ме.
НИНА. А водзӧ мый?
КОЧЕВ. А водзӧ вот и локті ӧні тэ дінӧ, медым тайӧ ӧшыбкасӧ ӧтвылысь исправитны, сӧветуйтчыны тэкӧд.
НИНА. Мыйын?
КОЧЕВ. Тэ тӧдан, вентиляторад позьӧ ӧтпырйӧ косьтыны не ӧти кӧрзина, а нёльӧс либӧ витӧс.
НИНА. Кыдзи?
КОЧЕВ. А со кыдзи! (Кочев нетшыштӧ вентиляция улысь ичӧтик брезент, код улӧ ӧшӧдӧма нёль кӧрзина.) Вот тайӧ брезент пыддиыс кӧ вӧчны сэтшӧмтор, коді эськӧ эз лэдз пӧсь воздухыслы мунны вывлань, а пыр эськӧ йӧткысис водзӧ, сэк эськӧ позис ещӧ на унджык кӧрзина ӧшӧдны. Коймӧд поточнӧйын ӧні квайтӧс нин ӧшӧдӧны.
НИНА (думайтӧ, аслыс арталӧ). Сэтшӧмтор... Ыджыд труба? Пӧвъясысь топыд камера? И не кӧрзинаяс, а решётка некымын судта? Вот тайӧ идея!
КОЧЕВ. Нина Николаевна, ӧшыбкаыд ӧд уналӧн овлӧ. Миян пиын пыдын на пукалӧ тайӧ эгоизмыс, личнӧй славаӧ зільӧмыс, сэк жӧ общегосударственнӧйсӧ вунӧдӧмӧн.
НИНА. Ой! Аддзи! Артмас!
КОЧЕВ. Мый аддзин, мый артмас, Нина?
НИНА (восторгын, гораа). Сеня! Сенечка! Сенюк, донаӧй! Выльысь тэнӧ аддзи! (Окалӧ.)
КОЧЕВ. Нина, мый тэкӧд? Менам чужӧмӧй мыськытӧм, няйтӧсь...
НИНА. Сенюк, изобретатель тэ менам! (Окалӧ.)
КОЧЕВ. Кутшӧм ме изобретатель? Мый тэ ме вылын серавлан?
НИНА. Самӧй настӧящӧй газочуркаяс косьтӧмын изобретатель! Ӧні мӧдасны миян став тракторъяс! Простойяс сэсся оз лоны, и леспромхозлысь план перевыполнитам! (Горзӧ, кияссӧ вом дорас вайӧмӧн.) Мастер ёрт, Курыдкашин ёрт! (Мӧд бокӧ.) Дымов ёрт! Сямтомов ёрт! Котӧртӧй татчӧ! Ӧдйӧджык!
КОЧЕВ (повзьӧмӧн). Нина, мый тэ вӧчан? Дугды!
НИНА. Курыдкашин ёрт! Сямтомов ёрт! Татчӧ!
Быд боксянь котӧртӧны Курыдкашин, Дымов, Сямтомов.
КУРЫДКАШИН. Кыті сибдіс?
СЯМТОМОВ. Мый лоис? Мыйла корин?
ДЫМОВ. Мый горзан? Кыті сотчӧ?
НИНА. Изобретательӧс аддзи!
СЯМТОМОВ. Кутшӧм изобретательӧс?
ДЫМОВ. А ме чайті, мыйкӧ серьёзнӧйтор лоӧма.
КУРЫДКАШИН. Шуткаястӧ меным тэ эновт, Нина. Эн заставляйт старикӧс весьшӧрӧ котравны.
НИНА. Кыдзи нӧ весьшӧрӧ, кор ме изобретательӧс аддзи?
ДЫМОВ. Кутшӧм изобретательӧс?
НИНА (гордӧя индӧ Кочев вылӧ). Со кутшӧмӧс!
КУРЫДКАШИН. Эновт, мися, шуткаястӧ!
НИНА. Тайӧ абу шутка! Кочев ёрт изобретитіс газочуркаяс ускореннӧя косьтан метод!
КУРЫДКАШИН. Кыдзи тэ висьталін?
СЯМТОМОВ. Збыльысь?
ДЫМОВ (индӧ Кочев вылӧ). Тайӧ?
