ГӦРДАРМЕЕЧЬЯСЛӦН ЧУКСАСЬӦМ
Миян газет лэдзанінӧ тшӧкыда локтӧ юӧръяс коми гӧрдармеечьяссянь. Найӧ гижӧны, кыдзи Гӧрд Армияын олӧны, мый уджалӧны, кыдзи велӧдчӧны. Став юӧрсьыныс тыдалӧ — коми том морт казялӧма нин бура, мыйла сійӧ Гӧрд Армияын, тӧдӧ, кодӧс дорйӧ, аддзӧ нин, коді сылӧн ёрт, коді неёрт. Медся ёна татшӧм юӧръясын тӧдчӧ коми гӧрдармеечлӧн чуксалӧм ассьыныс бать-мамнысӧ, вокъяссӧ, чойяссӧ, другъяссӧ бурджык олӧм вылӧ, велӧдчӧм вылӧ. Налӧн юӧръясныс гора, ёна гора чуксалӧ, садьмӧдӧ, велӧдӧ. Аддзис гӧрдармееч став пемыдлунсӧ, лёк олӧмсӧ аслас коми сиктас.
Со татӧні юӧр ӧти красноармеечлӧн. Сійӧ ачыс Межадорысь (Сыктыв уездысь), Истомин Иван Ӧльӧксей. Ӧні служитӧ Ленинградын. Тыдалӧ, мортыс этша велӧдчылӧма, муртса грамота тӧдӧ, юӧрсӧ омӧля гижӧма (омӧля сӧмын ортсысяньыс, пытшкӧсыс бур, югыд, сьӧлӧмсяньыс). Истомин ёрт гижӧма том йӧзлы, кодъяс ӧні кежлӧ гортӧ на колисны. Со мый сійӧ гижӧ: «Тшӧкта ме тіянӧс вермасьны бать-мамъяс пемыдлунӧн, тшӧкта найӧс велӧдны грамотаӧ; висьталӧй налы, мед оз кутны челядьӧс школаӧ ветлӧмысь, медым асьныс велӧдчасны. Эновтӧй асьныд войпукъястӧ, мунӧй школаясӧ, клубъясӧ, корсьӧй югыдлун. Косясьӧй, том йӧз, пемыдлункӧд, сійӧ миянӧс долыд олӧмысь сайӧдӧ. Энӧ вунӧдӧй миян дона велӧдысь Ленинлысь кывъяс: „Дасӧд во тыран Октябр революция лун кежлӧ мед эз вӧв миян весиг ӧти лыддьысьны-гижны кужтӧм морт“, — нуӧй сійӧ кывъяссӧ олӧмӧ». Куим пӧрйӧ Ленин ёртлысь кывъяссӧ казьтыштӧма юӧрас. Со кутшӧма сьӧлӧм вылас воӧма тайӧ кывъясыс, кутшӧма дольӧ аслас ёртъяслы.
Водзынджык гижӧ: «Медся нин ёна миянлы, войвылын олысьяслы, колӧ велӧдчӧмыд. Миян коми крестьянин му бердын во гӧгӧр уджалӧ-пессьӧ, да няньыс нинӧм мында оз волы. Сійӧ ставыс уджавны кужтӧм вӧсна. Колӧ заводитны миян му-видз уджавны выль ног, нигаясӧ гижӧм серти да агрономъяс висьталӧм серти. А велӧдчытӧгыд ӧд он тай нигаястӧ лыддьы».
Со мый, коми йӧз, тіян пияныд Гӧрд Армиясянь гижӧны. Кывзӧй!
Том коми войтыр! Тіянлы чукӧстчӧ коми том гӧрдармееч. Сійӧ локтас да юасьны кутас, мый ті вӧчинныд. Ставныд босьтчӧй чорыда пемыдлункӧд косясьны.
