ВАСИЛИЙ ИВАНОВИЧЛӦН ГУСЯТОР

Гырддзанас пызанӧ мыджсьӧмӧн да чуньяссӧ юрси пиас вӧйтӧмӧн Василий Иванович зумыша видзӧдӧ пелькиник бумага лист вылӧ. Чужӧм сертиыс он гӧгӧрво: скӧралӧ сійӧ али шогсьӧ. Сьӧд синкымъясыс букыштчӧмаӧсь, но синъясыс рамӧсь, весиг меліӧсь. Лолалӧ лӧня, рӧвнӧя. Василий Иванович киын кӧ вӧлі карандаш, а пызан вылас чистӧй бумага, позис чайтны, мый сьӧкыд задача решайтӧ либӧ кывбур гижӧ. Но пызан вылын куйлан бумага вылӧ тырыс печатайтӧма и ки помысь, чернилаӧн гижӧма. Гижӧдсӧ Василий Иванович уна пӧв нин лыддис и леспромхозын, и гортӧ локтігас, и гортас пыр на сы вылӧ видзӧдӧ.

— Вася, Вась! — кыліс орчча жырсянь гӧтырыслӧн небыдик гӧлӧс.

Василий Иванович черӧбсидзискодь, лэдзис шуйга кисӧ пидзӧс вылас, веськыд кинас вештыштіс ныр увсьыс бумагасӧ да ышловзьӧмӧн валитчис улӧс вылӧ. Син улас сылы уси стенын ӧшалан ыджыд портрет. Василий Иванович быттьӧ первойысь на аддзис сійӧс, кутіс азыма видзӧдны. И кажитчӧ, быттьӧ зэв уна выльтор сэні лоӧма, кодъясӧс Василий Иванович эз на аддзыв. Со юрсиыс, кажитчӧ, ёнджыка дзормӧма, тшӧтшкӧртӧм усъясыс кузьджыкӧсь лоӧмаӧсь, а синъясыс ещӧ меліджыкӧсь. Петличкаясас маршал звездаясыс кажитчӧны гырысьджыкӧсь, а морӧс пасьтала орденъясыс югыдджыкӧсь.

Василий Иванович бара ыджыда ышловзис. Сійӧ эз кывлы, кыдзи гӧтырыс локтіс сы дінӧ да мышкас сувтӧмӧн тшӧтш кутіс видзӧдны портрет вылӧ. Сэсся Васьлысь юрсисӧ небыдика шылькнитіс да юаліс:

— Тэ нӧ мый, первойысь на аддзин Ворошиловлысь портретсӧ, мый сідз видзӧдан? Ме тэнӧ ӧбӧдайтны чуксала, шыд кӧдзалӧ, а тэ весиг он шыась.

— Тэ, Танюш, он гӧгӧрво менӧ, — ещӧ ӧтчыд ышловзьӧмӧн чӧвтіс Вась.

Татьяна збыльысь видзӧдліс Василий Ивановичлы синъясас да ки пӧлӧдыс сійӧс ӧбӧдайтны нуӧдігмоз дӧзмӧмпырысь шуис:

— Ме вӧлі ог гӧгӧрво, а ӧні, буракӧ, куті гӧгӧрвоны. Тэ лунысь-лунӧ пыр ёнджыка жугыльман. Весиг он сёрнит мекӧд. Юала, мый лои тэкӧд, а он висьтав, кутшӧмкӧ гусятор ас пиад кутан, кодӧс весиг гӧтырлы висьтавны оз позь. Тэд, тыдалӧ, мӧд мусмӧма...

— Дугды, йӧюк! — торкис Вась гӧтырсӧ, пызан сайӧ пуксигмоз.

— Мыйла нӧ дугда. Став олан серыд тэнад сэтшӧм лои да. Ме ӧд тэнӧ ог кут, и ог вермы кутны. Кыдзи кужан — сідзи и ов. Вот ӧні курорт вылӧ мунан да вӧля лоӧ: некод тэнӧ оз аддзы ни оз кут.

— Нинӧм абусӧ, Танюш, эн сёрнит. А то ог мун курорт вылас. Ӧні жӧ косявла путёвкасӧ, — збыльысь, скӧрмӧмпырысь орӧдіс Вась. Сэсся ӧдйӧ чеччис да гырысь воськовъясӧн веськӧдчис бӧр мӧд жыръяс, ылысянь на чургӧдіс кисӧ, медым кватитны пызан вылысь путёвкасӧ.

Татьяна уськӧдчис Вась бӧрся, панйис сійӧс да водзджык удитіс кватитны путёвкасӧ.

— Тэ збыльысь али прӧста менӧ повзьӧдлан? — кутіс пеньгыны Татьяна. — Тэд сетісны премия, кыдзи медбур вӧрлэдзысьлы, стахановецлы, сетісны путёвка Крымӧ, а тэ дузъялан, да ещӧ косявлыны грӧзитан. Висьтав веськыда, мый тэкӧд, мый тэд оз тырмы? Быд во тэнӧ премируйтӧны. Быдлаын тэнӧ ошкӧны. Сёян мый колӧ. Пасьтасян карса паськӧмӧн. Мый тэд ещӧ колӧ? А уськӧд ноко тӧд вылад, кыдзи батьыд важӧн овліс? Вот тэ да ме эг тӧдлӧй сэтшӧм олӧмсӧ. А колі эськӧ, мед тэ кӧть ӧти во кер пӧдрадщик ордын уджалін. Сэк, гашкӧ, эн вӧв татшӧм.

Василий Иванович пыр чӧв оліс, кывзіс. Сэсся коскӧдыс кутіс Татьянаӧс да раминика бара:

— Тэ он гӧгӧрво менӧ, Татьяна.

— Он гӧгӧрво, он гӧгӧрво, — нерыштіс Татьяна мужиксӧ. — Пыр тэнад ӧтитор.

— Кывзы, Таня. Весьшӧрӧ тэ думайтан, мый ме абу здӧвӧлен олӧмӧн, чайтан, мый ме ог аддзы ассьыным лӧсьыд, шуда да гажа олӧмнымӧс. И дзик прӧста тэ вежӧгтан менӧ кодкӧ дінӧ. Тэысь кындзи некод менам абу. А тэнӧ радейта важсьыс на ёна. Мем сӧмын ӧтитор колӧ... Но менӧ оз гӧгӧрвоны, весиг тэ он гӧгӧрво...

Василий Иванович орӧдіс сёрнисӧ, бара синъяссӧ чӧвтіс Ворошилов портрет вылӧ да ышловзис.

— Мый нӧ сэтшӧмыс тэд колӧ, мыйла мем он висьтав?

Недыр чӧв олӧм бӧрын Василий Иванович орйӧдлӧмӧн вочавидзӧ:

— Тӧдан, Таня, абу лӧсьыд висьтавны... кывйӧй оз бергӧдчы... ещӧ серавны кутан. Ме тэд ог висьтав, и тэ эн юась. А кор лоас сійӧ, кор аддзан — видны он кут. Верит мем.

— Эн ылӧдлы менӧ. Некутшӧм гусятор тэнад абу, кор путёвка кӧсъян косявлыны. Тэ, буракӧ, юртӧ дзикӧдз воштӧмыд.

— Мыйла тэ менӧ он кӧсйы гӧгӧрвоныс? — зэв нуртӧма юалӧ Вась.

— Ме гӧгӧрвоа. А тэ вот мыйла он гӧгӧрво: тэнӧ премируйтісны путёвкаӧн, кыдзи знатнӧй стахановецӧс, а тэ косявлан сійӧ премиясӧ? Да тэнӧ непӧштӧ премируйтны, а вӧтлыны колӧ вӧрлэдзанінсьыс! — пузис Татьяна. — Ме вот муна да ставсӧ висьтала леспромхозын.

