ӦТУВЪЯ ЛАВКАЯС ЁНМӦДАН ТӦЛЫСЬ

Став Коми му пасьта локтан тӧлысьӧ коми уджалысь йӧз пондасны шуны ассьыныс кыв ӧтувъя лавкаяс (Епо) ёнмӧдӧм йылысь. Быд уджалысь морт локтан тӧлысьӧ быд боксянь видзӧдлас, кыдзи ловзьӧ да кыптӧ сылӧн ӧтувъя лавкаыс. Быд морт видзӧдлас, ӧнӧдз мый вӧчӧма да водзӧ мый ковмас на вӧчны. Ыджыд зэв тайӧ уджыс. Ковмас зіля зэв гӧгӧр артыштны. Ӧнӧдз эз на, дерт, та йылысь быд морт кыдзи колӧ мӧвпышт, эз на видзӧдлы бурджыка, мый керсьӧ гӧгӧрыс. Ӧтувъя лавкаяс ёнмӧдӧм кузя зэв на вӧчӧма этша. Уна на колӧ вӧчны. Локтан тӧлысь тайӧ уджыс мунны кутас.

Медводз колӧ дум вылӧ уськӧдны кооперация йылысь Ленинлысь шуӧмсӧ. Югыдлань выль туй сійӧ тшӧктӧм-велӧдӧм серти вӧчнытӧ колӧ. Ӧтувтӧм вылӧ ёнджыка видзӧдлыны колӧ. Уна-ӧ, ёна-ӧ ӧнӧдз миян ӧтувтчӧмаӧсь ӧтувъя кооператив лавкаясӧ? Зэв на этша. Тайӧ тӧлысьын колӧ став уджалысь йӧзлы пырны ӧтувъя лавкаӧ, ставыслы тырӧдз пуктыны пайсӧ. Ёнмӧдны, кыпӧдны вывланьӧ, сувтӧдны кок йылӧ, озырмӧдны сьӧмӧн да отсӧгӧн колӧ ӧтувъя лавкаяс.

Ньӧбасьӧм-вузасьӧм бурджыка лӧсьӧдӧм йылысь, ӧтувтчӧм йӧз дорӧ тӧваръяс матыстӧм йылысь, уджалысь сьӧкыд оландырсӧ кокньӧдӧм-югдӧдӧм кузя ёнджыка ковмас сёрнитны.

Уджалысь йӧз дор сулалысь йӧзӧс удж вылӧ лавкаӧ бӧрйӧм понда, бура гӧгӧрвоана уджалысьясӧс лавкаӧ пуктӧм понда сідзи жӧ зіля колӧ артавны быд боксянь. Ӧнісянь быд кооперативӧ пуксьӧдны колӧ прамӧй йӧзӧс. Купечӧс-озырӧс вӧтлыны колӧ быд лавкаысь — мед дукыс эз вӧв, наысь бурыд оз ло, найӧс сибӧдӧмлы ӧтувъя лавка удж дорӧ ӧнісянь колӧ пуктыны пом, дай аслыным сы ордӧ мунны оз ков.

Быдлаті водзвыв бурджыка видзӧдлыны колӧ, радейтны ӧтувъя лавкаӧс ассьыным, ӧтув ставнымлы веськӧдны сійӧс бур туй вылӧ, мед сійӧ венас купечӧс да отсалас йӧзлы выль олӧмлань воны.

Кутчысьӧй, коми йӧз, ӧтувъя лавкаӧ ставныд!

Ёнмӧдӧй, отсалӧй ӧтувъя лавкалы — ӧтувтӧй уджнытӧ-сьӧмнытӧ сэтчӧ. Сэки кокниджык лоӧ аслыныд, югыдджык лоӧ олӧмныд.