КОДІ МЫНТАС

Колян во тӧвнас Зӧвсьӧртса (Емдін уездса) нёль крестьянин: Исаков В. В., Ячменев П. И. да, Агафонов Г. Е. да, Агафонов И. Г. уджавлісны Прокопьевскӧй вӧлӧсьтын шпал бердын. Северолесын служитысьяс — Исаков А. И. Мельников С. Ф.-кӧд медавлӧмаӧсь. Сійӧ уджалӧмсьыс колӧ вӧлі босьтны 130 шайт гӧгӧр.

Делянкаас, кӧні уджалісны тайӧ нёль мортыс, шпал лэдзны босьтчис Отса кер лэдзан артель. Артельыслы эськӧ колі мынтысьны Зӧвсьӧртса крестьяналы уджалӧмсьыс, да сійӧ эз мынтысь. Кӧсйӧма мынтысьны уджавны медалысьыс, Мельников. Сійӧ жӧ вӧлі сетӧма Гамса складысь сёян-юан тайӧ нёль мортыслы.

Шпалъяссӧ да пуръялӧмсӧ примитіс Северолесса служак письыс Исаков. Сійӧ уджалӧмысь сьӧмла тшӧктӧма ветлыны Яренскӧ Мельников ордӧ. Мельниковыд мынтысьӧм пыдди босьтас да крестьянатӧ ыстас Отйӧ кер лэдзан артельӧ. Сэні уджалӧмысь нёль крестьянаыдлы сьӧмсӧ оз ставсӧ сетны, 85 шайт 57 ур абу сетӧмаӧсь.

Сійӧ сьӧмсӧ корсьӧм вӧсна ӧти морт нёль крестьяна пиысь ветлас Яренскӧдз куимысь, Отйӧдз кыкысь, нёльысь Гамӧ, ӧтчыд Емдінӧ, сӧмын нинӧм оз артмы. Ветлӧма лои ставсӧ 700 верст кымын, воши лун 15−20 видз вылын уджалан кадӧ.

Оз ӧмӧй нӧ тайӧ пӧсьӧн перйӧм сьӧмсӧ сетлыны некор? Сьӧмыд ӧд лёка ёна колӧ крестьянинлы, нӧшта нин ӧні, вот мынтыны да нянь ньӧбны. Позьӧ ӧмӧй тадзи уджалӧмысь не мынтысьны, мырддьыны мортлысь нянь?

Коді нӧ мынтысяс?

Нокӧ босьтчылӧй разьны тайӧ дзугсӧ кодлы мог.