Василий Иванович тшӧтш пузис да ас тӧдлытӧг восьтіс гӧтырыслы гусяторсӧ, кодӧс дыр нин ёна старайтчӧмӧн видзис ас пытшкас. Ӧнія моз жӧ Татьяна унаысь заводитліс юасьны гусятор йывсьыс, но пычиктыны нинӧм эз вермы, а ӧні, скӧрмӧмпырысь, ставыс эрдӧ петіс ӧтпырйӧ, кыдзи пузьӧм йӧв ыджыд би вылын петӧ каструляысь. Кыкнан кинас шенасигтыр Василий Иванович тэрыба да гора кисьтіс:

— Мый мем путёвкасьыд! Окота кӧ Крымӧ ветлыны, ме ачым ньӧба. Оз тырмы али мый менам деньгаӧй? Этша ли мый нажӧвита? Коді ещӧ ме мындаыс нажӧвитӧ! Менам удждонӧй, веськыда кӧ шуны... — тані Вась джӧмдыштліс, луасьыштіс юр вежӧрас, кодкӧд эськӧ сравнитны ассьыс удждонсӧ, сэсся юрсӧ гогнитӧмӧн рявкнитіс — ...профессорлӧн дорысь на вылын! Кутшӧм вӧрлэдзысь сяммӧ ме мында керсӧ вӧчны! Коді ещӧ меысь кындзи воысь воӧ мекӧд ӧтмында да ме моз кужӧ уджавны? Некод оз.

— А ас мозыд уджавныс тэ кодӧскӧ велӧдін? Мыйла тэ пыр зілян дзебны ассьыд уджалан ногтӧ, — сюйыштіс Татьяна, но Василий Иванович вӧлі вывті пузьӧма, медым кывны да гӧгӧрвоны тайӧ кывъяссӧ. Татьяна сёрнитігкості сійӧ удитіс сӧмын пӧв-мӧдысь лолыштны, медым водзӧ кисьтны:

— А мыйӧн менӧ дӧзмӧдан татшӧма уджалӧмсьыд... мыйӧн наградитісны?

— Тэд сетісны путёвка Крымӧ, сетісны патефон, костюм дӧра... И ставыс тайӧ удждонысь ӧтдор, ставыс премия! Ещӧ на тэд этша! А кутшӧм патераын олан?

— Сетісны... Премия... А мый мем татшӧм премиясьыд? Висьтала тай тэд, мися, ставсӧ тайӧс ме верма ачым ньӧбны.

— А мый нӧ тэд сэсся колӧ?

— Мый колӧ? Кымын во чӧж ме уджалі вӧрын, став вын-эбӧсӧс и кужанлунӧс пукті, кымын сюрс кубометр кер вӧчи, кымын во стахановец и кымын во чӧж надейтчи, мися, наградитасны, кӧть нин «Знак Почёта» сетасны, а мем сӧмын премияяс чӧвталӧны, — норасьӧмӧн, гӧлӧссӧ чинтӧмӧн да кок улас видзӧдӧмӧн помаліс Василий Иванович.

Татьяналӧн скӧрмӧмыс воши. Сійӧ мӧвпыштіс: «Со мый сылӧн вӧлӧма гусяторйыс. Со мый йылысь сійӧ вӧлӧм мӧвпалӧ, уна вой узьтӧг колльӧдӧ, со мый вӧсна сылы оз ковны премияясыд». И нерыштіс думсьыс мужиксӧ: «Кӧть нин «Знак Почёта»!

Татьяналы друг тешкодь лои, сійӧ нюмдіс да Васьлы мышкӧн бергӧдчӧмӧн гажаа чӧвтіс:

— Эз наградитны — значит, эн на заслужит. Вот и ставыс.

Вензьӧм ори. Василий Иванович лэдзчис диван вылӧ да вӧйтчис аслас мӧвпъясӧ. «Эн на заслужит!» Тайӧ кывъясыс чорыда сатшкисны Василий Ивановичӧс. Сійӧ виччысис гӧтырсяньыс сочувствие, чайтіс, мый сійӧ кыдзкӧ гажӧдыштас, кокньӧдыштас сылысь уна вося збыльмытӧм мӧвпсӧ, гашкӧ, индас туй, кыдзи пӧртны олӧмӧ. А сійӧ пурттӧг сатшкис: «Эн на заслужит».

Дыр пукаліс Василий Иванович, дыр мӧвпаліс, арталіс тайӧ кывъяссӧ, но некутшӧма эз вермы сӧгласитчыны накӧд. Кыдзи вермис Татьяна, сылӧн гӧтыр, шуны, мый Василий Иванович эз на заслужит весиг «Знак Почёта». Кыдзи сылӧн кывйыс бергӧдчис тадзисӧ шуныс? Но, гашкӧ, инӧ, эз на заслужит «Орден Ленина» либӧ орден «Трудового Красного Знамени». А «Знак Почёта» тырвыйӧ заслужитіс. Василий Иванович, кыдз шуасны, потомственнӧй вӧрлэдзысь. Батьыс сылӧн нэмсӧ вӧрын уджаліс, кӧть унджык кадсӧ и кер пӧдрадщиклы куш кынӧмпӧт перйӧм вылӧ тойтліс, но уджаліс зіля, сямӧн. Ачыс Василий Иванович томысянь жӧ уджалӧ вӧрын, сы кодь сюсь вӧрлэдзысьыс шоч. Уна во нин сійӧ стахановец, тысячник. Василий Иванович — культурнӧй вӧрлэдзысь. Лунысь лунӧ сійӧ лыддьӧ газетъяс, журналъяс, книгаяс библиотекаысь, кык газет да журнал судзӧдӧ ачыс. Сійӧ ветлӧ киноӧ, театрӧ. Василий Иванович велӧдчис кружокъясын, сылӧн эм «Ворошиловскӧй стрелок» да «ПВХО» значокъяс, кодъяс пыр дзирвидзӧны сы морӧсын. Вӧрлэдзысьяс пӧвстын сійӧс важӧн нин оз нимтыны Иван Васьӧн либӧ Шабур Иван пиӧн, а ыдждӧдлӧны Василий Ивановичӧн. Унаысь нин сы йылысь гижлісны газетъясын. Та дінӧ позьӧ содтыны: кор сійӧ вӧлі гӧтыртӧм на, сэк ёна радейтлісны нывъяс, кыдзи сюсь да ён вӧрлэдзысьӧс да мича, авъя том зонмӧс. Унаӧн асьныс веськыда висьтавлісны та йылысь, а Вера Шуктомова весиг бӧрдіс, кор Вась шуис сылы, мый радейтӧ Татьянаӧс.

Василий Иванович кыпӧдіс юрсӧ, синкым пырыс моз видзӧдліс пызан сайын книга лыддьысь гӧтырыс вылӧ да весиг яндзимкодь лои скӧралӧмсьыс, думсьыс каитчыны кутіс, мыйла висьталіс гӧтырыслы ассьыс гуся мӧвпсӧ, гусьӧн видзан колӧмсӧ, кодӧс сы дыра кутіс ас пытшкас, код йылысь сы дыра мӧвпаліс, код вӧсна сэтшӧма зілис да тӧждысис. Ӧні гӧтырыс шмонитны кутас сы вылын, олан туй оз ло.

Медым дзугны гӧтырсӧ, медым путкыльтны ассьыс висьталӧмсӧ, медым гӧтырыс эз верит, мый сылы зэв окота пӧлучитны орден, Василий Иванович нарӧшнӧ серӧктіс да гажаа шуӧ Татьяналы:

— А тэ чайтін, мый ме збыльысь, дай веритін?

Татьяна орӧдчис книгасьыс, гӧгӧрвотӧма видзӧдліс Вась вылӧ:

— Мыйсӧ?

— Но... Мый ме шогся, эз наградитны да, мый мем окота пӧлучитны кӧть нин «Знак Почёта»...

— Мый нӧ эськӧ представляйтчан! — веськодя чӧвтіс Татьяна да бара копыртчис книга весьтӧ.