НИНА. Да. Сійӧ. (Босьтӧ газочуркаяс да сеталӧ ставлы.) Мый тайӧ?
КУРЫДКАШИН. Тӧдӧмысь, газочурка.
НИНА. Кутшӧм?
СЯМТОМОВ. Кос, буракӧ.
ДЫМОВ. И пӧсь.
НИНА. Сеня тайӧс косьтіс кык час чӧжӧн.
Ставныс видзӧдӧны Кочев вылӧ.
КОЧЕВ. Эг ме. Ме сӧмын пукті косьтыныс...
КУРЫДКАШИН. Кытчӧ?
Пырӧны: Сокерин, Красов, Зорина, Валя да рабочӧйяс.
НИНА. Электростанцияса вентилятор ӧшиньын. Тані Кочев косьтіс нёль кӧрзина, а ми ӧні кутам косьтыны кык кубометрӧн быд кык часын! Вентиляторсяньыс ми нюжӧдам труба. Ме придумайті нин. Пӧвъясысь вӧчӧм труба. Со тадзикӧн! Пытшкӧсас лӧсьӧдам стеллаж-решётка. Решётка вылас кисьтам газочурка кык либӧ куим кубометр, и кык-куим час мысти пес дась! Тані жӧ лӧсьӧдам разделочнӧй площадка электропилаӧн. Ӧти рабочӧй кутас пилитны, поткӧдлыны и косьтыны став нёльнан тракторыслы куим смена вылӧ пес! А ПЭС–40 электростанцияыд эм миян быд поточнӧй линияын, сідзкӧ, быдлаын позьӧ организуйтны пес косьтӧм!
КУРЫДКАШИН. Вот тайӧ да! Кыдзи нӧ ме, нэм чӧж уджалі вӧрын да, татшӧм прӧстӧй, торйӧдзыс эг додумайтчы? Неважӧн на ӧд этійӧ ӧшиняс ватникӧс косьті! Эх, сибдалӧ, тыдалӧ, пӧрысь юрвемыд!
СЯМТОМОВ. А ме кымынысь косьтылі тані ассьым кепысьясӧс?!
КУРЫДКАШИН. Но вот, Нина! А тэ вӧлі шуан, мый изобретательясӧн вермасны лоны сӧмын инженеръяс да учёнӧйяс! А ті, Зорина ёрт, сӧмын министерство, научнӧй институтъяс пыр. А пестӧ, вӧлӧмкӧ, позьӧ вӧрысь аддзыны, Москваысь закажиттӧг!
КРАСОВ. Курыдкашин ёрт, сет распоряжение, медым талун жӧ вӧлі татчӧ установитӧма электропила, вӧчӧма стеллажнӧй труба, решёткаясӧн. Зорина ёрт, Нина да Кочев ёртъяскӧд ӧні жӧ вӧч чертёжъяс Кочев методӧн газочурка ускореннӧя косьтӧмлысь, медым аски ыстыны став лесоучастокъясӧ!
ЗОРИНА. Ме леспромхоз водзын ёна мыжа. Но дӧвеританныд кӧ, аслам водзӧ уджӧн докажита, мый ме сӧветскӧй специалист и верма уджавны.
РАБОЧӦЙЯС ПӦВСТЫН ШУӦМЪЯС: Зорина делӧ тӧдӧ! Уджавны кужӧ! Оз кӧ сы мында кут ноксьыны порсьяскӧд — быдтор вӧчас! Мед уджалӧ!
КОЧЕВ. Красов ёрт, ми трактористъяс, уджалам сӧмын кӧкъямыс час, а дас квайт час миян тракторъяс прӧста сулалӧны. Оз-ӧ позь тракторъяснымӧс сутки чӧж уджӧдны? Сэк эськӧ ми куим мында пондім сетны вӧр та мында жӧ машинаӧн. Менам помощникӧй тырвыйӧ нин вермӧ лоны сменщикӧн, ме сылы спокойнӧя дӧверита ассьым тракторӧс. Уджавныс ӧд дзик ӧткодь, лунын кӧть войын! Рыт-асыв пемыднас тай нӧ уджалам?
