ТУРЪЯЫН

(Емдін уездын)

Туръяын эм коммунист, комсомол ячейкаяс, профсоюз. Коммунист ячейкаын ӧти шлен да куим кандидат. Йӧз пӧвстын уджалӧмныс налӧн пӧшти оз тӧдчы, асланыс собранньӧяс овлывлӧ шоча.

Комсомол ячейкаын 20 морт. Удж налӧн мунӧ зэв бура. Секретарныс ячейкаас уджавны сяммӧ. Собранньӧяс вӧчлывлӧны тшӧкыда, сёрнитӧны сэні уна йылысь. Велӧдчӧны политграмотаӧ, видз-му кыдзи уджавны. Йӧзыс комсомолечьяс вылӧ видзӧдӧны бура, волывлӧны найӧ собранньӧяс вылӧ, бӧрйӧны обществолы уджаланінъясӧ. Со Исполкоманыс бӧрйӧма ӧти комсомолеч. Сы вылӧ и надейтчӧны, шуӧны, сійӧ пӧ бура сувтӧдас удж Исполкомын.

Профсоюзын йӧзыс эськӧ уна да, уджыс некутшӧм оз мун. Вӧчасны кӧ собранньӧ, унджык шленыс оз лок. Мый шуасны собранньӧ вылын вӧчны, оз вӧчны мукӧд шленыс. Колӧ заводитны бурджыка уджавны. Коді оз кӧсйы уджавны да кывзыны, нинӧм союзад видзӧмысь.

Гырысь йӧзӧс заводитісны велӧдны ноябр 1 лунсянь. Уджсӧ нуӧдӧны кыкӧн, челядь школаын велӧдысьяс. Йӧзыс зэв волӧны велӧдчыны. Кӧсйӧны вӧлі кутчысьны велӧдны ӧні кежлӧ 25 мортӧс, локтісны 36 морт.

Велӧдысьяс йӧз пӧвстын уджалӧны бура, комсомолкӧд ӧтвыв.

Лыддьысян керка заводитчис уджавны октябр тӧлыссянь. Удж нуӧдысьыс зэв зіль. Ӧні йӧз велалі лыддьысян керка бердӧ, быд рыт волывлӧ морт кызь кымын. Газет да журналъяс лыддьӧм кындзи, позьӧ тӧдмавны быдсяма справкаяс. Лыддьысян керкаын лӧсьӧдӧма спектак вылын ворсан кружок, сьылысьяс кружок.

Госторгын эм зэв уна тӧвар, сӧмын оз вузавны сьӧм вылӧ, корӧны ур ку. Таво урыс этша вӧлі, нинӧм мында эз вермыны кыйны. Бурджык эськӧ вӧлі тӧвар вузавны сьӧм вылӧ.

Селькор.