Василий Ивановичлы кокньыдик лои сьӧлӧм вылас. Сійӧ мӧвпыштіс:

— Таня оз нин верит висьталӧм гусяторлы, оз кут шмонитны ни йӧзӧ оз петкӧд. Сідзкӧ, орден получитны надейтчӧмыс да колӧмыс Васьлӧн бара лоӧ аслас, ӧтнаслӧн гусяторйӧн. А Васьлы позьӧ надейтчыны орден вылӧ, Вась заслужитіс нин сійӧс, кӧть гӧтырыс и шуис, мый «эн на заслужит». Кӧть мый, а Василий Ивановичлы сетасны орден. Кӧть кыдзи, а Василий Иванович шедӧдас либӧ «Трудӧвӧй Знамя» орден либӧ орден «Знак Почёта».

Василий Ивановичлысь мӧвпъяссӧ торкис Татьяна. Книгаас видзӧдігтырйи, небыд кывъясӧн, быттьӧ оз Васькӧд, а аскӧдыс сёрнитӧ либӧ книгасьыс лыддьӧ, сійӧ шуаліс:

— Орден получитны кӧсйӧм — абу омӧльтор. Быд честнӧй сӧветскӧй мортлы окота пӧлучитны Сӧветскӧй правительствосянь высшӧй награда, орден. Но орден колӧ заслужитны. Сійӧс прӧста оз ӧшлыны морӧсӧ. Орденӧн награждайтӧны подвиг вӧчӧмысь, ыджыд заслугаысь.

— Вот тайӧ тэ збыль шуин, — ошкыштіс Василий Иванович Татьяналысь бӧръя кывъяссӧ. А ачыс мӧвпыштіс: «Наградитӧны сӧмын подвиг вӧчӧмысь — тайӧ збыль. Но вӧрлэдзан удж вылын некутшӧм подвиг вӧчны он вермы. Сё кубометрӧн лун ӧти мортлӧн ньӧтчыд оз артмы, а сезонын сюрс кубометр вӧчӧм — сійӧ ӧні абу нин подвиг, тысячникыд ӧні зэв нин уна. Колӧ мунны мӧд удж вылӧ, кӧні позьӧ вӧчны подвиг да кӧні награждайтӧны.

Василий Иванович зіля чеччис, этажерка вылысь босьтіс газет чукӧр да тэрмасьӧмӧн кутіс корсьны орденӧн наградитӧм йылысь СССР-са Верховнӧй Сӧветлысь Указъяс. И аддзис Указ лётчикъясӧс, водолазъясӧс, шахтёръясӧс, артистъясӧс, пограничникъясӧс, кӧрттуй вылын уджалысьясӧс наградитӧм йылысь юӧръяс. Но Василий Иванович абу лётчик ни абу водолаз, абу артист ни абу пограничник. Дерт, Василий Иванович вермас и лётчикӧн и артистӧн лоны, но ӧд дыр ковмас велӧдчыны, а велӧдчигӧн оз наградитны, сідзкӧ, дыр ковмас виччысьны. А вот кӧрттуй вылын уджавны сійӧ, пӧжалуй, вермас и дыр велӧдчытӧг, абу ӧд быть лоны машинистӧн, сэн позьӧ и прӧстӧй стрелочникӧн либӧ мӧд удж вылын уджалігӧн вӧчны подвиг. Сэні абу вӧрлэдзӧм.

* * *

Вагонын мунігӧн Василий Иванович пыр думайтіс, кутшӧм удж вылын кӧрттуй транспортын сійӧ вермас вӧчны подвиг, медым правительство наградитіс. Василий Иванович вель дыр сёрнитіс проводниккӧд, юасис сылысь, кутшӧм профессияяс эмӧсь, виччысьӧмӧн юаліс, коді эськӧ вермас регыдджык отличитчыны. Котельничын Василий Иванович сёрнитіс та могысь жӧ кузь уска машинисткӧд, а Буй прӧйдитӧм бӧрын весиг главнӧй дінӧ шыӧдчис. Главнӧй эськӧ и ёна вӧлі оз эшты, но кор сы дінӧ збыльысь шыасисны, чигарка куритігчӧж сёрнитіс Васькӧд.

Главнӧй висьталіс, мый кӧрттуй вылын уджавны лӧсьыд дай почётнӧй удж, мый кӧрттуйлӧн тӧдчанлуныс страналы вывті ыджыд. Сэсся главнӧй ошйысис, мый неважӧн правительство наградитіс орденъясӧн да медальясӧн кӧрттуй вылын уджалысьяс пиысь уна сё мортӧс.

Наградитӧм йылысь бӧрын Василий Иванович сёрнисӧ водзӧ эз нуӧд. Сылы эз ло лӧсьыд, весиг нуртӧммис. Полка вылӧ гатш водӧмӧн сійӧ дыр мӧвпаліс кӧлесаяс гольскӧм шы улын. Сэсся лайкыда гычӧдӧмыс кутіс лазгӧдны сылысь синъяссӧ.

Регыд Василий Иванович веськаліс паровозӧ, топка дорӧ, кузь уска машинист дінӧ, кодкӧд сёрнитіс Котельничын. Машинист долыда здоровайтчис да Васьлы киас кӧрт зыр сетігмоз шуис:

— Но, Шабуров ёрт, тэ буретш кадӧ локтін. Кочегар менам висьмис, тэ вежан сійӧс. Босьт зырсӧ да шуруйт бура, мед парыс оз усь, мед поездным оз сёрмы.

Василий Иванович нимкодя кутчысис зырйӧ, заводитіс уджавны, а шуруйтӧм костъясас кутіс тӧдмасьны машинаӧн. Регыд сійӧ гӧгӧрвоис, кыдзи колӧ поездсӧ вӧрзьӧдны водзӧ, кыдзи сувтӧдны, тормозитны. А ачыс мӧвпалӧ, мый сійӧ регыд вермас лоны машинистлы отсасьысьӧн.

Мыйкӧ дыра мунӧм мысти кузь уска машинист шуӧ Василий Ивановичлы:

— Вай лок татчӧ ӧшинь дорас да видзӧд, а ме сэк кості папирос куритышта. Мыйкӧ кӧ казялан — висьтав.

Кузь уска машинист пуксис куритчыны, а Василий Иванович сувтіс ӧшинь дорӧ.

Паныд тӧлыс летӧдӧ Василий Ивановичлысь юрсисӧ, малалӧ чужӧмсӧ. Гораа кашкигтырйи, трубасьыс тшын пуркйӧмӧн паровоз пыр ӧтарӧ ӧддзӧдӧ ассьыс мунӧмсӧ. Кок улын вуджӧртӧны шпалъяс. Насыпь пӧлӧн телеграф столбъясын лайкъялӧны проводъяс, быттьӧ нотнӧй книгаын помасьтӧм визьяс. Водзынджык, быттьӧ панласигтырйи, гӧнитӧ вӧрыс дзоньнас, и ылысса пуясыс гӧнитӧны ӧдйӧджык матыссаяс дорсьыс.

Синъяссӧ читкыртӧмӧн Василий Иванович чожа видзӧдӧ водзӧ. Поезд лэбзьӧ джуджыд насыпь вывті. Туйыс неуна чукыльтӧ бокӧ.

Друг Василий Ивановичлӧн ёсь синъясыс ылысянь казялісны туй вывсьыс идралӧм рельсъяс. Василий Иванович личкыштіс тормоз ручкасӧ, весиг машинистлы горӧдны эз удит. Кор поездыс сувтіс да Василий Иванович машинисткӧд чеччыштісны насыпь вылӧ, аддзисны, мый паровозлӧн водз кӧлесаяс муртса метр джын абу воӧмаӧсь рельсы помӧдз. Ещӧ кӧ шпал вомлӧст — и лои эськӧ крушение.

Вагонъясысь чепӧсйӧм пассажиръяс пырысь-пыр жӧ кытшалісны Василий Ивановичӧс, кутісны аттьӧавны крушениеысь мездӧмысь. Главнӧй сэні жӧ гижис рапорт Каганович ёрт ним вылӧ, а рапортас индіс Шабуровӧс правительствоӧн наградитӧмӧ представитӧм йылысь.

