АЙКИНАЫН

(Емдін уезд улын)

Таво нянь воис омӧль. Мукӧдыслӧн регыд сёйсяс тӧвся няньыс. Тӧлын унаӧн зэв медасялісны кер да пес лэдзны. Таво мунісны Богослов заводӧ морт 78 кымын.

Исполком.

Исполком уджалӧ бура. Юралысьыс кандидатын коммунист партияын. Ёна зільӧ самӧкур пуӧмысь, юӧмысь дугӧдны йӧзӧс. Ӧні ёна босьтчисны вот чукӧртӧм удж бердӧ. Ноябр кызь витӧд лун кежлӧ вӧлі чукӧртӧма 1030 шайт. Вот эз на ставыс чукӧрмы. Унджык коммунистъяс да профсоюзса шленъяс мынтісны вогӧгӧрся вотнысӧ ставсӧ ӧтпырйӧ.

Кооператив.

Вӧлӧсьтын эм куим Епо. Медбура на пиысь уджалӧ Айкинаса Епо. Сы вӧсна кымынкӧ ӧтка вузасьысьлы лои мунны Айкинаысь, эз кутны налысь босьтасьны йӧзыд. Ӧні Айкинаын сэтшӧм вузасьысьяс ньӧти нин абу. Октябр тӧлысьын воссис инвалидъяслӧн кооператив, Рыков ёрт нимӧн шуисны. Сэтӧні шленыс 28 морт. Бура удж нуӧдысьыс абу да, некыдзи уджсӧ оз вермыны сувтӧдны. Сӧмын лавкааныс кымынкӧ сімӧм литовка куйлӧ, дас кымын нига да этшаника мукӧд посни тӧвар.

Эм крестьяналы удждысян тӧварищество. Сэтчӧ пырӧма 320 морт. Сійӧ таво уна удждыліс вӧвъяс лӧсьӧдалӧм вылӧ. Ӧні уджйӧзсӧ крестьянасянь заводитчӧ чукӧртны. Тӧвариществоысь удждысьысь зэв уна.

Лыддьысян керка уджалӧ бура. Пӧшти быд рыт овлӧ собранньӧяс да кружокъяслӧн велӧдчӧм. Эм справкаяс сеталан пызан. Сэні быд рыт дежуритӧны коммунист да комсомол ячейкаяссянь. Лыддьысян керкаӧ ёнджыкасӧ волӧны томджык йӧз, олӧмаясджык сьӧкыда кыпалӧны. Тшӧкыда овлывлӧ спектакъяс, ловъя газет.

Профтехшколаын колӧ уна ремонт вӧчны. Колӧ обшивайтны, мавтны вевтсӧ. Ремонт вӧчтӧг школаыд регыд дзикӧдз киссяс.

Гырысь йӧзӧс босьтчисны велӧдны неважӧн на. Велӧдчыны йӧзыс зільӧны. Медся ёна зільӧны допризывникъяс.

Пельшӧр олӧ бокын верст сайын, некутшӧм удж нуӧдны оз кутчысь ни, оз отсав ни. Весиг собранньӧяс вылӧ оз волывлы. Пукалӧ быттьӧ ош гуын.

Всеработпрослӧн быд вежонын овлывлӧ собранньӧяс, сӧмын чукӧртчывлӧны найӧ школаын, кытчӧ йӧзыс оз волыны. Колӧ эськӧ налы восьтыны ӧдзӧс собранньӧ выланыс тшӧтш йӧзыслы.

Селькор.