СОКЕРИН. Та йылысь ме важӧн нин мӧвпала, но пыр виччыси, мед трактористъяс асьныс водзмӧстчисны. И со, найӧ шыасисны. Тракторӧн збыль позьӧ уджавны сутки чӧж. Вӧрын сӧмын лунын уджалӧм — сійӧ важыслӧн коляс, пережиток. Важӧн, мыйӧн пемдыліс, вӧрын некутшӧм удж йылысь эз позьлы мӧвпыштлыны, став олӧмыс сэн замирайтліс. А ӧні? Ӧні миян вӧрын лунын кодь жӧ югыд, и уджавны позьӧ сутки чӧж! Кочевлысь предложение колӧ поддержитны, вуджны первой кык смена вылӧ, а сэсся куим вылӧ.
КРАСОВ. Совершенно правильнӧ, зэв ценнӧй предложение.
КОЧЕВ. А вой кежлас кӧ увйыныс оз кутны удитны, ми увъяснас кутам трелюйтны. Площадка вылын увъясны, сэні югыд.
СЯМТОМОВ. Тайӧ эськӧ, гашкӧ, и бур, но разделочнӧй площадка вылын разделывайтныс оз кутны удитны, да Дымов бара менсьым голиӧс вундас.
ДЫМОВ. Ме кывлі, кутшӧмкӧ леспромхозын пӧ хлыстъясӧн кыскалӧны вӧрсӧ улыс складӧдз да сэні разделывайтӧны. Мыйла нӧ миянлы оз позь на моз жӧ вӧчны? Хлыстнад пӧ ӧд кык пӧв унджык позьӧ кыскыны!
КРАСОВ. Колӧ прӧверитны расчётъяс.
ГУДКОВ. Ме прӧвериті тӧрыт, журналысь лыдди да. Таысь кындзи, хлыстӧвӧй вывозка сетӧ позянлун бырӧдны верхньӧй разделочнӧй площадкаяс, чинтӧ рабочӧйяслысь лыд разделка вылысь вообще, бырӧдӧ лишнӧй операция верхньӧй складын штабелюйтчӧм кузя, ӧддзӧдӧ погрузка...
ДЫМОВ. Вот, вот, ме тадзи жӧ кывлі.
КРАСОВ. Обязательнӧ кутам кыскавны хлыстъясӧн.
СОКЕРИН. Партия, правительство дӧверитісны миянлы ыджыд делӧ — выль техника используйтӧмӧн, выль методъяс применяйтӧмӧн кыпӧдны вӧр промышленностьын удж производительность, медым коммунизмлӧн великӧй стройкаяслы сетны унджык древесина, медым миянлысь народнӧй хозяйство обеспечитны вӧрӧн.
КРАСОВ. Татшӧм замечательнӧй йӧзӧн ми венам став трудностьяс и коммунизмлӧн великӧй стройкаяслы сетам сы мында вӧр, мыйта налы ковмас. Миян возможностьяс, резервъяс помтӧмӧсь, рабочӧйяслӧн дерзание безграничнӧй!
КУРЫДКАШИН. Татшӧм первокласснӧй техниканад уджалӧмыд, майбыр, абу вӧвъясӧн да лучкӧвӧй пилаӧн тільсьӧм!
НИНА. Важӧн-ӧ на вӧлі шуан, машинаыд пӧ пыр ремонт корӧ?..
КУРЫДКАШИН. Машинаясыд тай, нылукӧ, вежисны менсьым мӧвпъясӧс...
СОКЕРИН. Вӧр промышленностьын техника успешнӧя осваивайтӧмын да применяйтӧмын тіян эмӧсь гырысь успехъяс. Медся донаыс таын сійӧ, мый промышленностьлӧн тайӧ выль отрасль рационализируйтӧмын да уджалан методъяс пыр водзӧ усовершенствуйтӧмын тіян участвуйтӧны став передовӧй рабочӧйяс. Тайӧ туй кузя колӧ мунны и водзӧ! Талун ме тіянлы вайи нимкодь юӧр, ёртъяс. Вӧр промышленность уджӧ выль, медся передовӧй методъяс пыртӧмысь миян сӧветскӧй правительство присудитіс сталинскӧй премия леспромхозса директор Красов ёртлы!
СТАВӦН. Ура! Ура! Ура!
НИНА. Мед олас Сталин ёрт! Ура!
СТАВӦН. Ура!
Занавес.
Пом.