Кор Василий Иванович воис Москваӧ, сылы паныд вокзал вылӧдз локтіс ачыс Лазарь Моисеевич да аслас машинаӧн веськыда нуис Кремльӧ. Спасскӧй воротаӧд Кремльӧ пыригӧн часӧвӧй кутіс корны билет Василий Ивановичлысь. Василий Иванович вочавидзис, мый сійӧ локтӧ наградала и некутшӧм билет оз ков сылы. Но часӧвӧй Кремльӧ пырны некыдз эз лэдз, кутчысис сояс да весиг тракӧдыштӧмӧн гораа шуӧ Васьлы:

— Гражданин, ваш билет!

Василий Иванович друг восьтіс синъяссӧ, видзӧдліс. Сойӧдыс сійӧс тракӧдӧ кондуктор:

— Гражданин пассажир, предъявите билет.

Дӧзмӧмпырысь кондукторлы билет петкӧдлӧм бӧрын Василий Иванович ӧдйӧ бергӧдчис мышкӧн, медым пыр жӧ ланьтны да помӧдз аддзыны тайӧ лӧсьыд мича вӧтсӧ. Но ланьтны Василий Иванович эз вермы. Сідзи эз и помась тайӧ вӧтыс.

Крымӧ вотӧдз Василий Иванович унаысь водліс узьны полка вылӧ, быд ногыс зілис аддзыны Кремльӧ пырӧм, но нинӧм эз артмы.

Феодосияӧ воигӧн Василий Иванович вӧлисти эновтіс вӧтӧн орден шедӧдӧмсӧ, думсьыс весиг серавны кутіс асьсӧ. Сэсся друг сылы юрас татшӧм мӧвп воис: «Кӧрттуй вылын уджалысьясӧс правительство неважӧн на наградитіс. Матысса кадӧ бара награждайтны оз кутны. Сідзкӧ, нинӧмла и удж вылас сэтчӧ вуджныс, мӧдлаысь колӧ корсьны. Вот воднӧй транспортын эз на награждайтлыны. Навернӧ, регыд кутасны награждайтны. Сэтчӧ колӧ веськӧдчыны, кытчӧдз абу на сёр. Сэні позьӧ пароход вылын штурвальнӧявны».

Василий Иванович дась вӧлі кӧть ӧні жӧ бергӧдчыны туй вывсьыс да пырны пароход вылӧ, но крымса паськыд муяс вылысь шобді саридзсӧ видзӧдігӧн вунӧдчис.

Феодосияын, шойччыны мунысь мукӧд войтыркӧд тшӧтш, Василий Иванович пуксис автобусӧ да муніс Коктебельӧ. Машинаыс бура дыр кайис гӧра вылӧ. Сэсся шуйгавылас и веськыда водзын воссис Чёрнӧй морелӧн помтӧм эрд. Василий Ивановичлӧн синъясыс быттьӧ сибдісны море серпасас. Сэтшӧм мича сылы кажитчис первойысь на сыӧн аддзӧм мореыс.

Недыр мысти машинаын пукалысь пассажиръяс костын лыбис шум. Веськыд ки вылын пукалысьяс ӧшиньӧд кинысӧ вылӧ чургӧдӧмӧн ӧта-мӧд вежмысьт висьталӧны мыйкӧ ыджыд гӧлӧсӧн. Василий Иванович зіля бергӧдіс юрсӧ да видзӧдліс ӧшиньӧд. Кельыдлӧз сынӧдысь сійӧ казяліс дас кымын планер. Кодкӧ висьталіс, мый тані мунӧ планернӧй состязание.

Василий Иванович мӧвпыштіс: «А мый, ме кӧ тшӧтш заводита паритны? И друг рекорд пукта! Вот и... орден сетасны!»

Сэк кості автобус воис санаторий дінӧ. Чемодан сдайтӧм бӧрын Василий Иванович лэччис пляж вылӧ. Берег кузяла сэн йӧз. Ставныс гожъялӧмаӧсь, быттьӧ бронзӧвӧйӧсь. Кор Василий Иванович пӧрччысис купайтчыны да видзӧдліс ас вылас, быдсӧн эз ло лӧсьыд, быттьӧ сійӧ ӧтнас пасьтӧм, сэтшӧм еджыд.

Мореӧ уськӧдчылӧм бӧрын сійӧ водіс пляж вылӧ, медым ӧдйӧджык гожъявны да ӧбедӧдз бергаліс ӧти боксянь мӧд вылӧ. Василий Иванович чайтіс сійӧ жӧ луннас лоны мукӧд кодь бронзӧвӧйӧн.

Сэтшӧм нин характерыс Василий Ивановичлӧн: мыйкӧ кӧ думыштас, кӧть мый, а вӧчас, шедӧдас, и кыдз позьӧ ӧдйӧджык. И ӧні сідз жӧ: аддзис гожъялӧм йӧзӧс, и пыр жӧ заводитіс гожъявны. И гожъялас, лоас мукӧд кодь. Гожъялӧмыд абу нин зэв сьӧкыдтор. Гырысьджыкторъяс вермӧ шедӧдны Василий Иванович, кор шуас: «Шедӧда». Тадзи жӧ вӧлі кодкӧ воӧ. Василий Иванович шуис аслыс: «Тайӧ сезонын вӧча сюрс кубометр кер». И вӧчис. А куйлігтырйи гожъялӧм йывсьыд и сёрнитны оз сулав. Василий Ивановичлӧн вӧлі сӧмын ӧтитор, кодӧс сійӧ пыр на эз вермы шедӧдны: награда.

Но Василий Ивановичлӧн гожъялӧмыс эз артмы. Рытнас сылӧн кайис температура 40 градусӧдз. Врачьяс урчитісны: солнечнӧй удар. Асылӧдз сы дінын дежуритісны.

Аскинас Василий Иванович лунтыр куйліс вольпасьын. Унатор сійӧ удитіс мӧвпавны. А бӧрвылас решитіс: колӧ лючки шойччыны. И раз сійӧ сы ылнасянь локтіс татчӧ шойччыны — тайӧ вӧлі медся правильнӧй решение.

* * *

Недель чӧж Василий Иванович гажаа шойччис. То сійӧ купайтчӧ, то гӧра вылӧ кайӧ, то крабъясӧс кыйны ветлӧ: шпагат помӧ дука яйтор кӧрталас да став тӧждысьӧмыс вунлӧ Василий Ивановичлӧн. Сӧмын сёйӧ да гажӧдчӧ, да шойччӧ, а унаысь челядь моз весиг ворсліс пляж вылын.

Ӧти рытӧ Василий Ивановичӧс ёртыс нуӧдчис ветлыны «клубӧ». Клубыс тані, кыдз шуасны, гожся: стен ни вевт абу, эм сӧмын сцена, а «залас», сцена водзвылас, скамьяяс сувтӧдалӧмаӧсь.

Клубын Василий Ивановичлы пуксьыны некытчӧ нин вӧлі, став местаыс тыр. Ёртыскӧд сійӧ матыстчис сцена дорӧ, медым матынджык вӧлі видзӧдны.

Занавес воссьӧм бӧрын сцена вылӧ петіс том морт да ки пӧвсӧ лэптыштігмоз шуӧ:

— Ёртъяс, талун миянӧ локтіс гӧсьт, Герой Советского Союза Никифоров ёрт...

Аплодисментъяс шы вевттис том мортлысь гӧлӧссӧ. Василий Ивановичлӧн быдӧн вомыс калькаліс. Ас синмӧн сійӧ аддзас и ас пельӧн кылас Сӧвет Союзса геройӧс. Йӧзкӧд тшӧтш сійӧ сьӧлӧмсяньыс кутіс аплодируйтны.

Василий Иванович воображениеын Сӧвет Союзса геройыд вӧлі аслыссяма, мукӧдысь ёна торъялана. Сійӧ, дерт, ёна ыджыд шӧр тушаа йӧзысь, морӧсыс паськыд да вылын, юрсӧ вылын жӧ кутӧ, а ветлӧ, кӧнкӧ, зэв сюся. И век нин геройтӧ, кӧнкӧ, позьӧ кокньыда казявны уна сюрс морт пиысь. Василий Иванович уна нин лыддьыліс геройяс йылысь, уна кывліс найӧ подвигъяс йылысь, унаӧс аддзыліс снимокъяс да картинаяс вылысь, но ас синмӧн талун первойысь на аддзас.

Тадзи мӧвпалігкості сцена вылӧ петіс пелькиник тушаа, бритӧм юра, сьӧд костюма томиник морт, да полігтырйи ньӧжйӧник восьлаліс сцена водздорлань. Василий Иванович дӧзмискодь быдӧн, мыйла сцена вылӧ лэдзӧны быдсяма бокӧвӧй йӧзсӧ, кор сетісны нин кыв Сӧвет Союзса геройлы. Юрсӧ гогнитыштӧмӧн сьӧд костюма здоровайтчис, но Василий Иванович эз казяв, синъяссӧ сійӧ вӧлі веськӧдӧма сцена пыдыса ӧдзӧсӧ, медым аддзыны геройлысь петӧмсӧ. «Залын» кыптісны аплодисментъяс да «ура» горӧдӧм шыяс. Ӧні Василий Иванович вӧлисти видзӧдліс сьӧд костюма том морт вылӧ да сы морӧсысь казяліс кык орден. Синъясыс лап-лап муніны, шемӧс босьтіс сійӧс: «Татшӧм томиникыс... татшӧм ичӧтыс — герой!»

А герой вӧлі висьталӧ нин аслас лэбалӧм йылысь, врагӧс бомбитӧм йылысь. Висьталӧм сертиыс сійӧ нинӧм торъясӧ абу и вӧчӧма, ачыс весиг шуис, мый любӧй сӧветскӧй гражданин эськӧ сідз жӧ вӧчис.

Рытнас Василий Иванович дыр эз вермы ланьтны, дыр сы син водзын дзирдалісны геройлӧн орденъясыс. Думсьыс Василий Иванович видіс асьсӧ, мыйла сійӧ абу лётчик. Сэсся тшупис аслыс: тайӧ ичӧтик мортсӧ кӧ наградитісны, сідзкӧ, и менӧ наградитасны.

Курорт вылын олігӧн Василий Иванович уна боксянь арталіс, кутшӧм удж вылӧ сылы мунны, кӧні вермас олӧмӧ пӧртны ассьыс мӧвпъяссӧ да чорыда решитіс: «Муна уджавны пароход вылӧ».

* * *

Арся пемыд пырыс би югӧръяснас муртса тӧдчыштӧмӧн паськыд ю шӧрті шлачӧдӧ пур кыскысь буксир. Кӧдзыд вой тӧлыс, кажитчӧ, став вынсьыс зільӧ путкыльтны тайӧ ичӧтик пароходсӧ, но оз вермы да скӧрысь шутьлялӧ сы мачтаын, киргӧ трубаын, швачӧдӧ бортъясӧ гырысь веж гыясӧн. Енэжын ӧшӧдчӧмӧн лэбӧны гудыр сьӧд кымӧръяс. Тшӧкыда на и дзикӧдз сайӧдлӧны берегъяссӧ сап пемыд занавесӧн.

Пароход палуба вылын морт абу. Не кӧ би югӧръясыс, позьӧ чайтны, мый пароходыс ӧтнас ачыс мунӧ, йӧзсӧ кытчӧкӧ берегӧ эновтӧмӧн. Но быд ӧшиньӧд дзузгысь би югӧръясыс висьталӧны, мый пароходвывса команда дзебсьӧма кӧдзыд вой тӧвсьыс каютаясӧ. Сӧмын штурвальнӧй рубкаын вуджрасьӧ морт: то ӧтарӧ, то мӧдарӧ бергӧдлӧ ыджыд кӧлесасӧ, бакенъяс вылын гӧрд да еджыд би чусалӧм серти ва туй корсьӧмӧн.

Пемдігас буксирлӧн капитан Потапов ыджыд вой тӧв вӧсна, вывті пемыд вӧсна кӧсйӧ вӧлі сувтны берег дорӧ, медым не сибдыны либӧ не жугӧдны пурсӧ. Лоцман сӧгласитчис Потаповкӧд, но штурвальнӧй тшӧть моз сувтіс паныд:

— Кыдз нӧ позьӧ войбыд кежлӧ сувтны берег дорӧ, кор быд час дона, кор ӧти войӧн юыс вермас сувтны. Вой кежлӧ кӧ сувтам — ми вермам пурнымӧс веськыда туй вылас кынтыны. Колӧ водзӧ мунны. Арся вой чӧжӧн ми зэв ылӧ удитам кывтны. Вай ме войбыд кежлӧ ӧтнам сувта вахта вылӧ.

— Кыдзи тэ, Шабуров ёрт, войбыд кежлӧ сувтан вахта вылӧ, кор ӧні на муртса помасис тэнад вахтаыд? — шензигмоз юалӧ капитан.

— Ме удиті нин сёйны и шойччыны, — вочавидзис Василий Иванович, — а асывнас ме зэв дыр узи да, ун оз лок, — пӧръяліс капитанӧс , медым сійӧ эз ӧткажит ӧтнаслы войбыд вахта нуны. Именнӧ ӧтнаслы, а не кыклы. Нуӧдны вой тӧв паныд сап пемыд войын эта ыджда буксир — абу шутка, татшӧм уджӧ оз быдӧн кутчысь. А Василий Ивановичлы буретш сійӧ и колӧ. Сӧмын мед сійӧ вӧлі ӧтнас, некод мед сійӧс эз велӧд ни эз отсав, и некод мед эз велав сы моз нуӧдны буксир татшӧм войяснас. Ӧд мукӧд кӧ тшӧтш велаласны сы моз жӧ авариятӧг войын буксир нуӧдны — сэк Василий Иванович нинӧмӧн оз кут торъявны наысь, кыдзи и вӧрлэдзанінын эз кут торъявны, кор сэні лои уна тысячник.

Капитан бура дыр видзӧдіс Шабуров вылӧ да шензигтырйи думайтіс: «Ме кызь во ветла пароход вылын, кызь во буксир новлӧдла, но татшӧм поводдяӧн пола петны, а тайӧ первой навигация уджалӧ да ньӧти повтӧг медся сьӧкыд уджас пыр кутчысьӧ. И ӧти авария сылӧн эз вӧвлы. Сӧмын мыйлакӧ сійӧ пыр ӧтнас зільӧ сувтны вахта вылӧ».

Капитан ещӧ мӧвпыштіс, мый татшӧм тӧла дырйи зэв сьӧкыд сувтны берег дорӧ, а Шабуровлы позьӧ дӧверитны, босьтчас кӧ — сійӧ вӧчас, абу нин первойысь. И решитіс, мунны войбыд. Штурвал дӧверитіс Шабуровлы.

Штурвал кӧлесаӧ кутчысьӧм бӧрын Василий Ивановичлӧн вӧлі сӧмын ӧти мог: кыдз позьӧ ылӧджык кывтны войнас некытчӧ сибдытӧг ни пур жугӧдтӧг, медым асывнас шемӧсмӧдны не сӧмын капитанӧс а... Став Сӧвет Союз пасьта.

Татшӧм войяс вылас ӧні Василий Ивановичлӧн вӧлі пуктӧма медся бӧръя надея. Тані кӧ оз вермы ӧтличитчыны, тані кӧ, татшӧм войясас оз заслужит награда, мукӧдлаын нинӧм нин оз артмы. Да и мунныс сылы сэсся некытчӧ.

Неважӧн, кор Краснӧй Армиялӧн часьтъяс вуджисны Польша граница вомӧн, медым мездыны белорус да украинец вокъясӧс польскӧй панъяс нартитӧм улысь, Василий Иванович шыӧдчис военкоматӧ, медым сійӧс примитісны Краснӧй Армияӧ да ыстісны рытыввыв граница дорӧ. Но Василий Ивановичлы ӧткажитісны. И ӧткажитісны эз туйтӧм вӧсна. Военком меліа шуис сылы:

— Зэв рад, мый тэ, Василий Иванович, добровольнӧ мунан мездыны белорус да украинец вокъяснымӧс. Но ӧні кежлӧ миян вынным тырмидз. Тэ уджалан зэв колана удж вылын, ньӧти авариятӧг новлӧдлан буксиръяс. Газетъяс серти ме тайӧс тӧда. Ӧні тэ кольччыв на, а кор ковмас — сэк чукӧстам.

Та вылын и помасис сёрниыс. Василий Ивановичлы эз удайтчы мунны Краснӧй Армияӧ. А сэні эськӧ, кыдз вӧлі чайтӧ ачыс, вермис петкӧдлыны и храбрость, и доблесть, и мужество. Сэні эськӧ вермисны наградитны сійӧс Краснӧй Знамя орденӧн либӧ «За отвагу» медальӧн.

Тайӧ мӧвпъясыс дыр гудрасисны Василий Иванович юрын штурвальнӧй рубкасянь читкыра синмӧн сап пемыд войын ва туй корсигӧн.

Дзескыд да сьӧкыдінъясті кывтігӧн, кор пур бӧжсӧ берегӧ личкӧ либӧ лыа вылӧ ляскӧ, тайӧ думъясыс вунлӧны Василий Ивановичлӧн. Сэки сійӧ куш сӧмын пур да пароход йылысь мӧвпалӧ, ассьыс синсӧ моз жӧ видзӧ буксирсӧ, но мыйӧн лючкиджык кутас мунны пурйыс, сылӧн мӧвпъясыс бара важинас воӧны.

Войнас гоз-мӧдысь вылыс палуба вылӧ кайліс капитан. Матыстчылас Шабуров дінӧ, юалас, колӧ-ӧ сылы отсӧг, да ӧтказ пӧлучитӧм бӧрын бӧр лэччас улӧ, сайӧдчас Шабуров син водзысь. Но кузь войбыд сійӧ, то улыс палуба вывсянь, то каюта ӧшиньӧд, видзӧдліс буксирлысь кывтӧмсӧ, быд минут сійӧ вӧлі дась уськӧдчыны Шабуровлы отсӧг вылӧ.

Югдігас, кор тӧлыс лӧнис нин, лоцман вежис Шабуровӧс вахта вылысь. Лоцманкӧд тшӧтш рубкаӧ пырис капитан. Шабуров вылӧ синтырнас меліа видзӧдӧмӧн сійӧ чӧвтіс:

— Но и молодеч тэ, Шабуров ёрт!

Сутки узьтӧг колльӧдӧм бӧрын Василий Иванович лэччис аслас каютаӧ, тэрыба пӧрччысис да нюжӧдчис койка вылӧ морӧс тырыс надеяӧн.

Кӧч ку шапкаа том морт лым пиӧ юждысьӧмӧн, кашкигтырйи, коссӧ веськӧдлытӧг пилитӧ лучкӧвӧй пилаӧн пушкыр юра кыз пожӧм дін. Пилаыс сылӧн зэв надзӧн мӧрччӧ. Ӧти ног и мӧд ног заводитлӧ пилитны, но век неладнӧ артмӧ: то сылӧн сибдӧ, сатшкысьӧ пилаыс, то пуас инмытӧг вольскӧ, то помӧльӧ крукасьӧ.

— Он тай куж пилитныд, Борис, — кыліс мышсяньыс кӧч ку шапкаа вӧрлэдзысь рам гӧлӧс да кыпӧдіс юрсӧ.

— Некутшӧм тӧлк абу тайӧ пилаӧн уджалӧмысь, Василий Иванович. Черӧн унджык вӧча тайӧн дорысь.

— А тэ, Борис, тӧлкӧн пилит, эн тэрмась. Ноко, вешйыв сэсь да видзӧд, кыдзи ме кута пилитны. Велӧдчы.

Василий Иванович весыштіс лымсӧ сувтанінсьыс да гӧрбыльтчис. Сы киын пилаыс быттьӧ ачыс кутіс ветлыны, быттьӧ оз кыз пожӧм сійӧ пилит, а лымйӧд новлӧдлӧ пиласӧ.

Пилитігмозыс Василий Иванович висьталӧ Борислы, кыдзи колӧ кутны пиласӧ, кыдзи асланьӧ кыскыштны, кыдзи мӧдарӧ йӧткыштны, кыдзи кокӧн пыксьыны.

Мыйӧн пушкыра пожӧмыс пурскысис лым пиӧ, Василий Иванович видзӧдліс пила пиньяс вылӧ, чунь помнас видлыштіс да шуис Борислы:

— Пилаыд ныж. Рытнас волы, петкӧдла, кыдзи колӧ кеслыны. А ӧні вай ме дырйи пӧрӧд эсійӧ пусӧ, видзӧдла, кужан он.

Борис тэрмасьӧмӧн муніс пу бердӧ, лӧсьӧдіс сувтан места, зіля заводитіс пилитны Шабуров индалӧм серти.

— Но, вот, — пу пӧрӧм бӧрын долыда шуис Шабуров. — Ещӧ кӧ неуна, и сяммыны кутан. А тэ: «Черӧн унджык вӧча!»

— Ичӧтика гӧгӧрвоны куті. Да эг и мудз тайӧ пусӧ пӧрӧдігӧн, — ошйысис Борис. Сэсся друг юалӧ Шабуровлысь:

— Тэ, Василий Иванович, кымын во инструкторас уджалан?

Шабуров гӧгӧрвотӧмакодь видзӧдіс Борис вылӧ:

— А мыйла тэд колӧ тӧдныс?

— Сідз. Менӧ ӧти инструктор велӧдіс-велӧдіс, да ме сідзи эг и велав, а тэ со ӧтчыд петкӧдлін, да ме гӧгӧрвои нин.

— Инструкторын ме уджала сӧмын на коймӧд тӧлысь. Но ме томысянь вӧрын уджалі, и бӧръя воясас тысяча кубометрысь этша эг вӧчлыв. Сӧмын тулыссянь арӧдзыс эг уджав вӧрын, пароходӧн пур кыскалі. Веськыда кӧ шуны, вӧр уджсьыс ме тулыснас пыр кежлӧ кӧсйи мунны, но, кыдз аддзан, бӧр нин тані.

Василий Иванович, дерт, эз висьтав Борислы, мыйла сійӧ бӧр веськаліс вӧрӧ. Тайӧс весиг гӧтырыслы эз висьтав, шуис сӧмын, мый тӧлын пароход вылын керны нинӧм и колӧ мунны вӧрӧ.

А збыльысьсӧ тадзи вӧлі делӧыс. Пароход вылын уджалігӧн Вась йылысь весиг газетын гижлісны, кыдзи медбур штурвальнӧй йылысь, кодлӧн гожӧмбыдӧн эз вӧв ни ӧти авария. Василий Иванович дзик нин вӧлі чайтӧ асьсӧ наградитіг. И навигация помасигӧн правительство наградитіс уна водникӧс. Сӧмын Василий Ивановичлӧн овыс бара на эз тыдовтчы наградитӧмаяс пӧвстын. Сійӧс сӧмын премируйтісны часіӧн.

Василий Ивановичлы зэв ӧбиднӧ лои. Ӧд сійӧ чорыда вӧлі веритӧ наградитӧмас. И друг сійӧс бокӧ колисны. Василий Ивановичлӧн весиг кынӧм сюмалӧмыс и унмыс воши. Лун-мӧд некодкӧд эз сёрнит, висьӧм улӧ лэдзчысьӧмӧн гортсьыс эз петав. Пыр думайтіс, мыйкӧ вермас оз ещӧ вӧчны, медым пӧлучитны орден. Сэсся ыджыд письмӧ гижис Михаил Ивановичлы, гижис ставсӧ, кыдзи сійӧ уджаліс и кыдзи надейтчис пӧлучитны орден, но письмӧсӧ эз ысты, косявліс. Вась гӧгӧрвоис, мый корӧм серти орденъяс оз сетавны. И сэки жӧ гӧгӧрвоис, мый орден бӧрся вӧтлысьӧмысь некутшӧм тӧлк оз ло.

Тайӧ кадсяньыс вӧлисти дзикӧдз быри Василий Ивановичлӧн орден пӧлучитӧм вылӧ надея. И та йылысь став тӧждысьӧмыс, став мӧвпъясыс, орден корсьӧм могысь мӧд удж вылӧ вуджлӧмыс и ставыс Василий Ивановичлы лои тешкодьӧн, думсьыс серавны кутіс ас вылас, янӧдны асьсӧ, лыддьыны челядь вежӧраӧн. Ӧтчыд сійӧ шуӧ гӧтырыслы:

— А тешкодь жӧ сэтшӧм мортыд, коді куш орден шедӧдӧм вӧсна зільӧ петкӧдлыны асьсӧ?

— Дерт, тешкодь. А коді нӧ сэтшӧмыс? — збыльысь юаліс Татьяна.

Татшӧм юалӧм Вась эз виччысь. Джӧмдалӧмӧн сійӧ вочавидзӧ:

— Ӧти тӧдса морт менам вӧлі пароход вылын, — думсьыс пӧръяліс гӧтырсӧ Василий Иванович да серӧктіс, а сэсся водзӧ висьталіс:

— Сійӧ вӧлі шуӧ, менӧ пӧ, дерт, наградитасны орденӧн. И сійӧ весиг чемоданӧ нин тэчасьліс, медым Москваӧ мунны Калининсянь орден пӧлучитны, — бара серӧктіс Василий Иванович. — А ме сылы шуа, мися, ӧд ордентӧ оз быдӧнлы сетны, а сӧмын — коді заслужитас. Та вылӧ сійӧ дыр нинӧм эз вочавидз. Недель мысти вӧлисти шуӧ: «Тэ збыль шуин, Василий Иванович. Ордентӧ, дерт, быдӧнлы оз сетны. Быдӧнлы кӧ кутасны сетны, сэк сійӧ оз нин ло орден, а прӧстӧй значок лоӧ. Ордентӧ колӧ заслужитны».

Василий Ивановичлӧн, дерт, некутшӧм морт татшӧм тӧдсаыс пароход вылын эз вӧв. Сійӧ ас йывсьыс висьталіс «тӧдса морт» ним улас. Медым небыдика ещӧ серавлыштны ас вылас.

Вӧрас бӧр мунны Василий Иванович решитіс йи кутӧм бӧрын. Некутшӧм мӧвп нин орден йылысь сэсся сы юрӧ эз волыв та бӧрын. Мукӧд вӧрлэдзысьяскӧд тшӧтш сійӧ бара кутіс уджавны лучкӧвӧй пилаӧн да вӧчны ёртъяс дорсьыс куим-нёль мында унджык.

Ӧтчыд Вась дінӧ локтіс леспромхозса директор да шуӧ, лок пӧ тэ стахановскӧй методъясӧн уджалӧм кузя инструкторӧ. Василий Ивановичлы эськӧ зэв неокота вӧлі ӧткажитчыны сюрс кубометр кер вӧчӧмысь, но дыр сёрнитӧм бӧрын сӧгласитчис.

Ставыс тайӧ Василий Ивановичлы уси тӧд вылас пожӧм мыр вылын куритчигтырйи пукалігӧн. Сэк кості Борис удитіс нин гоз-мӧд пу пӧрӧдны.

Василий Иванович тэрмасьӧмӧн чеччис мыр вылысь, бара матыстчис Борис дінӧ, кутіс видзӧдны, кыдзи сійӧ пилитӧ, видыштіс сійӧс, мыйла бара ас ногыс кутӧ пиласӧ, мыйла сулаланінсӧ абу лӧсьӧдӧма колана ногӧн. Сэсся, быттьӧ дӧзмӧмпырысь, шуӧ Борислы:

— Тіянӧс морт ногӧн уджавны велӧдныс сьӧкыдджык сюрс кубометр кер вӧчӧм дорысь.

Борис видзӧдліс Шабуров вылӧ да нюмдігтырйи вочавидзӧ:

— Зато, Василий Иванович, тэ кӧ велӧдан ас мозыд жӧ уджавны сё мортӧс, сэк найӧ ӧтпырйӧ вӧчасны сё сюрс кубометр вӧр.

— Збыль ӧд сідз. А ме та йылысь эг на и мӧвпышты. Кыксё морт кӧ — кык сё сюрс! Но, ладнӧ. Аски ме тэ дінӧ вола, — мунігмозыс нин шуис Шабуров, а ачыс мӧвпыштіс: «Борис — сяма морт. Сылы кӧ ещӧ ӧтчыд петкӧдла — ме дорысь мастер лоӧ. Со Кузьпелев да Пипуныров менӧ панйӧны нин. А Симаков, быттьӧ, вит во нин сюрс кубометрӧн вӧчӧ. Тайӧ делянкаын кӧкъямысдас морт. Джын дорсьыс нин унджыкӧн сетӧны стахановскӧй норма. Ещӧ кӧ недель ола тані, позьӧ мунны нёльӧд нумера делянкаӧ. Сэні кольӧ лун дас. А сэсся выльысь кытшовта став делянкасӧ да позьӧ и мӧд леспромхозӧ вуджны.

Рытӧдзыс Василий Иванович удитіс ещӧ морт даскӧд сёрнитны, индыны, кыдз оз позь уджавны, уналы ещӧ петкӧдліс, кыдзи колӧ уджавны лучковӧй пилаӧн.

Ужын бӧрын вӧрлэдзысьяс чукӧртчисны асланыс клубӧ. Сэні талун Шабуровлӧн доклад: «Кыдзи уджавны лучковӧй пилаӧн».

Клуб сцена вылӧ сувтӧдӧмаӧсь зэв кыз пожӧм краж, быттьӧ зэв ыджыд пожӧм быдмӧма сэтчӧ. Тайӧ кражсӧ пилитӧмӧн Василий Иванович кутас петкӧдлыны лучковӧй пилаӧн уджалӧм.

Клубын то ӧтилаӧ, то мӧдлаӧ кытшӧн-кытшӧн пуксялӧмаӧсь вӧрлэдзысьяс, варовитӧны ас костаныс, ӧта-мӧд вежмысьт висьталӧны, коді уна-ӧ талун вӧчӧма кер, коді кымын кубометр кыскӧма.

— Ме талун дас кубометрӧ тыри, — радпырысь шуӧ олӧмакодь вӧрлэдзысь. — Та мындасӧ нэмӧн на эг вӧчлыв. Пыр вӧлі муртса ӧти норма тырӧ, да и то сьӧкыда. А талун вот дас кубометр, и мудзӧм оз тӧдчы.

— Мыйкӧ тай дас кубометрыд, аддзӧмыд мыйӧн ошйысьны, — торкис томиник ныв. — Ме талун нёль норма кыски делянка дінӧдз.

Вӧрлэдзысь дӧзмыштіс нывка вылӧ.

— Ме ньӧти ог ошйысь, а висьтала. Тэ первой кывзы да вӧлисьт...

Но нывка эз кут кывзыны. Сцена дінысь сійӧ казяліс том йӧзӧс да весасис на дінӧ.

А вӧрлэдзысьлы окота висьтасьны, кыдзи сылӧн артмис дас кубометрыс. Ки мышнас сійӧ вӧрзьӧдыштіс орчча пукалысьсӧ:

— Тӧдан, Гриш, кыдзи тайӧ лои?

— Шабуров, кӧнкӧ, ышӧдіс тэнӧ та вылӧ, менӧ моз жӧ.

— Збыль ышӧдіс. Ме первойсӧ эг верит сылы, весиг скӧрми. А лои со кыдз. Ме вӧлі буретш ыджыд пожӧм пӧрӧда. Друг мышкын кодкӧ шуӧ: «Он тай куж уджавныд!» Менӧ сотыштісны тайӧ кывъясыс. Видзӧдлі бӧрвылӧ... Сулалӧ том морт, видзӧдӧ ме вылӧ. Киас — пила, тайӧ лучковӧй пилаыд. Ачыс вашъялӧ. А ме ещӧ ёнджыка скӧрми, мися, локтӧма велӧдны менӧ. Кыдз нӧ, думайта, тэ менӧ велӧдан, ӧд кор ме заводиті кер дорас уджавны, тэнӧ сэк зыбкаын на гычӧдісны. Сэсся ме скӧра шуа сылы, мися, мун весась, абу на кӧ сёр. А сійӧ бара вашъялӧ: кытчӧдз пӧ, шуӧ, он велав уджавны, ог мун тэ дінысь. Но, думайта, и сибдіс тайӧ ме дінӧ. А сійӧ бара: вешйы пӧ, шуӧ, пу дінсьыс да видзӧд. Ме и вешйи, но ог на гӧгӧрво. А сійӧ (тэ, дерт, гӧгӧрвоан, мый ме Шабуров йылысь висьтала), сійӧ локтіс пу бокӧ, гӧрбыльтчис, лэптыштіс пиласӧ да ещӧ тшӧктіс... Збыль тшӧктіс... Сэсся и шуис чорыда: «Видзӧд!» Ме кӧсйи на сыкӧд вензьыны, коланаджык, ёсьджык кывъяс бӧрйыны куті, а сэк кості, видзӧда, пилаыс пу джынйӧдзыс нин мӧрччис. Кӧсйи шуны, мися, сулав, кыдз нӧ сідз, а сійӧ мем горӧдіс: «Вешйы, мед пу улас он сюр!» Пожӧм пурскысис лым пиӧ. А сійӧ, Шабуровыд, шуӧ: «Но мый? Аддзылін?» «Аддзылі», — шуа воча. А аддзылін кӧ пӧ, вай сэсся ачыд! Кутан пӧ кык мында вӧчны и кык мында удждонтӧ босьтны. Со тасянь и заводитчис. Ӧні со дас кубометрӧ нин вои, а недель мысти, гашкӧ, и дас вит лоӧ. Тайӧс гӧгӧрвоны колӧ. А эсійӧ, — юрнас ӧвтыштіс нывкалань, — шуӧ, ошйысян пӧ.

Сэк сцена вылын звӧнитісны. Варов вӧрлэдзысь вӧлі мышкӧн пукалӧ да тэрмасьӧмӧн бергӧдчис сценалань банӧн. А сэні, кыз пожӧм краж дінын, сулалӧ Шабуров, сідз жӧ вашъялӧ да киас пила кутӧ, кыдзи первойысь аддзис сійӧс варов вӧрлэдзысь.

Василий Иванович лампа би водзын видзӧдліс пила пиньяс вылӧ да чунь помъяснас небыдика видлалігтырйи шуис, кор сылы сетісны кыв доклад вӧчны:

— Ме, другъяс, докладтӧ эг на вӧчлыв дай ӧні ог вӧч. Ме кер вӧчны кужа, а доклад вӧчны ог. Ме, колӧкӧ, тіянлы висьтала, кыдзи колӧ кер пӧрӧдны медрегыд кадӧн, медым лунтырӧн унджык вӧчны. А докладтӧ нинӧм вылӧ ог вӧч, лучшӧ эн корӧй.

Василий Иванович заводитіс висьтавны, кыдзи колӧ пила кеслыны, мед лои лэчыд, кыдзи видзны пиласӧ, кыдзи кутны сійӧс, кыдзи пилитны. И ставсӧ петкӧдліс. Висьталігмозыс сійӧ уна пельӧ вундаліс сцена вылысь пожӧм кражсӧ. Кык-куим мортӧс чукӧстліс сцена вылӧ, тшӧктіс и найӧс пилитны кражсӧ аслас индалӧм серти.

* * *

Татьяна гусьӧнмоз чеччис да пасьтасис, медым не садьмӧдны мудз вывсьыс чӧскыда узьысь мужиксӧ, кӧть кадыс и эз нин вӧв водз. Гынсапӧга кокнас небыдика тапиктӧмӧн петіс кухняӧ лӧсьӧдны завтрак. Примус вылӧ пуктіс чайник, а керосин вылын кутіс жаритны яй.

Друг пондісны йигӧдчыны кильчӧ ӧдзӧсӧ. Татьяна думыштіс, мый тайӧ, гашкӧ, локтӧны Васьӧс собрание вылӧ корны либӧ прӧста аддзысьлыны кодкӧ вӧзйысьӧ, да эз вӧрзьы местасьыс, быттьӧ эз кыв йигӧдчӧмсӧ. Но ӧдзӧсӧ кутісны ёнджыка зӧрӧдны. Медым Василий Иванович эз садьмы, Татьяна зіля котӧртіс ӧдзӧс дорӧ, бергӧдіс йигансӧ.

Ӧдзӧс сайсянь газет мыччигмоз письмоносец гажаа юаліс:

— Василий Иванович гортын?

Татьяна кӧсйис ылӧдны, мый мужикыс эз на во, но недыр чӧв олӧм мысти веськыда шуис:

— Узьӧ. Войнас сӧмын вӧрысь воис. А мый нӧ, заказнӧй письмӧ эм?

Письмӧ новлӧдлысь пыр жӧ жугыльмис. Бокӧ видзӧдӧмӧн сійӧ нурбыльтіс:

— Абу заказнӧй... Ме ачым кӧсйи сетны, — газетсӧ пыр на киас кутіг шуис сійӧ воча. — Шуан, узьӧ... Мудзӧма.

Сэсся письмӧ новлӧдлысь лэптыштіс юрсӧ да нимкодя шӧпкӧдіс Татьяналы:

— Мед нӧ шойччӧ, ог садьмӧд. Но тэ, смотри, висьтав сылы, мый ме сійӧс став сьӧлӧмсянь чолӧмала. Эн вунӧд!

Татьяна гӧгӧрвотӧма видзӧдліс сы вылӧ.

Письмӧ новлӧдлысь газетсӧ паськӧдӧмӧн мыччис Татьяналы да чуньнас индӧмӧн аслыс моз чӧвтіс:

— Шуда и морт тэнад мужикыд... Тэ тшӧтш и...

Татьяна видзӧдліс чуньӧн чуткӧминӧ. Лыддис: «Шабурова Василия Ивановича, инструктора стахановских методов работы на лесозаготовках...»

Эз помӧдз лыддьы. Видзӧдліс вылӧджык, а сэні гырысь шыпасъясӧн печатайтӧма:

«УКАЗ Президиума Верховного Совета СССР...»

Бара улӧджык чеччыштіс синъяснас: «За выдающиеся заслуги... наградить орденом Ленина:

...Шабурова Василия Ивановича», — косталӧмӧн лыддис Татьяна. Сэсся лыддис Указсӧ ставнас да вӧлисти гӧгӧрвоис... Морӧсыс нимкодьӧн тыри. Сійӧ кӧсйис кутлыны да окыштны татшӧм юӧр вайысь письмоносецӧс, но мӧдыс важӧн нин мунӧма, Татьяна эз и тӧдлы.

Бура дыр Татьяна видзӧдіс газет вылӧ. Сэсся котӧрӧн пырис комнатаӧ, газетсӧ вылӧ лэптӧмӧн. Окалігтырйи садьмӧдіс мужиксӧ:

— Вась... Васюк!..

Василий Иванович зілис бергӧдчыны мышкӧн, но Татьяна мырдӧн садьмӧдіс:

— Вась... Со... лыддьы зіля...

Унзіль пырысь Василий Иванович видзӧдліс газет вылӧ. Сэсся друг тэрыба кутіс лапйӧдлыны синъяснас, тільыштас кулакъяснас да бара лапйӧдлӧ. Одеяла вештыштігмоз ӧдйӧ пуксис, ещӧ лыддис, видзӧдліс гӧтыр вылас. Татьяна гӧгӧрвоис сылысь нинӧм шутӧг юалӧмсӧ да нимкодя, тӧкӧтьӧ оз йӧкты, вочавидзис челядьмоз:

— Збыль, Васюк, збыль... Письмӧ новлӧдлысь чолӧмалӧ и...

Радысла Василий Ивановичлӧн гӧрддзасис горш діныс, синъясыс тырины нимкодь синваӧн, водзӧ сэсся ӧти кыв шуны эз вермы.